Mathiơ 24

Yàng Jesu yal lài bơta tơrlah tơrlơm Jerusalem

(Mak 13:1-2; Luka 21:5-6)

1Tòm tŭ Yàng Jesu lik bơh hìu duh khoai, ală cau bơtê tus rềp sơnio Kơnràñ in ală broă bơt bơtào hìu duh khoai dê. 2Kơnràñ đơs lah: “Bol mê gŏ jơh ală bơta hơ̆ sơl? Di ngan Añ đơs mơ bol mê, rơp ò gơs pơnai lŭ lơi ơm hơđang pơnai lŭ ndai tòm tiah do mơ ò gơtìp tơrlơm.”

Kalke mơ kup kơryan

(Mak 13:3-13; Luka 21:7-19)

3Tòm tŭ Kơnràñ nggui hơđang mơnơm Ôlibe, ală cau bơtê tus lùp is Kơnràñ lah: “Dan yal bol hi in git tŭ lơi rơp gơs ală bơta hơ̆, mơ rơp gơs tềl sơnio lơi bơh bơta tus wơl Kơnràñ dê mơ ngai lồi dut rài do dê taih?” 4Yàng Jesu ho lah: “Kơrhia tĕ, bañ lòi cau pơrlồm bol mê. 5Bơh gơs oă cau rơp ai sơnđan Añ tus mơ đơs lah: ‘Añ la Bơtau Krist,’ mơ rơp pơrlồm lơh oă cau in tìs nrah. 6Bol mê rơp kơno bơh kơlìn mơ jơnau pơnro bơh kơlìn. Kơrmap gàr tĕ, bañ dơrcul, bơh ală bơta hơ̆ pal gơlik tus mơya hơ̆ òhềt la lồi dut ò. 7Bơh làng bol do rơp bơtào tòmsò mơ làng bol ne, lơgar do tòmlơh mơ lơgar ndai. Oă tiah rơp gơs jơgloh rung mơ tơrlơm ù. 8Mơya jơh ală bơta hơ̆ mìng la bồ dà bơta jê sồt be cau jê deh. 9#Mat 10:22.Tŭ hơ̆ cau rơp tơmut bol mê tòm bơta rung rài mơ tơnchơt; bol mê rơp kong jơh ală làng bol gơjrañ kơuềng bơh sơnđan Añ.

10Tŭ hơ̆ gơs oă cau rơp gơtup tìs, pơrlơ̆ dră bal mơ gơp, mơ gơjrañ kơuềng bal. 11Oă cau gơnoar hwơr ma blac rơp tơlik să mơ pơrlồm oă cau. 12Mơ tài bơh bơta tồi glài iơh bơsak rơp gơbơtơl oă, gen bơta kòñ gơboh oă cau dê rơp huc ngềt. 13#Mat 10:22.Mơya cau lơi kơ̆ nùs jơl tus di lồi dut gen rơp geh dong klàs. 14Jơnau Niam bơh lơgar Yàng Tom Trồ rơp geh bơto yal làm jơh dunnia, tồ lơh cơng jơh ală làng bol in; tŭ hơ̆ bơta lồi dut rơp tus.”

Bơta rngòt rngơt dờng

(Mak 13:14-23; Luka 21:20-24)

15 # Dan 9:27; 11:31; 12:11. “Behơ̆ tòm tŭ bol mê gŏ bơta ngkòr ngkàc lơh gơprah gơpring Tiah Sàng Goh in, be cau gơnoar hwơr Daniel neh đơs, (cau lơi sền, wă tĕ), 16tŭ hơ̆ cau lơi ơm tòm Jude dô tĕ hơđang mơnơm; 17#Luk 17:31.cau lơi ơm hơđang rkàng hìu bañ mù pơrdô phan lơi bơh tòm hìu, 18ai cau lơi ơm tòm ƀlàng sre bañ rê ai ào bơdìh. 19Tòm ală ngai hơ̆ bòl glar cau bun in mơ cau gơs kòn pô in! 20Hòi dan tĕ nàng bơta dô bol mê dê ò di di kơnhai mrềt hala ngai Saƀat. 21#Dan 12:1; Yalt 7:14.Bơh tŭ hơ̆ rơp gơs bơta rung rài dờng, tian gơs bơh tŭ crơng gơs jơl tus di tŭ do òhềt gơs, mơ kung rơp ò tŭ lơi gơs behơ̆. 22Dilah ală ngai hơ̆ ò gơtơnhuc, gen ò gơs kòn mơnus lơi geh dong klàs; mơya tài bơh ală cau geh sac rwah gen ală ngai hơ̆ rơp gơtơnhuc.

23Tŭ hơ̆ dilah gơs cau lơi đơs mơ bol mê lah: ‘Do, Bơtau Krist ơm tềng do,’ hala, ‘Tềng hơ̆,’ gen bañ dòn. 24Bơh rơp gơs ală krist ma blac mơ ală cau gơnoar hwơr ma blac tơlik să mơ lơh gơlik oă bơta tềl krơi is dờng, tian gơs dilah rgơi gen kung pơrlồm ală cau geh sac rwah sơl. 25Do Añ neh yal lài bol mê in rau. 26#Luk 17:23-24.Behơ̆ dilah gơs cau đơs mơ bol mê lah: ‘Ne, Kơnràñ ơm tòm ƀlàng bràs,’ gen bañ lik; ‘Ne, Kơnràñ ơm tòm ơdŭ hìu,’ gen bañ dòn. 27Tài bơh kung be puhlèp bơh đah mattơngai lik àng gơcrà tus hơ đah mattơngai mut be lơi, gen Kòn Mơnus tus wơl kung rơp behơ̆ sơl.

28 # Luk 17:37. Ƀồc chơt tiah lơi, gen ală klàng rơp ơñùm tềng hơ̆.”

Bơta tus wơl Kòn Mơnus dê

(Mak 13:24-27; Luka 21:25-28)

29 # Esai 13:10; 34:4; Ejek 32:7; Jôel 2:10,31; 3:15; Yalt 6:12-13. “Tơnơ̆ mơ ală ngai rung rài, gen tŭ hơ̆ mo mattơngai gơlik klam jơngo, kơnhai ò àng tai, ală sơmañ bơh đang trồ dùh, mơ ală gơnoar trồ gơlơnggơr. 30#Dan 7:13; Sac 12:10-14; Yalt 1:7.Tŭ hơ̆ tềl sơnio Kòn Mơnus dê rơp gơtơlik hơđang trồ, jơh ală jơi bơtiàn tòm ù rơp tur ntơh ñìm rac, mơ gŏ Kòn Mơnus ai gơnap gơnoar mơ bơta gơklŏ dờng ơm hơđang mhwal trồ mơ tus. 31Kơnràñ rơp sồr ală cau gơnrơh Kơnràñ dê lòt uh kơlwòk ntas dờng ngan mơ pơjum ală cau geh sac rwah Kơnràñ dê bơh tòm poan đah, bơh jơng trồ do tus hơ jơng trồ ne.”

Bơta bơtê bơh chi ƀal

(Mak 13:28-31; Luka 21:29-33)

32“Do, bơtê tĕ bơh chi ƀal. Tòm tŭ ntê sơmbut nha gơcat, gen bol mê git kơnhai duh mòr tus. 33Kung behơ̆ sơl, tòm tŭ bol mê gŏ jơh ală broă hơ̆, git tĕ lah Kòn Mơnus mòr tus, gam ơm di đap mpồng. 34Di ngan Añ đơs mơ bol mê, jơi bơtiàn do ò lòt rlau jơl tus di tŭ jơh ală bơta hơ̆ gơlik gơs rau. 35Trồ tiah rơp roh mơya jơnau đơs Añ jê ò gơs tŭ lơi roh ò.”

Ngai Yàng rê wơl ò gơs cau lơi git

(Mak 13:31-37; Luka 17:26-30, 34-36)

36“Bơh ngai mơ jơ hơ̆ gen ò gơs cau lơi git, bulah cau gơnrơh hơđang trồ hala Kòn kung ò git sơl,#24:36 Gơs dô êt sră yau ò gơs sèng: hala kòn kung behơ̆ sơl. mơya mìng Bèp lơm git. 37#Sơnròp 6:5-8.Tòm rài Nôe be lơi, gen Kòn Mơnus tus wơl kung rơp behơ̆ sơl. 38Be tòm ală ngai lài mơ dà kŏ, cau kư̆ ñô sa, lap klau tòmbau ùr tus di ngai Nôe mut tòm ơhò, 39#Sơnròp 7:6-24.mơ ò git bơta lơi jơl tus di tŭ dà kŏ tus pơrdô jơh tơl nă; tòm tŭ Kòn Mơnus tus wơl kung rơp behơ̆ sơl.

40Tŭ hơ̆ gơs bàr nă cau klau ơm tòm ƀlàng sre; dô nă geh cèng lòt, ai dô nă gơkòl lòi wơl; 41Gơs bàr nă cau ùr piah di mpal; dô nă geh cèng lòt, ai dô nă gơkòl lòi wơl. 42Behơ̆ drơng kơp tĕ, bơh bol mê ò git ngai lơi Yàng he tus.

43 # Luk 12:39-40. Mơya git tĕ bơta do, dilah cau tòm hìu neh git jơ drơng lơi cau kơñau tus, gen drơng kơp ò lòi khai tò ƀlong hìu he. 44Behơ̆ gen bol mê kung pal rcang kơp tĕ, bơh Kòn mơnus tus tòm jơ bol mê ò kơlôi.”

Cau dĭ dòn song hala ò dòn song

(Luka 12:41-48)

45“Ñcau la dĭ dòn song mơ jak chài, mơ cau tòm bơtào khai sền gàr ală cau tòm hìu, nàng tòmpà phan sa bol khai in di di jơ taih? 46Lơngai cau dĭ hơ̆ in, tòm tŭ cau tòm tus gŏ khai lơh behơ̆. 47Di ngan Añ đơs mơ bol mê, cau tòm rơp bơtào cau hơ̆ sền gàr jơh ală phan mơna khai dê. 48Mơya dilah cau dĭ iơh bơsak ne đơs òm tòm nùs lah: ‘Cau tòm añ jê òbat tus,’ 49gen pù lơh ală cau bơyô lơh broă bal, ñô sa mơ ală cau bơñul lơmbè, 50gen cau tòm khai rơp tus tòm ngai khai ò kơlôi mơ tòm jơ khai ò git. 51Cau tòm rơp pù tac poac#24:51 Rct: Hala tơcoh khai rpot rpet. khai mơ tơmut khai bal mơ cau ma blac. Tềng hơ̆ rơp gơs ñìm rac mơ rkiat sề.”

Currently Selected:

Mathiơ 24: KPM2018

Highlight

Copy