Luka 22
22
Ndukkudaandi wa Shi Sawari Tlagha Yesu
(Mat 26:1-5; Mar 14:1-2; Ykh 11:45-53)
1Sarchi tabar nji ɓurti tolir nu̱ke yis su̱ ɓa nu̱ka qaki za tabar peetar ɗyin aa shi bing. 2Yang kuruku rututundi ndu̱ Maalu̱m Taurete kwang laɓ njiv nu̱ke wor ka tlaghaki Yesu mbu̱ tuka ku̱me a sawa nduki.
Yakhuda wa Da Kuɗar Masar Yesu ɓara
(Mat 26:14-16; Mar 14:10-11)
3Tu̱ yang Sheɗan vi nu̱ mbu̱ memu̱na Yakhuda nu̱ka qaki nda za Iskariyoti nu̱ke ɗya da chele gwaanggu̱m rapndang. 4Tu̱ ji tu̱ ɗu̱ she kuru rututundiku ndu̱ gorkirku ɓu̱ nduki nu̱ka nggu̱tki rafti ɓu̱ Maghamang, ta shi sawari ku ɗyine njiv nu̱ke chin ka masaki Yesu ɓar ye wora. 5Tu̱ kasha ku tu̱ tlogha tu̱k za wor ka vu̱r mu̱zhindi yenda. 6Gaanje Yakhuda wa shi alqawar ye wora, tu̱ nggaasi kor njiv nu̱ke chin ka masaki Yesu ye wor ɓar waare zu̱ndi ɓu̱ nduki.
Yesu wa Daasa Zu̱mndi ɗye Zu̱mndi Tabar Peetar ɗyin
(Mat 26:17-25; Mar 14:12-21; Ykh 13:21-30)
7Tu̱ sarchi tabar nji ɓurti tolir nu̱ke yis su̱ ɓa a khu̱dli, yang nang ke fu̱ɗar nu̱ke ka dlaki qur gamndi sadke ma tabar peetar ɗyinang. 8Tu̱ Yesu ru̱k Biturus ndu̱ Yokhana za, “Ɗu̱ ma tun a daasa zu̱mndi tabar peetar ɗyinang yerem ma zu̱m mi su̱yen.”
9Tu̱ yang zham nda ku za, “Ta shim daasa mi nu̱ fu̱na?”
10Tu̱ Yesu tlogha ye wor za, “Ba tun a viri nu̱ mbu̱ ghayang, tun ka gama ndu̱ khuski nggur na daki duuli dar ɗyimi, tun mbuuri nda ma yir mbu̱ rafti nu̱ viki nu̱ nje. 11Tun ze nu̱ raftang nun za, ‘Maalu̱m a ru̱kki rem za, “A fu̱n ke kib runggi nu̱ke chin ka zu̱mki tabar peetar ɗyin ndu̱ nu̱ mburindakwang na?” ’ 12Ka wut du̱ndi dangkali ye nu nu̱ke kiba nje mban gori, yang mbanang kwaɗaran, tun daasa aa nu̱m nu̱ ye maaran.”
13Nu̱ ɗu̱ki ku ta gwa ɗyikwang ba wa nu̱ Yesu zu̱ki ye wora, tu̱ yang daasa ɗye zu̱mndi tabar peetar ɗyinang nu̱ nje.
Lauɗar Zu̱mndi ɓu̱ Yesu ndu̱ Pudekwang
(Mat 26:26-30; Mar 14:22-26; 1Kor 11:23-25)
14Nu̱ sarchi shiki tu̱ Yesu ndu̱ Pudeku ɓaranang kha gha ma zu̱m ɗye zu̱mndi tabar peetar ɗyin. 15Tu̱ yang Yesu ze wor za, “Nga shim zu̱m nga tabar peetar ɗyin nang ndu̱ tun me za nga bonye nang wa nu̱m gom. 16Nga zu̱ran ye nu, nga ma shi zu̱mndi tabar nang ndu̱ tun tu̱k ɓa, kope ɗyi nu̱ saki tu̱ ka shi tabarang wa nyel mbu̱ kwaaɗar ɓu̱ Magham.”
17Nu̱ daki ɗyekhti ɗyim qu̱far anap tu̱ shi kunar ye Magham, tu̱ zu̱ za, “Dlu̱ma nang, tun shakh nu̱ chele ɓaanu. 18Nga zu̱ran ye nu, nga ma za ɗye zar na viki ve ye qu̱far anap tu̱k ɓa kope kwaaɗar ɓu̱ Maghamang a ɓa.”
19Tu̱ da ɓurti tolirang tu̱ ɓakhla nu̱ gha, kom tu̱ vu̱r ye wor a zu̱ran za, “Nang ke shipar man vara, nu̱ vu̱rki ku̱me tunu, tun ki shiran wanang ma kwaari nga.”
20Tu̱ gaɓ tu̱k tu̱ da ɗyekhti ɗyim ye qu̱far anapang gaanje wa woɗa zu̱m ɗye zu̱mndi mbu̱ virkirang ba wa nu̱ shiki gumapaalyang. Tu̱ zu̱ tu̱k za, “Na ɗya shipar meewar alqawar mbu̱ tom ɓang nu̱ke a ma mbu̱ti ku̱me tunu. 21Yang wonji njif nu̱ke a ma masa nga ɓara a zu̱m ɗye zu̱mndi ndu̱ nga! 22Yi ɓu̱ nduk ka mu̱ɗ ba wa nu̱ke a nje zu̱ran, yang bonyang ɓu̱ njif nu̱ masaki nda ɓarang.” 23Tu̱ yang pudekwang ki zham yen ɗyine njif nu̱ke ka shiki poona ɗyinang chele ɓaanda.
Keele ɗyine ki ke Gor Chele ɓaanda
24Yang tu̱k, tu̱ keele gang chele ɓaanda nu̱ ɗyine ki ke gora? 25Tu̱ Yesu ze wor za, “Kujiku ɓu̱ nduki nu̱ke nu̱ zu̱n Magham ɓa, wa ka wuɗ kwaaɗar nu̱ ɗyine nduki ɓaanda, gorkirku ɓaanda tu̱k wa ka qa var wor za wor nu̱ shaatar nduki. 26Yang ku̱ nang ɗal chele ɓaanu ɓa. Ye nang, bu ku̱ njif nu̱ dukki gwaari chele ɓaanu kha wa woi koɗomma, tu̱ dle gume ɓaanu kha wa maava. 27Woɗye ki dukki gwaari chele njif nu̱ khaki gha ma zu̱m ɗye zu̱mndi ndu̱ njif nu̱ke a shakhtanang na? Nga za njif nu̱ke a zu̱m ɗye zu̱mnda ɓa goma? Yang wonji nga chele ɓaanu ba wa njif nu̱ke a shakh ɗye zu̱mndi. 28Tun chingki nu̱ su̱yen ndu̱ nga mbu̱ bonyeku nang zaki. 29Nga vu̱r zalale kwaaɗar ye nu leendang ba wa nu̱ Zhinkir ɓang vu̱rki ya. 30Ku̱me nang, tun ka zu̱m tun za su̱yen ndu̱ nga mbu̱ kwaaɗar ɓanga. Tun ka khan ɗyine zhakhɗyeku, tun a kuma me ghai gwaanggu̱m rapndi ɓu̱ Israila.”
Siman Biturus ka ɓa Keela za nyin Zu̱n Yesu ɓa
(Mat 26:31-35; Mar 14:27-31; Ykh 13:36-38)
31Tu̱ Zhinerem gwaanji zu̱ za, “Siman, Siman, nggu̱t ka, Sheɗan wa khuɗ ku̱ gwaanji nu chin zhaaror nu ɓar wa ye gawa. 32Yang nga shi barar yoro ma ku̱ maito ɓa kata ɓa. Mbu̱ ta nggoɗ ta gaɓ nu̱ sha yang, to ɓa vu̱r shokhku̱rokh me bu̱n ye nyeezoro.”
33Tu̱ yang Biturus nggam yenda za, “Zhinerem gwaanji, nga daasaran ma ku̱ khirerem gha zhaaru̱m su̱yen ndu̱ to. Mbu̱ a ma tlagha ku, buka ku̱ tlagha rem su̱yen.”
34Tu̱ yang Yesu tlogha yenda za, “Biturus, nga zu̱ran yoro, me ku̱ koogurokh shi mbaari meeni, to ka keela no za no zu̱ndi nga ɓa sar kunung.”
Daasa ma Vaanu ku̱me Bonye nu̱ke a ɓari
35Tu̱ Yesu shi zhamndi ye pudeku ɓaranang za, “Sarchi nang ru̱kki nu waare mu̱zhindi, ndu̱ kulup ndu̱ paghamndi tun wa mbu̱ɗ ɗyi nggur mu?”
Tu̱ tlogha yenda ku za, “Auwo, nyem mbu̱ɗ aa nu̱m ɓa.”
36Tu̱ Yesu ze wor za, “Yang nang ke sarchi nu̱ke njif nu̱ke mu̱zhindi a nje kha nda ku̱ da nu̱ me kharan, nu̱ kulup ku̱ da, njif nu̱ke kaskar kha nda ɓa, ku̱ masa lukti ɓaran ɓara tu̱ masa kaskar da. 37Nga zu̱ran ye nu, a nje bu̱laran mbu̱ lagarkati ɓu̱ Magham za, ‘Wa shiga nda nu̱ mbu̱ nu̱ solarku’ Yang kap ɗyi nu̱ zu̱ki nu̱ ɗyina ka nyedli. Wanang ni, ɗyi nu̱ annabikwang zu̱ki ɗyina kap a nyedli.”
38Tu̱ nu̱ mburindakwang zu̱ za, “Zhinerem gwaanji, wonji kaskar rap fan kha rem.”
Tu̱ Yesu tlogha ye wor za, “Ɓalarang wa kha wanang.”
Yesu wa Shi Barar ɗyine Dleng qu̱far Zaitun
(Mat 26:36-46; Mar 14:32-42)
39Tu̱ Yesu ɗu̱ ta dlan ɗyin Dleng qu̱far Zaitun ba wa nu̱ su̱nki ndu̱ shiran, tu̱ nu̱ mburi nda kwa tu̱k mbu gaanje nda. 40Nu̱ khu̱lki ku ɗyin dlengang tu̱ ze wor za, “Shi ma barari ku̱me nggu̱ɗ nun mbu̱ buuriku ɓa.” 41Tu̱ yang ɗu̱ konggol nu̱ke chele ɓaran ndu̱ wor ba wa mbukti ndooga, tu̱ kurum gha ndu̱ me purman, tu̱ shi barari a zu̱ran za, 42“Zhinkiri, mbu̱ ɗya shimndi ɓaaro, to da bonye nang ya ɓara. Yang shi na ya ku̱me nga shimndan ɓa, bu ku̱ shimndi ɓaara khan guma.” 43Tu̱ nu̱ ru̱kti ɓu̱ Magham a ɓa viɗi tu̱ pa du̱mbu̱r yenda. 44Yang ku̱me Yesu a mbu̱ bonye, tu̱ zu̱m guma ndu̱ barar maɗyikandi nu̱ke ku̱rku̱ɗyi ɓaranang a kuɗari wa tom a jiti yaghai.
45Nu̱ lauɗaki su̱ bararang, tu̱ ɗu̱ she nu̱ mburindakwang, tu̱ yang gwa wor a ɗyenir ku kha su̱bu̱rti memu̱na. 46Tu̱ Yesu zham wor za, “Tun a ɗyenir nu̱ma, ji ma nu̱ viɗi tun shi barari ku̱me nggu̱ɗ nu nu̱ mbu̱ buuri ɓa.”
Wa Ku̱s Yesu
(Mat 26:47-56; Mar 14:43-50; Ykh 18:2-11)
47A mbu̱ ɓalarang tu̱ tabar nduki a ɓa. Yang Yakhuda, da chele gwaanggu̱m rapndang kya gume wora. Tu̱ Yakhuda ɗu̱ she Yesu ma khaapa nda. 48Tu̱ Yesu zham nda za, “Yakhuda, alapa ta ma masa Yi ɓu̱ Nduk ɓar ndu̱ khaapa mu?”
49Nu̱ ni mburindakwang naki wanang, tu̱ zham nda ku za, “Zhinerem gwaanji shem boote ndu̱ kaskar kwa mu?” 50Tu̱ yang da chele ɓu̱ nu̱ mburindakwang ku̱m maavi ɓu̱ gorkir ɓu̱ kurukwang ve dlu̱mndan nu̱ zu̱ma tu̱ ku̱rta nu̱ gha.
51Tu̱ Yesu wu wor za, “Njig ma.” Tu̱ su̱ɓa dlu̱mndi khuskyang tu̱ shaana nda nu̱ gha.
52Tu̱ Yesu ze kuruku rututundi ndu̱ gorkirku ɓu̱ nu̱ nggu̱ti rafti ɓu̱ Magham ndu̱ ndukkudaandi na ɓa ki ma ku̱s nda za, “Tun a vi ndu̱ kaskarku ndu̱ saɓirku ma ku̱si nga wa nu̱ muuri? 53Yang nga su̱yen ndu̱ tun aakochi mbu̱ rafti ɓu̱ Magham nun ku̱si nga ɓa. Yang ba, nang ke sarchi ɓaanu, sarchi zalale ɓu̱ nu̱ kwaaɗarku nu̱ke a mbu̱ zhumi.”
Biturus wa Keela za nyin Zu̱n Yesu ɓa.
(Mat 26:57-58, 69-75; Mar 14:53-54, 66-72; Ykh 18:12-18, 25-27)
54Nu̱ ku̱ski Yesu ku, tu̱ ɗu̱ ndu̱ chin mbu̱ rafti ɓu̱ gorkir kurukwang. Tu̱ yang Biturus ki mbu wor gana gana ɓakh ndu̱ wora. 55Yang ni nu̱ nggu̱ti rafti ɓu̱ Maghamang piiki ɓai ku nu̱ mu̱na raftang, tu̱ kha gha ku a tu̱ku̱ndan, tu̱ Biturus kha gha ma tu̱ku̱ndan su̱yen ndu̱ wora. 56Nu̱ ye wonkhar nggur nu̱ke a tlu̱nar mbu̱ raftang naki nda kharan wudle ɓaiyang, tu̱ zu̱ yiti yenda njang dong, kom tu̱ zu̱ za, “Njif nang ɗya da chele ɓaanda.”
57Tu̱ yang Biturus keela za, “Nusu, sar da nang zu̱n nda ɓa.”
58Nu̱ shoɓki koɗom, tu̱ njif nggur tu̱k na Biturus tu̱ ze nda za, “To nduk da chele ɓaanda yo!”
Tu̱ Biturus tlogha za, “Khusku, sar da ɗya nga ɓa!”
59Nu̱ shoɓki nu̱ su̱ tu̱k, ba wa awe da ka, tu̱ khuski nggur tu̱k zu̱ za, “Njif nang shwat a su̱yen ndu̱ chin ku̱me ɗya khuzi Galili.”
60Tu̱ yang Biturus tlogha yenda za, “Khusku, ɓang nang da mbu̱ ɗyi nu̱ke ta zu̱ran nang aa da ɓa.” Nu̱ za men nu̱gha mbe ɓalarang ɓa, tu̱ koogurokh shi mbaari. 61Tu̱ Zhinerem gwaanji dambu̱r tu̱ nggu̱t Biturus njang. Tu̱ Biturus kor ɓalar nu̱ Zhinerem gwaanji zu̱ki yenda za, “To ka keela no za no zu̱ndi nga ɓa sar kunung me ku̱ koogurokh shi mbaari.” 62Tu̱ yang Biturus ɗu̱ dam tu̱ ɗa gho maɗyi.
Wa Zu̱ Ɓalar Ndu̱mndi ku ye Yesu tu̱ Dlab nda ku
(Mat 26:67-68; Mar 14:65)
63Tu̱ nu̱ nggu̱ti rafti ɓu̱ Magham ku nu̱ saki Yesu nu̱ mbu̱ bu̱n wora nggaasi zu̱ ɓalar ndu̱mndi yenda, tu̱ ku̱s dlab nda ku. 64Tu̱ gu̱n yitan nu̱gha ndu̱ ɗyi ngguri tu̱ ka zham nda ku za, “Ki ghwaɗ ki ra? Mbu̱ to nu̱ nar tun zu̱ yerem!” 65Tu̱ shi ɓalarku nu̱ ɗyine nda a pu̱zi nda ku.
Wa Ɗu̱ ndu̱ Yesu Gume Kwakhneku
(Mat 26:59-66; Mar 14:55-64; Ykh 18:19-24)
66Vi dumaaran, tu̱ tabar dlegumeku ɓu̱ nduki ndu̱ kuru rututundi, ndu̱ Maalu̱m Taurete ku vi ndu̱ Yesu gume tabar ɓaanda. 67Tu̱ zham nda ku za, “Zu̱ yerem to ke Masiya kuji datkandi ɓu̱ Magham mu?”
Tu̱ Yesu tlogha ye wor za, “Aa nga tlogha ye nu nga za, I, tun ɓu̱ maita nga ɓa. 68Yang mbu̱ nga zhamndonu tu̱k tun ɓu̱ tlogha ya ɓa. 69Yang ji ɗyin meeni, Yi ɓu̱ Nduk ka khan ɗyin bu̱n zu̱me ɓu̱ Magham nu̱ zalale aa nu̱m.”
70Tu̱ kap ɓaanda gaɓ tu̱ zham nda ku tu̱k za, “Yang ɗa, to Yi ɓu̱ Magham mu?”
Tu̱ Yesu tlogha san ye wor za, “Tun wa zu̱ ba torop ku̱me nga ke chin.”
71Tu̱ yang zu̱ ku za, “Chem a laɓkya nyi pooni saidu tu̱ka? Wonji wa zu̱ yerem ndu̱ men.”
Currently Selected:
Luka 22: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
