Luka 13

Kơno bơta rung rài, gơjrañ sang glài tĕ, chi ƀal ò gơlik plai

1Tòm tŭ hơ̆ gơs ală cau ơm tềng hơ̆ yal wơl Yàng Jesu in bơh broă Pilat neh tơnchơt ală cau Galile, ai mhàm ală cau hơ̆ bơcă bal mơ phan ơn duh khoai bol khai dê. 2Kơnràñ ho lah: “Bol mê kơlôi lah ală cau Galile hơ̆ gơs glài rlau mơ ală cau Galile ndai sơl, gen tàng pal kong jê sồt behơ̆ ơ? 3Añ đơs mơ bol mê, ò di; mơya dilah bol mê ò gơjrañ sang glài, gen jơh tơl nă bol mê kung rơp roh rui behơ̆ sơl. 4Hala jơt phàm nă cau kòl gơlang jòng Silôe tơrlah gơklơn chơt ne, bol mê kơlôi bol khai gơs glài rlau mơ ală cau ndai ơm tòm Jerusalem ơ? 5Añ đơs mơ bol mê, ò di; mơya dilah bol mê ò gơjrañ sang glài, gen jơh tơl nă bol mê kung rơp roh rui behơ̆ sơl.”

6Kơnràñ đơs pơnyơu do: “Dô nă cau ne gơs dô nơm chi ƀal tam tòm suơn khai dê, tus jòi plai mơ ò gŏ, 7gen đơs mơ cau sền gàr suơn lah: ‘Ne, neh pe nam do, añ lòt tus jòi plai di chi ƀal do mơ ò gŏ. Kơl tĕ gơ; ñchi bơh tài lòi gơ tìm gòi ù#13:7 Cil: gơdìn ù. behơ̆ taih?’ 8Cau sền gàr suơn ho lah: ‘Ơ ồng, dan lòi wơl dô nam do tai, gơn añ tò gùt dar mơ ơn phan pơnđồm ù, 9lòng sền tơnơ̆ gơlik plai sơl; dilah ò, gen ồng rơp kơl.’”

Yàng Jesu sơmbòi cau kòp jê tòm ngai Saƀat

10Gơs dô ngai Saƀat, Yàng Jesu bơto sồr tòm dô nơm hìu jum. 11Ne, gơs dô nă cau ùr gơkòl cà lơh, kòp jê tòm jơt phàm nam, khun but ò rgơi ntào song. 12Dơ̆ Yàng Jesu gŏ khai, gen hòi mơ đơs lah: “Ơ kòn ùr, ai geh lik klàs bơh di bơta kòp jê rau.” 13Kơnràñ ơn tê di să khai, chòp khai ntào song mo mơ jòng ro Yàng Tom Trồ. 14#Lik 20:9-10; Yalw 5:13-14.Tài bơh Yàng Jesu neh sơmbòi tòm ngai Saƀat, gen cau dong gàr hìu jum gơjrañ, đơs mơ làng bol lah: “Gơs prau ngai cau pal lơh broă; behơ̆ tus tĕ tòm ală ngai hơ̆ nàng geh sơmbòi, bañ tus tòm ngai Saƀat.” 15Mơya Yàng ho mơ khai lah: “Ơ cau ma blac! Kòp nă tòm bol mê tòm ngai Saƀat ò di hồ kơnrồ hala alàng he dê lik bơh bòng ñhơt mơ tề gơ lòt hùc dà ò ơ? 16Tơ ài lah cau ùr do la kòn sau Abraham dê, mơ cà Satan neh kơt cap tòm jơt phàm nam do, ò di la ò hồ toh khai bơh di che cap hơ̆ tòm ngai Saƀat ò ơ?” 17Kơnràñ đơs ală jơnau hơ̆ gen ală cau sò tơm di Kơnràñ ƀàssìl jơh, ai jơh mpồl làng bol hòn chò bơh jơh ală broă crih crài Kơnràñ neh lơh.

Pơnyơu bơh gar sơbê mơ kañ

(Mathiơ 13:31-33; Mak 4:30-32)

18Behơ̆ Kơnràñ đơs lah: “Lơgar Yàng Tom Trồ tòm toh be bơta lơi taih? Añ pal pơndròm mơ bơta lơi taih? 19Lơgar hơ̆ pơndròm be dô gar sơbê mơ cau ne ai sih tòm suơn khai dê: gơhòn, gơlik dô đòm chi dờng, ală sềm ơm hơđang ntê gơ.”

20Kơnràñ đơs tai lah: “Añ pal pơndròm lơgar Yàng Tom Trồ mơ ñchi lơi taih? 21Lơgar hơ̆ pơndròm be kañ mơ cau ùr ne ai bơcă tòm poan jơt lit jơl tus di tŭ kơmbuh phe gơprồ làm jơh.”

Mpồng wềt

(Mathiơ 7:13,14, 21-23)

22Kơnràñ lòt làm ală ƀòn dờng ală ƀòn dềt, bơto ndang lòt ndang hơ Jerusalem. 23Gơs cau đơs mơ Kơnràñ lah: “Ơ Yàng, gơs mìng dô êt cau geh dong klàs ơ?” Kơnràñ ho mơ bol khai lah: 24“Pơnđơl tĕ jơh pràn mut tòm mpồng wềt, bơh Añ đơs mơ bol mê, oă cau rơp jòi gùng kòñ mut mơ ò rgơi. 25Dơ̆ cau tòm hìu guh mơ til mpồng rau, bol mê ntào đah bơdìh, teh mơ hòi lah: ‘Ơ Yàng, dan pò bol hi in.’ Kơnràñ rơp ho lah: ‘Añ ò git bol mê bơh ntềng đah tus.’ 26Tŭ hơ̆ bol mê rơp đơs lah: ‘Bol hi neh sa ñô di đap Kơnràñ, mơ Kơnràñ neh bơto sồr tòm ală gùng ƀòn dờng bol hi dê.’ 27#Đơs Crih 6:8.Kơnràñ rơp ho tai lah: ‘Ơ jơh ală bol mê la cau lơh bơta iơh bơsak, Añ đơs mơ bol mê, Añ ò git bol mê bơh ntềng đah tus; lik lòt tĕ bơh di añ!’ 28#Mat 22:13; 25:30.#Mat 8:11-12.Tŭ hơ̆, bol mê gŏ Abraham, Isak mơ Jakôp bal mơ jơh ală cau gơnoar hwơr ơm tòm lơgar Yàng Tom Trồ, ai bol mê gen kong sang sơrbì hơ bơdìh; gen bol mê rơp ñìm rac mơ rkiat sề. 29Bơh đah mattơngai lik, đah mattơngai mut, đah đơm, đah đang bol khai rơp tus nàng nggui sa tòm lơgar Yàng Tom Trồ. 30#Mat 19:30; 20:16; Mak 10:31.Ngan behơ̆, gơs cau lồi dut rơp gơlik gơs cau sơnròp, cau sơnròp rơp gơlik gơs cau lồi dut.”

Yàng Jesu yal lài bơh Kơnràñ mơ Jerusalem

(Mathiơ 23:37-39)

31Di di jơ hơ̆ gơs dô êt cau Pharisi lòt tus yal mơ Kơnràñ lah: “Lik tĕ bơh tềng do, bơh Herôt kòñ tơnchơt Kơnràñ.” 32Kơnràñ sồr bol khai lah: “Lòt tĕ yal mơ pì òng hơ̆ lah: ‘Do, Añ bơtrơh tơlik cà, sơmbòi bơta kòp jê ngai do, ngai hìng, tus di ngai pe gen Añ geh wil tơl. 33Bulah behơ̆, ngai do, ngai hìng mơ ngai hìng nau Añ kư̆ pal lòt, bơh ò gơs tŭ lơi dô nă cau gơnoar hwơr kong tơnchơt di bơdìh Jerusalem.’

34Ơ Jerusalem, Jerusalem, mê tơnchơt ală cau gơnoar hwơr, cơm lŭ di ală cau kong sồr lòt tus hơ mê! Oă dơ̆ Añ kòñ pơjum tơrgòm ală kòn sau mê be iar me ngkrok ală kòn gơ tus hơđơm đar gơ dê, mơya bol mê ò bài! 35#Đơs Crih 118:26.Do, hìu bol mê dê rơp lòi srau gòi. Añ đơs mơ bol mê, bol mê rơp ò gŏ Añ tai, jơl tus di tŭ bol mê rơp đơs lah: ‘Lơngai Bơtau ai sơnđan Yàng mơ tus!’”

Currently Selected:

Luka 13: KPM2018

Highlight

Copy