Luka 2

Yàng Jesu lik lìng

(Mathiơ 1:18-25)

1Tŭ hơ̆, bơtau Ôgustơ tơlik dô jơnau gơnoar sồr, sồr jơh ală lơgar dunnia pal cih sơnđan mat tòm sră.#2:1 Rct: ală lơgar ơm hơđơm gơnoar at bồ cau Rôma dê. 2Bơta cih sơnđan mat do la dơ̆ sơnròp tòm rài Kirinius la cau kwang đơng lơgar Siri. 3Jơh tơl nă lik lòt, kòp nă rê hơ ƀòn tòm, nàng cih sơnđan mat tòm sră.

4Bơh Jôsep la bal mơ hìu nhă jơi bơtiàn Dabit dê, gen kung bơh Nasaret tòm Galile guh hơ Jude, tus hơ ƀòn dờng Dabit, sơnđan la Betlehem, 5nàng cih sơnđan khai mơ sơnđan Mari, la cau neh ho bau mơ khai, cau hơ̆ gam bun. 6Tòm tŭ bol khai ơm tềng hơ̆ gen ngai Mari deh neh tus. 7Khai deh kòn klau tơnhoa, ai ồi klơm, mơ tơmbic tòm bòng ñhơt, bơh hìu ơpah bic ò gơs tiah bol khai in ơm.

8Mơ tai, tòm kơnhwàl hơ̆ gơs ală cau ê belàt ơm tòm ƀlàng, drơng mang kơp gàr mpồl belàt. 9Nisơna gơs cau gơnrơh Yàng dê tơlik mat mơ bol khai, mơ bơta gơklŏ Yàng dê gơcrà gùt dar, bol khai rngòt rngơt ngan. 10Gen cau gơnrơh đơs mơ bol khai lah: “Bañ rngòt, do, añ yal bol mê in dô nơm jơnau niam hòn chò dờng, gơ rơp dờng màng ală làng bol in; 11hơ̆ la ngai do tòm ƀòn dờng Dabit dê neh deh bol mê in dô Bơtau Dong klàs, la Krist, la Yàng. 12Do la tềl sơnio bol mê in: Bol mê rơp gŏ dô nă oh nga klơm mơ ồi, bic tòm bòng ñhơt.” 13Nisơna gơs rbô rhiang cau ling bơh trồ bal mơ cau gơnrơh hơ̆ jòng ro Yàng Tom Trồ lah:

14“Gơklŏ ngan Yàng Tom Trồ ơm hơđang tap trồ jòng rlau jơh,

Ring lơngai tòm ù ai cau geh nđàc in niam nùs Kơnràñ.”

15Tŭ ală cau gơnrơh neh lòi bol khai mơ guh rê hơ lơgar trồ rau, ală cau ê belàt đơs bal lah: “Heh! Bol he lòt lă tus hơ Betlehem nàng sền broă neh gơlik gơs mơ Yàng ai bol he in git.” 16Chòp bol khai sơrbac sơrbang lòt tus tềng hơ̆, gŏ Mari, Jôsep, mơ oh nga bic tòm bòng ñhơt. 17Neh gŏ behơ̆, gen bol khai yal wơl ală jơnau neh yal bol khai in bơh kòn dềt hơ̆. 18Jơh ală cau lơi kơno jơnau cau ê belàt yal wơl, gen ai lơh krơi ngan. 19Ai Mari gen prap ală jơnau hơ̆ mơ kơlôi sơnơng tòm nùs. 20Ală cau ê belàt rê wơl, lơh àng sơnđan mơ jòng ro Yàng Tom Trồ bơh ală bơta bol khai neh kơno mơ gŏ, tòm toh be jơnau neh yal bol khai in.

21 # Leb 12:3; Luk 1:31. Tơl phàm ngai rau, gen pal siat gơltau kòn dềt in, mơ tơmoh sơnđan la Jesu, hơ̆ la sơnđan cau gơnrơh neh tơmoh lài mơ tŭ bun Kơnràñ tòm kơndul mè.

Bơta ơn Yàng Jesu tòm hìu duh khoai

22Tòm tŭ ală ngai lơh bơta sàng goh jat be bơta boh lam Môise neh sir rau, gen bol khai cèng Kòn Dềt tus hơ Jerusalem nàng ơn Yàng in, 23#Lik 13:2,12.(be neh cih tòm bơta boh lam Yàng dê lah: “Jơi dam lơi ƀlong sò lài pal ơn is Yàng in”), 24#Leb 12:6-8.mơ ơn phan duh khoai jat be bơta boh lam Yàng neh sồr, la dô yô ntòp hala bàr nơm kòn ntòp hui.#2:24 Cil: ntờp trưm.

Bơta jòng ro Simeôn dê

25Mơ tai, tòm Jerusalem gơs dô nă cau klau sơnđan la Simeôn, la cau song ring mơ duh rngòt, kơp gơn bơta pơndòm pơniang Israel dê, mơ Yàng Hwềng Goh ơm hơđang khai. 26Khai neh gơs Yàng Hwềng Goh yal tơlik is lah, khai rơp ò chơt lài mơ tŭ gŏ Bơtau Krist Yàng dê. 27Khai gơs Yàng Hwềng chồl mut tòm hìu duh khoai; tòm tŭ mè bèp cèng kòn dềt la Jesu tus, nàng lơh Kơnràñ in jat bơta òs mòng bơta boh lam dê, 28gen khai kơnđu kòn dềt mơ jòng ro Yàng Tom Trồ lah:

29“Khoai Yàng, tŭ do dan Yàng ai dĭ gơna Yàng dê chơt lơngap lơngai,

jat be jơnau Yàng;

30Bơh mat añ neh gŏ bơta dong klàs Yàng dê,

31Mơ Kơnràñ neh rcang sir di đap jơh ală làng bol,

32 # Esai 42:6; 49:6; 52:10. hơ̆ la bơta àng yal tơlik làng bol bơdìh in,

mơ la bơta gơklŏ làng bol Israel Kơnràñ dê.”

33Mè bèp Kơnràñ ai lơh krơi bơh ală jơnau ồng Simeôn neh đơs bơh Kơnràñ. 34Gen Simeôn ai lơngai bol khai in, mơ đơs mơ Mari mè Kơnràñ lah: “Do, kòn do neh geh bơtào gơs nàng lơh oă cau tòm Israel in gơtup pừ#2:34 Cil: sơndac kơbồng. hala tơngguh wơl, kung lơh dô nơm tềl gơkòl tòmdră wơl. 35Ai ai, gơs dô nơm đào rơp srơp bluh hwềng soàn ai, nàng bơta kơlôi tòm nùs oă cau dê geh ràng tơlik.”

Cau gơnoar hwơr ùr Anne jòng ro Yàng

36Gơs cau gơnoar hwơr ùr Anne, kòn ùr Phanuel dê, jơi bơtiàn Aser, neh jòng sơnam ngan; bơh di tŭ neh bau ơm bal mơ bau klau tòm poh nam, 37mơ do neh ơm bơnrau phàm jơt poan nam rau. Mò ò gơs tŭ lơi lik bơh di hìu duh khoai, ngai mơ mang kư̆ duh broă Yàng, ơt sào mơ hòi dan. 38Di di tŭ hơ̆, mò kung guh tềng hơ̆, jòng ro ưnngài Yàng Tom Trồ, mơ tòmbơhbơr bơh Kơnràñ mơ ală cau kơp gơn bơta dong tă Jerusalem.

39 # Mat 2:23. Dơ̆ Jôsep mơ Mari neh lơh tơl ală broă jat bơta boh lam Yàng dê rau, gen rê wơl hơ Galile, hơ ƀòn dờng tòm bol khai dê la Nasaret. 40Kòn dềt rhòi dờng, sơlo pràn kơldang, bềng lìu bơta jak chài, mơ bơta nđàc Yàng Tom Trồ dê ơm hơđang Kơnràñ.

Yàng Jesu tòm tŭ jơt bàr nam

41 # Lik 12:1-27; Yalw 16:1-8. Mơ tai, kòp nam tus di bơta pơjum sa Lòt gan, mè bèp Kơnràñ lòt tus hơ Jerusalem. 42Tòm tŭ Yàng Jesu gơs jơt bàr nam, jat òs mòng Kơnràñ lòt tus tòm bơta pơjum sa. 43Tŭ bơta pơjum sa jơh rau, bol khai sơntòm rê hìu. Kơnòm Jesu ơm wơl tòm Jerusalem, mơ mè bèp ò git, 44tồnlah Kơnràñ gơs bal tòm mpồl cau rê. Neh lòt dô ngai sồng jòi lùp digùl ală cau jơi bơtiàn mơ gơp ƀòn, 45mơya ò gŏ Kơnràñ, gen rê wơl hơ Jerusalem nàng jòi. 46Tơnơ̆ mơ pe ngai bol khai bàn Kơnràñ tòm hìu duh khoai, ơm nggui digùl ală cau bơto, iat ndang lùp ndang. 47Cau lơi kơno gen ai lơh crih crài bơh bơta jak chài mơ bơta ho Kơnràñ dê. 48Dơ̆ mè bèp gŏ Kơnràñ gen ai lơh crih crài ngan, mơ mè Kơnràñ lùp lah: “Ơ kòn, ñchi bơh tài mê lơh bàr nă bol hi in be do taih? Do, bèp kòn mơ mè neh kơlôi moat ngan mơ jòi kòn.” 49Yàng Jesu ho lah: “Ñchi bơh tài mè bèp jòi Añ taih? Mè bèp ò git Añ pal duh broă Bèp Añ ò ơ?”#2:49 Rct: Añ pal ơm tòm hìu Bèp Añ jê ò ơ? 50Mơya bol khai ò wă jơnau Kơnràñ đơs hơ̆.

51Lồc behơ̆ Kơnràñ mơ bol khai mù rê hơ Nasaret, mơ Kơnràñ dòn duh bol khai. Mè Kơnàñ prap ală jơnau hơ̆ tòm nùs.

52 # I Sam 2:26; Pơnđik 3:4. Yàng Jesu sơlo jak chài, să jan sơlo dờng, sơlo niam nùs Yàng Tom Trồ mơ cau sơl.

Currently Selected:

Luka 2: KPM2018

Highlight

Copy