Luka 13

Njig ma Solar Ɓaanu mbu̱ Wanang ɓa tun Mu̱ɗi

1Ba ye sarchi nang tu̱ ɓeena ndukyang ze Yesu za Bilatus wa tlagha qusa Galili ku nggur nu̱ke a vu̱r sadke ye Magham mbu̱ kib ɓaran tu̱ tom ɓaanda longgan mbu̱ sadkyang. 2Tu̱ yang Yesu tlogha ye wor za, “Tamandi ɓaanu za nduki nu̱ tlaghaki wor nang wa duk aaki ndu̱ solarku mbu̱ ghai Galili ku̱me wa za bonyeku nang mu? 3Auwo, nga zu̱ran ye nu, mbu̱ nun nggoɗ tun njig solarku ɓaanu ɓa, tun ka mu̱ɗ ba wa nduki nang. 4Yang ɓu̱ nduki gwaanggu̱m miyasi nu̱ dangkali Silwam nggu̱ɗki nu̱ ɗyine wora ɗa, tun taman za wa duk aaki ndu̱ solarku mbu̱ ghai Urshalima mu? 5Auwo, nga zu̱ran ye nu, mbu̱ nun njig solarku ɓaanu ɓa, tun ka mu̱ɗ ba wa nduki nang.”

Kwarandi Qu̱far Suga

6Tu̱ Yesu zu̱ ku̱rti ɓalar nang ye wor za, “Khuski nggur a nje nu̱ke qu̱far sugarang nje kha nda mbu̱ dam ɓaran, tu̱ yang ɗu̱ ma ɗakh ye sugarang, tu̱ gwa nu̱ kha woi ɓa. 7Tu̱ ze nu̱ nggu̱ti dam ɓaranang za, ‘Meeni sonyi kunung, nga ɓar ma nggu̱t qu̱far sugar nang nu̱ kha woi ɓa, yang ku̱m nda nu̱ gha, ku̱me a dlu̱ maa ɓar ba bam.’

8“Tu̱ nu̱ nggu̱ti damang tlogha yenda za, ‘Ku̱man, njig qu̱far nang ya dong taba nga ghai nu̱ ve sanang tang sa bu̱ri yenda me sonyi da. 9Mbu̱ wa kha woi gaandan, wa shi mbari, mbu̱ nu̱ kha woi ɓa, kom tu̱ ku̱m nda yaghai.’ ”

Yesu wa Shaana Nokhzi nggur ye Fu̱ɗar Maasi

10Yesu a shogar mbu̱ kib tabar ɓu̱ Yakhudeku nggur Fu̱ɗar Maasi. 11Yang nokhzi nggur a nje nu̱ khu̱kheeti zu̱ɓki nda nu̱ gha. Wa shi sonyi gwaanggu̱m miyasi rubtan ku̱me nu̱ka ɗu̱ma jiiri tu̱ ching gha ndu̱ mbu̱ saaran ɓa. 12Nu̱ Yesu naki nda tu̱ qa nda nu̱ guma tu̱ ze nda za, “Nusu, ta shaana mbe khaati ɓaaro.” 13Tu̱ Yesu su̱ɓa nda ndu̱ kharan, fan ndu̱ fan tu̱ nokhzang ji tu̱ ching gha tu̱ gor dlu̱m Magham.

14Tu̱ yang gorkir ɓu̱ ye maa tabar ɓu̱ Yakhudekwang shokhna shaanar nokhzi nu̱ Yesu shiki fu̱ɗar maasang. Tu̱ ze ndukyang za, “Qaandi njong a nje nu̱ vu̱rki ye nu ma fu̱ɗar tlu̱nari, ku̱me nang, a ɓa ma, ma laɓ shaanar khaatiku ɓaanu ve fu̱ɗarku nang, ban nu̱ Fu̱ɗar Maasi.”

15Tu̱ Yesu tlogha ɓalarang yenda za, “Nu̱ mu̱narku! Ki chele ɓaanu ke nu̱ka kol aa kooro aa dle ghuti ɓaran nu̱gha ye maa gu̱ndan tu̱ ɗu̱ ndu̱ chin ma za ɗyim Fu̱ɗar Maasi ɓa? 16Yang alapa nokhzi nang nu̱ke ɗya zhikan Yibram nu̱ Sheɗan gu̱nki nda nu̱ gha sonyi gwaanggu̱m miyasi meeni, yang nu̱ shipa ku̱ lawa nda ɓar mbu̱ khar Sheɗan Fu̱ɗar Maasi ɓa?”

17Tu̱ ɓalar nu̱ shiki nang vu̱r kawar ye nu̱ zhangndiku ɓaran. Tu̱ yang ɓeena ndukyang kap kasha ku̱me ɗye lazham nu̱ shikyang.

Ku̱rti Ɓalar ndu̱ ye Pooni Mastad

(Mat 13:31-32; Mar 4:30-32)

18Tu̱ Yesu zu̱ za, “Kwaaɗar ɓu̱ Magham shipa kya nu̱ma? Ngga ku̱rti nda ndu̱ nu̱m shoɗa? 19Wa shipa ye pooni mastad (nu̱ke ɓaran pichichi) nu̱ kaɓki nu̱ mbu̱ dami, yang nu̱ gorki tu̱ kha ma qu̱far gwaanji, tu̱ ɗyikhtiku nu̱ viɗi shi pugdi ɓaanda nu̱ me bu̱nankwang.”

Ku̱rti Ɓalar ndu̱ Yis

(Mat 13:33)

20Tu̱ yang zu̱ tu̱k za, “Ngga buu shipar ɓu̱ kwaaɗar ɓu̱ Magham ndu̱ nu̱ma? 21Wa shipa yis nu̱ nokhzi nggur longgaki nu̱ mbu̱ buɗuki kuyangge kunung, tu̱ yang yisang dlu̱ mbu̱ lokhɓar buɗukyang ɓar kap.”

Me Viri Ɓorɓorndi

(Mat 7:13-14, 21-23)

22Nu̱ Yesu ku̱ski njiv ma yir Urshalima, tu̱ mbu mbu̱ ghaiku ndu̱ gureku a shogar ye nduki. 23Tu̱ njif nggur zham nda za, “Maalu̱m, woɗye nduki koɗomma ka gwaki ɗanar mu?”

Tu̱ Yesu tlogha ye wor za, 24“Shi ma komkomi tun vi me vi ɓorɓorndang, ku̱me nga zu̱ran ye nu, nduki khang ka shim viri yang ɓu̱ ɗu̱ma ɓa. 25Yang mbu̱ nu̱ raftang wa ji tu̱ za me virang nu̱gha, tun ka ɓa ching gha dam tun a ghwaɗ me virang, tun a khuti nda, tun a zu̱ran nun za, ‘Nu̱ rafa, qu̱n me virang yerem!’ Yang ka tlogha ye nu za, ‘Nang zu̱ndo nu̱ ɓa, yang nang zu̱n maa nu na viki su̱ ɓa.’

26“Yang tun ka ɓa zu̱ nun za, ‘Chem nyem zu̱mki chem za su̱yen ndu̱ to, to shi shogar yerem mbu̱ ghaiku ɓaarem.’

27“Yang ka ɓa ze nu za, ‘Nang zu̱ndo nu ɓa, yang nang zu̱n maa nu na viki su̱ ɓa, gal ma gha ya fan nduki malkandi nu̱ tlu̱nar zopku!’

28“Sarchi nun naki Yibram ndu̱ Yishaku ndu̱ Nyagham ndu̱ annabiku kap mbu̱ kwaaɗar ɓu̱ Magham, tu̱ yang komba nu ɓara, nang ke sarchi nu̱ke tun ka ɓa shiki ghoori ndu̱ ku̱ti dliindi. 29Nduki ka ɗa vi ɗokhatla ndu̱ mugu ndu̱ kona ndu̱ zan tu̱ gwa ye maa khar ku mbu̱ kwaaɗar ɓu̱ Magham. 30Yang zhire, nduki a nje nu̱ke a gana, nu̱ke ka ɓaa khan guma ku, yang tu̱k, nduki a nje nu̱ke a guma nu̱ke ka ɓa gaɓ ma nu̱ gana.”

Yesu wa Tu̱k Zhiyaye ɓu̱ Urshalima

(Mat 23:37-39)

31Ye sarchi nang, tu̱ Parisekwang a ɓa tu̱ ze nda ku za, “Njig ye maa nu̱ke ta su̱ nang to ɗu̱ ye maa ngguri ku̱me Khiridus a shim tlagha ro.”

32Tu̱ Yesu tlogha ye wor za, “Ɗu̱ ma tun a ze waayi (nu̱ mu̱nar) nang nun za, ‘Nga ɗyin fet khu̱kheetiku ɓar ndu̱ shaana nu̱ khaatiku meeni ndu̱ wuri, ye fu̱ɗar nu̱ kunung ngga lauɗa su̱ tlu̱nar ɓanga.’ 33Kap ndu̱ nang, wa ku̱s zu̱m nga guma ndu̱ yir meeni ndu̱ wuri, ndu̱ piɗara ku̱me nu̱ shipa ku̱ annabi mu̱ɗ ye maa nggur zum mbu̱ke Urshalima ɓa.

34“Awai Urshalima! Awai Urshalima! To no tlaghaki annabiku, to mbuk nduki na ru̱kki wor yoro. Sar kim nga shimki taba nga nduki ɓaanu nu̱ ye maa da, ba wa nu̱ke man kuzha ka kanggu̱laki qusonggi ɓaran nu̱ mbu̱ khobkan yang tun wa zhang gha! 35Wonji wa ngga rafti ɓaanu gha ye nu karangan ɗo. Nga zu̱ran ye nu, tun ɓu̱ na nga tu̱k ɓa kope fu̱ɗar nu̱ke tun ka zu̱ki nun za, ‘Njif nu̱ke a ɓar mbu̱ dlu̱m Zhinkir gwaanji ɗya nu̱ barka.’ ”

Currently Selected:

Luka 13: ttrNT

Highlight

Copy