Luka 20

Zhamndi ɗyine Zalale ɓu̱ Yesu

(Mat 21:23-27; Mar 11:27-33)

1Sarchi ngguri, Yesu a mbu̱ mu̱na rafti ɓu̱ Magham a shogar ye nduki ndu̱ wopar labar mbarkandang. Tu̱ kuruku rututundi ndu̱ Maalu̱m Taurete ku ndu̱ dlegumeku ɓu̱ nduki a ɓa she nda za, 2“Nyi zalale kya kha ma shi ɗyiku nu̱ke ta shiran nang shoɗa? Zu̱ yerem, ki vu̱rki zalale nang yora?”

3Tu̱ Yesu tlogha ye wor za, “Bu shi nga zhamndi ye nu tu̱k tun zu̱ ya, 4Woɗye zalale baptisme ɓu̱ Yokhana a ɓa viɗi she Magham mu yang she nduku? Zu̱ ma ya tu̱k nga.”

5Tu̱ yang shi sawari chele ɓaanda a zu̱ran ku za, “Mbu chem wa zu̱ za, ‘A ɓa viɗi,’ ka zhamnderem za, ‘Yang nu̱m saki nyem maita nda ɓa?’ 6Yang mbu̱ chem wa zu̱ za, ‘Zalalya a ɓa she nduku,’ nduki nang kap ka mbukterem ndu̱ ndogdiku, ku̱me wa maita ku za Yokhana ɗya annabi.”

7Tu̱ tlogha ku za, “Nyem zu̱n ye maa na ɓa ki si ɓa.”

8Tu̱ Yesu zu̱ ye wor za, “Ngam ɓu̱ zu̱ zalale nu̱ke nga shi ɗyikunang ye nu si zum ɓa.”

Ku̱rti Ɓalar ndu̱ nu̱ Ghutiku Malkandi

(Mat 21:33-46; Mar 12:1-12)

9Tu̱ zu̱m guma ndu̱ zu̱r ku̱rti ɓalar nang ye ndukyang za, “Njif nggur a nje nu̱ paki dam qu̱far anap ku tu̱ yang vu̱r nu̱ mbu̱ khar nu̱ ghutiku tu̱ ɗu̱ varan mbu̱ ghai nggur ta qan khang njigi. 10Nu̱ zhurmaari shiki ta ru̱k maavi ɓaran nu̱ mbu̱ damang she nu̱ ghutikwang ma ku̱ ɗa dlu̱ ye qu̱far anapang yenda. Yang tu̱ nu̱ ghutikwang shi dlabti yenda tu̱ komba nda ɓara, nu̱ vu̱r aa nu̱m yenda ku ɓa. 11Tu̱ nu̱ damang ru̱k maavi ɓaran nggur tu̱k tu̱ nu̱ ghutikwang chiika nda tu̱ vu̱r palase yenda, tu̱ komba nda ɓar nu̱ vu̱r aa nu̱m yenda ku ɓa. 12Tu̱ nu̱ damang gaɓ tu̱ ru̱k maavi ɓaran nu̱ kunungan tu̱k, tu̱ nu̱ ghutikwang ruɓa nda nu̱ gha tu̱ ɗa mbuk nda nu̱ dam.

13“Kom tu̱ nu̱ damang zu̱ za, ‘Leendang ngga shikya nu̱m ɗo? Bu ru̱k nga woi ɓang nu̱ke nga ndolaran maɗyi bai ka na zhaaji ɓaranku.’

14“Yang ba ni nu̱ ghutiku nang naki woyang tu̱ shi ɓalar ndu̱ yen ku za, ‘Kwaanggu̱rang wonji njif nu̱ke damang ka ɓa khaki ma ɓaran, tlagha mi nda nu̱ gha, ku̱me damang ka ɓa kha ma ɓaarem.’ 15Tu̱ mbuk woyang nu̱ qu̱rse karar damang tu̱ tlagha nda nu̱ gha ku.

“Tun a tamandan nu̱ dam nang ka shikya nu̱m ye nu̱ ghutiku nang na? 16Ka ɗa ɓa tu̱ tlagha nu̱ ghutiku nang nu̱gha kom tu̱ vu̱r damang ye ndukiku nggur zum.” Nu̱ ndukyang tu̱kki wanang, tu̱ zu̱ ku za, “Magham nggu̱tli!”

17Tu̱ Yesu nja yitan nu̱ mbu̱ ɓaanda, kom tu̱ shi zhamndi za, “Yang ɓa, nu̱m kya mbu̱ ɓalar ɓu̱ Magham bu̱lakandang na? Nu̱ zu̱ki za,

‘Ndogdi ni nu̱ du̱ndikwang zhangki gha,

chin khaki ma ndogdi nu̱ dukki ndu̱

boota mbu̱ du̱ndang.’

18Kap njif nu̱ nggu̱ɗki nu̱ ɗyin ndogdi nang ka zha rukhub rukhub. Yang njif nu̱ ndogdi nang nggu̱ɗki nu̱ ɗyine nda ka khi nda nu̱ gha wa buɗuki.”

19Tu̱ Maalu̱m Taurete ku ndu̱ kuru rututundikwang laɓ njiv nu̱ke wor ka ku̱ski Yesu waare su̱bu̱rti sarchi, ku̱me wa zu̱n ku za ku̱rti ɓalar nu̱ Yesu zu̱kya a shiran ndu̱ wora tu̱ yang tu̱k sawar ɓu̱ ndukiku.

Zhamndi ɗyine Vu̱rti Zhaanggal ye Nggomne gwaanji Kaisar

(Mat 22:15-22; Mar 12:13-17)

20Nu̱ dle gumekwang saki yiti yenda ku, tu̱ ru̱k nduki nggur nu̱ke ka wuɗki ye Yesu wa wor nduki mbarkandi. A ɓa ku ma ku̱ shi zhamndi yenda ku ku̱me ku̱ Yesu zu̱ ɗyi galkandi nu̱ke ka saki nu̱ kwaaɗarku ɓaanda tu̱ ku̱si nda. 21Tu̱ nduki nu̱ ru̱kki wora ɗu̱ she Yesu nu̱ zhamndi za, “Maalu̱m, chem wa zu̱n ɓalar ɓaaro ndu̱ shogar ɓa ɗya zhire, yang ta da nduk kap ma wayen, ta shi kya shogar njiv zhirekandi ɓu̱ Magham ɓara aakochi. 22Yang ye nar ɓaaro wa shipa vu̱r mi zhaanggal ye Nggomne gwaanji (Kaisar) mu, yang auwo mu?”

23Yang nu̱ke Yesu wa zu̱n ghu̱rti ɓaanda, tu̱ ze wor za, 24“Wuɗ ma mu̱zhindi dinari ya. Shipar ɓu̱ ki ndu̱ dlu̱m ki kya nje bu̱laran ɗyinan kwa?”

25Tu̱ tlogha ku za, “Ɗya ɓu̱ Nggomne gwaanji (Kaisar).”

Tu̱ Yesu ze wor za, “Nu̱ke wanangang, vu̱r ma ɗyi ɓu̱ Nggomne gwaanji (Kaisar) ye Nggomne gwaanji (Kaisar) ɗyi nu̱ke ɓu̱ Magham tun vu̱r ye Magham.”

26Yang ku̱me nu̱ gwa ɗyi nu̱ke wor ka ku̱ski nda si gume ndukyang ɓa, tu̱ ɗyin wor ɓu̱tli, a lazham pooni tloghar zhamndi nu̱ shiki ye wora, kom tu̱ kha yit ku.

Zhamndi ɗyine Jiiri mbe Mu̱ti Fu̱ɗar Wuri

(Mat 22:23-33; Mar 12:18-29)

27Tu̱ ɓeena Sadukeku nu̱ka zu̱ki za jiiri mbe mu̱ti nje fu̱ɗar wur ɓa ndang a ɓa she Yesu. Tu̱ zham nda ku za, 28“Maalu̱m, annabi Musa wa bu̱lan gha za, ‘Mbu̱ nduk wa mu̱ɗ tu̱ njig nokhzan nu̱ gwa woi ku ɓa, ku̱ khachin ɓu̱r nokhzang ku̱me ku̱ gwa woi yenda.’ 29Yang khachinkirku nggur a nje wor mut. Tu̱ yang gwa ɓaanda mu̱ɗ tu̱ njig nokhzan nu̱ kha woi yenda ɓa. 30Tu̱ khachin nu̱ mbuuki nda ɓu̱r nokhzang tu̱ mu̱ɗ tu̱k nu̱ gwa woi ku ɓa. 31Tu̱ khachinkir nu̱ kunungndang ɓu̱r nokhzang tu̱k nu̱ wanang, nu̱ wanang tu̱ khachinkirku mutndi nang ɓu̱r nokhzang ku yang kap ɓaanda tu̱ mu̱ɗ ku nu̱ gwa woi ɓa. 32Qu̱rsan, tu̱ nokhzang mu̱ɗ tu̱k, 33yang ɗa, mbu̱ wa nakha mu̱tiku fu̱ɗar wuri, nokhzi nang ka kha kya ma nokhzi ki chele khachinkirku mutndang na? Nu̱ke kap ɓaanda wa ɓu̱rti nda ku?”

34Tu̱ Yesu tlogha, ye wor za, “Mbu̱ qaandi virkir nang nduki wa ka shi ɓu̱rti tu̱ ɓu̱r ɓar tu̱k. 35Yang nduki nu̱ khu̱lki ma gwa jiiri mbe mu̱ti ndu̱ khar mbu̱ fu̱ɗar naandang sar da ɓu̱ shi ɓu̱rti ku tu̱k ɓa, yang ɓu̱ ɓu̱r ɓar tu̱k zum ɓa. 36Sar da ɓu̱ mu̱ɗ ku tu̱k ɓa ku̱me nang ka kha wa nu̱ ru̱ktiku ɓu̱ Magham. Ka kha ma qusonggi ɓu̱ Magham ku̱me ɗya qusa jiiri mbe mu̱ti. 37Ɗyine ɓalar jiiri mbe mu̱ti nang, aa Musa ndu̱ ɗyinan wa wuɗ za ka nakha mu̱tiku mbu̱ labar qu̱far nu̱ ku̱ski ɓaiyang. Ku̱me lagarkati ɓu̱ Musa wa qa Magham za, ‘Chin ke Maghamndi ɓu̱ Yibram ndu̱ Maghamndi ɓu̱ Yishaku ndu̱ Maghamndi ɓu̱ Nyagham.’ 38Ɗya Maghamndi ɓu̱ mu̱tiku ɓa, ɗya Maghamndi ɓu̱ nu̱ nyifiriku. Nang a wutan yerem za she Magham aaki ɗya nu̱ nyifi.”

39Tu̱ ɓeena Maalu̱m Taurete kwa zu̱ za, “Maalu̱m, ta tlogha torop.” 40Gaanje nang, nduk a nje nu̱ ɗu̱maki zham nda ɗyi nggur tu̱k ɓa.

Yesu ɗya Zhinkir gwaanji ɓu̱ Dauda

(Mat 22:41-46; Mar 12:35-37)

41Tu̱ Yesu zham wor za, “Woɗye nu̱m saki tun ka qa Masiya kuji datkandi ɓu̱ Magham za zhikan Dauda na? 42Ai Dauda ndu̱ men wa zu̱ mbu̱ Lagarkati Zabura za,

‘Zhinkir gwaanji wa ze

Zhinkir ɓang gwaanji za,

“Khon tleebi zu̱me ɓanga.

43Kope nga sa nu̱ zhangndi ɓa

nu̱ mbu̱ saaro ro.” ’#20:43 Nggu̱t tu̱k mbu̱: Zab 110:1.

44Nu̱ke kuji Dauda wa qa Masiya kuji datkandi ɓu̱ Magham za, ‘Zhinkir ɓaran gwaanji.’ Yang Masiya ka kha ma zhikan kikimnda?”

Yesu wa Qu̱n si Maalu̱m Tauretekwang

(Mat 23:1-36; Mar 12:38-40; Luk 11:37-54)

45Ndukyang a mbu̱ gwa dlu̱mndi wor tu̱ Yesu mbu̱m nu̱ she nu̱ mburindakwang za, 46“Ku̱r ma vaanu ndu̱ Maalu̱m Taurete ku nang. Ku̱me wa ka shim sa lukti gwaanjiku ma baara maari si, ndu̱ ndolar ku̱ nduki shi wuse ye wor mbu̱ tabar nduki. Wa ka shim maa khar nu̱ke zhaaji a si mbu̱ kib tabar ɓu̱ Yakhudeku ndu̱ ye maa tabar zu̱mndi. 47Wor ke nu̱ zu̱m ɗyin me khar ku̱du̱w nusuku nu̱ rafti ɓaanda, kom tu̱ shi barar kirkandi ku ma wuɗ var wor ye nduki, yang ka gwa kumar maɗyikandi ku.”

Currently Selected:

Luka 20: ttrNT

Highlight

Copy