Tlu̱nar ɓu̱ Pudeku 7

Ɓalar ɓu̱ Istafanus Gume Tabar Dle gume ɓu̱ Yakhudekwang

1Tu̱ gorkir ɓu̱ kurukwang zham Istafanus za, “Ɗyi nu̱ zu̱ki ku nang ɗya zhire mu?”

2Tu̱ tlogha za, “Nyeezaku ndu̱ zhinkirku ɓanga, gwa ma dlu̱mndonu ya! Magham nu̱ zhaaji wa wut ɗyinang ye zhikanerem Yibram sarchi nu̱ke a mbu̱ dlar ghai Mesopotamiya me ku̱ khan mbu̱ ghai Khaaran. 3Tu̱ Magham ze nda za, ‘Njig mbu̱ ghai ɓaaro ndu̱ nduki ɓaaro to ɗu̱ ye maa nu̱ke ngga ɓa wutki yoro.’

4“Tu̱ njig maa ɓu̱ Kaldiyeku ta khan mbu̱ ghai Khaaran. Gaanje mu̱ti ɓu̱ zhin tu̱ Magham a ɓa ndu̱ chin mbu̱ maa nu̱ke tun kharan mban leendangang. 5Yang Magham nu̱ vu̱r shakhti ɗye mbu̱ ge maarang yenda aa khaatli mbu̱ saari da ɓa, aa nu̱ke wa shi alqawar za chin ka vu̱r maarang yenda chin ndu̱ pooni ɓaran yang woi kha nda sarchi nang ɓa. 6Magham wa ze nda za, ‘Pooni ɓaa ku ka ɓa shi khar runggiku mbu̱ maa nu̱ke ɗya ɓaanda ɓa, nduki nu̱ mbu̱ maarang ka gaɓ ndu̱ wor ma maava tu̱ vu̱r bonye ye wor me sonyi won vat. 7Yang Magham ka kuma nduki nu̱ gaɓki ndu̱ wor ma maavyang, qu̱rsan ta vi ndu̱ pooni ɓu̱ Yibram tu̱ ghar ghai yenda mbu̱ maa nang.’ 8Tu̱ Magham ching alqawar nu̱ dlarsi chele ɓaran ndu̱ Yibram, nang ke ɗyi nu̱ saki tu̱ Yibram dla su̱ Yishaku qaandi miyasi qu̱rse wa kha nda. Qu̱rsan tu̱ Yishaku kha Nyagham, tu̱ Nyagham kha zhikaneremku gwaanggu̱m rap ndang.

9“Yang ku̱me zhikaneremku a zhiri ɓu̱ Yusufu nu̱ke ɗya khachin wora, tu̱ masa nda ɓar ku, tu̱ nduki nu̱ masaki nda ɓar ye worang ɗu̱ ndu̱ chin Masar. Yang nu̱ke Magham a nje su̱yen ndu̱ chin, 10tu̱ lawa nda ɓar mbe bonyeku nang kap. Tu̱ Magham vu̱r kaɗari yenda tu̱ gumaran shi paling she Firauna kuji Masar. Tu̱ Firauna vu̱r kwaaɗar Masar yenda tu̱ sa rafti ɓaran kap nu̱ mbu̱ bu̱nan.

11“A nje a nje, tu̱ meeri ndu̱ bonye maɗyikandi a vi nu̱ mbu̱ maa Masar ndu̱ maa Kanana kap, nu̱ke ɗye zu̱m nje kha zhikaneremku ɓa. 12Yang nu̱ Nyagham tu̱kki za ɗye zu̱mnda njig Masar, tu̱ ru̱k qusonggi ɓaran nu̱ke ɗya zhikaneremku nu̱ fara. Nang ke yir ɓaanda Masar nu̱ gumapaali. 13Gaɓti ɓaanda nu̱ rapan tu̱ Yusufu wut varan ye khachinkwang, nang ke maa nu̱ Firauna zu̱nki dlu̱dlarsi Yusufu. 14Tu̱ Yusufu ru̱k za ku̱ Nyagham zhin a ɓa ndu̱ khachinku ndu̱ nduki nu̱ mbu̱ bu̱n wor kap. Kap ɓaanda wor ɗyin mut qu̱m qurmun. 15Tu̱ Nyagham ɗu̱ Masar, ye maa nu̱ke chin ndu̱ zhikaneremku a mu̱tki. 16Tu̱ ɗa da man var wor ta gaɓ si Shekem, tu̱ san mbu̱ ku̱jip nu̱ Yibram masaki ndu̱ mu̱zhindi kha qusonggi ɓu̱ Khamor far Shekem.

17“Yang nu̱ sarchi nyedli alqawar nu̱ Magham shiki ye Yibram shiki bing, tu̱ nduki ɓaarem shi khang maɗyi Masar. 18Kom yang, tu̱ kuji nggur nu̱ke nu̱ zu̱n Yusufu ɓa zu̱m kwaaɗar Masar. 19Kuji nang wa mu̱na nduki ɓaarem, tu̱ vu̱r bonye ye zhikaneremku, tu̱ sa ku̱ mbuk ɓeelarku ɓaarem gha ma ku̱ mu̱t ku.

20“Kha Musa mbu̱ qaandiku naandang. Ɗya woi nu̱ke kharan mbar maɗyi, tu̱ moola nda me chere kunung kaa ɓu̱ zhin nu̱ khaki nda. 21Nu̱ man shakki ndu̱ chin tu̱ woi ɓu̱ Firauna da nda, tu̱ khuɓ nda wa woi ɓaran. 22Tu̱ Musa shoga kap kaɗari ɓu̱ nduki nu̱ Masar, wonji ɗya nu̱ zalale maghar ɓala ndu̱ tlu̱narku ɓaran.

23“Nu̱ khu̱lki sonyi ɗyin vat, tu̱ shim ɗu̱ nji she nyeezan Israileku. 24Nu̱ naki ye Masar ngguri a vu̱r bonye ye da chele ɓaanda, tu̱ ɗu̱ tu̱ ɗa shaata ye Israilang, tu̱ dli gaɗe ni yenda, tu̱ ghwat ye Masarang tu̱ tlagha nu̱ gha. 25A taman za nyeezanang ka da mban za Magham a boote ndu̱ chin ma ɗana wora, yang nu̱ da mban ku ɓa. 26Vi dumaaran tu̱k tu̱ gwa Israileku nggur wor rap a dakhlari. Yang nu̱ke a shim ku̱ somta wor ye yen ku tu̱ ze wor za, ‘Tun ndu̱ yen, tun ɗyi da, yang nu̱m saki tun a shim vu̱r bonye ye yena na?’

27“Tu̱ yang khuski nu̱ke a vu̱r bonye ye mu̱dlenang tu̱pa Musa nu̱ konggol, tu̱ zu̱ za, ‘Ki saki ma dle gume ɓaarem ndu̱ kumaremang? 28Nang ta shim tlagha na nga wa no tlaghaki khuzi Masarang mbu̱ɗa mu?’ 29Nu̱ Musa tu̱kki wanang, tu̱ ɗan mbu̱ maa Midiyan tu̱ ɗa shi khar runggi fara. Aa khaa qusonggi rap njigi.

30“Yang qu̱rse sonyi ɗyin vat, tu̱ nu̱ ru̱kti ɓu̱ Magham wut varan ye Musa mbu̱ ghiindi ɓai nu̱ke a mbu̱ ye qu̱far nggur gar bing ndu̱ dleng Sinai. 31Nu̱ Musa naki nang tu̱ shi lazham, tu̱ song nu̱ bing ma nanji nu̱ si mbari, tu̱ tu̱k su̱qur Magham a zu̱ran za, 32‘Nga ke Maghamndi ɓu̱ zhikankirku ɓaaro, Maghamndi ɓu̱ Yibram, ndu̱ Yishaku, ndu̱ Nyagham.’ Tu̱ var Musa ki dlu̱rti ku̱me sawa, nu̱ ɗu̱ma nggu̱tan ɓa.

33“Tu̱ Magham ze nda za, ‘Fet paghamndi ɓaa nu̱gha, ku̱me maa nu̱ke to chingndansi nang, ɗya maa shakhshakhndi. 34Nga na bonye nu̱ke nduki ɓang a zaran Masar shwat, nga tu̱k ghoori ɓaanda, yang nga shur ma ɗana wora, yang a ɓo ru̱k nga nu̱ Masar.’

35“Yang nang ke ba Musa nu̱ zhangki nda gha ku, a zu̱ran ku za, ‘Ki saki ma dle gume ɓaarem ndu̱ nu̱ kumar ɓaaremang?’ Magham ru̱kkyang ba chin ku̱ kha ma dle gume ndu̱ nu̱ ɗanari, sarchi ni nu̱ ru̱kti ɓu̱ Magham wutki varan yenda mbu̱ ye qu̱far nu̱ke ghiindi ɓaiyang a ɗyinanang. 36Chin a viki ndu̱ wor ɓar tu̱k qu̱rse wa shi ɗye lazhamku ndu̱ ɗye saiduku mbu̱ maa Masar, ndu̱ me Ɗyim gwaanji vyangndang, kom ndu̱ mbu̱ gaari nu̱ shiki sonyi ɗyin vat njang.

37“Ba chin Musa nang zu̱ki ye Israila za, ‘Magham ka ɗa ru̱k annabi nggur ye nu chele nduki ɓaanu, ba wa nu̱ ɗa ru̱kki nga.’ 38Musa nang ke khuski nu̱ tabaki nduki nu̱ Israila nu̱ mbu̱ gaari. Tu̱ kha su̱yen ndu̱ zhikanerem ndu̱ nu̱ ru̱kti ɓu̱ Magham nu̱ shiki ɓalar ndu̱ chin ɗyin Dleng Sinayang chin a dlu̱ki ɓalar nu̱ka vu̱rki nyifiri she Magham ta ɓa si yerem.

39“Tu̱ zhikanerem yang zhang mbu ɓalar ɓaran gha, tu̱ zhan nda, tu̱ shim gaɓ nda nu̱ Masar. 40Tu̱ ze Kharuna ku za, ‘Shi mu̱lu̱mku nu̱ke ka khaki nu̱ gume rem, ku̱me ɓu̱ Musa nu̱ ɗa viki ndu̱ chem ɓar mbu̱ maa Masar nang, nyem zu̱n ɗyi nu̱ gwaki nda ɓa.’ 41Nang ke sarchi nu̱ ɓu̱tlki mu̱lu̱m nu̱ke shipar ɓaran wa ye dle, tu̱ dla sadke ku yenda tu̱ shi kashar ku a vu̱r zhaaji ye ɗyi nu̱ke khar wor shiki. 42Ku̱me nang tu̱ Magham vu̱r su̱ ɗyinan ye wora, tu̱ vu̱r wor ɓar ma ku̱ ghar ghai ye ɗyiku nu̱ mu̱na viɗi fu̱ɗa ndu̱ chera ndu̱ anjinjeku. Nang wa shi torop ndu̱ ɗyi nu̱ke a nje bu̱laran mbu̱ lagarkati ɓu̱ annabikwang za,

‘Woɗye ɗa nduki nu̱ Israila,

tun dla qura ɗye nggarku, tun vu̱r sadkeku

me sonyi ɗyin vatndi mbu̱

gaarang ya mu?

43Ai tun baara maakwang ndu̱ tanti#7:43 Tanti Ɗyen ku̱ shekhɗekh yang ka mbu̱r ndu̱ ku̱zu̱m tu̱ ka ɗyikhla ma yir si guma.

ɓu̱ Molekh

ndu̱ anjinje ɓu̱ Refan

nu̱ke wor ke mu̱lu̱mku nun shiki

ma ghar ghai ye worang ɓa goma?

Ku̱me nang ngga gu̱r ndu̱ tun

ma yir guma ndu̱ Babilon.’

44“Zhu tang shekhɗekh shakhshakhndi a nje kha zhikanerem nu̱ke a wut khar ɓu̱ Magham chele nduki ɓaran mbu̱ gaarang. Nang ke shekhɗekh nu̱ Magham zu̱ki ye Musa za ku̱ shi, yang shi ba wa shipar nu̱ Magham wutki yenda. 45Nang ke shekhɗekh nu̱ zhikaneremku dlu̱ki tu̱ ɗa ɓa si mbu̱ maa nang qu̱rse wa dlu̱ maarang ɓar kha nduki nu̱ Magham kombaki wor ɓar mban mbu̱ yiti wora sarchi ɓu̱ Joshuwa. Chin shekhɗekh nang ba a nje ma yir sarchi kwaaɗar ɓu̱ Dauda. 46Dauda wa gwa dlu̱r she Magham, tu̱ khuɗ ku̱ du̱n nji maa ghaari ghai ye Maghamndi ɓu̱ zhikanerem Nyagham. 47Yang Solomon shiki du̱ndang ye Magham.

48“Yang kap ndu̱ nang, Magham nu̱ viɗi nu̱ka khan mbu̱ raftiku nu̱ nduk du̱nki ɓa. Ba wa nu̱ annabyang zu̱ki za,

49‘Mbu̱ viɗi ke zhakhɗye kwaaɗar ɓanga

maa vu̱ghai ke ɗye du̱ngndi saara.

Yang tun ka du̱ngkya rafti nu̱m ya?

Magham zu̱ki.

A fu̱nke maa maasi ɓanga?

50Nga du̱ngki ɗyiku nang kap ɓa goma?’

51“Nu̱ nggar var ku, nduki nu̱ke memu̱na wor kaaku̱ɗakh, nu̱ zhangndi tu̱kti maa ku! Tun wa ka zhang ɗyi nu̱ Jiimbi shakhshakhndi zu̱ki ye nu aakochi ba wa nu̱ zhikannu shiki. 52Annabyang nje nu̱ke zhikannu nu̱ vu̱r bonye yenda ɓa mu? Wor tlaghaki nduki nu̱ wopaki ɓar ɓu̱ nu̱ Jeembu nang, yang leendang tun vu̱rki nu̱ Jeembwang ɓar tun tlagha nda nu̱ gha. 53Tun dlu̱ki bibitang nu̱ ku̱nshe nu̱ ru̱ktiku ɓu̱ Magham yang tun zhangki mburan gha rong ma kaani.”

Wa Mbuk Istafanus tu̱ Tlagha nda nu̱ gha

54Nu̱ tu̱kki wanang ku, tu̱ memu̱na wor su̱bu̱r maɗyi, tu̱ ku̱t dliindi wora. 55Yang tu̱ Istafanus nyeedlan ndu̱ Jiimbi shakhshakhndi ghar yitan tu̱ nggu̱t maa viɗi, tu̱ na zhaaji ɓu̱ Magham ndu̱ Yesu chingndan ve bu̱n zu̱ma ɓu̱ Magham. 56Tu̱ Istafanus zu̱ za, “Nggu̱t ka, nga na maa viɗi qu̱ndan, ndu̱ Yi ɓu̱ Nduk chingndan ve bu̱n zu̱ma ɓu̱ Magham.”

57Tu̱ ndukyang fer zhaano ku tu̱ za dlu̱mndi wor nu̱gha, tu̱ zhan ɗyine nda ku guma da. 58Tu̱ vi ndu̱ chin dam qu̱rse ghayang tu̱ ki mbukti nda ku ndu̱ ndogdi. Tu̱ saiduku nu̱ke a nje du̱ng luktiku ɓaanda nu̱ she nyakhtlir nggur dlu̱man za Shawulu.

59A mbuk Istafanus kwang, tu̱ shi barar za, “Zhinerem gwaanji Yesu, dlu̱ nyifi ɓanga.” 60Tu̱ kurum gha tu̱ da su̱quran nu̱ viɗi tu̱ zu̱ za, “Magham, shi na tun ye wor ku̱me solar nu̱ shiki kunang ɓa.” Nu̱ zu̱ki wanang tu̱ mu̱ɗi.

Currently Selected:

Tlu̱nar ɓu̱ Pudeku 7: ttrNT

Highlight

Copy