Mathiơ 22

Pơnyơu bơh bơta yò sa tòmbau

(Luka 14:15-24)

1Yàng Jesu đơs pơnyơu tai mơ bol khai lah: 2“Lơgar đang trồ kung be dô nă cau bơtau ne lơh dô bơta yò sa tòmbau kòn klau khai in. 3Bơtau sồr ală cau dĭ lòt hòi ală cau neh geh jà tus sa tòmbau, mơya bol khai ò bài tus. 4Bơtau sồr tai ală cau dĭ ndai mơ nting lah: ‘Đơs tĕ mơ cau neh geh jà lah: Do añ neh rcang sir phan sa rau, kơnrồ mơ phan poan jơng lơmă neh lơh poac rau. Jơh ală bơta neh sir rau. Tus tĕ sa tòmbau.’ 5Mơya bol khai sền ò ơn nùs di jơnau hòi jà mơ kư̆ lòt gùng is; cau do lòt tòm sre, cau ne lòt kă bro. 6Ai cau ndai kup cau dĭ cau bơtau dê, bơtat bơtròh#22:6 Cil: bơtat tơmbe. mơ tơnchơt. 7Cau bơtau gơhào gơjrañ, gen sồr ală cau ling lòt tơnroh ală cau tơnchơt cau hơ̆, mơ chu ƀòn dờng bol khai dê. 8Chòp cau bơtau đơs mơ ală cau dĭ khai dê lah: ‘Bơta sa tòmbau neh lơh sir rau, mơya ală cau neh geh jà hơ̆ ò gơs cau lơi di pal. 9Behơ̆ lòt tĕ tus di ală jum gùng, dilah tìp cau lơi gen jà jơh tus sa tòmbau.’ 10Ală cau dĭ lòt làm ală gùng me pơjum jơh ală cau bol khai tìp, cau iơh bal mơ cau niam, behơ̆ ơdŭ sa tòmbau bềng cau nac.

11Cau bơtau mut sền ală cau nac mơ gŏ dô nă cau ò soh ào pơjum sa tòmbau, 12gen đơs mơ khai lah: ‘Ơ bi, mbe lơh mê ò soh ào pơjum sa tòmbau mơ rgơi mut tềng do taih?’ Cau hơ̆ ò gơ ai đơs. 13#Mat 8:12; 25:30; Luk 13:28.Gen cau bơtau sồr ală cau duh broă lah: ‘Cap tĕ tê jơng khai mơ sơrbì khai tòm tiah klam jơngo hơ bơdìh, la tiah rơp gơs ñìm rac mơ rkiat sề.’ 14Bơh gơs oă cau geh hòi, mơya dô êt geh sac rwah.”

Bơta boh dia Sesa in

(Mak 12:13-17; Luka 20:20-26)

15Tŭ hơ̆ ală cau Pharisi lik lòt, tòmbơyai bal nàng jòi kup tòm jơnau đơs Yàng Jesu dê. 16Bol khai sồr ală cau bơtê bol khai dê, bal mơ bơnòr cau Herôt tus đơs mơ Kơnràñ lah: “Ơ Cau Bơto, bol hi git ồng la cau song mơ bơto gùng Yàng Tom Trồ dê dô bă song ngan, ò cah is di cau lơi, bơh ồng ò sền đah bơdìh cau dê. 17Behơ̆ dan yal bol hi in git, ồng kơlôi mbe lơi: Bơta boh dia Sesa#22:17 Cau Rôma sơnđan bơtau bol khai dê la Sesa. in dimơ bơta boh lam hala ò?” 18Mơya Yàng Jesu git nùs iơh bơsak bol khai dê gen đơs lah: “Ơ ală cau ma blac, ñchi bơh tài bol mê lòng Añ taih? 19Ai tĕ Añ in sền priă boh dia.” Bol khai ai dô dơnie Kơnràñ in. 20Kơnràñ lùp lah: “Rùp mơ sơnđan do la ñcau dê taih?” 21Bol khai ho lah: “Sesa dê.” Gen Kơnràñ đơs mơ bol khai lah: “Behơ̆ tơm wơl tĕ Sesa in phan lơi Sesa dê, mơ tơm wơl tĕ Yàng Tom Trồ in phan lơi Yàng Tom Trồ dê.” 22Bol khai kơno jơnau hơ̆ gen ai lơh krơi, lòi Kơnràñ mơ lik lòt.

Jơnau lùp bơh bơta kis wơl

(Mak 12:18-27; Luka 20:27-40)

23 # Broă 23:8. Tòm ngai hơ̆, gơs ală cau Saduse la cau đơs ò gơs bơta kis wơl, lòt tus lùp Kơnràñ lah: 24#Yalw 25:5.“Ơ Cau Bơto, Môise neh đơs: ‘Dilah cau lơi chơt mơ ò gơs kòn, gen cau oh rơp bau mơ cau ùr bơnrau hơ̆, nàng tơrbŏ jơi bi khai in.’ 25Mơ tai, tòm bol hi neh gơs poh nă oh mi. Cau bi tơnhoa bau gen chơt, bơh ò gơs kòn gen lòi bau ùr khai oh klau khai in. 26Cau bàr, cau pe, tus di cau poh kung behơ̆ sơl. 27Lồi tơnơ̆, cau ùr hơ̆ kung chơt sơl. 28Behơ̆ gen, tòm tŭ gơs bơta kis wơl, cau ùr hơ̆ rơp la bau ñcau dê tòm poh nă oh mi hơ̆ taih? Bơh jơh tơl nă neh bau mơ khai.” 29Yàng Jesu ho lah: “Bol mê kơlôi tìs rau, bơh ò git Sră Goh, kung ò git gơnap gơnoar Yàng Tom Trồ dê. 30Bơh tòm bơta kis wơl kòn mơnus ò lap klau tòmbau ùr, mơya la be ală cau gơnrơh ơm hơđang trồ. 31Bol mê òhềt sền jơnau Yàng Tom Trồ đơs bơh bơta kis wơl cau chơt dê lah: 32#Lik 3:6,15.‘Añ la Yàng Tom Trồ Abraham dê, Yàng Tom Trồ Isak dê, Yàng Tom Trồ Jakôp dê,’ ò ơ? Kơnràñ ò di la Yàng Tom Trồ cau chơt dê ò, mơya la Yàng cau kis dê.” 33Mpồl làng bol kơno jơnau hơ̆ gen ai lơh crih crài bơh bơta bơto sồr Kơnràñ dê.

Bơta sồr lam dờng rlau jơh

(Mak 12:28-34; Luka 10:25-28)

34Tòm tŭ cau Pharisi kơno Yàng Jesu neh lơh cau Saduse in ò gơ ai đơs, gen bol khai pơjum bal. 35Gơs dô nă cau bơto bơta boh lam tòm mpồl hơ̆ lùp nàng lòng Kơnràñ lah: 36“Ơ Cau Bơto, tòm bơta boh lam, bơta sồr lam lơi la dờng rlau jơh taih?” 37#Yalw 6:5.Yàng Jesu ho lah: “‘Mê jơh tĕ nùs, jơh hwềng soàn, jơh dơngoh jak mơ kòñ gơboh di Yàng la Yàng Tom Trồ mê dê.’ 38Hơ̆ la bơta sồr lam sơnròp ngan mơ dờng rlau jơh. 39#Leb 19:18.Ai bơta sồr lam bàr kung behơ̆ sơl: ‘Mê kòñ gơboh tĕ di cau gơp ƀòn he be he.’ 40#Luk 10:25-28.Jơh ală bơta boh lam mơ jơnau gơnoar hwơr la tơrgòm tòm bàr bơta sồr lam hơ̆.”

Bơtau Krist la kòn Dabit

(Mak 12:35-37; Luka 20:41-44)

41Tòm tŭ cau Pharisi pơjum bal, gen Yàng Jesu lùp bol khai lah: 42“Bol mê kơlôi mbe lơi bơh Bơtau Krist taih? Kơnràñ la kòn ñcau taih?” Bol khai ho lah: “Kòn bơtau Dabit.” 43“Kơnràñ đơs mơ bol khai lah: Behơ̆ gen mbe Dabit geh Yàng Hwềng chồl, sơnđan Bơtau Krist la Yàng, mơ đơs lah:

44 # Đơs Crih 110:1. ‘Yàng neh đơs mơ Yàng añ lah:

Nggui tĕ đah ma Añ,

Jơl tus di tŭ Añ ơn ală cau sò tơm mê hơđơm mpàng jơng mê dê.’

45Behơ̆ dilah Dabit sơnđan Kơnràñ la ‘Yàng,’ gen mbe Kơnràñ la kòn Dabit dê taih?” 46Ò gơs cau lơi rgơi ho dô jơnau lơi, mơ bơh ngai hơ̆ kung ò gơs cau lơi khin lùp Kơnràñ tai.

Currently Selected:

Mathiơ 22: KPM2018

Highlight

Copy