Luka 21

Yesu wa Kuna Vu̱rti nu̱ Ku̱du̱w Nokhzi nggur Shiki

(Mar 12:41-44)

1Yesu a mbu̱ nggu̱ti tu̱ na nu̱ gu̱narku nu̱ke a sa vu̱rti ɓaanda nu̱ mbu̱ du̱ɓ zakyang, 2tu̱ yang na ku̱du̱w nggur tu̱k nu̱ke nungndan wa sa mu̱zhindi ye vi wor rap nu̱ke nu̱ khu̱l kobo da ɓa. 3Tu̱ Yesu zu̱ za, “Zhire nga zu̱ran ye nu, ku̱du̱w nokhzi nugunkandi nang wa vu̱r ɗyi nu̱ dukki ɓu̱ ɓeeni ndukyang kap. 4Ku̱me nduki nang vu̱r mbu̱ gu̱nar nu̱ke a kha wora, yang nokhzi nang mbe nungndi ɓaran wa vu̱r ɗyi nu̱ke a kha nda ɓar kap, yang nang ke ba ɗye khar viti ɓaran.”

Lauɗarsi Qaandi Virkiri

(Mat 24:1-2; Mar 13:1-2)

5Tu̱ yang ɓeena nduki ki ɓalar ɗyine du̱ndi Rafti ɓu̱ Maghamang, a wuɗ pooni koɗmar nu̱ shiki yenda ndu̱ ndogdiku mbarkandi ndu̱ poona ɗyiku zum zum nu̱ nduki vu̱rki tu̱ san ve du̱ndang. Tu̱ Yesu ze wor tu̱k za, 6“Sarchi a ɓar nu̱ke ka ɓa gu̱ɗaki ɗyi nu̱ke tun a naran nang nu̱gha ru̱m, ku̱me ndogda nje nu̱ke ka ɓa njigki nu̱ ɗyine mu̱dlen ɓa.”

Nggarsi Bonye

(Mat 24:3-14; Mar 13:3-13)

7Tu̱ zham nda ku za, “Maalu̱m, ɗyinang ka shi kochiya? Mbu̱ sarchi shir ɓu̱ ɗyiku nang wa shi chem ka nan ve nu̱ma?”

8Tu̱ Yesu tlogha ye wor za, “Ku̱r ma va nu, ku̱me ku̱ nduk lamba nu ɓa. Nduki khang ka ɗa ɓa ku mbu̱ dlu̱ma a zu̱ran ku za, ‘Wor ke nga,’ yang, ‘Sarchi wa shi bing.’ Sar da mbu nu wor ɓa. 9Mbu̱ tun wa tu̱k labar dakhlar ku ndu̱ ɗye ku̱zharku, tu̱k nu sawa tun ngga jiimbonu nu gha ɓa, ku̱me, ɗyinang ka shi kap, yang lauɗar si qaandi virkirang na ɓa dong ɓa.”

10Tu̱ gaɓ tu̱ ze wor za, “Ghai ka nggu̱ɗ nu̱ ve ghai ndu̱ dakhlari, tu̱ kwaaɗar nggu̱ɗ nu̱ ve kwaaɗa. 11Ka ɓa shi yakhtar maa vu̱ghai maɗyikandi ye maaku zum zum kom ndu̱ meeri ndu̱ bonye ye maaku khang. Ɗye ku̱zharku khang ka ɗatli ndu̱ ɗye saiduku mu̱na viɗi.

12“Yang me ku̱ ɗyiku nang shi kap, ka ku̱sonu tu̱ vu̱r bonye ye nu, ka ɗu̱ ndu̱ zhaano ɓaanu gume maa tabarku, tu̱ khiiro nu gha mbu̱ zhaaru̱m. Tu̱ ɗu̱ ndu̱ tun gume kujiku ndu̱ nu kwaaɗarku, yang ka shi ɗyiku nang ye nu kap ku̱me nga. 13Ɗyi nu̱ke ka shiki ku ye nwang ka vu̱rki zalale tu̱ kha ma njiv saida nga. 14Yang sa ma ye memu̱na nu nu̱ ɗawi nu̱ ɗyine tun ɓu̱ damta ndu̱ ɗyi nu̱ke tun ka zu̱ki ma lawa ɗyinonu ɓa. 15Ku̱me nga vu̱r ɓalarku ndu̱ kaɗari ye nu nu̱ke nduk a nje chele ɓu̱ nu̱ zhangndi ɓaanu nu̱ke ka ɗu̱maki mbu̱m ɓalar ɓaanu nu̱ gha tu̱ keela ɗyi nun zu̱ki ɓa. 16Aa mankir ɓaanu ndu̱ zhinkir ɓaanu ndu̱ khachinkirku ndu̱ kheetiku ndu̱ raptikirku ɓaanu ka vu̱rto nu ɓara, tu̱ sa ku̱ tlagha ɓeenan ku chele ɓaanu. 17Aaki ka zhangndo nu ku̱me nga. 18Yang aa ghosi ɗyinonu yen da ɓu̱ sagha ɓa. 19Mbu̱ tun wa gu̱n memu̱na nu nyifi ɓaanu ka ɗana.

Nggu̱di ɓu̱ Urshalima

(Mat 24:15-28; Mar 13:14-23)

20“Sarchi nun naki sojeku wa kara Urshalima zu̱n ma nu̱ gha gu̱ɗar ɓaran a shi bing. 21Yang, ku̱ nduki nu̱ Yakhudiya ɗan mbu̱ dlengkwang, tu̱ nduki nu̱ke a mbu̱ ghai Urshalima ɗan dam, yang tu̱k, ku̱ nduki nu̱ke a mbu̱ gurekwang a vi nu̱ mbu̱ ghai Urshalima ɓa. 22Ku̱me nang ke sarchi shokhnar ɓu̱ Magham ma nyel ɗyi nu̱ bu̱lakyang kap. 23Nusuku nu̱ ghu̱rɓandi ndu̱ nu̱ vu̱rti ɓiɓi ɗya ɗye zhiyaye ku ye sarchi nang, ku̱me bonye maɗyikandi ka ɗa vi nu̱ mbu̱ ghayang. Shokhnar ɓu̱ Magham ka ɗa ɓa ɗyine nduki nang. 24Ka tlagha ɓeena nduki mbu̱ dakhlarang, tu̱ ru̱k nu̱ ɓeena nduki nu̱ ku̱ski wor nu̱ mbu̱ ghaiku zum zum ma khar maava. Nduki nu̱ke ɗya Yakhudeku ɓa ka vu̱r bonye ye ghai Urshalima kope sarchi ɓaanda wa nyedli.

Gaɓti ɓu̱ Masiya Kuji Datkandi ɓu̱ Magham

(Mat 24:29-31; Mar 13:24-27)

25“Nduki ka na ɗye sawar ku zum zum ve fu̱ɗar ndu̱ chere ndu̱ anjinjeku. Nduki nu̱ larji ka ku̱zha ku̱me pooni kubti ndu̱ me yirti nu̱ke ɗyim chitndi ku ka ɓa ki shiran. 26Nduki ka mugan ku ku̱me sawar nar ɗyi nu̱ke a ɗaatli mbu̱ larji. Jiimbi nduki ka ji ku̱me ka yakhta ɗyi gwaanjiku nu̱ke a mu̱na viɗi. 27Kom ka na Yi ɓu̱ nduk a ɓar mbu̱ ku̱zapti ndu̱ zalale ndu̱ zhaaji maɗyikandi. 28Mbu̱ tun wa na pooni ɗyiku nang a shiri, kosa ma va nu nu̱ gha mbari ku̱me sarchi ɗanar ɓaanu a shi bing.”

Shogar ɗyine Qu̱far Suga

(Mat 24:32-35; Mar 13:28-31)

29Tu̱ Yesu wuɗ ye wor mbe ku̱rti ɓalar nang za, “Nggu̱t ma qu̱far sugari ndu̱ ɓeena qu̱farku ɓa. 30Ba mbu̱ wa nggaasi zha dlu̱mndi mewakandi, tun nu̱ va nu tun wa zu̱n za nomandi wa shi bing ɓari. 31Wanang tu̱k, mbu̱ tun wa na ɗyiku nang a shiri, zu̱n ma nu̱ ɗyine kwaaɗar ɓu̱ Magham a shi bing.

32“Nga zu̱ zhire ye nu, nduki nu̱ qaandi virkir nang ɓu̱ mu̱ɗku ɓa kope ɗyiku nang kap wa nyedli. 33Maa viɗi ndu̱ maa vu̱ghai kap ka pasha, yang sar da ɓalar ɓang ɓu̱ pasha ɓa.

Khar ndu̱ Daasari

34“Tun ku̱s va nu ye yen, ku̱me ku̱ khang kwaari ndu̱ zu̱mndi ndu̱ zari ndu̱ me kuya ndu̱ damtarku nu̱ mbu̱ larji nang nyigla nu ɓa. Ma ku̱ fu̱ɗar nang ɓa ruuma nu ruuma wa shaanggir ɓa, 35Ji fu̱ɗar nang ka ɗa ɓa nu̱ ɗyine aaki mbu̱ larji nang. 36Tun kha daasaran ɗo, tun a barar aakochi ku̱me gwa nu du̱mbu̱r lawar mbe ɗyiku nu̱ke a ma shir nang, tun ɗu̱ma chingndi gha gume Yi ɓu̱ Nduk tu̱k.”

37Yang Yesu wa ka shi shogar mbu̱ Rafti ɓu̱ Magham aa nyi fu̱ɗa, mbu̱ mugdi wa shi lu̱s, wa ka ɗu̱ ɗyine Dleng qu̱far Zaitun ta qan nje. 38Nu̱ dumaari ɗau, nduki kap wa ka ɗu̱ mbu̱ Rafti ɓu̱ Magham ma tu̱k nda.

Currently Selected:

Luka 21: ttrNT

Highlight

Copy