Mathiơ 19

Gơnoar broă Yàng Jesu tòm Jude mơ Jerusalem

(19:1 – 25:46)

Yàng Jesu bơto bơh bơta lòi bau

(Mak 10:1-12)

1Tòm tŭ Yàng Jesu neh bơto ală jơnau hơ̆ rau, gen bơh Galile lòt tus hơ kơnhwàl Jude đah ne hiòng Jordan. 2Gơs mpồl làng bol oă jat Kơnràñ, tềng hơ̆ Kơnràñ sơmbòi bol khai in.

3Gơs cau Pharisi tus lòng Kơnràñ mơ đơs lah: “Bulah bơh bơta lơi cau klau kung gơs gơnoar lòi bau ùr khai dê sơl?” 4#Sơnròp 1:27; 5:2.Kơnràñ ho lah: “Bol mê òhềt sền jơnau neh cih lah, bơh sơnròp Yàng Tom Trồ neh lơh gơs cau klau mơ cau ùr, 5#Sơnròp 2:24.mơ đơs lah: ‘Tài bơh hơ̆, cau klau rơp lik bơh mè bèp mơ đềt mềr mơ bau ùr khai dê, mơ bàr nă rơp gơlik gơs dô nơm poac bal ò ơ?’ 6Behơ̆ gen bol khai ò di la bàr tai, mơya dô nơm poac lơm. Behơ̆ cau bañ cah is ală cau mơ Yàng Tom Trồ neh bơrkoat bal!”

7 # Yalw 24:1. Bol khai lùp tai Kơnràñ lah: “Behơ̆ ñchi bơh tài Môise neh sồr ai sră tòmlòi nàng lòi bau ùr taih?” 8Kơnràñ đơs lah: “Bơh nùs bol mê kră kơldang gen tàng Môise ai gơnoar bol mê in lòi bau ùr, mơya bơh sơnròp ò gơs behơ̆ ò. 9#Mat 5:32; I Kô 7:10-11.Mơ Añ đơs mơ bol mê, cau lơi lòi bau ùr khai dê, ò di bơh glài rềs àr bơrnàn, mơ bau mơ cau ndai gen cau hơ̆ tìs glài bơrnàn; ai cau lơi bau mơ ùr cau lòi hơ̆ gen kung tìs glài bơrnàn sơl.”#19:9 Gơs dô êt sră yau gơs bơtơl sèng do: cau lơi bau mơ cau ùr neh cau lòi hơ̆ gen kung tìs glài rềs àr bơrnàn sơl. Gơs sră ƀà ò gơs cih sèng do. 10Ală cau bơtê đơs mơ Kơnràñ lah: “Dilah tòm rài cau klau, gơs mìng bơta behơ̆ lơm mơ lòi bau ùr, gen chan ò bau la niam rlau.” 11Mơya Kơnràñ đơs tai lah: “Ò di jơh tơl nă cau rgơi dòp jơnau hơ̆, mìng ală cau geh ai lơm. 12Bơh gơs cau kơndời#19:12 kơndời la kriau. bơh tòm kơndul mè, gơs cau kơndời bơh cau ndai, mơ gơs cau kơndời la bơh să tòm khai lơh is tài bơh lơgar đang trồ. Cau lơi rgơi dòp jơnau hơ̆ gen dòp tĕ.”

Yàng Jesu ai lơngai ală kơnòm dềt in

(Mak 10:13-16; Luka 18:15-17)

13Tŭ hơ̆ cau cèng ală kơnòm dềt tus hơ Yàng Jesu, nàng Kơnràñ ơn tê hơđang bol khai mơ hòi dan bol khai in, mơya ală cau bơtê lah pơrhơng ală cau cèng hơ̆. 14Yàng Jesu đơs lah: “Lòi tĕ ală kơnòm dềt tus hơ Añ, bañ bơkơŭ bol khai; bơh lơgar đang trồ gơrê mơ ală cau be bol khai.” 15Kơnràñ ơn tê hơđang bol khai, gen lik lòt bơh tềng hơ̆.

Cau kwang pas sơm

(Mak 10:17-31; Luka 18:18-30)

16Ne, gơs dô nă cau tus lùp Yàng Jesu lah: “Ơ Cau Bơto, añ pal lơh broă niam lơi nàng geh bơta kis gam sùm sùm taih?” 17Yàng Jesu ho lah: “Ñchi bơh tài mê lùp Añ bơh broă niam taih? Mìng gơs dô Bơtau niam lơm. Dilah mê kòñ mut tòm bơta kis, gen pal prap gàr ală bơta sồr lam.” 18#Lik 20:13-16; Yalw 5:17-20.Cau hơ̆ lùp lah: “Bơta sồr lam lơi taih?” Yàng Jesu ho lah: “Mê bañ tơnchơt cau, bañ tìs glài rềs àr bơrnàn, bañ ntung kơñau, bañ lơh cơng blac, 19#Lik 20:12; Yalw 5:16; Leb 19:18.dòn duh tĕ mè bèp mê, mơ kòñ gơboh tĕ di cau gơp ƀòn he be he.” 20Cau pơnu hơ̆ đơs lah: “Añ neh prap gàr ală bơta hơ̆ rau,#19:20 Gơs sră yau cih: bơh di tŭ añ gam kơnòm să. bơta lơi añ gam siơ̆u taih?” 21Yàng Jesu đơs mơ khai lah: “Dilah mê kòñ gơs wil tơl, gen lòt tĕ tac jơh ală phan mơna mê dê mơ tòmpà#19:21 Gsc: tòmpà jền priă. cau rƀah lơòi in, gen mê rơp geh phan màng hơđang trồ; lồc behơ̆ tus tĕ jat Añ.” 22Mơya dơ̆ kơno jơnau hơ̆, gen cau pơnu moat jrùng mơ lòt, bơh khai gơs oă ngan phan mơna.

23Gen Yàng Jesu đơs mơ ală cau bơtê lah: “Di ngan Añ đơs mơ bol mê, cau pas sơm mut tòm lơgar đang trồ la kalke ngan. 24Añ đơs tai mơ bol mê, làkđa mut tòm trồm jrum#19:24 Hơ̆ la dô nơm mpồng dềt tòm dơrñang theng Jerusalem. la ƀuơn rlau mơ cau pas sơm mut tòm lơgar Yàng Tom Trồ.” 25Ală cau bơtê kơno jơnau hơ̆ gen ai lơh crih crài oă ngan mơ đơs lah: “Behơ̆ gen ñcau rgơi geh dong klàs taih?” 26Yàng Jesu sền di bol khai mơ đơs lah: “Bơta hơ̆ jơi kòn mơnus ò rgơi lơh, mơya Yàng Tom Trồ rgơi lơh jơh ală bơta.”

27Tŭ hơ̆ Pier đơs mơ Kơnràñ lah: “Ơ Yàng, bol hi neh sang jơh ală bơta mơ jat Kơnràñ. Behơ̆ gen ñchi bol hi rơp geh taih?” 28#Mat 25:31; Luk 22:30.Yàng Jesu ho lah: “Di ngan Añ đơs mơ bol mê, tus di tŭ jơh ală bơta gơs wơl pa, la tŭ Kòn Mơnus rơp nggui hơđang sơbàn gơklŏ Kơnràñ dê, gen bol mê la cau neh jat Añ kung rơp nggui hơđang jơt bàr nơm sơbàn mơ cahrña jơt bàr jơi bơtiàn làng bol Israel. 29Dilah cau lơi bơh sơnđan Añ mơ sang hìu đam, oh mi, ruh lŏ, mè bèp, oh kòn, hala sre brê, gen cau hơ̆ rơp dòp leng dô rhiang dơ̆ rlau mơ hơ̆, mơ pơrdòn bơta kis gam sùm sùm. 30#Mat 20:16; Luk 13:30.Mơya gơs oă cau sơnròp rơp gơs lồi dut mơ cau lồi dut rơp gơs sơnròp.”

Currently Selected:

Mathiơ 19: KPM2018

Highlight

Copy