Luka 19

Zakka ndu̱ Yesu

1Tu̱ Yesu vi nu̱ mbu̱ ghai Jeriko, a peetar mbu̱ ghayang. 2Tu̱ gorkir ɓu̱ nu̱ dlu̱r zhanggalku nggur nu̱ke gu̱naran, dlu̱man za Zakka 3shim na Yesu. Yang nu̱ke ɗya nduk kuɗkumndi maɗyi, nu̱ ɗu̱ma na nda ɓa ku̱me ndukyang wa shi khang. 4Tu̱ yang Zakka ɗan guma tu̱ ɗa dlan mbu̱ qu̱far du̱ndakhle ngguri. Ku̱me wa zu̱n nu̱ke Yesu a ma mbuuri nje, yang mbu̱ aa ɓa ka na nda.

5Nu̱ Yesu khu̱lki nje tu̱ ghar yitan nu̱ viɗi tu̱ zu̱ za, “Zakka a pu̱r yaghai ɗau ɗau, ku̱me ngga zhur nu̱ kaa ɓaaro meeni.” 6Fan ndu̱ fan tu̱ Zakka, pu̱r yaghai tu̱ gaɗa Yesu ndu̱ kashari.

7Yang nu̱ ndukyang kap naki wanang, tu̱ nggaasi ruru ku a zu̱ran za, “Yesu wa zhur nu̱ kaa ɓu̱ nu̱ solar nang.”

8Tu̱ yang Zakka ji tu̱ ching gha tu̱ ze Zhinerem gwaanji za, “Zhinerem gwaanji tu̱ku! Ba fan meeni, ngga vu̱r bindi gu̱nar ɓang ye nu̱ nungndiku, mbu̱ yang nga shi batal ye njif nggur ɗyine ɗyi ngguri, ngga gaɓ ndu̱ khwaatan yenda sar vat.”

9Tu̱ Yesu ze nda za, “Meeni ɗanar a vi nu̱ mbu̱ rafti nang, ku̱me njif nang ɗya pooni ɓu̱ Yibram tu̱k. 10Jiwa wonji Yi ɓu̱ Nduk a ɓa ma laɓ nji nduki nu̱ saghaki, ku̱ ɗana wora.”

Ku̱rti Ɓalar ndu̱ Kulup Mu̱zhindi Gwang

(Mat 25:14-30)

11A mbu̱ tu̱kti ɗyiku nang, tu̱ zu̱m guma ndu̱ zu̱ ku̱rti ɓalar ye wor ku̱me wa shi bing ndu̱ Urshalima ku, yang nduki a tamandan za kwaaɗar ɓu̱ Magham ka nggaasan fan ndu̱ fan. 12Tu̱ Yesu ze wor za, “Mu̱shel nggur a nje nu̱ ɗu̱ki mbu̱ ghai nggur ɓakh ma zu̱m kujiri kom ku̱ ɗa gaɓi. 13Tu̱ yang qa maaviku ɓaran wor gwang me ku̱ peeta yirang, tu̱ vu̱r mu̱zhindi nu̱ khu̱lki ɓi tlu̱nar ɓu̱ nduk da me chere kunung ye aa nyi da chele maaviku ɓaranang. Tu̱ ze wor za ku̱ shi gomar ku si kope chin a gaɓi.

14“Yang ku̱me nduk ɓaranang a shim nda ku ɓa, tu̱ ru̱k nu̱ ru̱kti nu̱ gaanje nda nu̱ zoɓar za, ‘Nyem shim ku̱ njif nang kha ma kuji ɓaarem ɓa.’

15“Qu̱rse aa zu̱m kwaaɗarang, tu̱ ɗa gaɓ nu̱ kaari fan ndu̱ fan tu̱ qa maaviku ɓaranang ma tu̱k ɗyi nu̱ shiki ku ndu̱ mu̱zhindi nyin vu̱rki ye worang.

16“Nu̱ maavi nu̱ gumapaalyang a ɓa ki tu̱ ze nda za, ‘Gundi, nga gwa kulup mu̱zhindi gwang ɗyine kulup dandi ɓarang.’

17“Tu̱ nu̱ rafti ɓaranang ze nda za, ‘Wa shi mbari, maavi mbarkandi! Nu̱ke ta shi zhire ɗyine ɗyi koɗommandi nang, ngga vu̱r kwaaɗar yoro. To ka khaki ma kuji ɗyine ghaiku gwang mbu̱ wuzu̱ndi ɓanga.’

18“Nu̱ maavi nu̱ rapndang a ɓa ki, tu̱ ze nda za, ‘Gundi, kulup mu̱zhindi dandi ɓaarang aa ɓa ndu̱ kulup mu̱zhindi qurmun.’

19“Tu̱ nu̱ rafti ɓaranang tlogha yenda za, ‘Ngga sa ma kuji ɓu̱ ghai qurmun mbu̱ kwaaɗar ɓanga.’

20“Tu̱ yang da chele maavikwang a ɓa tu̱ ze nu̱ rafti ɓaranang za, ‘Gunndi, wonji kulup mu̱zhindi ɓarang, nga kolan gha mbu̱ ɓyakhti ngguzur kapar tang tuka gha. 21Ku̱me nga sawa ro, to nduk sharkandi, ta ka da ɗyi nu̱ke no du̱ng gha ɓa, to ku̱m ɗyi nu̱ke no kaɓ ɓa.’

22“Tu̱ nu̱ rafti ɓaranang tlogha yenda za, ‘To maavi malkandi ngga kuma viɗi ɗyine ɓalar no zu̱ki ndu̱ meero. Alapa ta daran za nga nduk sharkandi ku̱me nga ka da ɗyi nu̱ke nang du̱ng gha ɓa, tang ku̱m ɗyi nu̱ke nang kaɓ ɓa, 23yang nu̱m saki no du̱ng mu̱zhindi ɓang ya gha mbu̱ beetal ku̱me gwa nga tun ɗyinan ɓa?’

24“Tu̱ nu̱ raftang ze nduki nu̱ke a nje chingndan ye maaranang za, ‘Dlu̱ ma kulup mu̱zhindi dandang ɓar kha nda tun vu̱r ye njif nu̱ gwaki kulup mu̱zhindi gwang nu̱ ɗyine kulup mu̱zhindi dandi ɓaranang.’

25“Tu̱ ndukyang tlogha yenda za, ‘Gundi, kulup mu̱zhindi gwang nje kha nda.’

26“Tu̱ yang tlogha ye wor za, ‘Nga zu̱ran ye nu, kap njif nu̱ke tun a nje kha nda, ka shaata yenda nu̱ si, yang njif nu̱ke aa nu̱m kha nda ɓa, aa ɗyi nu̱ke a kha ndang, ka dlu̱ ɓara. 27Gaanje nang tu̱k, a ɓa ma ndu̱ nu̱ kareku ɓang nu̱ zhangki za ku̱ kha nga ma kuji ɓaanda ɓa ndu̱ nang ya fan, tun tlagha wor nu̱gha gumera nga naran.’ ”

Yesu wa Vi nu̱ mbu̱ Ghai Urshalima

(Mat 21:1-11; Mar 11:1-11; Ykh 12:12-19)

28Nu̱ Yesu du̱ngki su̱ ɓalar nang, tu̱ khan guma ma yir Urshalima, 29khu̱dli ɓaanda bing ndu̱ ghai Betapaji ndu̱ Betani nu̱ke a ku̱bdi Dleng qu̱far Zaitun. Tu̱ ru̱k nu̱ mbuuri nda ku wor rap za, 30“Vi ma nu̱ mbu̱ gure nu̱ke a gume nu nang. Ba tun a viiri, tun ka gwa ye kooro nggur gu̱ndan nje nu̱ke nduk nu̱ lu̱ba nda sar da ɓa, tun kol nda nu̱ gha tun a ɓa ndu̱ chin ya fan. 31Aaki zhamki nu za, ‘Nu̱m saki tun a kol koorwang na? Zu̱ma yenda nun za Zhinerem gwaanji a shim boote si.’ ”

32Nu̱ nduki nu̱ ru̱kki wora ɗu̱ki, ta gwa ba wa nu̱ Yesu zu̱ki ye wora. 33A mbu̱ kwatlan ku, tu̱ nu̱zhinkwang zham wor za, “Nu̱m saki tun a kol ye koorwang na?”

34Tu̱ tlogha ku ye wor za, “Zhinerem gwaanji a shim boote si.”

35Tu̱ ɗa ɓa ku ndu̱ koorwang ye Yesu, tu̱ lu̱pa luktiku ɓaanda nu̱ ɗyine nda tu̱ du̱ng Yesu nu̱ ɗyinan. 36Nu̱ke Yesu a peetar ɗyin koorwang, tu̱ ndukiku ki khu̱tla ɗye lu̱par ɓaanda nu̱ yiti njivang.#19:36 Lu̱pa lukti ɓaanda nu̱ ɗyine njivang Yakhudeku ka shi lale ye kuji gwaanji wanang mbu̱ a ɓar she wora. (2Kuj 9:13).

37Tu̱ Yesu khu̱l bing ndu̱ Urshalima, ye maa nu̱ njivang zhurki nu̱ vu̱ghai ɗyin Dleng qu̱far Zaitunang. Tu̱ nu̱ mburi nda ku khang da su̱qur wor nu̱ viɗi tu̱ nggaasi gor dlu̱m Magham a kasharku ku̱me ɗye lazhamku nu̱ naki kwang.

38Tu̱ ku̱s zu̱ran ku, za, “Barkya ve kuji nu̱ke a ɓar mbu̱

dlu̱m Zhinerem gwaanji,

qaandi memu̱nar a mbu̱ viɗi ndu̱ zhaaji

ye Magham nu̱ viɗi.”

39Tu̱ ɓeena Pariseku nu̱ke a mbu̱ tabar ndukyang ze Yesu za, “Maalu̱m, wu nu̱ mburoku nang ku̱ kha yit!”

40Tu̱ Yesu ze wor za, “Nga zu̱ran ye nu, aa wor nang wa kha yit ku, ndogdiku nang ka daa su̱qur wor nu̱ viɗi.”

Yesu wa Shi Ghoori ku̱me Urshalima

41Nu̱ shiki bing ndu̱ Urshalima, a na ɗyin ghayang, tu̱ shi ghoori nu̱ ɗyine nda 42a zu̱ran za, “To nang, tu̱ga meeni ta zu̱n ɗyi nu̱ke ka ɗa ɓa ki ndu̱ khar mu̱nkandi yoro, yang tom ɓu̱ na ɓa. 43Sarcha ɓar nu̱ke nu̱ zhangndi ɓa ku ka du̱nki garuk tu̱ kara si, tu̱ nggu̱ɗ nu̱ ve ndu̱ dakhlari, sojeku ka kara ve aa nyi maa, 44ka ruksha nu̱ yaghai mbu̱ garukku ɓaaro, to ndu̱ qusonggi ɓaaro. Ɓu̱ njig ndogdi da ɗyin mu̱dlen mbu̱ ndogdi du̱ndiku ɓaanu ɓa. Ɗyinang ka shi kap ku̱me no zu̱n sarchi nu̱ Maghamang ɓa ki ma ɗana ɓa.”

Yesu wa Komba nu̱ Gomarku mbu̱ Rafti ɓu̱ Magham

(Mat 21:12-17; Mar 11:15-19; Ykh 2:13-22)

45Tu̱ Yesu vi nu̱ mbu̱ Rafti ɓu̱ Magham tu̱ nggaasi komba nu̱ gomarku nu̱ke a masar mbu̱ Rafti ɓu̱ Magham ɓara. 46Tu̱ ze ndukyang za, “A nje bu̱laran za, rafti ɓang ɗya ye maa bara, yang tun wa gaɓsi ma gulang tukar nu̱ muuriku.”

47Tu̱ Yesu ki shogar aa nyi ɗaatli ma mbu̱ Rafti ɓu̱ Magham, yang kuruku rututundi ndu̱ Maalu̱m Taurete ku ndu̱ dlegumeku nu̱ke a chele ndukyang, ki konyi gwanda njiv nu̱ke wor ka tlaghaki nda. 48Yang nu̱ gwa njiv shiran ku ɓa ku̱me aakya shim tu̱k ɓalar ɓaran maɗyi.

Currently Selected:

Luka 19: ttrNT

Highlight

Copy