Mathiơ 14

Bơta chơt Jang Ƀaptis

(Mak 6:14-29; Luka 9:7-9)

1Tòm tŭ hơ̆ Herôt la bơtau oh kơno jơnau pơnro bơh Yàng Jesu, 2gen đơs mơ ală cau kwang dong broă khai lah: “Do la Jang Ƀaptis, khai neh kis wơl bơh bơta chơt, gen tàng rgơi lơh ală broă gơnap gơnoar hơ̆ tòm khai.” 3#Luk 3:19-20.Tài bơh broă Herôdias la bau ùr Philip oh Herôt dê, gen tàng Herôt neh kup cap Jang krơ̆ tòm hìu jàm. 4#Leb 18:16; 20:21.Bơh Jang neh ràc bơtau lah: “Bơtau bau mơ cau ùr hơ̆ la tìs mơ bơta boh lam.” 5Khai kòñ tơnchơt Jang, mơya rngòt di mpồl làng bol tài bơh bol khai sền Jang la cau gơnoar hwơr.

6Tòm bơta pơjum sa kah ngai deh Herôt, kòn ùr Herôdias dê tòmya digùl tiah ñô sa, niam nùs Herôt oă ngan, 7tian gơs Herôt srat să mơ ho ai khai in bơta lơi khai kòñ dan. 8Tài bơh mè chồl bơtrut gen khai đơs lah: “Dan ai añ in bồ Jang Ƀaptis ơn tòm sơlào tềng do.” 9Bơtau moat jrùng ngan, mơya tài bơh neh rlau srat să mơ tài bơh ală cau ñô sa bal mơ khai, gen khai sồr ai kòn ùr hơ̆ in. 10Bơtau sồr cau lòt koh bồ Jang tòm hìu jàm, 11ơn bồ tòm sơlào mơ cèng ai kòn ùr in, mơ khai cèng mè khai in. 12Gen ală cau bơtê Jang dê tus ai ƀồc mơ tơp, mơ lòt yal Yàng Jesu in.

Yàng Jesu lơh piang lă gơlik gơs oă dơ̆ sơnròp

(Mak 6:30-44; Luka 9:10-17; Jang 6:1-14)

13Dơ̆ Yàng Jesu kơno jơnau hơ̆ gen lòt bơh tiah hơ̆ mut tòm ơhò, tus hơ tiah ngềt ngơt. Tòm tŭ kơno behơ̆, gen mpồl làng bol bơh ală ƀòn dờng lòt jơng jat Kơnràñ. 14Kơnràñ lik bơh ơhò, gŏ mpồl làng bol oă gen nđàc sơngit di bol khai mơ sơmbòi ală cau kòp jê in.

15Tus di mho, ală cau bơtê tus hơ Kơnràñ mơ đơs lah: “Tiah do ngềt ngơt mơ trồ neh mho rau; dan ai mpồl làng bol in lòt mut tòm ală ƀòn nàng rwat phan sa.” 16Mơya Yàng Jesu đơs lah: “Bol khai ò càng lòt; să tòm bol mê ai bol khai in sa.” 17Cau bơtê đơs mơ Kơnràñ lah: “Tềng do bol hi gơs mìng pram nơm piang lă mơ bàr nơm ka lơm.” 18Kơnràñ đơs lah: “Cèng tĕ Añ in hơ do.” 19Gen Kơnràñ sồr mpồl làng bol nggui dê ñhơt, ai pram nơm piang lă mơ bàr nơm ka hơ̆, pò mat hơ trồ mơ ai lơngai, gen dơrkă piang lă tong ală cau bơtê in, ală cau bơtê tòmpà mpồl làng bol in. 20Jơh tơl nă sa hòm, ai ală pet dơrkă tơngkah gen bol khai dòñ bềng jơt bàr bài. 21Ntum khà cau sa la pơgap pram rbô nă, ò kòp cau ùr mơ cau kơnòm.

Yàng Jesu lòt hơđang nha dàlềng

(Mak 6:45-52; Jang 6:15-21)

22Tŭ hơ̆ mo Yàng Jesu chồl ală cau bơtê mut tòm ơhò, tiă lài đah bơtĭ ne dàlềng, tòm tŭ Kơnràñ ai mpồl làng bol in rê. 23Neh sir rau, gen Kơnràñ guh is hơđang mơnơm nàng hòi dan. Tus di mang, Kơnràñ ơm is dô nă.

24Tòm tŭ hơ̆ ơhò neh tus digùl dàlềng rau. Bơh càl khồm sơlơ̆u gen tàng ryà dà lơnggac ơhò. 25Tus di jơ drơng poan#14:25 Pơgap bơh pe jơ tus di prau jơ drim. Jat tŭ jơ cau Rôma dê, mang (bơh 6 jơ mho tus di 6 jơ drim ngai tơnơ̆) geh cah tòm poan tŭ drơng, kòp tŭ drơng pơgap pe jơ. mang hơ̆, Yàng Jesu lòt hơđang nha dàlềng mơ tus hơ bol khai. 26Dơ̆ ală cau bơtê gŏ Kơnràñ lòt hơđang nha dàlềng, gen gơnsràng rngòt mơ đơs lah: “Hơ̆ la dô nơm mu!” Gen bol khai driau dờng mơ rngòt rngơt. 27Yàng Jesu đơs mo mơ bol khai lah: “Kơ̆ tĕ nùs; Añ do, bañ rngòt.” 28Chòp Pier ho Kơnràñ lah: “Ơ Yàng, dilah ngan la Kơnràñ, dan sồr Añ lòt hơđang nha dà tus hơ Kơnràñ.” 29Kơnràñ đơs lah: “Tus tĕ.” Pier lik bơh ơhò lòt hơđang nha dà tus hơ Yàng Jesu. 30Mơya tòm tŭ gŏ càl dờng, gen Pier rngòt ngan mòr gơkram tòm dà, gen hòi dờng lah: “Ơ Yàng, dong añ!” 31Yàng Jesu ai tê sơmbat mo di khai mơ đơs lah: “Ơ cau gơs dô êt bơta dòn, ñchi bơh tài mê pin taih?” 32Tòm tŭ bol khai mut tòm ơhò rau, gen càl thit ngềt. 33Gen ală cau tòm ơhò tus cùn khoai Kơnràñ mơ đơs lah: “Kơnràñ ngan la Kòn Yàng Tom Trồ dê.”

Yàng Jesu sơmbòi cau kòp tòm Genesaret

(Mak 6:53-56)

34Tòm tŭ neh tiă dàlềng rau, gen bol khai tus tòm kơnhwàl Genesaret. 35Ală cau tòm kơnhwàl hơ̆ đal git Kơnràñ gen sồr cau lòt yal làm tiah hơ̆, mơ cèng jơh ală cau kòp jê tus hơ Kơnràñ, 36rac dan mơ Kơnràñ ai bol khai in mìng ƀư di tiang ào Kơnràñ lơm. Cau lơi ƀư di gơ gen geh bòi jơh.

Currently Selected:

Mathiơ 14: KPM2018

Highlight

Copy