Luka 12

Yàng Jesu bơto sồr ală cau bơtê

1 # Mat 16:6; Mak 8:15. Tòm tŭ hơ̆ mpồl làng bol pơjum bal oă, rbô rhiang nă cau, tian gơs bol khai jă jơlềt bal mơ gơp, gen sơnròp ngan Yàng Jesu sơntòm đơs mơ ală cau bơtê lah: “Kơrhia tĕ bơh kañ cau Pharisi dê, la bơta ma blac. 2#Mak 4:22; Luk 8:17.Ò gơs bơta lơi pồn ndơp mơ ò gơ pò tơlik, ò gơs bơta lơi ndơp ndơr mơ ò rgơi git. 3Behơ̆ tàng, jơnau lơi mơ bol mê neh đơs tòm tiah jơngo gen rơp geh kơno tòm tiah àng, ai jơnau mơ bol mê neh đơs òm#12:3 Cil: đơs pơrlup. tòm ơdŭ ndơp, gen rơp yal tơlik hơđang rkàng hìu. 4Añ đơs mơ bol mê la oh mi bơyô Añ jê, bañ rngòt di cau tơnchơt să jan, gen tơnơ̆ ò rgơi lơh bơta lơi tai. 5Mơya Añ sơnio bol mê in git pal rngòt di ñcau: pal rngòt di Bơtau tơnơ̆ mơ tŭ neh tơnchơt să jan rau, kung gơs gơnoar sơrbì tòm brah tìng tai; ngan Añ đơs mơ bol mê, pal rngòt tĕ di Bơtau hơ̆! 6Pram nơm rac òs tac ò di la bàr su ơ? Mơya Yàng Tom Trồ ò gơs hŭi dô nơm lơi. 7Sŏ hơđang bồ bol mê kung neh kòp jơh rau. Bañ rngòt, bơh bol mê la màng rlau mơ oă rac.

8Añ kung đơs mơ bol mê, dilah cau lơi yal tơlik Añ di đap cau, gen Kòn mơnus kung rơp yal tơlik khai di đap cau gơnrơh Yàng Tom Trồ dê sơl; 9ai cau lơi pơndang sang Añ di đap cau, gen kung rơp kòl pơndang sang di đap cau gơnrơh Yàng Tom Trồ dê. 10#Mat 12:32; Mak 3:29.Dilah cau lơi đơs tòmdră di Kòn Mơnus gen rơp geh toh, mơya cau lơi đơs tràl sơrbil di Yàng Hwềng Goh gen ò geh toh ò. 11#Mat 10:19-20; Mak 13:11; Luk 21:14-15.Tòm tŭ cau hwài bol mê lòt tus hơ hìu jum, di đap cau kwang at bồ mơ cau gơs gơnoar, gen bañ kơlôi rcang pal mbe lơi hala jơnau lơi nàng tò să#12:11 Cil: pò să. he, mơ pal đơs; 12tài bơh di di jơ hơ̆ Yàng Hwềng Goh rơp bơto bol mê jơnau bol mê pal đơs.”

Bơta hàm hà

13Gơs dô nă cau tòm mpồl làng bol đơs mơ Yàng Jesu lah: “Ơ Cau Bơto, dan sồr bi añ tòmpà phan jơtài añ in, mơ mè bèp neh lòi wơl bol he in.” 14Mơya Kơnràñ đơs mơ khai: “Ơ cau ne, ñcau neh bơtào Añ lơh gơs cau kwang cahrña hala cau tòm pà phan bol mê in taih?” 15Gen Kơnràñ đơs mơ bol khai lah: “Kơrhia tĕ, mơ kơrmap gàr tĕ să he bơh jơh ală bơta hàm hà, bơh bơta kis cau dê ò di bơh gơs phan mơna tơngkah tơngkañ ò.”

16Kơnràñ đơs mơ bol khai dô jơnau pơnyơu lah: “Mìr sre cau pas sơm ne gơs oă ngan kòi. 17Khai kơlôi is lah: ‘Mbe añ kòñ lơh, bơh ò tơl tiah nàng prap ală kòi mbo añ jê taih?’ 18Gen khai đơs lah: ‘Do la broă añ rơp lơh: añ sòr ală hìu đam mơ lơh wơl dờng rlau, nàng prap jơh ală kòi mơ phan mơna añ jê tềng hơ̆. 19Añ rơp đơs mơ hwềng soàn añ lah: Ơ hwềng, mê neh gơs oă phan mơna prap lòi oă sơnam in; rlô bòl tĕ, sa, ñô, mơ chò hòp lă.’ 20Mơya Yàng Tom Trồ đơs mơ cau pas sơm hơ̆ lah: ‘Ơ cau bơrngơl gơla! Tòm mang do Añ rơp tă wơl hwềng soàn mê, gen ală phan mơna mơ mê neh rcang prap lòi rơp gơrê mơ ñcau taih?’ 21Cau lơi prap lòi phan mơna he in mơ ò pas gơs jat nùs kòñ Yàng Tom Trồ gen kung behơ̆ sơl.”

Bơta kơlôi rcang

(Mathiơ 6:24-34)

22Yàng Jesu đơs mơ ală cau bơtê lah: “Behơ̆ tàng Añ đơs mơ bol mê, bañ bơh bơta kis he dê mơ kơlôi rcang bơh phan sa, kung bañ bơh să jan he dê mơ kơlôi rcang bơh phan soh. 23Bơh bơta kis la màng rlau mơ phan sa, să jan la màng rlau mơ phan soh. 24Sền tĕ di ală kơnđà: Bol gơ ò sih ò toès, kung ò gơs bung drong hala đam jàr, mơ Yàng Tom Trồ ròng siam bol gơ; tơ ài lah bol mê màng rlau mơ ală sềm ò git nđò! 25Gơs cau lơi tòm bol mê bơh kơlôi rcang mơ bơtơl rài kis he in jòng rlau sơl ơ? 26Behơ̆ dilah broă dềt rhền rlau jơh mơ bol mê ò rgơi lơh, mbe bol mê rgơi kơlôi rcang bơh ală broă ndai taih? 27#I Bơtau 10:4-7; II Yal 9:3-6.Sền tĕ di ală bơkào hòn tòm ƀlàng be lơi: gơ ò bòl glar, ò rồi brài; mơya Añ đơs mơ bol mê, bulah Salômôn pas sơm kàr lơi, kung ò gơs soh be dô nơm tòm ală bơkào hơ̆. 28Behơ̆ dilah bơkào ñhơt tòm ƀlàng la jơi ngai do gam mơ ngai hìng sơrbì tòm bơnhă, mơ Yàng Tom Trồ tơnsoh bol gơ in behơ̆ sơl, tơ ài lah bol mê, ơ ală cau gơs dô êt bơta dòn ne! 29Behơ̆ gen bol mê bañ kơlôi rcang phan sa, phan ñô, kung bañ gơs nùs kơlôi rcang ir. 30Bơh jơh ală bơta hơ̆ ală làng bol tòm dunnia òs jòi jat, mơya Bèp bol mê git bol mê pal càng ală bơta hơ̆ rau. 31Mơya, jòi jat tĕ lơgar Yàng Tom Trồ dê, gen Kơnràñ rơp ai bơtơl ală bơta hơ̆ bol mê in.

32Ơ mpồl dềt, bañ rngòt, bơh Bèp bol mê niam nùs ai bol mê in lơgar. 33Tac tĕ phan bol mê nàng pà gòi; rcang tĕ he in kơldung priă ò klar siar, phan màng ò roh hơđang trồ, la tiah cau kơñau ò rgơi tus rềp, mŏ tu ò lơh ồm lề. 34Bơh phan mơna bol mê ơm tiah lơi, gen nùs bol mê kung ơm tềng hơ̆ sơl.”

Drơng kơp gơn Yàng

35 # Mat 25:1-13. “But bol mê pal kơt tĕ, đèng bol mê pal chu tĕ. 36#Mak 13:34-36.Lơh tĕ be cau kơp gơn cau tòm he rê bơh bơta ñô sa tòmbau, nàng tòm tŭ cau tòm tus, teh mpồng gen pò mo. 37Lơngai ală cau dĭ gơna hơ̆ in, dơ̆ cau tòm rê, gŏ bol khai ơm drơng kơp! Di ngan Añ đơs mơ bol mê, cau tòm rơp kơt but he, ai bol khai in nggui, mơ tus duh broă bol khai in. 38Dilah cau tòm hìu rê di di jơ drơng bàr hala jơ drơng pe#12:38 Pơgap sin jơ mang tus di pe jơ drim. Sền jơnau cih tòm Mat 14:25. mơ gŏ behơ̆, gen lơngai ală cau dĭ gơna hơ̆ in! 39#Mat 24:43-44.Git tĕ bơta do: dilah cau tòm hìu neh git tŭ lơi cau kơñau tus, gen drơng kơp ò lòi khai tò ƀlong hìu he. 40Bol mê kung pal rcang kơp tĕ, bơh Kòn Mơnus tus tòm jơ bol mê ò kah kơlôi.”

41Pier lùp lah: “Ơ Yàng, Yàng đơs pơnyơu do bol hi in, hala kung đơs tơl nă cau in sơl?” 42Yàng đơs lah: “Ñcau la cau at bồ hìu dòn song mơ jak chài, mơ cau tòm bơtào khai sền gàr ală cau tòm hìu, nàng tòmpà bol khai in phan sa di di jơ taih? 43Lơngai cau dĭ hơ̆ in tòm tŭ cau tòm tus gŏ khai lơh behơ̆! 44Añ đơs ngan mơ bol mê, cau tòm rơp bơtào cau hơ̆ sền gàr jơh ală phan mơna khai dê. 45Mơya, dilah cau dĭ hơ̆ đơs òm tòm nùs lah: ‘Cau tòm añ jê òbat tus,’ gen khai pù lơh ală dĭ klau dĭ ùr, mơ ñô sa bơñul lơmbè. 46Cau tòm khai rơp tus tòm ngai khai ò kơlôi mơ tòm jơ khai ò git, pù tac poac khai,#12:46 Rct: lơh glài khai kơnjơ̆ ngan. mơ tơmut khai bal mơ cau ò dòn song. 47Cau dĭ lơi neh git nùs kòñ cau tòm, mơ ò rcang, kung ò lơh jat nùs kòñ cau tòm dê, gen rơp kong pù lơh oă ngan. 48Ai cau ò git nùs kòñ cau tòm, mơ lơh broă ò pal lơh, gen kong pù dô êt. Bơh cau lơi geh ai oă, gen kong lùp wơl oă; mơ cau lơi geh jào oă, gen kong lùp wơl oă rlau.”

Ală bơta bơto sồr ndai

49“Añ neh tus tơndùh ồs tòm ù; ñchi bơta Añ kơp kòñ rlau tai dilah gơ neh hìt rau! 50#Mak 10:38.Mơya gơs dô bơta ƀaptem Añ pal kong, nùs Añ jê sồt oă ngan jơl tus di tŭ broă hơ̆ gơlik gơs wil tơl. 51Bol mê kơlôi Añ tus nàng cèng bơta ring lơngai hơđang ù ơ? Añ đơs mơ bol mê, ò di, mơya cèng bơta cah is. 52Bơh do jơl hìng nau, pram nă cau tòm dô nơm hìu rơp tòmcah is, pe nă tòmdră mơ bàr, bàr nă tòmdră mơ pe. 53#Mice 7:6.Bol khai rơp tòmcah is, bèp tòmdră mơ kòn klau, kòn klau tòmdră mơ bèp, mè tòmdră mơ kòn ùr, kòn ùr tòmdră mơ mè, po me tòmdră mơ ƀan, ƀan tòmdră mơ po me.”

54Kơnràñ đơs tai mơ mpồl làng bol lah: “Dơ̆ bol mê gŏ puk mhwal#12:54 Cil: kơntoal sơntŭ. guh bơh đah mattơngai mut, gen đơs mo lah: ‘Rơp gơs mìu,’ gen gơs ngan behơ̆. 55Dơ̆ tus càl bơh đah đơm, gen bol mê đơs lah: ‘Rơp duh trơàl,’ gen gơs ngan behơ̆. 56Ơ ală cau ma blac, bol mê git sền đal bơta gơtòmgơl trồ tiah dê; mbe gơlơh ò git sền đal tŭ tơngai do taih? 57Ñchi bơh tài bol mê kung ò git sơwì is nền bơta lơi la song taih?

58Tòm tŭ mê lòt bal mơ cau yă mê tus hơ cau kwang cahrña, rò gùng pơnđơl tĕ lơh gơtòmsòr niam mơ khai, rngòt khai hwài mê tus hơ cau kwang cahrña, cau kwang cahrña jào mê tòm tê cau at bồ hìu jàm, mơ cau at bồ hìu jàm tơmut mê tòm hìu jàm. 59Añ đơs mơ mê: Mê ò geh lik klàs bơh tềng hơ̆ jơl tus dê tŭ tơm jơh, ò siơ̆u dô su lơi.”

Currently Selected:

Luka 12: KPM2018

Highlight

Copy