Mathiơ 21

Yàng Jesu mut tòm Jerusalem

(Mak 11:1-11; Luka 19:28-38; Jang 12:12-19)

1Tòm tŭ mòr tus hơ Jerusalem, tŭ pa mut tòm Betphage di gah mơnơm Ôlibe, gen Yàng Jesu sồr bàr nă cau bơtê lòt, 2mơ nting lah: “Lòt tus tĕ hơ ƀòn tòm toh di đap, bol mê bàn mo dô nơm alàng me cau kơt bal mơ dô nơm alàng kòn. Hồ tĕ gơ mơ tề cèng Añ in. 3Dilah gơs cau đơs jơnau lơi mơ bol mê, gen ho tĕ lah: ‘Yàng#21:3 Rct: cau tòm gơ kòñ ngui. kòñ ngui bàr nơm gơ.’ Gen khai rơp ai tề alàng mo.” 4Mơ tai, broă do gơlik gơs nàng gơlik di ngan be jơnau cau gơnoar hwơr đơs lah:

5 # Sac 9:9. “Yal tĕ mơ làng bol Siôn lah:

Ne, Bơtau ai dê tus hơ ai,

Nùs niam lơnhơn#21:5 Cil: niam lơngơn. mơ hào alàng,

Alàng kòn, la kòn alàng me dê.”

6Bàr nă cau bơtê hơ̆ lòt mơ lơh jat be jơnau Yàng Jesu neh sồr, 7tề alàng me mơ alàng kòn tus, dă ào bol khai hơđang gơ, gen Kơnràñ hào gơ. 8Tòm mpồl làng bol gơs oă cau dă ào khai tòm gùng, cau ndai sreh ntê chi mơ rsìh tòm gùng. 9#Đơs Crih 118:26.Mpồl làng bol cau ƀà lòt lài, cau ƀà jat tơnơ̆ driau dờng lah: “Hôsana, Kòn Dabit. Lơngai Bơtau ai sơnđan Yàng mơ tus. Hôsana hơđang jòng rlau jơh.”

10Tŭ Kơnràñ mut tòm Jerusalem, gen jơh làng bol tòm ƀòn dờng tòm lùp bal mơ đơs lah: “Hơ̆ la ñcau taih?” 11Mpồl hơ̆ ho lah: “Hơ̆ la cau gơnoar hwơr Jesu Cau Nasaret tòm Galile.”

Yàng Jesu lơh goh hìu duh khoai

(Mak 11:15-19; Luka 19:45-48; Jang 2:13-22)

12Yàng Jesu mut tòm hìu duh khoai Yàng Tom Trồ dê, bơtrơh tơlik jơh ală cau kă bro tòm hơ̆, tơlo cơnòng cau gơl priă mơ cơnòng nggui cau tac sềm ntòp, 13#Esai 56:7.#Jer 7:11.Kơnràñ đơs mơ bol khai lah: “Gơs jơnau cih lah: ‘Hìu Añ pal sơnđan la hìu hòi dan,’ mơya bol mê lơh hìu hơ̆ gơlik gơs trồm ală cau ntung kơñau.” 14Ală cau jơngo mơ cau kwet kơlte tus hơ Kơnràñ tòm hìu duh khoai, gen Kơnràñ sơmbòi bol khai. 15Mơya tòm tŭ ală cau gơnoar lam bồ ơn phan duh khoai mơ ală cau bơto bơta boh lam gŏ ală bơta crih crài Kơnràñ neh lơh, mơ kơno ală cau kơnòm driau tòm hìu duh khoai lah: “Hôsana Kòn Dabit!” Gen gơhào gơjrañ; 16#Đơs Crih 8:2.mơ đơs mơ Kơnràñ lah: “Ồng kơno jơnau mpồl kơnòm do đơs sơl?” Yàng Jesu ho lah: “Kơno, behơ̆ bol mê òhềt sền jơnau: ‘Yàng neh geh jòng ro bơh bơr ală kơnòm dềt mơ ală kòn gam pô,’ ò ơ?” 17Chòp Kơnràñ lòi bol khai, mơ lik bơh ƀòn dờng tus tòm Bethani, bic mang tềng hơ̆.

Chi bal ro

(Mak 11:12-14, 20-24)

18Àng drim hìng tòm tŭ rê wơl hơ ƀòn dờng gen Kơnràñ jơgloh. 19Kơnràñ gŏ dô tòm chi ƀal di gah gùng, lòt tus rềp mơya ò gŏ plai lơi, mìng nha lơm, gen Kơnràñ đơs mơ gơ lah: “Bơh do jơl hìng nau mê ò gơs tŭ lơi gơlik plai tai ò!” Tŭ hơ̆ chi ƀal ro mo. 20Gŏ behơ̆ ală cau bơtê ai lơh krơi mơ đơs lah: “Mbe gơlơh chi ƀal gơs ro mo behơ̆ taih?” 21#Mat 17:20; I Kô 13:2.Yàng Jesu ho lah: “Di ngan Añ đơs mơ bol mê, dilah bol mê gơs bơta dòn mơ ò pin wil wơl dô êt lơi, gen bol mê ò di mìng rơp lơh bơta Añ neh lơh di chi ƀal lơm ò, mơ bulah bol mê đơs mơ mơnơm do lah: ‘Yò tĕ să mơ ntruñ tòm dàlềng,’ gen bơta hơ̆ kung rơp gơlik gơs ngan. 22Tòm tŭ hòi dan, dilah dòn gen ngan rơp dòp geh jơh ală bơta bol mê dan.”

Jơnau lùp bơh gơnoar Kơnràñ dê

(Mak 11:27-33; Luka 20:1-8)

23Dơ̆ Yàng Jesu mut tòm hìu duh khoai, tòm tŭ Kơnràñ bơto sồr gen gơs ală cau gơnoar lam bồ ơn phan duh khoai mơ ală cau kwang kra tòm làng bol tus lùp lah: “Bơh gơnoar lơi mơ ồng lơh ală bơta do, mơ ñcau neh ai ồng in gơnoar hơ̆ taih?” 24Yàng Jesu ho lah: “Añ kung lùp bol mê dô jơnau. Dilah bol mê rgơi ho, gen Añ kung rơp yal bol mê in bơh gơnoar lơi mơ Añ lơh ală bơta do. 25Bơta ƀaptem Jang dê la bơh lơi bơh trồ hala bơh cau taih?” Bol khai tòmbơyai bal lah: “Dilah bol he đơs: ‘Bơh trồ,’ gen khai rơp đơs mơ bol he lah: ‘Behơ̆ ñchi bơh tài bol mê ò dòn Jang taih?’ 26Ai dilah đơs: ‘Bơh cau,’ gen bol he rngòt di làng bol, bơh jơh tơl nă sơnđan Jang la cau gơnoar hwơr.” 27Gen bol khai ho Yàng Jesu lah: “Bol hi ò git.” Gen Kơnràñ đơs mơ bol khai lah: “Añ kung ò yal bol mê in git bơh gơnoar lơi mơ Añ lơh ală bơta do.

Pơnyơu bơh bàr nă kòn klau

28Mbe bol mê kơlôi taih? Dô nă cau ne gơs bàr nă kòn klau. Khai tus sồr kòn sơnròp lah: ‘Ơ kòn, ngai do lòt tĕ lơh broă tòm suơn ño.’ 29Kòn hơ̆ ho lah: ‘Kòn ò bài.’ Mơya tơnơ̆ hơ̆ khai kơlôi wơl gen lòt.#21:29 Rơndap lài tơnơ̆ bàr nă kòn tòm bơta pơnyơu do jat tòm toh be bơta sơnio lam cau Grek. 30Chòp bèp lòt tus di kòn dơ̆ bàr mơ kung sồr behơ̆ sơl. Kòn do ho lah: ‘Ơi, ơ bèp, kòn lòt,’ mơya ò lòt. 31Tòm bàr nă kòn hơ̆, kòn lơi lơh jat nùs kòñ bèp dê taih?” Bol khai ho lah: “Kòn sơnròp.” Yàng Jesu đơs mơ bol khai lah: “Di ngan Añ đơs mơ bol mê, ală cau dar dia mơ ală cau dri tơlàr rơp geh mut tòm lơgar Yàng Tom Trồ lài mơ bol mê. 32#Luk 3:12; 7:29-30.Bơh Jang neh tus sơnio gùng song ring bol mê in, mơya bol mê ò dòn khai; ai ală cau dar dia mơ ală cau dri tơlàr neh dòn khai; bulah bol mê neh gŏ bơta hơ̆, mơ kung ò gơjrañ sang glài nàng dòn khai sơl.”

Pơnyơu bơh cau tòm suơn ño

(Mak 12:1-12; Luka 20:9-19)

33 # Esai 5:1-2. “Iat tĕ dô jơnau pơnyơu ndai. Gơs dô nă cau tòm hìu ne tam dô nơm suơn ño, lơh pơnggàr gùt dar. Tòm dơlam suơn khai tò dô nơm trồm pat ño, mơ bơt dô nơm theng kơp gàr; gen ai ală cau lơh suơn in ơpah gơ, mơ lòt hơ lơgar ndai. 34Kơnhai pic plai neh tus, gen cau tòm sồr ală cau dĭ lòt tus hơ ală cau lơh suơn nàng tơrgòm cồng nha bơh suơn ño khai dê. 35Mơya ală cau lơh suơn kup ală cau dĭ, pù lơh cau do, tơnchơt cau ne, mơ cơm lŭ di cau dă. 36Cau tòm sồr ală cau dĭ ndai lòt oă rlau mơ lài, gen bol lơh suơn kung lơh behơ̆ sơl. 37Lồi tơnơ̆ cau tòm sồr kòn klau khai lòt tus hơ bol khai, bơh đơs lah: ‘Ngan bol khai rơp ki ngàm di kòn klau añ.’ 38Mơya dơ̆ bol lơh suơn gŏ kòn klau hơ̆ gen đơs bal lah: ‘Do la cau pơrdòn. Heh, tơnchơt tĕ khai mơ tòmpìt ai sre brê khai dê.’ 39Gen bol khai kup kòn klau hơ̆ sơrbì hơ bơdìh suơn mơ tơnchơt tơn. 40Behơ̆ tòm tŭ cau tòm suơn ño tus, gen rơp lơh mbe lơi di bol lơh suơn hơ̆ taih?” 41Bol khai ho Kơnràñ lah: “Cau tòm rơp tơnroh bol iơh bơsak hơ̆ dô bă kơnjơ̆ ngan, mơ ai cau lơh suơn ndai in ơpah suơn hơ̆, la cau rơp ai khai in plai di kơnhai gơ dê.” 42#Đơs Crih 118:22,23.Yàng Jesu đơs mơ bol khai lah: “Bol mê òhềt sền tòm Sră Goh lah:

‘Pơnai lŭ mơ ală cau bơt hìu neh sang tơlik,

Lŭ hơ̆ neh gơlik gơs lŭ mum hìu.

Bơta hơ̆ la bơh Yàng lơh gơs,

Mơ la dô bơta crih crài di đap mat bol he’ ơ?

43Tài behơ̆ Añ đơs mơ bol mê, lơgar Yàng Tom Trồ rơp tă bơh di bol mê mơ jào dô nơm làng bol rơp lơh gơlik plai lơgar hơ̆ in. 44Cau lơi dùh hơđang pơnai lŭ hơ̆ gen rơp lề trak, ai lŭ hơ̆ dùh di cau lơi, gen rơp tơnlề cau hơ̆ be thul.”

45Ală cau gơnoar lam bồ ơn phan duh khoai mơ ală cau Pharisi kơno ală jơnau pơnyơu hơ̆, gen git Kơnràñ đơs bơh bol khai. 46Bol khai jòi bơta nàng kup Kơnràñ, mơya rngòt di mpồl làng bol, tài bơh làng bol sơnđan Kơnràñ la cau gơnoar hwơr.

Currently Selected:

Mathiơ 21: KPM2018

Highlight

Copy