Mathiơ 23

Yàng Jesu lah pơrhơng cau Pharisi

(Mak 12:28-34; Luka 10:25-28)

1Tŭ hơ̆ Yàng Jesu đơs mơ mpồl làng bol mơ ală cau bơtê lah: 2“Ală cau bơto bơta boh lam mơ cau Pharisi nggui hơđang cơnòng Môise dê. 3Behơ̆ prap gàr mơ lơh jat tĕ jơh ală bơta bol khai sồr, mơya bañ đòm broă bol khai lơh, bơh bol khai đơs mơ ò lơh. 4Bol khai kơt mơ dap ală phan àñ kơnjơ̆ hơđang pơnì cau; mơya să tòm bol khai ò bài ƀư mơ ràs tê. 5#Mat 6:1; Yalw 6:8; Khà 15:38.Jơh ală broă bol khai lơh la nàng cau in sền gŏ, bơh bol khai wan gơltau bơta boh lam ơnàng mơ pơnhwài jòng tiang ào,#23:5 Ală mbrùi ào do lơh tềl sơnio bơta ơn is Yàng Tom Trồ in (sền Khà 15:37-41). 6kòñ nggui tiah màng ryŭ tòm bơta ñô sa, mơ nggui cơnòng hơđap tòm hìu jum, 7kòñ gơs cau lùp còp să tòm gùl drà, mơ kòñ gơs cau sơnđan he la Rabi. 8Mơya bol mê bañ lòi cau sơnđan bol mê la Rabi, bơh bol mê gơs mìng dô Bơtau la Cau Bơto, ai jơh ală bol mê la oh mi. 9Kung bañ sơnđan cau lơi tòm ù la bèp, bơh bol mê gơs mìng dô nă Bèp la Bơtau ơm hơđang trồ. 10Kung bañ lòi cau sơnđan bol mê la cau tòm, bơh bol mê gơs mìng dô nă Cau tòm hơ̆ la Bơtau Krist. 11#Mat 20:26-27; Mak 9:35; 10:43-44; Luk 22:26.Mơya cau dờng rlau tòm bol mê rơp lơh gơs cau duh broă bol mê. 12#Luk 14:11; 18:14.Dilah cau lơi yò tơngguh is să he gen rơp gơtơmù, ai cau tơnliah is să he gen rơp geh yò tơngguh.”

Yàng Jesu lơh nền glài bơta ma blac

(Mak 12:40; Luka 11:39-42, 44, 52; 20:47)

13“Bòl glar bol mê in, cau bơto bơta boh lam mơ cau Pharisi, la cau ma blac! Tài bơh bol mê til mpồng lơgar đang trồ di đap cau; să tòm bol mê ò bài mut mơ cau lơi kòñ mut gen bol mê kung ò ai. [ 14Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê lơh bơthĭ hòi dan jòng jơnau mơ sa loan hìu ală cau ùr bơnrau dê; tài bơh hơ̆ bol mê rơp gơkòl lơh nền glài kơnjơ̆ rlau.]#23:14 Gơs dô êt sră cih tê yau ò gơs sèng 14.

15Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê lòt làm dàlềng làm ù nàng lam dô nă cau mut tòm gùng duh khoai; dơ̆ khai mut rau, gen bol mê lơh khai in gơlik kòn sau brah tìng bàr dơ̆ rlau mơ bol mê.

16Bòl glar bol mê in, ală cau jơngo lam gùng mơ đơs lah: ‘Dilah cau lơi sơnio hìu duh khoai mơ srat să, gen ò gơs bơta lơi, mơ dilah cau lơi sơnio màh hìu duh khoai dê mơ srat să, gen khai gơkòl kơt.’ 17Ơ cau bơrngơl gơla mơ jơngo! Phan lơi la màng rlau, màh hala hìu duh khoai lơh màh in gơlik gơs sàng goh taih? 18Mơ bol mê đơs lah: ‘Dilah cau lơi sơnio cơnòng duh khoai mơ srat să, gen ò gơs bơta lơi, mơ dilah cau lơi sơnio phan ơn hơđang hơ̆ mơ srat să, gen khai gơkòl kơt.’ 19Ơ cau jơngo ne! Phan lơi la màng rlau, phan ơn hala cơnòng duh khoai lơh phan ơn in gơlik gơs sàng goh taih? 20Behơ̆ cau lơi sơnio cơnòng duh khoai mơ srat să, hơ̆ la sơnio cơnòng duh khoai mơ ală phan hơđang hơ̆ mơ srat să. 21Cau lơi sơnio hìu duh khoai mơ srat să, hơ̆ la sơnio hìu duh khoai mơ Bơtau ơm tòm hơ̆ mơ srat să. 22#Esai 66:1; Mat 5:34.Ai cau lơi sơnio trồ mơ srat să, hơ̆ la sơnio sơbàn Yàng Tom Trồ mơ Bơtau nggui hơđang hơ̆ mơ srat să.

23 # Leb 27:30. Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê ơn pơnah jơt tòm biap trau, biap ƀô mơ biap krồng, mơ sang lòi bơta dờng màng rlau tòm bơta boh lam, la bơta song ring bơta kòñ nđàc, mơ bơta dòn. Ală bơta do bol mê pal lơh, mơ kung ò di lơh ñhòt ală bơta ne sơl. 24Ơ cau jơngo mơ lam gùng, bol mê kơnềng sơmềt mơ loan làkđa!

25Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê rào đah bơdìh mơngàn mơ prềng, mơya tòm dơlam gen bềng bơta sa kwà mơ bơta pròng preh. 26Ơ cau Pharisi jơngo ne! Lài ngan rào tĕ tòm dơlam mơngàn mơ prềng, gen đah bơdìh kung goh sơl.

27 # Broă 23:3. Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê be bơtô ƀồc pih#23:27 Cil: bong. cùr bò, đah bơdìh hàng mơnĕ, mơya tòm dơlam bềng ntìng cau chơt mơ jơh ală bơta ƀơ̆ ƀơl. 28Kung behơ̆ sơl cau sền đah bơdìh bol mê be song ring, mơya tòm dơlam bềng bơta ma blac mơ bơta tồi glài iơh bơsak.”

Yàng Jesu yal lài bơta lơh glài

(Luka 1:47-51)

29“Bòl glar bol mê in, cau bơto bơta boh lam mơ cau Pharisi, la cau ma blac! Bơh bol mê bơt bơtào bơtô ƀồc ală cau gơnoar hwơr dê, lơh hàng mơnĕ bơtô ƀồc ală cau song ring dê, 30mơ đơs lah: ‘Dilah bol he neh kis tòm rài ồng pàng, gen bol he ò gơs pơnah mơ bol khai lơh gơhòr mhàm ală cau gơnoar hwơr dê.’ 31Behơ̆ bol mê lơh cơng is să tòm he in lah bol mê la kòn sau ală cau neh tơnchơt ală cau gơnoar hwơr. 32Gen lơh tĕ bềng lìu rnoas tồi glài ồng pàng bol mê dê. 33#Mat 3:7; 12:34; Luk 3:7.Ơ jơi bơs, jơi bơtiàn bơs tur ne, mbe bol mê geh klàs di bơta lơh glài brah tìng dê taih?

34Gen tàng, Añ sồr ală cau gơnoar hwơr, ală cau jak chài, mơ ală cau bơto bơta boh lam tus hơ bol mê; gen cau ƀà bol mê rơp tơnchơt mơ pơng hơđang chi pơng, cau ndai bol mê rơp pù lơh tòm hìu jum, mơ kup kơryan bol khai bơh ƀòn dờng do tus ƀòn dờng ne. 35#Sơnròp 4:8; II Yal 24:20-21.Tồ jơh ală mhàm cau song ring neh gơhòr hơđang ù gơtuh hơđang bol mê, bơh mhàm Abel la cau song ring, tus dê mhàm Sacari kòn Baraci dê mơ bol mê neh tơnchơt digùl Tiah Sàng Goh mơ cơnòng duh khoai. 36Di ngan Añ đơs mơ bol mê, jơh ală bơta hơ̆ rơp gơlik tus hơđang jơi bơtiàn do.”

Jơnau pơt wòl Jerusalem in

(Luka 13:34-35)

37“Ơ Jerusalem, Jerusalem, mê tơnchơt ală cau gơnoar hwơr mơ cơm lŭ di ală cau kong sồr lòt tus hơ mê! Oă dơ̆ Añ kòñ pơjum tơrgòm ală kòn sau mê, be iar me ngkrok ală kòn gơ, tus ơm hơđơm đar gơ dê, mơya bol mê ò bài! 38#Jer 22:5.Do, hìu bol mê rơp gơkòl lòi srau gòi. 39#Đơs Crih 118:26.Bơh Añ đơs mơ bol mê, bơh do jơl hìng nau bol mê rơp ò gŏ Añ tai jơl tus di tŭ bol mê rơp đơs lah: ‘Lơngai Bơtau ai sơnđan Yàng mơ tus.’”

Currently Selected:

Mathiơ 23: KPM2018

Highlight

Copy