Yokhana 21
21
Yesu wa Wut Varan ye nu̱ Mburi nda ku Mut
1Qu̱rsan tu̱ Yesu wut varan ye nu̱ mburi nda ku me ɗyim chitndi nu̱ Tiberiya. Wonji ɗyi nu̱ ɗatlki. 2Siman Biturus, ndu̱ Toma (nu̱ka qaki nda za, mugɗa), Nataniyel na viki mbu̱ ghai Kaana nu̱ke a mbu̱ dlar ghai Galili. Kom ndu̱ qusonggi ɓu̱ Zabadi ndu̱ nu̱ mburi nda ku nggur wor rap a nje ku kap su̱yen, 3Tu̱ Siman Biturus ze wor za, “Nga yir ma ku̱s yurvi.” Tu̱ ɓeeni nu̱ mburi nda kwang zu̱ za, “Chem ka ɗu̱ su̱yen ndu̱ to.” Tu̱ vi tu̱ ɗu̱ ku ta vi nu̱ mbu̱ du̱mbu̱l ɗyimi, yang nu̱ ku̱s aa nu̱m ku mbu̱ virkirang ɓa.
4Nu̱ dumaari ɗau, tu̱ Yesu ching gha me ɗyim chitndang, yang ni nu̱ mburi nda kwang saida nda ɓa.
5Tu̱ Yesu wopa ye wor za, “Nyeeza, tun wa ku̱s yurvu mu?”
Tu̱ tlogha yenda ku za, “Auwo!”
6Tu̱ Yesu ze wor za, “Wos ma lem ɓaanu nu̱ bu̱n zu̱ma ndu̱ du̱mbu̱lang tun ka ku̱si.” Tu̱ wos ku ba wa nu̱ Yesu zu̱kyang, tu̱ ku̱s yurviku khang, tu̱ ku̱na dut lemang nu̱ mbu̱ du̱mbu̱lang ku.
7Tu̱ nu̱ mburi nu̱ke Yesu a ndola ndang ze Biturus za, “Njif nang ɗya Zhinerem gwaanji!”
Ba nu̱ Siman Biturus tu̱kki za ɗya Zhinerem gwaanji, tu̱ da lukti ɓaran tu̱ sa ku̱me varan nggaran. Tu̱ ku̱m ji tu̱ nggu̱ɗ nu̱ mbu̱ ɗyimang. 8Tu̱ ɓeeni nu̱ mburi ndang ɗu̱ me gu̱mndi mbu̱ du̱mbu̱lang a dut lem nu̱ nyeelki ndu̱ yurvyang. Ku̱me ɓakh ɓaanda ndu̱ me gu̱mndang ɗya ba mite won da. 9Na ɓa ki ku me gu̱mndang tu̱ na shaadli ɓai ye maaran ndu̱ yurvi ɗyinan ndu̱ ɓu̱rti tolir tu̱k.
10Tu̱ Yesu ze wor za, “A ɓa ma ndu̱ yurviku koɗom mbu̱ nun ku̱ski leendangang.”
11Tu̱ Siman Biturus dlan mbu̱ du̱mbu̱lang tu̱ ɗa dut lemang nu̱ dam nyeedlan ndu̱ yurviku gwaanji gwaanji wor won ndu̱ ɗyin qurmun qu̱m kunung (153). Yang kap ndu̱ khang ɓaanda, lemang nu̱ ɓyakh ɓa. 12Tu̱ Yesu ze wor za, “A ɓa ma tun zu̱m paasi.” (Ɗye zu̱mndi dumaari). Yang nduk a nje nu̱ khaki ma zhamndan za to ki kwa ɓa ku̱me wa zu̱n ku za ɗya Zhinerem gwaanji. 13Tu̱ Yesu ɗu̱ tu̱ da ɓurti tolirang tu̱ vu̱r ye wora, tu̱ da yurvyang tu̱k tu̱ vu̱r ye wora. 14Nang ke wuti varan nu̱ kunung nu̱ Yesu shiki ye nu̱ mburi nda kwang gaanje jiiri ɓaran mbe mu̱ti.
Yesu ndu̱ Biturus
15Nu̱ woɗaki zu̱m paasi ɓaanda, tu̱ Yesu zham Siman Biturus za, “Siman yi ɓu̱ Yokhana, ta ndola nga dukti nduki nang mu?” Tu̱ Biturus tlogha yenda za, “I, Zhinerem gwaanji, ta zu̱n nga shimndoro” Tu̱ Yesu ze nda za, “Zu̱m ndu̱ ndu̱ɓangku ɓanga.” 16Tu̱ Yesu gaɓ tu̱ zham nda nu̱ rapan za, “Siman yi ɓu̱ Yokhana, ta ndola nga mu?”
Tu̱ tlogha yenda za, “I, Zhinerem gwaanji, ta zu̱n nga ndolaro.”
Tu̱ Yesu zu̱ za, “khutlo ndu̱ɓangku ɓanga.”
17Tu̱ Yesu gaɓ tu̱k tu̱ zham nda nu̱ kunungan za, “Siman yi ɓu̱ Yokhana, ta ndola nga mu?”
Tu̱ Biturus su̱bu̱r mban nu̱gha ku̱me ye zhamndi nu̱ kunungang Yesu wa zu̱ za, “Ta ndola nga mu?” Tu̱ gaɓ tu̱ tlogha za, “Zhinerem gwaanji ta zu̱n aa nu̱m kap, yang ta zu̱n tu̱k za nga ndola ro.”
Tu̱ Yesu ze nda za, “Zu̱m ndu̱ ndu̱ɓangku ɓanga. 18Zhire, nga zu̱ran yoro, sarchi nu̱ke to nyakhtli, ta ka sa lukti to ɗu̱ ye maa nu̱ke ta shimndan kap. Yang mbu̱ ta geema to ka vu̱r kha ye njif nggur tu̱ sa lukti yoro. Tu̱ ɗu̱ ndu̱ to ye maa nu̱ke ta shim yir si ɓa.” 19(Yesu zu̱ wanang ma wut pooni mu̱ti nu̱ke Biturus ka ɓa shiki ma ku̱ vu̱r zhaaji ye Magham). Gaanje ɓalar nang tu̱ Yesu ze Biturus za, “A mburi nga.”
Yesu ndu̱ nu̱ Mburi nda nu̱ke a Shimndanang
20Nu̱ Biturus mbu̱mki tu̱ nggu̱t maa gana, tu̱ na nu̱ mburi nu̱ke Yesu a ndola ndang a mbu wora. Nang ke nu̱ mburi nu̱ khaki nu̱ bing ndu̱ Yesu sarchi nu̱ke a zu̱m ɗye zu̱mndi tabar peetar ɗyinang. Chin zhamki Yesu za, “Zhinerem gwaanji, ki kya ma vu̱rtor ɓara?” 21Nu̱ Biturus naki nda tu̱ zham Yesu za, “Zhinerem gwaanji, njif nang ɗa?”
22Tu̱ Yesu ze nda za, “Mbu̱ nang shim ku̱ mu̱t ɓa kope nga gaɓi, nu̱m ke ɓa mba na? Ɓa ba mburi nga!” 23Tu̱ labar nang ɗu̱ aa fu̱n chele ɓu̱ nu̱ mbu Yesu ku, a zu̱ran ku za nu̱ mbu Yesu nang ɓu̱ mu̱t ɓa. Yang Yesu nu̱ ze nda za ɓu̱ mu̱t ɓa ɓa. Zu̱ za, “Mbu̱ nga shim ku̱ kha ndu̱ nyifi kope gaɓti ɓanga, nu̱m ke ɓa mba na?”
24Nang ke nu̱ mbu Yesu nu̱ke a saida ɗyiku nang, wa bu̱lan gha. Chem wa zu̱n saidu ɓaran ɗya zhire.
25Yang ɓeeni ɗyiku a nje khang nu̱ Yesu shiki, nu̱ke mbu̱ ka bu̱lan gha kap, nga tamandan a larji ɓu̱ ɗu̱ma da lagarkatiku nu̱ke ka bu̱laki ɓa.
Currently Selected:
Yokhana 21: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
