Tlu̱nar ɓu̱ Pudeku 9

Nggooti ɓu̱ Shawulu

(Tlp 22:6-16; 26:12-18)

1Yang ɓu̱ Shawulu ba a zu̱m guma ndu̱ vu̱r bonye ye nu̱ mbu Yesu ku a shim tlagha wora. Tu̱ ɗu̱ she dle gume ɓu̱ kurukwang, 2tu̱ khuti nda za ku̱ vu̱r lagarkati yenda ma yir she kib tabarku ɓu̱ Yakhudeku nu̱ke a Damaskus. Nu̱ ɗyine mbu̱ chin wa gwa nduki nu̱ke a mbu Njiv ɓu̱ Zhinerem gwaanji, nusu ndu̱ khusku, ku̱ ku̱s nji wor tu̱ ɗa ɓa ndu̱ wor Urshalima gu̱ndan. 3A mbu̱ yirang, nu̱ shiki bing ndu̱ Damaskus, ba fan ndu̱ fan, tu̱ wuti maari na viki viɗi#9:3 Wuti maa Wuti maa maɗyikandi nu̱ ka dukki nu̱ ka ɓa ki su̱yen ndu̱ pedlang. shi yarang ye maa nu̱ke a sang. 4Tu̱ nggu̱ɗ nu̱ yaghai, tu̱ yang tu̱k su̱qur nggur a ɓalar yenda za, “Shawulu, Shawulu, nu̱m saki to ki vu̱r bonye ya?”

5Tu̱ Shawulu shi zhamndi za, “To kiya, Zhinkir gwaanji?”

Tu̱ su̱qura ɓalarang tlogha yenda za, “Nga ke Yesu nu̱ke ta vu̱r bonye yendang. 6Ju to vi nu̱ mbu̱ ghayi, ka zu̱ ɗyi nu̱ke to ka shiki yoro.”

7Tu̱ nduki nu̱ke a yir su̱yen ndu̱ chinang ku̱na ɓala ku, a tu̱k su̱qur ɓalari, yang nu̱ na aaki ku ɓa. 8Tu̱ Shawulu ji nu̱ viɗi, nu̱ qu̱nki yitan nu̱gha nu̱ ɗu̱ma na maa ɓa. Tu̱ bala nda ku tu̱ ɗa ɓa ndu̱ chin Damaskus. 9Wa shi qaandi kunung a na maa ɓa, nu̱ zu̱m ɗye zu̱m ɓa yang nu̱ za tun ɓa.

10Nu̱ mbu Yesu nggur a nje Damaskus dlu̱man za Khananiya. Zhinerem gwaanji wa shi ɓalar yenda sarchi nu̱ qu̱nki yitan tu̱ na ɗyi tukakandi ku za, “Khananiya!” Tu̱ tlogha za, “Wonji nga Zhinerem gwaanji.”

11Tu̱ Zhinerem gwaanji ze nda za, “Ju to ɗu̱ me njiv nu̱ka qaki za Kwatu̱ra, to ɗu̱ mbu̱ rafti ɓu̱ Yakhuda, to zham mbu̱ khuzi Tarsus nggur a nje dlu̱man Shawulu, a nje a barari. 12Nga qu̱n yitan nu̱gha tu̱ na khuski nggur dlu̱man Khananiya a ɓa tu̱ sa khar barke yenda ma ku̱ na maari tu̱k.”

13Tu̱ yang Khananiya tlogha za, “Zhinkir gwaanji, nga tu̱k labar ɓu̱ khuski nang she nduki khang ndu̱ pooni mu̱nar nu̱ shiki ye nu̱ mburoku Urshalima. 14Wonji gorkir ɓu̱ kurukwang wa vu̱r zalale yenda ku̱ ku̱s aa nyi nduk nu̱ka shiki barar mbu̱ dlu̱moro.”

15Tu̱ Zhinerem gwaanji ze nda za, “Ɗu! Nga dat khuski nang ku̱ shi tlu̱nar ya tu̱ wut dlu̱ma ye nduki nu̱ke ɗya Yakhudeku ɓa, ndu̱ kujiku ndu̱ nduki nu̱ Israila kap. 16Ngga wut bonye nu̱ke ka zaki ku̱me dlu̱ma yenda.”

17Kom tu̱ Khananiya ɗu̱ tu̱ ɗa vi nu̱ mbu̱ raftang. Nu̱ du̱ngki kharan nu̱ ɗyine Shawulu, tu̱ zu̱ za, “Mu̱dla Shawulu Zhinerem gwaanji Yesu nu̱ wutki varan yoro yiti njiv nu̱ke ta ɓarang a ru̱kki nga. Ru̱ktang ma gwana nar maari tu̱k tu̱ nyeedlor ndu̱ Jiimbi shakhshakhndi.” 18Fan ndu̱ fan tu̱ ɗyi nggur wa guɓa a nggu̱ɗ mbu̱ yiti Shawulu tu̱ na maari. Nu̱ jiiki, tu̱ shi baptisme yenda. 19Tu̱ zu̱m ɗye zu̱mndi tu̱ gwa du̱mbu̱ri.

Shawulu wa shi Waazu Damaskus

Tu̱ Shawulu qan koɗom ndu̱ nu̱ mbu Yesu ku nu̱ mbu̱ ghai Damaskus. 20Nu̱ qan maɗyi ɓa, tu̱ Shawulu nggaasi waazu mbu̱ kib tabar ɓu̱ Yakhudekwang a zu̱ran za Yesu ɗya Yi ɓu̱ Magham. 21Kap nduki nu̱ tu̱kki nda tu̱ shi lazham ku a zu̱ran za, “Woɗye nang ke njif nu̱ tlaghaki tu̱ lakhta nduki nu̱ke a barar mbu̱ dlu̱m Yesu Urshalima ɓa goma? A ɓa fan ma ku̱skya wora ku̱ ɗu̱ ndu̱ wor ye kuruku rututundang de?” 22Yang kap ndu̱ nang tu̱ Shawulu shaata gwar du̱mbu̱ri, a za ɗyin Yakhudeku nu̱ke a Damaskus, a wutan ye wor ye dalangi za Yesu ke Masiya.

Shawulu wa Lawa me Khar Yakhudeku

23Nu̱ qanki khang, tu̱ Yakhudeku shi sawari ku̱ tlagha nda shawulu. 24Tu̱ yang Shawulu tu̱k labar ɗyi nu̱ke a daasa shiran ku, nu̱ saki nduki ma bu me garuk ghayang virkir ndu̱ fu̱ɗari ma ku̱ tlagha nda ku. 25Yang tu̱ nu̱ mburi nda ku da nda mbu̱ kang ta zhur ndu̱ chin ve khwati nggur nu̱ke a ve garuk ghayang.

Shawulu wa gaɓ nu̱ Urshalima

26Tu̱ Shawulu ɗu̱ Urshalima, nu̱ ɗu̱ki, tu̱ shim viri nu̱ chele ɓu̱ nu̱ mbu̱ Yesu kwang, tu̱ yang kap ɓaanda tu̱k sawar ɓaranku ku̱me nu̱ maita ku za ɗya nu̱ mbu Yesu ɓa. 27Kom tu̱ Barnaba da nda tu̱ ɗu̱ ndu̱ chin gume Pudekwang, tu̱ zu̱ nar Zhinerem gwaanji nu̱ Shawulu shiki yiti njivi, ndu̱ ɓalar nu̱ Zhinerem gwaanji zu̱ki yenda. Kom ndu̱ waazu nu̱ Shawulu shiki mbu̱ Damaskus mbu̱ dlu̱m Yesu sawa su̱ ɓa. 28Ji ɗyin nang, tu̱ Shawulu kha gha su̱yen ndu̱ wor a baara maari varan zu̱ran mbu̱ Urshalima a waazu mbu̱ dlu̱m Yesu sawa su̱ ɓa. 29Wa ka shi ɓalar ndu̱ Yakhudeku nu̱ka tu̱kki me Gu̱rik ku tu̱ ka shi keele ku, tu̱ yang shim tlagha nda ku. 30Nu̱ nyeezankwang daki mban, tu̱ ɗu̱ ndu̱ chin ku Kaisariya tu̱ tu̱pa nda ku maa yir Tarsus.

31Kom tu̱ nu̱ mbu Yesu ku nu̱ Yakhudiya ndu̱ Galili ndu̱ Samariya gwa qaandi memu̱na. Tu̱ me bu̱n wor shi shokhku̱rokh tu̱ gwa du̱mbu̱r ku ku̱nshe shaatar ɓu̱ Jiimbi shakhshakhndi. Tu̱ shaata ku maɗyi, a khar ɓaanda ndu̱ sawar Zhinkirang.

Biturus wa Shaana Iniyas

32Nu̱ Biturus baaraki mbu̱ dlar ghayang kap, tu̱ ɗu̱ she nu̱ mbu Yesu ku nu̱ke a mbu̱ ghai Lidda. 33Nu̱ ɗu̱ki tu̱ ɗa gwa khuski nggur dlu̱man za Iniyas, yang wa shi sonyi miyasi qaandan ku̱me zurɗaran. 34Tu̱ Biturus ze nda za, “Iniyas, Yesu Masiya wa shaana nu̱gha. Ju to ɗyikhla ku̱rbuk ɓaaro.” Fan ndu̱ fan tu̱ Iniyas ji nu̱ viɗi. 35Nu̱ nduki nu̱ Lidda ndu̱ ghai Sharon naki khuski nu̱ shaanakyang, tu̱ ɗa gaɓ ku nu̱ she Masiya.

Biturus wa Ji ndu̱ Tabita mbe Mu̱ti

36Yang nu̱ mbu Yesu nggur a nje mbu̱ ghai Joppa dlu̱man za Tabita nang ke Dorka. Nokhzi nang wa shi mbarkir ye nduki tu̱ shaata nu̱ nungndi ku khang. 37Ye sarchi naandang tu̱ khaati ngga nda tu̱ mu̱ɗi. Nu̱ wurki nda gha ku tu̱ khu̱tla man varanang gha mbu̱ kib dangkali nu̱ke a viɗi. 38Nu̱ke ghai Lidda a bing ndu̱ Joppa, ni nu̱ mbu Yesu ku nu̱ Joppa tu̱kki za Biturus a nje Lidda, tu̱ ru̱k nduki rap ku̱ ɗu̱ she nda ku̱ khuti nda za ku̱ ɗa ɓa ndu̱ wakho.

39Tu̱ Biturus ɗu̱ su̱yen ndu̱ wora. Nu̱ khu̱lki ku, tu̱ ɗu̱ ndu̱ chin mbu̱ kib nu̱ke a viɗang. Tu̱ nusuku nu̱ke zhi me wor mu̱tki ching nu̱ bing ndu̱ chin a ghoori ku a wut luktiku ndu̱ kaparku nu̱ shiki ye wor sarchi nu̱ke a nje ndu̱ wora.

40Tu̱ Biturus komba aaki nu̱ dam, tu̱ kurum gha tu̱ shi barari. Nu̱ mbu̱mki nu̱ she mu̱tang tu̱ zu̱ za, “Tabita, ju.” Tu̱ mu̱tang qu̱n yitan nu̱gha. Nu̱ naki Biturus, tu̱ ji tu̱ kha gha. 41Tu̱ Biturus vu̱r kharan yenda tu̱ shaata nda tu̱ ji tu̱ ching gha. Tu̱ sa men tu̱ qa nu̱ mbu Yesu ku ndu̱ nusuku nu̱ zhime wor mu̱tki nang tu̱ sa nda nu̱ mbu̱ khar wor nu̱ nyifi.

42Tu̱ labar nang ɗu̱ aa fu̱n mbu̱ ghai Joppa, tu̱ nduki khang maita Zhinerem gwaanji. 43Tu̱ Biturus qan khang Joppa, mbu̱ rafti ɓu̱ du̱keshi nggur dlu̱man za Siman.

Currently Selected:

Tlu̱nar ɓu̱ Pudeku 9: ttrNT

Highlight

Copy