Yokhana 19

1Sarchi nang, tu̱ Bilatus sa za ku̱ shi kurpi ye Yesu. 2Tu̱ sojekwang shi ɗye zhar ndu̱ njekhti tu̱ san mbu̱ ɗyinan. Tu̱ sa lukti vyangndi pooni ɓu̱ kujiku yenda. 3Tu̱ yang ka ɗu̱ she nda ku a ɓu̱tli nda a zu̱ran yenda ku za, “U̱ngkali, kuji ɓu̱ Yakhudeku.”

4Tu̱ Bilatus a vi tu̱k tu̱ ze Yakhudekwang za, “Wonji nga ma viri ndu̱ Yesu ye nu, yang nga shim zu̱n nu nu̱ ɗyine nang gwa nda ndu̱ zop nggur ɓa.” 5Nu̱ Yesu a viki ndu̱ ɗye zhar njekhti mbu̱ ɗyinan ndu̱ lukti vyangndi, tu̱ Bilatus ze wor za, “Wonji ma khuskyang.”

6Yang ba nu̱ kuru rututundi ku ndu̱ nu̱ nggu̱ti Rafti ɓu̱ Magham kwang naki nda tu̱ ghwaɗ zhaano ku a zu̱ran za, “Ku̱ kaatli nda gha! Ku̱ kaatli nda gha!”

Tu̱ Bilatus tlogha za, “Ɗu̱ma tun a katl nda gha ndu̱ vaanu ɓang nang gwa nda ndu̱ zop nggur ɓa.”

7Tu̱ Yakhudekwang tlogha yenda za, “Woparang nje khaarem, yang woparang wa wut za wa ku̱s ku̱ tlagha nda nu̱ gha, ku̱me wa gaɓ ndu̱ ɗyinan za mu chin Yi ɓu̱ Magham.”

8Nu̱ Bilatus tu̱kki wanang tu̱ shaata tu̱k sawar nu̱ si. 9Tu̱ gaɓ tu̱ vi nu̱ mbu̱ patle ɓaranang tu̱ zham Yesu za, “Ta vi fu̱na?” Yang Yesu nu̱ tlogha zhamndang yenda ɓa. 10Ku̱me nang, tu̱ Bilatus ze nda za, “To zhang shi ɓalar ya gha mu? No zu̱n za nga ke nu̱ zalale ngga gha ndu̱ kaatlor gha ɓa goma?”

11Tu̱ Yesu tlogha yenda za, “Zalale ɓaa yina ɗya Magham vu̱rki yoro. Yang njif nu̱ shiki njiv vu̱rti nga nu̱ mbu̱ khaarang wa duk toro ndu̱ zop.”

12Ku̱me ɓalar nang, tu̱ Bilatus shim ngga Yesu gha, tu̱ yang Yakhudekwang da su̱qur wor nu̱ viɗi a zhaano ku za, “Ba mbu̱ ta ngga khuski nang gha, to rapti Kaisar ɓa. Ai, aaki gaɓki ndu̱ ɗyinan ma kuji a shikya takhumndi ye Kaisar.”

13Nu̱ Bilatus tu̱kki ɗyi nu̱ zu̱ki ku nang, tu̱ ɗa vi ndu̱ Yesu tu̱ khan ɗyine zhakhɗye kumari ye maa nu̱ du̱nki ndu̱ ndogdi. Ka qa maaranang ndu̱ me Yakhuda za Gabata. 14Yang ye fu̱ɗaranang, ɗya fu̱ɗar daasar tabar peetar ɗyin. Fu̱ɗar a tala.

Tu̱ Bilatus ze Yakhudeku za, “Wonji ma kuji ɓaanu!”

15Tu̱ Yakhudekwang ghwaɗ zhaano a zu̱ran ku za, “Ku̱ tlagha nda nu̱ gha! Ku̱ tlagha nda nu̱ gha! Ku̱ katl nda gha!”

Tu̱ Bilatus zham wor za, “Tun a shim ku̱ katl nga kuji ɓaanu gha?”

Tu̱ kuru rututundi kwang tlogha za, “Kuji khaarem tu̱ duk Kaisar ɓa.”

16Kom tu̱ Bilatus da Yesu tu̱ san mbu̱ khar Yakhudeku ma ku̱ katli nda gha.

Wa Katl Yesu gha

(Mat 27:32-44; Mar 15:21-32; Luk 23:26-43)

17Tu̱ Yakhudekwang ɗu̱ ndu̱ Yesu. Yesu vi ɓar mbu̱ ghayang aa da qu̱far kaatli ɗyin varan ma yir ye maa nu̱ka qaki za ye maa du̱ɓ ɗyin. Yang ka qa Golgota ndu̱ me Yakhuda. 18Tu̱ katl Yesu gha ye maaran su̱yen ndu̱ nduki nggur wor rap, da ve bu̱nan nu̱ zu̱ma da ve nu̱ gu̱ɗau.

19Yang Bilatus wa bu̱la ɓalar nggur nu̱ katlki nu̱ ve qu̱far kaatlang. Shi bu̱larang za, “YESU KHUZI NAZARET KUJI ƁU̱ YAKHUDEKU.” 20Yakhudeku khang wa na bu̱lar nang ku̱me ye maa nu̱ katlki nda ghang a bing ndu̱ ghayang. Wonji bu̱la ndu̱ me Yakhuda, ndu̱ Roma ndu̱ Gu̱rik. 21Tu̱ kuruku rututundang ze Bilatus za, “Ku̱ bu̱la kuji ɓu̱ Yakhudeku ɓa, ku̱ bu̱la za, khuski nang wa zu̱ za, nga ke kuji ɓu̱ Yakhudeku.”

22Tu̱ Bilatus tlogha za, “Ɗyi nang bu̱laki nga bu̱la.”

23Qu̱rse sojekwang wa katl Yesu gha, tu̱ ghar ɗye sarku ɓaran, tu̱ shakh nu̱gha san vat, aa nyi soja tu̱ ghar san da. Tu̱ da lukti kirkandi ɓaran nu̱ke me tatl su̱ ɓa, shaka nda shaka shaka viɗi ma yir yaghai.

24“Tu̱ ze yen ku za, ɓyakh mi lukti nang nu̱gha ɓa, ngga mi daati nu̱ ɗyinan chem na njif nu̱ke ka zu̱mki tu̱ kha ma ɓaran.”

Ɗyinang shi wanang ma nyel ɗyi nu̱ lagarkati ɓu̱ Magham zu̱ki za,

“Wa shakh ɗye sar ɓang ku nu̱ chele ɓaanda.

Tu̱ ngga daatiku nu̱ ɗyine lukti ɓanga.”#19:24 Nggu̱t tu̱k mbu̱: Zab 22:18.

Nang ke ɗyi nu̱ sojekwang shiki.

25Nduki nu̱ chingki nu̱ bing ndu̱ qu̱far kaatli nu̱ katlki Yesu nu̱ ɗyinanang ɗya man ndu̱ khachin man nusukandi, ndu̱ Maryam nokhzi Kilopas, ndu̱ Maryam ye Magadaliya. 26Nu̱ Yesu naki man ndu̱ nu̱ mburi nda nu̱ke a ndola ndang chingndan bing tu̱ ze man za, “Nana, njif nang wa kha ma woi ɓaaro.” 27Kom tu̱ ze nu̱ mburi nda za, “Njif nang wa kha ma mo.” Ji ɗyin sarchi nang tu̱ nu̱ mburi ndang ɗu̱ ndu̱ man Yesu kaa ɓaran ta khan she nda.

Mu̱ti Ɓu̱ Yesu

(Mat 27:45-56; Mar 15:33-41; Luk 23:44-49)

28Yesu wa zu̱n za sarchi nang chin wa woɗa aa nu̱m, yang ku̱me ku̱ aa nu̱m kha nyeedlan wa nu̱ lagarkati ɓu̱ Magham zu̱ki, tu̱ zu̱ za, “Nga tu̱k khuzhumndi.” 29Yang nu̱ke bungndi nggur a nje nyeedlan ndu̱ ɗyim ɓeundi, tu̱ nggu̱t ndoɗyiri nu̱gha ndu̱ ɗyim ɓeundang, tu̱ shaɓ ndoɗyirang nu̱ me saɓir khisop tu̱ zoɓa ye me Yesu. 30Nu̱ Yesu darki ɗyim ɓeundang tu̱ zu̱ za, “Wa woɗa” Kom tu̱ sa ɗyinan nu̱ yaghai tu̱ ngga nyifi ɓaran gha.

Wa Zhokh Yesu ndu̱ Kaazi

31Nu̱ke ɗyinang shi fu̱ɗar Daasari, vi dumaaran ɗya Fu̱ɗar Maasi gwaanji. Nu̱ Yakhudekwang shim ku̱ njig man var mu̱tikwang nu̱ me qu̱far kaatlang ye Fu̱ɗar Maasang ɓa, tu̱ khuɗ Bilatus ku ku̱ zha saari wor nu̱gha ku̱ ɗa zhur wor yaghai. 32Tu̱ sojekwang a ɓa tu̱ zha saari khuski nu̱ gumapaali nu̱ katlki nda gha su̱yen ndu̱ Yesu, tu̱ zha ɓu̱ njif dandang tu̱k 33Yang nu̱ ɗa ɓa ki ku she Yesu tu̱ gwa wa mu̱ɗi, nu̱ zha saaran nu̱gha ɓa. 34Tu̱ da chele sojekwang zhokh ku̱bdi Yesu ndu̱ kaazi, tu̱ tom ndu̱ ɗyim a mbu̱ɗi fan ndu̱ fan. 35Njif nu̱ naki ɗyikunang ndu̱ yitan zu̱ki, yang ɗyi nu̱ zu̱kyang ɗya zhire. Wa zu̱n tu̱k za chin a zu̱kya zhire ɓu̱ ɗyi nu̱ ɗatlki, yang a zu̱ranang ku̱me maita nu wa nyin maitakyang. 36Ɗyinang shi ma nyel ɗyi nu̱ bu̱laki nu̱ mbu̱ lagarkati ɓu̱ Magham za, “Ɓu̱ zha aa qu̱tli ɓaran da nu̱gha ɓa.”#19:36 Nggu̱t tu̱k mbu̱: Shig 9:12; Zab 34:20. 37Ye maa nggur mbu̱ bu̱lar ɓalar ɓu̱ Magham nu̱ zu̱ki tu̱k za, “Ka nggu̱t njif nu̱ wor zhokhkyang.”#19:37 Nggu̱t tu̱k mbu̱: Zak 12:10; Ɗyt 1:7.

Par mu̱ti Yesu

(Mat 27:57-61; Mar 15:42-47; Luk 23:50-56)

38Qu̱rsan, tu̱ Yusufu ye Armatiya khuɗ Bilatus ku̱ vu̱r man var Yesu yenda. Yang Yusufu ɗya nu̱ mbu Yesu mbu̱ tuka ku̱me a sawa Yakhudekwang. Nu̱ Bilatus vu̱rki zalale ni yenda, tu̱ da man var Yesu ɓara. 39Yang Nikodemu nu̱ ɗu̱ki she Yesu mbu̱ virkirang a su̱yen ndu̱ Yusufu, khubtan ndu̱ ɗye zhi mu̱nkandi, ɗya mur ndu̱ alos longgaran nu̱ke taɗaran wa khu̱l kilo ɗyin kunung qu̱m vat. 40Tu̱ nduki rapndi nang da man var Yesu tu̱ ɗyikhlan mbu̱ kapar linen ndu̱ ɗyiku nu̱ zhiiri mu̱nkandi ku nang ba wa nu̱ke Yakhudeku ka paki mu̱ti ɓaanda. 41Yang ye maa nu̱ katlki Yesu ghang, dam nggur a nje ndu̱ mewar ku̱jip nu̱ke nu̱ sa nduk nu̱ mban sarda ɓa. 42Tu̱ sa man var Yesu nu̱ mbu̱ ku̱jipang ku nu̱ke ɗya fu̱ɗar Daasar ɓu̱ Yakhudekwang, wonji ku̱jipang a bing.

Currently Selected:

Yokhana 19: ttrNT

Highlight

Copy