Mathiơ 20

Cau lơh ơpah tòm suơn ño

1“Bơh lơgar đang trồ kung be cau tòm suơn ne, rìng àng lik lòt nàng ơpah cau lơh broă tòm suơn ño khai dê. 2Tŭ neh lơh nền tơm cau lơh broă in dô ngai dô dơnie, gen cau tòm sồr bol khai mut tòm suơn ño. 3Pơgap sin jơ drim,#20:3 Js: jơ dơ̆ pe. cau tòm lik lòt gŏ ală cau ndai ntào gòi tòm drà, 4gen đơs mơ bol khai lah: ‘Bol mê kung mut tĕ tòm suơn ño, mơ añ rơp ai jền tơngai di pal bol mê in.’ Bol khai lòt mo. 5Khai lik tai pơgap jơt bàr jơ gùl ngai#20:5 Js: jơ dơ̆ prau. mơ pe jơ mho#20:5 Js: jơ dơ̆ sin. kung lơh behơ̆ sơl. 6Pơgap pram jơ mho#20:6 Js: jơ jơt dùl. cau tòm lik gŏ ală cau ndai tai ntào tềng hơ̆, gen lùp bol khai lah: ‘Ñchi bơh tài bol mê ntào gòi tềng do dô ngai mho taih?’ 7Bol khai ho lah: ‘Tài bơh ò gơs cau ơpah bol hi.’ Cau tòm đơs mơ bol khai lah: ‘Bol mê kung mut tĕ tòm suơn ño añ jê.’

8 # Leb 19:13; Yalw 24:15. Tus di mho cau tòm suơn ño đơs mơ cau at bồ hìu lah: ‘Hòi tĕ ală cau lơh ơpah tus mơ ai jền tơngai bol khai in, rơp sơntòm bơh cau lồi dut tus di cau sơnròp.’

9Ală cau lơh ơpah bơh pram jơ mho, kòp nă dòp leng dô dơnie. 10Tòm tŭ ală cau sơnròp tus; gen tồnlah rơp dòp leng oă rlau, mơya kòp nă bol khai kung dòp leng dô dơnie sơl. 11Dơ̆ neh dòp jền tơngai rau, gen bol khai yoam cau tòm suơn, 12mơ đơs lah: ‘Ală cau lồi dut do neh lơh broă dô jơ, mơ ồng gơwèt mơ bol khai ndròm mơ bol hi, la cau neh kong kơnjơ̆ mơ duh trơàl dô ngai mho.’ 13Mơya cau tòmho mơ dô nă tòm mpồl bol khai lah: ‘Ơ bi, añ ò lơh tìs mơ bi ò. Bi ò di neh lơh nền mơ añ dô dơnie ò ơ? 14Ai tĕ jền tơngai bi dê mơ lòt. Añ kòñ ai cau lồi dut do in kung be neh ai bi in sơl. 15Ò di, añ ò gơs gơnoar ngui phan mơna añ jê jat nùs kòñ añ ò ơ? Hala bi gơs nùs ƀoah gơjrañ tài bơh añ sơrmah sơrmài ơ?’ 16#Mat 19:30; Mak 10:31; Luk 13:30.Behơ̆ cau lồi dut rơp gơs sơnròp, mơ cau sơnròp rơp gơs lồi dut.”

Yàng Jesu yàl lài dơ̆ pe bơh bơta chơt mơ kis wơl Kơnràñ dê

(Mak 10:32-34; Luka 18:31-34)

17Tòm tŭ Yàng Jesu guh hơ Jerusalem, rò gùng Kơnràñ lam is jơt bàr nă cau bơtê mơ đơs mơ bol khai lah: 18“Do, bol he guh hơ Jerusalem, Kòn Mơnus rơp gơkòl bơtào tòm tê ală cau gơnoar lam bồ ơn phan duh khoai mơ ală cau bơto bơta boh lam, mơ bol khai rơp lơh nền glài tơnchơt Kơnràñ, 19bơtào Kơnràñ cau làng bol bơdìh in dơñŏ tơnhial, pù lơh mơ pơng hơđang chi pơng. Tus di ngai pe Kơnràñ rơp geh kis wơl.”

Mè bàr nă kòn klau Sebede dê

(Mak 10:35-45)

20Tŭ hơ̆ mè ală kòn klau Sebede dê mơ ală kòn khai tus hơ Yàng Jesu, cùn khoai mơ dan dô bơta. 21Kơnràñ lùp lah: “Ñchi ai kòñ taih?” Khai ho lah: “Dan ai bàr nă kòn klau añ jê geh nggui dô nă đah ma mơ dô nă đah kiau Kơnràñ tòm lơgar Kơnràñ dê.” 22Mơya Yàng Jesu ho lah: “Bol mê ò git bơta bol mê dan hơ̆. Bol mê rgơi hùc mơngàn mơ Añ rơp hùc sơl ơ?” Bol khai ho lah: “Bol hi rgơi.” 23Kơnràñ đơs lah: “Ngan bol mê rơp hùc mơngàn Añ, mơ dô nă nggui đah ma, dô nă nggui đah kiau Añ, gen ò di la Añ gơs gơnoar ai, mơya tiah hơ̆ ală cau lơi mơ bơta hơ̆ neh geh Bèp Añ rcang lài bol khai in.”

24Dơ̆ kơno jơnau hơ̆, gen jơt nă cau bơtê gơjrañ di bàr nă oh mi ne. 25#Luk 22:25-26.Gen Yàng Jesu hòi bol khai tus mơ đơs lah: “Bol mê git lah ală cau kwang làng bol Bơdìh at bồ làng bol bol khai dê; mơ ală cau kwang dờng, gen ngui gơnoar pràn mơ at bồ bol khai. 26#Mat 23:11; Mak 9:35; Luk 22:26.Mơya tòm bol mê gen ò di behơ̆ ò; gơpơrlơ̆ wơl, cau lơi kòñ gơs dờng, gen pal lơh gơs cau duh broă. 27Ai cau lơi kòñ gơs cau lam bồ, gen pal lơh gơs dĭ gơna. 28Kung be Kòn Mơnus neh tus ò di nàng cau duh broă Khai in, mơya nàng duh broă cau in, mơ phi bơta kis Khai lơh gơs phan tơwài oă cau.”

Yàng Jesu sơmbòi bàr nă cau jơngo

(Mak 10:46-50; Luka 18:35-43)

29Tòm tŭ Yàng Jesu mơ ală cau bơtê lik bơh Jerikô, gen gơs mpồl làng bol oă jat Kơnràñ. 30Ne, gơs bàr nă cau jơngo nggui di gah gùng, kơno Yàng Jesu lòt gan tềng hơ̆, gen driau lah: “Ơ Yàng, Kòn Dabit, dan nđàc sơngit di bol hi” 31Mpồl làng bol lah pơrhơng bol khai, sồr ơm mŏ mŏ, mơya bol khai sơlo driau dờng rlau tai lah: “Ơ Yàng, Kòn Dabit, dan nđàc sơngit di bol hi.” 32Gen Yàng Jesu dơh wơl, hòi bol khai mơ lùp lah: “Ñchi bol mê kòñ Añ lơh bol mê in taih?” 33Bol khai ho lah: “Ơ Yàng, dan pò mat bol hi in.” 34Yàng Jesu gơs nùs nđàc sơngit mơ ƀư di mat bol khai, gen bol khai gŏ mo mơ lòt jat Kơnràñ.

Currently Selected:

Mathiơ 20: KPM2018

Highlight

Copy