Yokhana 18

Wa Ku̱s Yesu

(Mat 26:47-56; Mar 14:43-50; Luk 22:47-53)

1Qu̱rse Yesu wa woɗa barar nang, tu̱ peeta mbu̱ nggu̱di Kidiron su̱yen ndu̱ nu̱ mburi nda kwang, tu̱ ɗu̱ ɗyin ɗawar fara. Yang tleebi mbu̱ nggu̱dang, dam nggur a nje. Tu̱ Yesu ndu̱ nu̱ mburi nda kwang vi ku nu̱ mban. 2Yang Yakhuda nu̱ vu̱rki Yesu ɓar wa zu̱n ye maaranang ku̱me Yesu wa ka gama ndu̱ nu̱ mburi nda kwang ye maaran. 3Tu̱ Yakhuda a ɓa ndu̱ sange sojeku ndu̱ ɓeeni nu̱ nggu̱ti kib ghaari ghai ɓu̱ Yakhudekwang ndu̱ kuruku rututundi ndu̱ Pariseku khubtan ndu̱ Pitileku ndu̱ toshilen ndu̱ ɗye ruɓarku. 4Yang nu̱ke Yesu wa zu̱n ɗyi nu̱ke a ma shiran ku kap, tu̱ ɗa vi tu̱ zham wor za, “Tuna laɓkya kiya?”

5Tu̱ tlogha ku za, “Yesu Khuzi Nazaret” Tu̱ Yesu ze wor za, “Nga ke chin.” Yang Yakhuda nu̱ vu̱rki nda ɓarang a nje chingndan su̱yen ndu̱ wora. 6Nu̱ Yesu zu̱ki za, “Nga ke chin,” tu̱ song nu̱ gana ku tu̱ nggu̱ɗ nu̱ yaghai.

7Tu̱ Yesu gaɓ tu̱ zham wor za, “Tuna laɓkya kiya?” Tu̱ zu̱ ku za, “Yesu khuzi Nazaret.”

8Tu̱ Yesu tlogha za, “Ai, nga woɗa zu̱ran ye nu za nga ke chin. Yang mbu̱ tun a laɓ kya nga, njig ma nduki ɓang nang ku̱ ɗu̱ vaanda.” 9Shi nang ma nyel ɗyi nu̱ Yesu zu̱kyang. Gana far sarchi bararang wa zu̱ za, “Mbu̱ nduki no vu̱rki ya nduk a nje nu̱ saghaki ɓa.”

10Yang Siman Biturus nu̱ke kaskar a nje kha nda, tu̱ ku̱di tu̱ ku̱m maavi ɓu̱ gorkir ɓu̱ kurukwang tu̱ ku̱rta dlu̱mndan nu̱ zu̱ma nu̱ gha. Yang dlu̱m maavyang za Malkus.

11Tu̱ Yesu wu Biturus za, “Goɓ ndu̱ kaskar ɓaa mbu̱ raftan! Ngam ɓu̱ za mbu̱ ɗyekhti#18:11 Zar mbu̱ ɗyekhti A ve bonye nu̱ke Yesu a ma zaran ku̱me zop ɓu̱ larji. nu̱ Zhinkirang vu̱rki ya de?”

Wa Ɗu̱ ndu̱ Yesu Gume Gorkir ɓu̱ Kuruku

(Mat 26:57-58; Mar 14:53-54; Luk 22:54)

12Ye sarchi nang, tu̱ sange sojeku ndu̱ gorkir ɓaanda ndu̱ nu̱ nggu̱ti kib ghaari ghai ɓu̱ Yakhudekwang ku̱s Yesu tu̱ gu̱n kharan nu̱gha ku, 13ta ɓa ndu̱ chin ku she Khanana#18:13 Khanana Ɗu̱ ndu̱ Yesu gume nda ku̱me a vu̱r zhaaji yenda ku. Kayafa dlu̱ kwaaɗarang khanda. gumapaali. Khanana ɗya su̱rvi Kayafa nu̱ke chin ke gorkir ɓu̱ kuruku ye sonyiran. 14Nang ke Kayafa nu̱ vu̱rki sawari ye Yakhudekwang za wa shipa ku̱ nduk da mu̱t ku̱me ndukyang.#18:14 Nggu̱t tu̱k mbu̱: Ykh 11:50.

Biturus wa Keela Zu̱ndi Yesu

(Mat 26:69-70; Mar 14:66-68; Luk 22:55-57)

15Tu̱ yang Siman Biturus ndu̱ nduk da chele ɓu̱ nu̱ mburi nda kwang mbu gaanje Yesu. Yang gorkir ɓu̱ kurukwang wa zu̱n njif dandang. Nu̱ke wanangang, tu̱ vi nu̱ mbu̱ dalang mbu̱ rafti ɓu̱ gorkir kurukwang su̱yen ndu̱ Yesu. 16Yang ɓu̱ Biturus chingndan me virang dam. Tu̱ nu̱ mbu Yesu nu̱ke gorkir ɓu̱ kurukwang zu̱nki ndang vi nu̱ dam tu̱ shi ɓalar ye wonkhar nu̱ke a bu me virang ku̱ ɗa vi ndu̱ Biturus mbu.

17Tu̱ wonkhar nu̱ke a bu me virang zham Biturus za, “Woɗye to da chele nduki nu̱ mbu khuski nang ɓa goma?”

Tu̱ Biturus tlogha za, “Auwo! Nga mban ɓa.”

18Nu̱ke mbiti a nje tu̱ maaviku ndu̱ nu̱ nggu̱ti Rafti ɓu̱ Maghamang pi ɓai ku a tu̱ku̱ndan. Tu̱ Biturus ching nu̱ she wor a tu̱ku̱ndan tu̱k.

Gorkir ɓu̱ Kurukwang wa Shi Zhamndi ku ye Yesu

(Mat 26:59-66; Mar 14:55-64; Luk 22:66-71)

19Tu̱ gorkir ɓu̱ kurukwang shi zhamndi ye Yesu ɗyine nu̱ mburi nda ku ndu̱ shogar ɓaran.

20Tu̱ Yesu tlogha ye wor za, “Ai, nga shi ɓalar ye larji ye dalangi gume aaki, nga shogar ye nduki aakochi mbu̱ maa tabar ɓaanu ndu̱ mbu̱ Rafti ɓu̱ Magham, ye maa nu̱ke Yakhudeku ka tabaki. Sar da nang zu̱ ɗyi nggur mbu̱ tuka ɓa. 21Yang nu̱m saki to ki zhamndi nga? Zhom nduki nu̱ tu̱kki shogar ɓang ku̱ zu̱ ɗyi nang shogaki ye wora. Ai, wa zu̱n ɗyi nang zu̱ki ye wora.”

22Nu̱ zu̱ki wanang, tu̱ da chele ɓu̱ nu̱ nggu̱ti Rafti ɓu̱ Magham nu̱ke a nje chingndan ɓu̱tl Yesu ve mbu̱ yitan ɓwa, tu̱ zu̱ za, “Nu̱m saki to ka tloghaki ɓalar ye gorkir ɓu̱ kuruku wanangang na?”

23Tu̱ Yesu tlogha za, “Mbu̱ nga zu̱ ɗyi galkandi, zu̱ ye maa nang galki ya. Yang mbu̱ nga zu̱kya zhire, nu̱m saki to ɓu̱tli nga?” 24Kom tu̱ Khanana sa ku̱ ɗu̱ ndu̱ Yesu bu̱nan gu̱ndan she Kayafa gorkir ɓu̱ kurukwang.

Biturus wa Gaɓ tu̱ Keela Zu̱ndi Yesu

(Mat 26:71-75; Mar 14:69-72; Luk 22:58-62)

25Yang Siman Biturus ba nje chingndan ye maaran tu̱ zham nda ku za, “Annya, to da chele nu̱ ɓu̱ mburi nda kwang ɓa ya?” Tu̱ Biturus keela za, “Nga mban ɓa.”

26Yang da chele maaviku ɓu̱ gorkir ɓu̱ kurukwang a nje ye maaranang ɗya kheeti ɓu̱ njif nu̱ Biturus ku̱rtaki dlu̱mndan nu̱ghang. Tu̱ ze Biturus za, “Woɗye nang na mbu̱ damang su̱yen ndu̱ chin ɓa goma?” 27Tu̱ Biturus gaɓ tu̱ keela. Fan ndu̱ fan tu̱ koogurokh shi mbaari.

Wa Kuma Yesu Gume Nggomna Bilatus

(Mat 27:1-2, 11-14; Mar 15:1-5; Luk 23:1-5)

28Ye sarchi nang, tu̱ Yakhudekwang vi ndu̱ Yesu ɓar mbu̱ rafti ɓu̱ Kayafa tu̱ ɗu̱ ndu̱ chin ku patle ɓu̱ nggomne nu̱ Roma. Yang nu̱ke ɗya dumaari ɗau, tu̱ zhang viri nu̱ mbu̱ raftang gha ku ku̱me a zhang khanda ru̱knaran ku tu̱ nggu̱tl wor ndu̱ zu̱mndi ɗye zu̱mndi tabar peetar ɗyinang ɓa. 29Ku̱me nang, tu̱ Bilatus vi nu̱ dam tu̱ gwa wor za, “Tuna da zhaano ɓu̱ njif nang ɗyine nu̱ma?”

30Tu̱ tlogha ku za, “Mbu̱ nu̱ shi zop ɓa, ai, tu̱ga chem ɓu̱ ɗa ɓa ndu̱ chin sho ɓa.”

31Tu̱ Bilatus zu̱ za, “Ɗu̱ma ndu̱ chin tun a kuma nda ndu̱ ɗyi nu̱ wopar ɓaanu zu̱ki.” Tu̱ Yakhudekwang tlogha za, “Zalala khaarem ma kuma mi nduk tu̱ tlagha nda nu̱ gha ɓa.” 32Yang ɗyinang shi ma ku̱ nyel ɓalar nu̱ Yesu zu̱ki ɗyine pooni mu̱ti nu̱ke chin a ma shiran.

33Kom tu̱ Bilatus gaɓ nu̱ kaa mbu̱ rafti, tu̱ sa ku̱ ɗa ɓa ndu̱ Yesu, tu̱ zham nda za, “To ke kuji ɓu̱ Yakhudekwang mu?”

34Tu̱ Yesu tlogha za, “Zhamndi nang ji sho mu, yang nduki nggur zu̱ki ɗyi nggur yor ɗyina mu?”

35Tu̱ Bilatus tlogha za, “Nga pooni ɓu̱ Yakhuda mu? Nduki ɓaaro ndu̱ kuruku rututundi a ɓa ki ndu̱ to ya. Yang shwat to shikya nu̱ma?”

36Tu̱ Yesu tlogha za, “Kwaaɗar ɓang ɗya poonan ɓu̱ larji ɓa, tu̱ga maaviku ɓang wa dakhla nduki ma vi nga nu̱ mbu̱ khar Yakhudeku ɓa.”

37Tu̱ Bilatus zu̱ za, “Alapa to kuji goma?”

Tu̱ Yesu tlogha za, “To ndu̱ ɗyinoro ta zu̱ no za nga kuji. Nang ke ɗyi nu̱ saki tu̱ kha nga, nang ke ɗyi nu̱ saki tang a vi nu̱ mbu̱ larji tu̱k, ma zu̱ zhire ni. Kap nu̱ shimndi zhire wa ka tu̱k ɓalar ɓanga.”

38Tu̱ Bilatus zham nda za, “Nu̱m ke zhirya na?”

Wa Dla Kumar Mu̱ti ye Yesu

(Mat 27:15-31; Mar 15:6-20; Luk 23:13-25)

Qu̱rse wa shi zhamndi nang, ta ɓa she Yakhudekwang tu̱ ze wor za, “Ɓang nang gwa nda ndu̱ zop nggur ɓa. 39Yang me ghai nggur a nje khaanu, nang ka nggaki nduk da ye nu gha zhaaru̱m aa nyi Tabar peetar ɗyin. Yang ɗa, tun a shim ngga nga kuji ɓu̱ Yakhudekwang gha men mu?”

40Tu̱ tlogha ku nu̱ zhaano za, “Chin ɓa! Ku̱ nggakya Barabas gha!” Yang Barabas ɗya nu̱ zhiri ghai ɓaran.#18:40 Barabas Ɓeena bu̱larku ka qa nda za nu̱ yeta, ɓeenan za nu̱ takhum kom ɓeenan za nu̱ tlu̱nar zop.

Currently Selected:

Yokhana 18: ttrNT

Highlight

Copy