Mathiơ 13

Pơnyơu bơh cau sih gar

(Mak 4:1-9; 8:4-8)

1Kung tòm ngai hơ̆, Yàng Jesu lik bơh hìu mơ nggui di gah dàlềng nàng bơto. 2#Luk 5:1-3.Gơs mpồl làng bol oă pơjum gùt dar Kơnràñ, tian gơs Kơnràñ mut nggui tòm ơhò, ai ală làng bol ntào di gah dàlềng. 3Kơnràñ ngui jơnau pơnyơu mơ bơto oă bơta bol khai in lah:

“Ne, gơs dô nă cau lik lòt nàng sih gar. 4Tòm tŭ sih, gơs gar rung di gah gùng, gen sềm tus sa jơh. 5Kung gơs gar rung di tiah lŭ la tiah ò gơs oă ù; tài bơh gơbồr ò jrô, gen gơhòn mo. 6Dơ̆ mattơngai lik, gen gơ ñòp; tài bơh ò gơs ryas, gen tànggơ ro. 7Gar ƀà rung di tòm lò; lò hòn sơnru lơh gơrềt jơh. 8Gar ƀà tai rung di ù niam gen gơlik plai, gơnar ƀà dô rhiang, gơnar ƀà prau jơt, gơnar ƀà pe jơt. 9Cau lơi gơs tồr, iat tĕ!”

Gơtha jơnau pơnyơu

(Mak 4:10-12; Luka 8:9-10)

10Ală cau bơtê tus lùp Yàng Jesu lah: “Ñchi bơh tài Kơnràñ ngui jơnau pơnyơu đơs mơ bol khai taih?” 11Kơnràñ ho lah: “Neh ai bol mê in git ală bơta ndơp ndơr lơgar đang trồ dê, mơya ò ai bol khai in. 12#Mat 25:29; Mak 4:25; Luk 8:18; 19:26.Bơh cau lơi gơs gen rơp ai bơtơl tai, nàng khai geh tơngkah tơngkañ; mơya cau lơi ò gơs, gen rơp tă tơn bơta khai neh gơs. 13Behơ̆ tàng, Añ đơs pơnyơu mơ bol khai, bơh bol khai sền mơ ò gŏ, iat mơ ò kơno, mơ kung ò git wă bơta lơi. 14Behơ̆ bol khai neh lơh gơlik di ngan jơnau đơs hwơr Esai dê lah:

‘Bol mê rơp iat gen kơno, mơya ò git wă dô êt lơi;

Rơp sền gen gŏ, mơya ò git đal dô êt lơi.

15 # Esai 6:9,10. Bơh nùs làng bol do neh kră kơldang;

Tồr bol khai neh tĭ,

Mat bol khai neh ñềm;

Rngòt mat bol khai geh gŏ,

Tồr bol khai geh kơno,

Nùs bol khai geh git wă, bol khai rê wơl,

Mơ Añ sơm bol khai in bòi mòn.’

16 # Luk 10:23-24. Mơya lơngai mat bol mi in bơh gơ gŏ; lơngai tồr bol mê in bơh gơ kơno. 17Di ngan Añ đơs mơ bol mê, gơs oă cau gơnoar hwơr mơ cau song ring neh kòñ gŏ ală bơta bol mê gŏ mơ ò geh gŏ, kòñ kơno ală jơnau bol mê kơno mơ ò geh kơno.”

Jơnau gơtha cau sih gar

(Mak 4:13-20; Luka 8:11-15)

18“Gen bol mê iat tĕ jơnau pơnyơu bơh cau sih gar. 19Cau lơi iat jơnau lơgar đang trồ dê mơ ò git wă, gen cà iơh bơsak tus sơmbrơt bơta neh sih tòm nùs khai dê. Hơ̆ la gar neh sih di gah gùng. 20Gar neh sih tòm tiah lŭ, hơ̆ la cau kơno jơnau, gen hòn chò dòp mo. 21Mơya tòm khai ò gơs ryas, mìng ơm ing dô êt, tus di tŭ gơtìp bơta rung rài hala bơta kup kơryan gơlik bơh jơnau hơ̆, gen khai gơtup tìs mo. 22Gar neh sih di tòm lò, hơ̆ la cau kơno jơnau, mơya bơta kơlôi rcang rài do dê mơ bơta pơndòm pơnhòp pas sơm dê lơh gơrềt jơnau hơ̆, gen ò gơlik plai. 23Ai gar neh sih tòm ù niam, hơ̆ la cau kơno jơnau mơ git wă; khai rơp gơlik plai tian gơs gơnar ƀà gơlik dô rhiang, gơnar ƀà prau jơt, gơnar ƀà tai pe jơt.”

Jơnau pơnyơu bơh ñhơt drung

24Yàng Jesu đơs pơnyơu ndai mơ bol khai lah: “Lơgar đang trồ la kung be dô nă cau sih gar niam tòm sre khai dê. 25Mơya tòm tŭ jơh tơl nă cau bic lơhă, gen cau sò tơm tus sih gar ñhơt drung tòm kòi mi, gen lòt. 26Tus di tŭ kòi mi hòn mơ gơlik plai, gen ñhơt drung kung hòn lik bal sơl. 27Gen ală cau dĭ cau tòm hìu dê tus đơs mơ khai lah: ‘Ơ ồng, ồng ò di sih gar niam tòm sre ồng ò ơ? Behơ̆ mbơh tus ñhơt drung taih?’ 28Cau tòmho lah: ‘Hơ̆ la dô nă cau sò tơm neh lơh bơta hơ̆.’ Ală cau dĭ đơs lah: ‘Behơ̆ ồng kòñ bol hi lòt jì ñhơt drung hơ̆ sơl?’ 29Khai đơs lah: ‘Ò di, rngòt tòm tŭ bol mê jì ñhơt drung gen di gơrồ kòi mi mòn. 30Lòi tĕ jơh bàr bơta hòn bal tus di kơnhai toès; tus di kơnhai toès añ rơp sồr cau toès lah: Lài ngan tơrgòm tĕ ñhơt drung, cap wơl gơs tơrñap nàng chu, mơya tơrgòm prap tĕ kòi mi tòm đam añ jê.’”

Jơnau pơnyơu bơh gar sơbê

(Mak 4:30-32; Luka 13:18-19)

31Kơnràñ ai jơnau pơnyơu ndai đơs mơ bol khai lah: “Lơgar đang trồ kung be dô gar sơbê mơ cau ne ai sih tòm sre khai dê. 32Gar hơ̆ dềt rlau jơh mơ ală gar ndai, mơya tòm tŭ neh hòn rau gen dờng rlau mơ ală biap mơ gơlik dô đòm chi, tian gơs ală sềm tus ơm hơđang ntê gơ.”

Jơnau pơnyơu bơh kañ

(Luka 13:20-21)

33Kơnràñ đơs pơnyơu ndai tai mơ bol khai lah: “Lơgar đang trồ kung be kañ cau ùr ne ai bơcă bal mơ poan jơt lit kơmbuh phe#13:33 Dô rnoas la 13 lit. jơl tus di tŭ gơprồ làm jơh.”

Ñchi bơh tài Yàng Jesu ngui jơnau pơnyơu

(Mak 4:33-34)

34Yàng Jesu ngui jơnau pơnyơu đơs ală bơta hơ̆ mơ mpồl làng bol; Kơnràñ ò đơs bơta lơi mơ bol khai, mơ ò ngui jơnau pơnyơu, 35#Đơs Crih 78:2.nàng gơlik di ngan be jơnau cau gơnoar hwơr đơs lah:

“Añ rơp pò bơr mơ đơs pơnyơu,

Añ rơp yal tơlik ală bơta neh pồn bơh tŭ crơng gơs trồ tiah.”

Gơtha jơnau pơnyơu bơh ñhơt drung

36Gen Yàng Jesu lòi mpồl làng bol mơ mut tòm hìu. Ală cau bơtê tus hơ Kơnràñ mơ đơs lah: “Dan yal bol hi in jơnau gơtha pơnyơu bơh ñhơt drung tòm sre.” 37Kơnràñ ho lah: “Cau sih gar niam la Kòn Mơnus; 38sre la dunnia, gar niam la kòn sau lơgar đang trồ dê, ñhơt drung la kòn sau cau iơh bơsak dê 39Cau sò tơm sih gar hơ̆ la cà ràk, kơnhai toès la ngai lồi dut rài do, cau toès la cau gơnrơh. 40Behơ̆, tơrgòm ñhơt drung mơ chu tòm ồs be lơi, gen ngai lồi dut rài do kung rơp behơ̆ sơl. 41Kòn Mơnus rơp sồr ală cau gơnrơh Kơnràñ lòt, tơrgòm jơh ală bơta lơh gơtup tìs mơ ală cau lơh bơta tồi glài iơh bơsak mơ tơlik bơh di lơgar Kơnràñ, 42gen sơrbì tòm brong ồs, tềng hơ̆ gơs bơta ñìm rac mơ rkiat sề. 43Tŭ hơ̆ ală cau song ring rơp gơcrà be mattơngai tòm lơgar Bèp bol khai dê. Cau lơi gơs tồr, iat tĕ!”

Jơnau pơnyơu bơh phan màng

44“Lơgar đang trồ kung be dô nơm phan màng pồn tòm sre; dô nă cau bàn gen pồn ndơp, hòn chò mơ lòt tac jơh ală phan khai dê mơ rwat sre hơ̆.”

Jơnau pơnyơu bơh lŭ màng

45“Lơgar đang trồ kung be dô nă cau kă bro jòi lŭ kràng màng niam mơnĕ. 46Tŭ neh bàn dô nơm lŭ kràng màng kas jền ngan, gen lòt tac jơh ală phan khai dê mơ rwat gơ.”

Jơnau pơnyơu bơh bơtơng

47“Lơgar đang trồ kung be dô nơm bơtơng dang tòm dàlềng, tơrgòm tơl ală jơi ka. 48Dơ̆ bơtơng neh bềng rau, cau hwài di gah dà, gen nggui mơ sac ală ka niam ơn tòm nir, ai ală ka iơh gen sang sơrbì. 49Ngai lồi dut rài do kung behơ̆ sơl. Ală cau gơnrơh rơp lik lòt cah is ală cau iơh bơsak bơh ală cau song ring, 50gen sơrbì bol iơh bơsak hơ̆ tòm brong ồs; tềng hơ̆ gơs bơta ñìm rac mơ rkiat sề.”

Jơnau song pa mơ yau

51“Bol mê git wă jơh ală bơta hơ̆ sơl?” Ală cau bơtê đơs lah: “Git.” 52Kơnràñ đơs tai lah: “Tài behơ̆ kòp nă cau bơto bơta boh lam mơ neh gơlik gơs cau bơtê lơgar đang trồ dê la kung be dô nă cau tòm hìu cèng tơlik ală phan pa mơ phan yau bơh tòm đam khai dê.”

Yàng Jesu kòl sang lòi tòm Nasaret

(Mak 6:1-6; Luka 4:16-30)

53Tòm tŭ Yàng Jesu neh đơs ală jơnau pơnyơu hơ̆ rau, gen Kơnràñ lik lòt bơh tềng hơ̆. 54Kơnràñ tus hơ ƀòn tòm Kơnràñ dê, gen bơto sồr làng bol tòm hìu jum, tian gơs bol khai ai lơh crih crài mơ đơs lah: “Mbơh cau do geh bơta jak chài mơ ală broă gơnap gơnoar do taih? 55Cau do ò di la kòn cau chài lơh chi ò ơ? Mè khai ò di sơnđan la Mari, mơ ală oh khai ò di la Jakơ, Jôsep, Simôn mơ Jude ò ơ? 56Ai ală oh ùr khai ò di ơm mơ bol he ò ơ? Behơ̆ mbơh cau do geh jơh ală bơta hơ̆ taih?” 57#Jang 4:44.Gen bol khai gơtup tìs bơh Kơnràñ. Mơya Yàng Jesu đơs mơ bol khai lah: “Cau gơnoar hwơr ò gơs cau ki ngàm mìng tòm ƀòn tòm mơ hìu tòm khai dê lơm.” 58Tềng hơ̆ Kơnràñ ò lơh oă tềl krơi tài bơh bơta ò dòn bol khai dê.

Currently Selected:

Mathiơ 13: KPM2018

Highlight

Copy