Luka 15

Ku̱rti Ɓalar ɗyine Ndu̱ɓang nu̱ Saghaki

(Mat 18:12-14)

1Sarchi ngguri, tu̱ nu̱ dlu̱r zhaanggalku, ndu̱ ɓeena nu̱ tlu̱nar solarku, ta ɓa ku ma tu̱k shogar ɓu̱ Yesu. 2Yang tu̱ Parisekwang su̱yen ndu̱ Maalu̱m Taurete ku, tu̱ ku̱s ba ruru mbu̱ memu̱na wor za, “Nggu̱t njif nang wa gonta ɗyinan ndu̱ nu̱ solar ku kap ndu̱ zu̱mndi ɗye zu̱mndi ndu̱ wora.”

3Tu̱ Yesu shi ku̱rti ɓalar ye wor za, 4“Mbu̱ nduk da chele ɓaanu ndu̱ɓangkwang nje kha nda wor won, yang tu̱ da sagha ɓar mbu̱ khutlori. Ai ka ɗa njig ɗyin mu̱dlam qu̱m mu̱dlamndang tabaran ve yen ye maa khutlorang, tu̱ ɗa laɓ saghakandang. 5Mbu̱ wa ɗal nu̱ ɗyinan, ka shi kasha, tu̱ ɗa dan qura, 6ta ɓasi kaari. Ka qa raptan ku ndu̱ nu̱ bing ɓaranku, tu̱ ze wor za, ‘Shem kashar su̱yen, ku̱me nga gwa ndu̱ɓang ɓang nu̱ saghakyang.’ 7Wanang tu̱k nga shim zu̱ mban ye nu za, Kashar a njig viɗi ɗyine nduk da nu̱ tubaki. Wa duk nduki ɗyin mu̱dlam qu̱m mu̱dlam nu̱ jeembu, nu̱ke a gang nggooti ku ɓa.

Ku̱rti Ɓalar ɗyine Mu̱zhindi nu̱ Saghaki

8“Yang tu̱k ɓa, mbu̱ke nokhzi nggur nu̱ke ye vi mu̱zhindi a nje kha nda wor gwang. Yang tu̱ da mbu̱ mu̱zhindang, nu̱ke aa nyi da, khangan wa khu̱l tlu̱nar me piti rap tu̱ sagha, am vin ɓai, tu̱ koo mbu̱ kibyang ma laɓtan, kope wa gwa de? 9Sarchi nu̱ gwaki, ai ka taba raptan ku ndu̱ nu̱ bing ɓaranku, tu̱ ze wor za, ‘Shaata ma nga ndu̱ kashari, ku̱me nga gwa ye vi mu̱zhindi ɓang nu̱ saghakyang.’ 10Nga maataran ye nu, wanang tu̱k nu̱ ru̱ktiku ɓu̱ Magham a kashari ɗyine aa nyi nu̱ solar da nu̱ tubaki.”

Ku̱rti Ɓalar ɗyine Woi nu̱ Saghaki

11Tu̱ Yesu zu̱m guma ndu̱ vu̱rti labar nang ye wor za, “Khuski nggur a nje ndu̱ qusa khuzuki ɓaran rap. 12Tu̱ rakhndang ze zhin wor za, ‘Ku̱man, nga shim shakh na ɗye mbu̱ge ɓa yerem nu̱gha, to vu̱r me ɓang ya leendang.’ Tu̱ zhinang shakh gu̱nar ɓaranang ye wor nu̱gha, aaki nu̱ ɓaran.

13“Nu̱ qan khang gaanje shakhta ɓa, tu̱ woi koɗomndang taba gu̱nar ɓaranang ye yen kap, tu̱ ghwaɗ varan nu̱ dam, mbu̱ ghai nggur ɓakhndi, ta su̱bu̱r mu̱zhindi ɓaranang ɓar kap nu̱ ye maa ɗye shir bam bamndi. 14Qu̱rse nu̱ saghaki ɗyin me kharan ɓar kap, tu̱ meeri maɗyikandi nggu̱ɗ nu̱ mbu̱ ghayang, wonji aa nu̱m kha nda tu̱k ɓa, ba wa ku̱ meeri tlagha nda. 15Tu̱ ɗu̱ tu̱ vi ma laɓ tlu̱nar she njif nggur mbu̱ ghayang, tu̱ sa nda ma khutlo aledeku ɓaran. 16Tu̱ meeri ku̱na nda ba wa zu̱m nji ɗye zu̱mndi ɓu̱ aledekwang, yang nduk a nje nu̱ vu̱rki yenda ɓa.

17“Nu̱ ɗa gaɓki nu̱ mbu̱ khankal ɓaran, tu̱ kor varan za, ‘Kai! Wonji nu̱ tlu̱narku ɓu̱ ku̱maandi ɓang a njig su̱ palamku ndu̱ ɗye zu̱mndi, yang wonji meeri a ma tlagha nga fan ba bam. 18Kuzhom ji nga tang gaɓ nu̱ she nda tang a ze nda nga za, “Baba, nga shi sola ye Magham nu̱ viɗi kom ndu̱ to tu̱k. 19Nang khu̱l ma qa na nga yi ɓa tu̱k ɓa. Do nga ba wa da chele ɓu̱ nu̱ tlu̱narku ɓaakwang.” ’ 20Tu̱ ji tu̱ ku̱s njiv ma gaɓti nu̱ kaari she zhin.

“Yang a ɓakh dong, tu̱ zhinang na nda, tu̱ zhinang tu̱k zhiyaye ɓaran, tu̱ qu̱n ɗari ta khaapa nda.

21“Tu̱ woyang zu̱ za, ‘Baba, nga shi sola ye Magham ndu̱ to tu̱k. Nang khu̱l ma qa na nga yi ɓaa ɓa.’

22“Yang tu̱ zhinang qa maaviku ɓaran tu̱ ze wor za, ‘Leendang! A ɓa ma ndu̱ lukti mbarkandi, tun sa yenda. Tun sa ayimndi yenda ndu̱ paghamndi. 23Tun ɗa ku̱s ye dle nyem ku̱rki nu̱ gha, mbu̱nkandang tun tlagha, nji mi chem a kashari. 24Ku̱me yiɓang nang ba wa mu̱tan ɗau, yang leendang aa nakha. Ɗau wa sagha, yang nga gaɓ tang gwa nda.’ Tu̱ nggaasi kasharku maɗyi.

25“Ba ye sarchi ni, chin woi gwaanjang, a ji mbu̱ dami. Nu̱ ɗa shiki bing kaari, tu̱ tu̱k dlu̱rti ndu̱ sapar wa ruɓi mbu̱ raftang. 26Tu̱ qa da chele ɓu̱ maaviku nu̱ mbu̱ raftang tu̱ zham nda, ɗa, nu̱m ɗatlki kwa? 27Tu̱ maavyang zu̱ za, ‘Ai khato, mbu ɓarang a gaɓki, kom tu̱ zhu sa ku̱ tlagha ye dle mbu̱nkandang, ku̱me khato a gaɓ nu̱ kaari nggalang ɓaran.’

28“Tu̱ yi ɓaran gwaanjang shokhna maɗyi, tu̱ zhang viiri nu̱ mbu gha. Tu̱ zhinang a vi ma vu̱r kanaɗyi yenda, tu̱ khuti nda ku̱ shi ku̱gam ku̱ vi nu̱ kaari. 29Yang tu̱ nggam ye zhinang za, ‘Nggu̱ɗu, kap mbu̱ sonyiriku nang, nga tlu̱nar yoro wa maava, sar da no sa nga ma tlu̱na tang zhang shiran gha ɓa. Kap ndu̱ wanang, sar da no tlagha aa ye guno ma qa nga raptaku chem zu̱m su̱yen ɓa! 30Yang ba nu̱ woi ɓa nang a gaɓki, chin nu̱ ɗu̱ki ta sagha gu̱narku ɓa nu̱gha ɗyine man mu̱nggu̱lku bam bam, ta tlagha ye dle mbu̱nkandi nang yenda.’

31“Tu̱ zhinang ze nda za, ‘Yi ɓanga, aa nyi sarchi ta su̱yen ndu̱ nga, yang kap ɗyiku nu̱ke a khara kap ɓaaro. 32Wa shipa shem kya kashari ndu̱ ɓong memu̱nari, ku̱me khato nang, ba wa wa mu̱ɗi, leendang aa nakha, mbu̱r far sagharan, yang leendang aa ɗaatli.’ ”

Currently Selected:

Luka 15: ttrNT

Highlight

Copy