Luka 14
14
Yesu wa Shaana nu̱ Khaati ye Fu̱ɗar Maasi
1Fu̱ɗar Maasi ɓu̱ Yakhudeku, tu̱ Yesu vi nu̱ mbu̱ rafti ɓu̱ da chele gorkirku ɓu̱ Pariseku ma zu̱m ɗye zu̱mndi. Tu̱ yang ndukyang sa yiti yenda. 2Yang njif nggur a nje kharan gume nda nu̱ke saaran ndu̱ kharan kap khu̱tlan. 3Tu̱ Yesu zham Maalu̱m Taurete ndu̱ Parisekwang za, “Woparang wa wuɗ za shaana mi nu̱ khaatiku Fu̱ɗar Maasi mu yang wanang ɓa?” 4Tu̱ yang kha vaanda gha tu̱tu̱k, tu̱ Yesu khuɓ khar khuskyang tu̱ shaana nda nu̱ gha kom tu̱ ze nda za ku̱ ɗu̱ varan.
5Tu̱ Yesu gaɓ tu̱ zham ndukyang za, “Ki chele ɓaanu ke nu̱ka shi tlu̱na Fu̱ɗar Maasi mbu̱ aa kooro aa dle ɓaran nggu̱ɗki nu̱ bu̱lgazhi ɓa? Alapa ɓu̱ fed nda nu̱ dam Fu̱ɗar Maasi ɓa goma?” 6Yang tu̱ ndukyang mbu̱ɗ ɗyi nu̱ke zu̱ nda.
Yesu wa Shi Shogar ɗyine Wuti Katar ɗyin
7Nu̱ Yesu naki nduki na ɓa ki ma zu̱m ɗye zu̱mndang a dat maa khar nu̱ dukki ndu̱ zhaaji. Tu̱ zu̱ ku̱rti ɓalar nang ye wor za, 8“Mbu̱ nduk wa qa ma tabar gu̱ndi ɓu̱rti, ɗu̱ na to ɗa kha gha ye maa khar ɓu̱ nduk kudaandi ɓa, ku̱me bai wa qa njif nggur nu̱ dukki ro nu̱ zhaaji. 9Ta na chin nu̱ qaki nu ma tabar ɓu̱rti ɓaranang ka ɗa ɓa tu̱ zo za, ‘Ji ɓar to ngga maa ye njif nang.’ Yang to ka tu̱k kawar jiiri ɓar ye maa nu̱ke ta si ma yir ye maa khar nu̱ke zhaaji ɓaranang kata. 10Yang mbu̱ wa qa ma taba, ɗu̱ to ɗa kha gha ye maa khar nu̱ke zhaaji su̱ ɓa, mbu̱ njif nu̱ qakirang aa ɓa, ka zo za, ‘Rapta, ju to kha gha ɗyine zhakhɗye nu̱ dukki ndu̱ zhaaji nang.’ Na ka sa nduki nu̱ ɗa ɓa ki ma tabarang tu̱ na zhaaji ɓaaro. 11Ku̱me kap njif nu̱ daki ɗyinang ma ɗyi ngguri, ka gaɓ ndu̱ chin ma aa nu̱m ɓa, yang njif nu̱ kataki ɗyinan nu̱gha ka gwa gorkiri.”
Shir mu̱nki
12Tu̱ Yesu ze njif nu̱ qaki nda za, “Mbu̱ ta ma qa nduki, aa ma zu̱m ɗye zu̱mndi, aa ma tabar zu̱mndi, qa na raptorku ɗyenda ɓa. Qa na nyeezorku ndu̱ kheetiku ɓaaro ndu̱ nyeezor nu̱ gu̱narku ɗyenda ɓa. Ku̱me ka ɓa qa ku tu̱k fu̱ɗa nggur ma ɓaanda, tu̱ kha ma ɗye ɓiiro ro. 13Yang mbu̱ ta ma qa tabar zu̱mndi, to qa nu̱ nungndiku, ndu̱ zu̱ɓtiku ndu̱ nu̱ zurɗarku ndu̱ pugumku. 14Mbu̱ ta shi wanang to ka gwa barka, ku̱me nduki nang ɓu̱ ɗu̱ma ɓi ro ɓa, yang Magham ɗyenda ka ɓa ɓiiki ro fu̱ɗar wuri, nang ke fu̱ɗar nu̱ke Magham ka nakhaki nduki nu̱ jeembu ku mbe mu̱ti.”
Ku̱rti ɓalar ɗyine tabar zu̱mndi gwaanji
(Mat 22:1-10)
15Nu̱ da chele nduki nu̱ khaki nu̱ wudle tebu̱r su̱yen ndu̱ chin tu̱kki wanang, tu̱ ze Yesu za, “Barkya ve njif nu̱ke ka ɓa zu̱mki ɗye zu̱mndi mbu̱ kwaaɗar ɓu̱ Magham.”
16Tu̱ Yesu ze nda za, “Njif nggur a nje nu̱ daasaki tabar zu̱mndi gwaanji, tu̱ qa nduki khang. 17Nu̱ sarchi nggar zu̱mnda shiki, tu̱ ru̱k maavi ɓaran ku̱ ɗa ze nduki nyin qa kya za, ‘A ɓa ma, ku̱me nga daasa aa nu̱m nu̱gha.’
18“Tu̱ yang nduki nu̱ qa kya gho me wora. Tu̱ njif nu̱ gumapaalyang zu̱ za, ‘Nga masa dam nggur nu̱ke wa ku̱s ma ɗu̱ nga tang a na ndu̱ yita, yang ku̱ nu̱ rafti ɓa shi kanaɗyi ya ku̱me ngam ɓu̱ gwa ma yir ɓa.’
19“Tu̱ da chele nduki nu̱ qaki wora tu̱k ze maavyang za, ‘Ngam ɓu̱ gwa ma yir zum ɓa ku̱me nga masa dle ghuti wor gwang, yang nga shim ɗu̱ nga ma buu tlu̱nar ndu̱ wora. Yang ku̱gam shi kanaɗyi.’
20“Tu̱ njif nggur tu̱k yaasa men za, ‘Nga shi mewar ɓu̱rti, ku̱me nang, ngam ɓu̱ gwa ma yir ɓa.’
21“Gaɓti ɓu̱ maavyang ke shar, tu̱ zu̱ ɗyi nu̱ ndukiku nang zu̱ki ye nu̱ rafti ɓaranang. Tu̱ memu̱na nu̱ raftang su̱bu̱ri, tu̱ yang ze maavyang za, ‘Ɗo nu̱ mbu̱ ghai to mbu njiva njiva ndu̱ bonga bonga mbu̱ ghayang. Ta qa nu̱ nungndiku ndu̱ zu̱ɓtiku ndu̱ pugumku ndu̱ zurɗarku no za ku̱ ɗa ɓa ku.’
22“Nu̱ maavyang a gaɓki tu̱ ze nu̱ rafti ɓaranang za, ‘Maasi, nga shi ba wa no zu̱ki ya, yang kap ndu̱ nang, ɓeena maarang nje nu̱ nyel ɓa.’
23“Tu̱ nu̱ raftang ze maavi ɓaranang za, ‘Ɗu̱ yiti njiv gwaanjiku ndu̱ pichichindiku nu̱ qu̱rse ghayang to mata nduki ku̱ ɗa ɓa ku ma ku̱ rafti ɓang nyedli. 24Nga zu̱ran ye nu, nduk a nje chele nduki nu̱ qaki wor tu̱ gho me wor nang nu̱ke ka darki ɗye zu̱mndi ɓang ɓa.’ ”
Bonye nu̱ mbu̱ Mbuuri Yesu
(Mat 10:37-38)
25Yesu a mbu̱ yir su̱yen ndu̱ tabar nduki khang gaanje nda. Tu̱ mbu̱m nu̱ she wora. A za, 26“Kap njif nu̱ ɗa ɓa ki sha, yang nu̱ ndola nga tu̱ duk zhin ndu̱ man, ndu̱ nokhzan, ndu̱ qusonggi ɓaran ndu̱ khachinkirku ɓaran ɓa ndu̱ aa nyifi ɓaran ɓa, ɓu̱ kha ma nu̱ mbuuri nga ɓa. 27Wanang tu̱k njif nu̱ke nu̱ da qu̱far kaatli ɗyinan (nang ke zar bonye) tu̱ mbuuri nga su̱ ɓa, ɓu̱ kha ma nu̱ mbuuri nga ɓa.
28“Woɗye nduk a nje chele ɓaanu nu̱ke ka nggaki su̱ du̱n rafti ɓaran waare khar gha tu̱ shi kwaari ɗyine mu̱zhindi nu̱ke chin ka saghaki nu̱ ɗyine du̱ndan ma yir ve lauɗarsan mu? 29Ai mbu̱ nu̱ shi kwaari ɗyinan ɓa, ka nggaasi sa saari du̱ndang nu̱gha ɗawar ɗo, yang ɓu̱ ɗu̱ma kwataran ɓa, yang nduki nu̱ naki du̱ndang ka mu̱si nda. 30Ka zu̱ ku za njif nang wa nggaasi du̱ndi yang wa ku̱na kwataran.
31“Nyi kuji nu̱ke sojeku ɓaran du̱pu gwang ke ɓu̱ ching gha tu̱ shi sawari dong, mbu̱ kuji nggur nu̱ke sojeku ɓaran du̱pu ɗyiirap a ma nggu̱di nu̱ ve nda ndu̱ dakhla ɓa? Ai ka shi kwaari dong, mbu̱ du̱mbu̱r ɓaran wa khu̱l ku̱ shi dakhlar ndu̱ kuji dandang. 32Mbu̱ ɓu̱ ɗu̱ma ku ɓa, ka ru̱k nu̱ ru̱ktiku nu̱ ɗawi, ye sarchi nu̱ke kujirang a nje ɓakh dong ma somta yen. 33Wanang tu̱k, njif nu̱ke nu̱ njig ɗyi nu̱ke a kha nda kap ɓa, ɓu̱ kha ma nu̱ mbuuri nga ɓa.
Ku̱rti Ɓalar ɗyine Dleeru
(Mat 5:13; Mar 9:50)
34“Dleeru ɗya ɗyi mbarkandi, yang mbu̱ wa shakh ndu̱ mu̱ndi ɓaran, nduk ka gaɓ ndu̱ mu̱ndi ɓaran kikimnda? 35Ɓu̱ shi boota mbu̱ dam ɓa, yang ɓu̱ kha ma bu̱ri zum ɓa, buka ku̱ wos gha.
“Nu̱ dar mbu̱ ɓala ku̱ da mban.”
Currently Selected:
Luka 14: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
