Tlu̱nar ɓu̱ Pudeku 8

1Yang Shawulu a nje ye maarang a gu̱n su̱ tlaghar Istafanus nu̱ shikikwang.

Shawulu wa Vu̱r Bonye ye nu̱ Mbu Yesu ku

Ye sarchi nang, tu̱ nu̱ mbu Yesu ku nu̱ke a Urshalima za bonye maɗyikandi. Tu̱ lakhta wor nu̱ mbu̱ dlar ghai Yakhudiya ndu̱ Samariya tu̱ njigkya ba Pudekwang ɗyenda mbu̱ Urshalima. 2Tu̱ nu̱ sawar Magham ku pa Istafanus gha, tu̱ gho mu̱ti ɓaranku maɗyi. 3Yang ɓu̱ Shawulu, tu̱ ku̱s vu̱r bonye maɗyikandi ye nu̱ mbu Yesu ku. Tu̱ ki viri rafa rafa, a ku̱di nusuku ndu̱ khuzuku, a khi wor gha zhaaru̱m.

Wa Wopa Labar Mbarkandang mbu̱ Ghai Samariya

4Tu̱ nduki nu̱ lakhtaki ku nang ki baara maari ku a wopa Labar Mbarkandang nu̱ a fu̱n. 5Tu̱ Filibus ɗu̱ mbu̱ ghai nggur Samariya tu̱ wopa labar ɓu̱ Masiya nje. 6Nu̱ ndukyang tu̱kki ɗyi nu̱ Filibus zu̱kyang tu̱ na ɗye lazhamku nu̱ke a shiran, tu̱ dlu̱ ɗyi nu̱ zu̱ki ye worang khar wor rap. 7Tu̱ khu̱kheeti malkandiku a vi ɓar mbe nduki khang a zhaano ku. Tu̱ shaana zurɗarku ndu̱ zu̱ɓtiku khang. 8Tu̱ nduki mbu̱ ghayang kasha ku maɗyi ku̱me nang.

9Yang khuski nggur a nje dlu̱man Siman nu̱ka wutki me bilimku ɓaran zhu mbu̱ ghai Samariya. Nduki nu̱ mbu̱ ghayang kap a tu̱k lazham ɓu̱ ɗyi nu̱ke khuskyang a shiran. A kham ɗyinan za chin nduk gori. 10Nduki kap woi ndu̱ gorki a gwa dlu̱mndi wor yenda a zu̱ran ku za, “Khuski nang ɗya zalale ɓu̱ Magham nu̱ka qaki za Zalale gwaanji.” 11A mburi nda ku ku̱me wa shoɓ a shi ɗye lazhamku ye wora. 12Yang nu̱ maitaki Labar Mbarkandi nu̱ kwaaɗar ɓu̱ Magham ndu̱ dlu̱m Yesu Masiya nu̱ Filibus zu̱ki, tu̱ shi baptisme ye wor kap nusu ndu̱ khusku. 13Tu̱ Siman ndu̱ ɗyinan maita. Qu̱rse nu̱ shiki baptisme yenda tu̱ ki mbu Filibus aa fu̱n a na ɗye lazhamku ndu̱ ɗye saiduku nu̱ke a shiranang tu̱ shi lazham maɗyi.

14Nang ɗo, nu̱ pudeku nu̱ke a Urshalima tu̱kki za dlar ghai Samariya wa dlu̱ ɓalar ɓu̱ Magham ku, tu̱ ru̱k Biturus ndu̱ Yokhana ye wora. 15Nu̱ khu̱lki ku, tu̱ shi barar ye wora ma ku̱ dlu̱ Jiimbi shakhshakhndi. 16Ku̱me Jiimbi shakhshakhndi nu̱ ɗa shur nu̱ ɗyine aaki chele ɓaanda dong ɓa, shikya ba baptisme ye wor mbu̱ dlu̱m Zhinerem gwaanji Yesu. 17Tu̱ Biturus ndu̱ Yokhana sa khar barke ye wor tu̱ dlu̱ Jiimbi shakhshakhndi.

18Yang nang ɗo, nu̱ Siman naki za alapa sar khar ɓu̱ Pudekwang ke nu̱ sa nduk tu̱ gwa Jiimbi shakhshakhndi, tu̱ zoɓa mu̱zhindi ye wora. 19Tu̱ zu̱ za, “Vu̱r ma zalale nang ya tu̱k, ku̱me mbu̱ nga sa khara ye aaki ku̱ dlu̱ Jiimbi shakhshakhndi.”

20Tu̱ yang Biturus tlogha yenda za, “Ku̱ mu̱zhindi ɓaa su̱ya su̱yen ndu̱ to, ku̱me ta taman za to ka gwa vu̱rti ɓu̱ Magham ndu̱ mu̱zhin! 21Tun a nje nu̱ tabaki ndu̱ tlu̱nar nang ɓa, ku̱me memu̱na torop she Magham ɓa. 22Nggoɗu mbe tlu̱nar malkandi nang, to khuɗ Zhinkir gwaanji, bai ka ndu̱m ɗyi no tamanki memu̱narang yoro. 23Ku̱me nga na to nyeedlan ndu̱ zhiri malkandi to gu̱ndan mbu̱ sola.”

24Tu̱ Siman tlogha za, “Khuɗ ma Magham ya, ku̱ aa da mbu̱ ɗyiku nun zu̱ki nang kha ya wanang ɓa.” 25Qu̱rse Biturus ndu̱ Yokhana wa saida tu̱ zu̱ Labar Mbarkandang mbu̱ ghai nandang. A gaɓti ku nu̱ Urshalimang tu̱ ki wopa Labar Mbarkandang mbu̱ ghai ku nu̱ke a Samariya.

Filibus ndu̱ Khuzi Itiyofiye ngguri

26A nje a nje tu̱ nu̱ ru̱kti ɓu̱ Magham ze Filibus za, “Ju to ɗu̱ kona ndu̱ njivang, to mbu njiv nu̱ mbu̱ gaari na viki Urshalima ma yir Gaza.” 27Nu̱ jiiki tu̱ ɗu̱ nje, tu̱ ɗa na khuzi Itiyofiye nggur nu̱ke san miiran, ɗa nduk gor mbu̱ kwaaɗar ɓu̱ Kandis kuji nusukandi nu̱ Itiyofiya. Chin ke nu̱ du̱ngndi mu̱zhindi ɓu̱ kujirang. Yang a ɓa Urshalima ma ghar ghai ye Magham, 28a gaɓti nu̱ kaari kharan mbu̱ mu̱tu̱ke pu̱rsi ɓaran, a nggu̱t mbu̱ lagarkati ɓu̱ Annabi Yishaya. 29Tu̱ Jiimbyang ze Filibus za, “Ɗu she mu̱tu̱ke pu̱rsi nang to ching nu̱ bing ndu̱ chin.”

30Nu̱ Filibus ɗaki tu̱ ɗu̱ she khuskyang, tu̱ tu̱k nda a qa ye chiti nu̱ mbu̱ lagarkati ɓu̱ annabi Yishaya. Tu̱ Filibus zham nda za, “Ta da mbu̱ ɗyi nu̱ke ta nggu̱tan nang mu?”

31Tu̱ Tlogha za, “Fu̱n ɗo? Buka mbu̱ njif nggur wa zu̱ mban ya.” Tu̱ khuɗ Filibus za ku̱ kha gha ku su̱yen mbu̱ ɗye lu̱baran.

32Wonji maa nu̱ke a nggu̱tan mbu̱ bu̱lar ɓalar ɓu̱ Maghamang!

“Wa ku̱dir nda wa ndu̱ɓang nu̱ke

a yir ndu̱ chin ma dla quran,

wa ye gamndi nu̱ka khaki yit

me khar njif nu̱ke a khu̱z

ghosi varan yenda nu̱ gha,

nu̱ qu̱n men ɓa.

33Wa vu̱r palase yenda tu̱

zhang vu̱r zhire ɓaran yenda gha.

Ka gwa woi kikimndana?

Nu̱ke wa da nyifi ɓaran

tu̱ shakh nda ndu̱ larji.”#8:33 Nggu̱t tu̱k mbu̱: Yish 53:7, 8.

34Tu̱ khuski nu̱ke su̱ ve nda ɓa ndang zham Filibus za, “Annabi nang a shikya ɓalar ɓu̱ kiya? A shikya ɓalar ɓu̱ ɗyinan mu yang ɓu̱ njif ngguri?” 35Tu̱ Filibus nggaasan ndu̱ maa nu̱ke a si mbu̱ lagarkati ɓu̱ Maghamang tu̱ zu̱ Labar Mbarkandi ɓu̱ Yesu yenda.

36A mbu̱ yir ku ta khu̱l ye maa nu̱ke ɗyim a nje, tu̱ khuski nu̱ke su̱ ve nda ɓa ndang zu̱ za, “No, wonji ɗyimi! Nu̱m ka nggu̱tlki shir baptisme ya?” 37[Tu̱ Filibus zu̱ za, “Mbu̱ ke ta maita nu̱ memu̱na da, ka shi yoro.” Tu̱ khuskyang tlogha za, “Nga maita Yesu Masiya ke Yi ɓu̱ Magham.”]#8:37 Maa nang a nje mbu̱ ɓeeni bu̱lar khar nu̱ zhu ɓa. 38Tu̱ zu̱ za ku̱ mu̱tu̱ke pu̱rsang ching gha. Ta shur ku ku̱lmbu̱r tu̱ vi nu̱ mbu̱ ɗyimang, tu̱ Filibus shi baptisme yenda. 39Na viki ku ɓar mbu̱ ɗyimang, tu̱ Jiimbi shakhshakhndi da Filibus ɓara, khuski nu̱ke su̱ ve nda ɓa ndang nu̱ na Filibus tu̱k ɓa, tu̱ khuskyang zu̱m guma ndu̱ yir ɓaran a kashari. 40Tu̱ Filibus gwa varan mbu̱ Azotus. Tu̱ baara ghaiku a zu̱ Labar Mbarkandang tu̱ khu̱l Kaisariya.

Currently Selected:

Tlu̱nar ɓu̱ Pudeku 8: ttrNT

Highlight

Copy