Luka 16

Ku̱rti Ɓalar ɓu̱ nu̱ Tlu̱nar nu̱ Shiki Song Zhire ye nu̱ Rafti ɓaran

1Tu̱ Yesu ze nu̱ mburindakwang za, “Nu̱ gu̱nar nggur a nje nu̱ gwaki labaran za nu̱ tlu̱nar ɓaran a palam ndu̱ gu̱nar nyin saki nu̱ mbu̱ bu̱nan. 2Tu̱ qa nu̱ tlu̱narang tu̱ ze nda za, ‘Nga tu̱k kya nyi pooni labar ɗyino shoɗa? A ɓo ndu̱ lagarkati shigar si ɗyi no shiki mbu̱ tlu̱nar ɓa ya kap, ku̱me tom kha ma nu̱ nggu̱ti gu̱narang ya tu̱k ɓa.’ ”

3“Tu̱ nu̱ tlu̱narang zu̱ ve memu̱naran za, ‘Nu̱ rafti ɓanga ma komba nga ɓar me tlu̱nar ɓanga, yang ngga shi kima? Nga zu̱n nga ma ɗu̱ma ghuɗ ɓa, ku̱me du̱mbu̱r ɓang kata, yang ngam ɓu̱ ɗu̱ma viri ma khuti zum ɓa, ku̱me ka kha ya ma ɗye kawa. 4Buru̱ nga ka! Nga zu̱n ɗyi nu̱ke ngga shiki ku̱me mbu̱ wa komba nga ɓar me tlu̱narang, ku̱ nduki dlu̱ri nga mbu̱ rafti ɓaanda.’ ”

5“Tu̱ nu̱ tlu̱nar nang qa nduki nu̱ke nu̱ rafti ɓaran a mbu wor kudum kap. Tu̱ yang zham nu̱ gumapaalyang za, ‘Nu̱ rafti ɓanga mburoro kima?’

6“Tu̱ njifang ze nda za, ‘A mburi nga kudum mu̱zhindi bungndi mor won.’ Tu̱ nu̱ tlu̱narang zu̱ za, ‘Wonji lagarkati bu̱lar kudumang, kho gha fan ɗau ɗau, to bu̱la ɗyin qurmun.’

7“Tu̱ zham njif nggur tu̱k za, ‘To ɗa, nu̱ rafti ɓang a mbu ro kima?’

“Tu̱ njifang tlogha za, ‘Kekendi alkame won da.’

“Tu̱ ze nda za, ‘Do lagarkatang to gaɓ si ma kekendi ɗyin miyasi.’

8“Tu̱ nu̱ rafti ɓu̱ nu̱ song zhiryang makhta nda ku̱me ghu̱rti nu̱ shikyang. Nduki nu̱ mbu̱ larji meeni wa duk nduki nu̱ kya mbu̱ yarang ghu̱rti mbu̱ pooni ɓaanda. 9Nga zu̱ran ye nu, shi ma boote ndu̱ gu̱nar larji tun ba raptikirku ku̱me mbu̱ gu̱narang wa woɗa ka dlu̱ro nun mbu̱ rafti nu̱ke ɓu̱ shi woɗa ɓa.

10“Njif nu̱ shiki zhire mbe ɗyi koɗommandi, ka ɗu̱ma shi zhire mbe ɗyi khangndi tu̱k. Yang mbu̱ nduk nu̱ ɗu̱ma shi zhire mbe ɗyi koɗomndi ɓa, ɓu̱ ɗu̱ma shi zhire mbe ɗyi khangndi ɓa. 11Mbu̱ nun shi zhire mbe gu̱nar larji ɓa, ki ka vu̱rki gu̱nar zhirekandi ye nwa? 12Yang mbu̱ nun shi zhire mbe ɗyi ɓu̱ njif nggur ɓa, ki ka vu̱rki ɓaanu ye nwa?

13“Maava nu̱ka ku̱s nu̱ rafti rap ɓa, ku̱me ka zhang nu̱ rafti da, tu̱ ndola nu̱ rafti dandang. Ka vu̱rkya ɗyinan ye nu̱ rafti da chele ɓaanda, tu̱ ndu̱m nu̱ rafti dandang. Tom ɓu̱ ghar ghai ye Magham su̱yen ndu̱ ghaari ghai ye mu̱zhin ɓa.”

Nduk ɓu̱ Ɗu̱ma Nggoɗ Wopar ɓu̱ Magham ɓa

(Mat 11:12-13; 5:31-32)

14Nu̱ Pariseku nu̱ shimndi mu̱zhindi maɗyi a tu̱kki ɓalar nang, tu̱ dut me wor nu̱ ɗyine Yesu. 15Tu̱ yang Yesu ze wor za, “Tun kya shim wutan ye nduki za tun nu̱ jeembu, yang Magham wa zu̱n memu̱na nu. Ɗyi nu̱ke nduki a shimndan maɗyi ɗya ɗye zhaana she Magham.

16“Nduki a mbu kya Taurete ɓu̱ Musa ndu̱ lagarkati ɓu̱ annabiku ma khu̱dli sarchi nu̱ Yokhana nu̱ baptisma a ɓa ki, yang ba sarchi nu̱ wopaki labar mbarkandi nu̱ kwaaɗar ɓu̱ Magham, aakya wuta viiri nu̱ mban. 17Yang ka duk ndu̱ ndolndoli ku̱ maa viɗi ndu̱ maa vu̱ghai su̱ya ye ku̱ mbillir mbe bu̱lar wopar ɓalarang pasha.

Shogar ɗyine Nggar Ɓu̱rti

(Mat 19:1-12; Mar 10:1-12)

18“Kap njif nu̱ nggaki nokhzan gha tu̱ ɓu̱r nokhzi ngguri a shikya zawa ndu̱ nokhzi nu̱ ɓu̱rkyang. Njif nu̱ ɓu̱rki nokhzi nggakandi tu̱k a shikya zawa ndu̱ chin rong ma kaani.”

Labar ɓu̱ nu̱ Gu̱nar ngguri ndu̱ Liazaru

19Tu̱ Yesu zu̱m guma ndu̱ ɓalarang za, “Nu̱ gu̱nar nggur a nje nu̱ka saki lukti vyangndi ndu̱ linen mbarkandi nu̱ me mu̱zhindi, a khar yele ɓaran. 20Yang nu̱ khuti nggur a nje tu̱k qaandan me vi ɓu̱ nu̱ gu̱narang dlu̱man za Liazaru, yang khaatan ku̱me varanang kap mbir. 21Aakochi Liazaru wa ka shim zu̱m nji ɗye zu̱mndi nu̱ka ku̱ɗbaki nu̱ su̱ tebu̱r ɓu̱ nu̱ gu̱narang. Yiɗaku tu̱k wa ka ɓa tu̱ nyii mbiranang.

22“Sarchi mu̱ti ɓu̱ nu̱ khuti nang, tu̱ nu̱ ru̱ktiku ɓu̱ Magham da nda tu̱ ɗu̱ ndu̱ chin she Yibram (ye maa khar mu̱nkandi.) Gana fan, tu̱ nu̱ gu̱narang mu̱ɗ tu̱k, tu̱ pa nda gha. 23Tu̱ gwa varan mbu̱ giɗim ɓai ye maa zar bonye maɗyikandi. Nu̱ daki yitan nu̱ viɗi, tu̱ na Yibram ɓakh fara su̱yen ndu̱ Liazaru. 24Tu̱ yang wopa ye Yibram za, ‘Aba Yibram, tu̱k zhiyaye ɓang ɓa. To ɗa ru̱k Liazaru ku̱ sa ye kharan nu̱ mbu̱ ɗyim tu̱ ɓa doɓ ya nu̱ ɗyin ghiinda ma tu̱k nga ndolndol koɗom, ku̱me nga bonye maɗyikandi mbu̱ ɓai nang.’

25“Tu̱ Yibram tlogha yenda za, ‘Yi ɓanga, mbu̱ ta kori, ta woɗa dlu̱ ɗye ɓi ɓa mbarkandi mbu̱ khar viti no shiki larji. Yang chin Liazaru za kya bonye, wonji yang meeni wa gwa du̱ngndi memu̱na, ɓa yang ta mbu̱ bonye. 26Nang ɗyenda ɓa, kereng a nje dlamdlam yang kiri chele ɓaarem ndu̱ tunu, ku̱me ɗu̱ma nu dlar nu̱ she rem ɓa, yang chem ɓu̱ ɗu̱ma dlar nu̱ she nu zum ɓa.’

27“Tu̱ nu̱ gu̱narang zu̱ za, ‘Aba, nga khutoro, ru̱k Liazaru nu̱ kaa ɓu̱ ku̱maandi ɓanga. 28Ku̱me khachinkirku ɓang khuzukwang nje wor qurmun, ku̱ wu wor ya, ku̱me ku̱ ɗa ɓa ku ye maa bonye nu̱ke nga mban nang ɓa.’

29“Tu̱ Yibram tlogha yenda za, ‘Wopar ɓu̱ Musa ndu̱ lagarkati ɓu̱ annabiku a njig she wora, mbu nda ɗyi nu̱ zu̱ki ye worang.’

30“Tu̱ nu̱ gu̱narang tlogha za, ‘Auwo, Aba Yibram, mbu̱ njif nggur wa ji mbe mu̱ti tu̱ ɗu̱ she wor ka nggoɗ ku.’

31“Tu̱ Yibram ze nda za, ‘Mbu̱ nu̱ gwa dlu̱mndi wor ye wopar ɓu̱ Musa ndu̱ Annabikwang ɓa, ɓu̱ gwa dlu̱mndi wor ku̱me njif nggur wa ji mbe mu̱ti ɓa.’ ”

Currently Selected:

Luka 16: ttrNT

Highlight

Copy