Yokhana 20

Jiiri ɓu̱ Yesu mbe Mu̱ti

(Mat 28:1-10; Mar 16:1-8; Luk 24:1-12)

1Nu̱ dumaari ɗau ye fu̱ɗar nu̱ gumapaali, dong maarang nu̱ shaana ɓa, tu̱ Maryam ye Magadaliya ɗu̱ she ku̱jip ɓu̱ Yesu tu̱ gwa ndogdi nu̱ zaki me ku̱jipang si tu̱paran. 2Tu̱ qu̱n ɗa tu̱ ɗu̱ she Siman Biturus ndu̱ nu̱ mburi nu̱ke Yesu a ndola ndang tu̱ ze wor za, “Wa da Zhinerem gwaanji ɓar ku mbu̱ ku̱jipang, yang nyem zu̱n ye maa nu̱ du̱ngki nda nu̱ si ɓa.”

3Tu̱ Biturus ndu̱ nu̱ mbu Yeswang ku̱s njiv ma yir she ku̱jipang. 4Tu̱ ɓu̱tl ɗar ku su̱yen, tu̱ yang nu̱ mbu Yeswang peeta Biturus, tu̱ kaya nda khu̱dli me ku̱jipang. 5Nu̱ kurumki gha tu̱ yingga mbu̱ ku̱jipang, tu̱ na kapar linenang du̱ngndan, yang nu̱ vi nu̱ mbu̱ ku̱jipang ɓa. 6Kom nu̱ Siman Biturus a khu̱lki gana fan, tu̱ vi nu̱ mbu̱ ku̱jipang, tu̱ na kapar linenang du̱ngndan. 7Tu̱ na kapar linen nu̱ gu̱nki nu̱ ve ɗyinanang du̱ngndan ye maa da zu̱m ndu̱ kapar linen dandang. 8Tu̱ nu̱ mburi Yesu nu̱ khu̱lki she ku̱jipang gumang vi tu̱k. Nu̱ naki tu̱ maita. 9Yang ma ɓar ye sarchi nang nu̱ da mbu̱ ɗyi nu̱ Bu̱lar Ɓalar ɓu̱ Magham zu̱ki za wa ku̱s ku̱ Yesu ji mbe mu̱ti ɓa. 10Tu̱ nu̱ mburi nda kwang gaɓ vaanda nu̱ kaari.

Yesu wa Wut Varan ye Maryam

(Mat 28:9-10; Mar 16:9-11)

11Tu̱ yang Maryam ching gha me ku̱jipang dam a ghoori. A mbu̱ ghoorang tu̱ kurum gha tu̱ yingga mbu̱ ku̱jipang. 12Tu̱ yang na nu̱ ru̱ktiku ɓu̱ Magham wor rap ndu̱ kapar ɓongndi kharan ye maa nu̱ qanki man var Yesu nu̱ njang. Nu̱ ru̱kti da kharan ye maa nu̱ du̱ngki ɗyinan nu̱ san, yang dandang kharan ye maa du̱ngki saaranang.

13Tu̱ nu̱ ru̱kti ɓu̱ Magham kwang zham nda za, “Nusu, ta gho kya nu̱ma?” Tu̱ ze wor za, “Wa da Zhinkir ɓang gwaanji ɓara, yang nang zu̱n ye maa nu̱ saki nda nu̱ su̱ ɓa.” 14A za men nu̱gha nu̱ mbu̱mki tu̱ na Yesu chingndan, yang nu̱ saida nda ɓa.

15Tu̱ Yesu zham nda za, “Nusu ta gho kya nu̱ma? Ta laɓkya kiya?”

Yang tu̱ taman za bai ɗya nu̱ tlu̱nar mbu̱ damang, nang ke ɗyi nu̱ saki tu̱ ze nda za, “Ku̱man mbu̱ to daki nda ɓara, zu̱ ye maa no saki nda nu̱ si tang a da nda.” 16Tu̱ Yesu qa nda za, “Maryam!”

Tu̱ mbu̱m nu̱ she Yesu tu̱ qa nda ndu̱ me Yakhuda za, “Rabboni” (mban za “Maalu̱m.”)

17Tu̱ Yesu ze nda za, “Khuɓ na nga ɓa, ku̱me nang dlan she Zhinkirang ɓa dong. Yang ɗu̱ she nyeezaku to ɗa ze wor no za, nga gaɓti nu̱ she Zhinkir ɓanga ndu̱ Zhinkir ɓaanu, Maghamndi ɓanga ndu̱ Maghamndi ɓaanu tu̱k.” 18Tu̱ Maryam ye Magadaliya ɗu̱ tu̱ ɗa ze nu̱ mburi nda kwang za, “Ai, nga na Zhinerem gwaanji.” Tu̱ zu̱ ɗyi nu̱ Yesu zu̱ki yenda tu̱k.

Yesu wa Wut Varan ye nu̱ Mburi nda kwang

(Mat 28:16-20; Mar 16:14-18; Luk 24:36-49)

19Ye fu̱ɗar nu̱ gumapaali mbu̱ qaandi mut (fu̱ɗa Laaji) nu̱ me mugdi, nu̱ mburi nda kwang a nje tabaran ye maa da me viri khiiran ɗyine wora ku̱me a sawa dle gume ɓu̱ Yakhudekwang. Tu̱ Yesu a ɓa tu̱ ching nu̱ chele ɓaanda tu̱ ze wor za, “Gappu̱ramma ku.” 20Qu̱rse wa zu̱ nang ye wora, tu̱ wut kharanku ye wor ndu̱ ku̱bdan nu̱ zhokhki ndang. Tu̱ nu̱ mburi nda kwang kasha nar Zhinerem gwaanji.

21Kom tu̱ Yesu gaɓ tu̱ ze wor za, “Kha ma gha ndu̱ qaandi memu̱na! Ba wa nu̱ Zhinkirang a ru̱kki nga, nga ru̱ktonu tu̱k.”

22Nu̱ zu̱ki wanang tu̱ pi khu̱kheeti ye wora, tu̱ zu̱ za, “Dlu̱ ma Jiimbi shakhshakhndi. 23Kap njif nun yaapaki solar ɓaran yenda, wa yaapa yenda, yang kap njif nu̱ke nun yaapa yenda ɓa, ɓu̱ yaapa yenda ɓa.”

Yesu wa Wut Varan ye Toma

24Yang Toma nu̱ka qaki nda za “Mugɗa,” nu̱ke ɗya da chele gwaanggu̱m rapndang a nje su̱yen ndu̱ wor sarchi nu̱ Yesu wutki varan ye wora ɓa. 25Tu̱ ɓeeni nu̱ mburi nda kwang ze nda za, “Chem wa na Zhinerem gwaanji.” Tu̱ yang Toma ze wor za, “Mbu̱ nang na ge qusekwang ve kharan, tang sa khara nu̱ mban, kom tang sa khara nu̱ ve ku̱bdanang ɓa, ngam ɓu̱ maita ɓa.”

26Qaandi miyasi qu̱rsan, nu̱ mburi nda kwang a nje tabaran ba mbu̱ raftang, yang Toma nje su̱yen ndu̱ wor sarchi nang. Me viri kwang zaran, tu̱ yang Yesu a ɓa tu̱ ching nu̱ chele ɓaanda tu̱ zu̱ za, “Kha ma ndu̱ qaandi memu̱na.” 27Kom tu̱ ze Toma za, “A so ye kha nu̱ fan, no kharaku. A zoɓo khaaro to san ve ku̱bda, ku̱ memu̱na kha rap rap ɓa, to maita.”

28Tu̱ Toma ze nda za, “Zhinkir gwaanji, ndu̱ Maghamndi ɓang tu̱k.”

29Tu̱ Yesu ze nda za, “Ai, to maita ku̱me ta na, barkya ve nduki nu̱ke nu̱ na ku ɓa, yang wa maita ku.”

Ye mbu̱ Lagarkati nang

30Yesu wa shi ɗye lazhamku khang mbu̱ yiti nu̱ mburi nda kwang nu̱ke nu̱ bu̱lan mbu̱ lagarkati nang ɓa. 31Yang bu̱la nu̱kunang ma ku̱ maita nu nu̱ ɗyine Yesu ke Masiya, Yi ɓu̱ Magham. Kom tu̱k, nu̱ ku̱n she maitar nda tun gwa nyifi mbu̱ dlu̱man.

Currently Selected:

Yokhana 20: ttrNT

Highlight

Copy