Mathiơ 12

Jơnau lùp bơh ngai Saƀat

(Mak 2:23-28; Luka 6:1-5)

1 # Yalw 23:25. Tŭ hơ̆ di di ngai Saƀat, Yàng Jesu lòt gan ƀlàng sre kòi mi. Ală cau bơtê Kơnràñ dê jơgloh, gen ròs kòi mi mơ sa. 2Cau Pharisi gŏ behơ̆, gen đơs mơ Kơnràñ lah: “Sền ne, ală cau bơtê Ồng dê lơh bơta ò geh gơnoar lơh tòm ngai Saƀat.” 3#I Sam 21:1-6.Kơnràñ đơs lah: “Bol mê òhềt sền sră cih bơh broă Dabit lơh tòm tŭ khai mơ ală cau lòt jat khai jơgloh ơ? 4#Leb 24:9.Khai neh mut tòm hìu Yàng Tom Trồ dê, sa piang lă pơdơng, la piang lă mơ khai mơ ală cau lòt jat ò geh gơnoar sa, lòi mìng ală cau gơnoar ơn phan duh khoai in lơm. 5#Khà 28:9-10.Hala bol mê òhềt sền tòm bơta boh lam, ală cau gơnoar ơn phan duh khoai lơh broă tòm hìu duh khoai tòm ngai Saƀat mơ tìs mơ bơta boh lam mơ ò gơkòl glài sơl ơ? 6Mơya Añ đơs mơ bol mê, tềng do gơs dô nă Cau dờng rlau mơ hìu duh khoai. 7#Ôse 6:6.Dilah bol mê neh git wă jơnau gơtha sèng do: ‘Añ kòñ bơta kòñ nđàc, ò kòñ phan ơn duh khoai ò,’ gen bol mê ò lơh nền glài ală cau ò gơs glài. 8Bơh Kòn mơnus la Yàng ngai Saƀat dê.”

Cau siar tê

(Mak 3:1-6; Luka 6:6-11)

9Yàng Jesu lik lòt bơh hơ̆ mơ mut tòm hìu jum cau Juda. 10Tềng hơ̆, gơs dô nă cau siar mpàng tê. Gơs cau lùp Kơnràñ lah: “Tòm ngai Saƀat, geh gơnoar sơmbòi hala ò?” Bol khai lùp behơ̆ nàng yă Kơnràñ. 11#Luk 14:5.Gen Kơnràñ đơs mơ bol khai lah: “Ñcau tòm bol mê dilah gơs dô nơm belàt dùh tòm trồm tòm ngai Saƀat mơ ò at yò tơlik gơ ơ? 12Tơ ài lah kòn mơnus la màng rlau mơ dô nơm belàt ò git nđò! Behơ̆ tòm ngai Saƀat geh gơnoar lơh broă niam.” 13Chòp Kơnràñ đơs mơ cau hơ̆ lah: “Pò tĕ tê mê dê.” Khai pò tê, mơ gơ gơs bòi kung be tê đah ne sơl. 14Ală cau Pharisi lik hơ bơdìh mơ bơyai mbe lơh nàng tơnroh Kơnràñ.

Cau dĭ gơna Yàng Tom Trồ sac rwah

15Yàng Jesu git bơta hơ̆ gen pleh lòt bơh tềng hơ̆. Gơs oă cau lòt jat Kơnràñ, Kơnràñ sơmbòi jơh tơl nă, 16mơ bơkơ̆u bol khai bañ yal cau in bơh Kơnràñ, 17nàng gơlik di ngan be jơnau cau gơnoar hwơr Esai neh đơs lah:

18“Ne, Cau Duh Broă Añ, la Cau Añ neh sac rwah,

La Cau kòñ gơboh Añ jê, niam nùs Añ tòm jơh ală bơta.

Añ rơp ai Hwềng Goh Añ ơm hơđang Khai,

Mơ Khai rơp yal bơta cahrña song ngan làng bol Bơdìh in.

19Khai rơp ò pơndang, ò driau nggà,

Mơ ò gơs cau lơi kơno jơnau Khai tòm gùng.

20Khai rơp ò dơrkă#12:20 Cil: tòmpă. gai proh neh pă pơnie#12:20 Cil: dien. rau,

mơ ò tơnchơt ồs mòr chơt dê brài đèng,

Jơl tus di tŭ Khai lơh bơta song ngan in geh pha rlau.

21 # Esai 42:1-4. Mơ ală làng bol bơdìh rơp gơn kơnòm di sơnđan Khai.”

Yàng Jesu mơ Beeljebul

(Mak 3:20-30; Luka 11:14-32; 12:10)

22Tŭ hơ̆ gơs cau cèng tus hơ Yàng Jesu dô nă cau cà lơh, jơngo mơ kloat. Kơnràñ sơmbòi khai in, tian gơs cau kloat tus đơs mơ gơs gŏ. 23Jơh mpồl làng bol ai lơh crih crài mơ đơs lah: “Do ngan la Kòn Dabit ơ?” 24#Mat 9:34; 10:25.Tòm tŭ ală cau Pharisi kơno jơnau hơ̆ gen đơs lah: “Cau do mìng kơnòm di Beeljebul la bơtau cà mơ bơtrơh cà.”

25Yàng Jesu git bơta kơlôi bol khai dê, gen đơs mơ bol khai lah: “Dilah lơgar lơi cah is gơ dê gen rơp roh gơprah; dilah ƀòn dờng hala hìu lơi cah is gơ dê gen rơp ò gơs kơ̆ tai. 26Dilah cà Satan bơtrơh cà Satan gen gơcah is gơ dê, lơgar gơ mbe rgơi gam kơ̆ taih? 27Ai dilah Añ kơnòm dê Beeljebul nàng bơtrơh cà, gen ală cau jat bol mê kơnòm dê ñcau nàng bơtrơh cà taih? Behơ̆ gen bol khai la cau rơp lơh nền glài bol mê. 28Mơya dilah Añ kơnòm dê Hwềng Yàng Tom Trồ dê nàng bơtrơh cà, gen lơgar Yàng Tom Trồ dê neh tus hơ bol mê rau. 29Hala mbe cau lơi rgơi mut tòm hìu cau pràn kơldang mơ phà kơñau phan, dilah lài ngan ò cap cau pràn hơ̆ taih? Pal cap cau pràn hơ̆ lài, gen sồng geh phà kơñau hìu khai dê. 30#Mak 9:40.Cau lơi ò tòmsòr mơ Añ la tòmdră mơ Añ; cau lơi ò tơrgòm pơjum Añ in gen lơh gơprah gơpring. 31Behơ̆ tàng Añ đơs mơ bol mê, kòp bơta tồi glài mơ đơs tràl sơrbil rơp geh toh cau in, mơya bơta đơs tràl sơrbil dê Yàng Hwềng Goh gen ò gơs tŭ lơi geh toh. 32#Luk 12:10.Dilah cau lơi đơs tòmdră mơ Kòn mơnus gen rơp geh toh, mơya cau lơi đơs tòmdră mơ Yàng Hwềng Goh gen ò geh toh bulah tòm rài do hala tòm rài tơnơ̆.”

Tòm chi mơ plai

(Luka 6:43-45)

33 # Mat 7:20; Luk 6:44. “Dilah chi niam gen plai gơ kung niam, chi iơh gen plai gơ kung iơh, bơh sền plai gen git chi. 34#Mat 3:7; 23:33; 15:18; Luk 3:7; 6:45.Ơ jơi bơtiàn bơs tur ne; bol mê la iơh bơsak gen mbe rgơi đơs bơta niam taih? Bơh jat bơta bềng lìu tòm nùs gen sồng bơr đơs tơlik. 35Cau lơbơn niam bơh bơta niam tòm nùs gen tơlik bơta niam, ai cau iơh bơsak bơh bơta iơh bơsak tòm nùs gen tơlik bơta bơsak. 36Añ đơs mơ bol mê, tòm ngai cahrña, cau rơp yal wơl kòp jơnau ò kwơ mơ bol khai neh đơs. 37Bơh jơnau đơs mơ mê geh kòp la song ring, kung bơh jơnau đơs mơ mê kong lơh nền glài.”

Bơta dan tềl krơi

(Mak 8:11-12; Luka 11:29-32)

38 # Mat 16:1; Mak 8:11; Luk 11:16. Tŭ hơ̆ gơs ală cau bơto bơta boh lam mơ cau Pharisi đơs mơ Yàng Jesu lah: “Ơ Cau Bơto, bol hi kòñ sền Ồng lơh dô nơm tềl krơi.” 39#Mat 16:4; Mak 8:12.Kơnràñ ho lah: “Jơi bơtiàn iơh bơsak rềs àr bơrnàn do dan dô nơm tềl krơi, mơya rơp ò ai bol khai in tềl krơi lơi rlau mơ tềl krơi cau gơnoar hwơr Jôna dê. 40#Jôna 2:1.Be Jôna neh ơm tòm kơndul ka dờng tòm pe ngai mơ pe mơnang, Kòn mơnus kung rơp ơm tòm kơnàng ù tòm pe ngai mơ pe mơnang behơ̆ sơl. 41#Jôna 3:5.Tòm ngai cahrña, cau Ninibe rơp ñă ntào mơ jơi bơtiàn do mơ lơh nền glài bol khai, bơh cau Ninibe neh gơjrañ sang glài tòm tŭ Jôna bơto yal, mơ do gơs dô nă Cau dờng rlau mơ Jôna! 42#I Bơtau 10:1-10; II Yal 9:1-12.Tòm ngai cahrña, bơtau ùr đah đơm rơp ñă ntào mơ jơi bơtiàn do mơ lơh nền glài bol khai, bơh khai bơh kơndòl plai ù lòt tus nàng iat bơta jak chài Salômôn dê, mơ do gơs dô nă Cau dờng rlau mơ Salômôn!”

Cà iơh rê wơl

(Luka 11:24-26)

43“Dơ̆ cà lik bơh di cau lơi, gen gơ lòt làm tòm ală tiah rañ rsơh, jòi tiah rlô bòl, mơya jòi ò gơs. 44Gen gơ đơs lah: ‘Añ rơp rê wơl hơ hìu mơ añ pa lik.’ Dơ̆ gơrê wơl, gŏ hìu gòi, neh pơs goh mơ rơndap niam, 45gen gơ lòt tai mơ lam tus poh nơm cà ndai iơh bơsak rlau mơ gơ, mut ơm bal tềng hơ̆; behơ̆ rài kis cau hơ̆ gơlik iơh rmơh rlau mơ lài òr. Jơi bơtiàn iơh bơsak do kung rơp behơ̆ sơl.”

Mè mơ oh mi Yàng Jesu dê

(Mak 3:31-35; Luka 8:19-21)

46Tòm tŭ Yàng Jesu gam đơs mơ mpồl làng bol, gen mè mơ oh mi Kơnràñ dê tus ntào bơdìh, kòñ tòmbơhbơr mơ Kơnràñ. 47Gơs cau yal mơ Kơnràñ lah: “Ne, mè mơ oh mi Ồng dê ntào bơdìh, kòñ tòmbơhbơr mơ Ồng.”#12:47 Dô êt sră cih mơ tê ò gơs sèng 47. 48Kơnràñ ho khai lah: “Ñcau la mè Añ, ñcau la oh mi Añ taih?” 49Kơnràñ pò tê sơnio ală cau bơtê mơ đơs lah: “Do la mè Añ mơ oh mi Añ. 50Bơh cau lơi lơh jat nùs kòñ Bèp Añ jê ơm hơđang trồ, gen cau hơ̆ la oh mi, ruh lŏ mơ mè Añ jê.”

Currently Selected:

Mathiơ 12: KPM2018

Highlight

Copy