Tlu̱nar ɓu̱ Pudeku 6

Wa Dat nu̱ Tlu̱narku wor Mut

1Yang mbu̱ qaandiku naandang, nu̱ke nu̱ mbu Yesu ku a shaata khangi, tu̱ Yakhudeku nu̱ka tu̱kki me Gu̱rik gho me wor nu̱ ɗyine Yakhudeku nu̱ka tu̱kki me Aramayik. Gho me worang, ku̱me nusuku ɓaanda nu̱ zhime wor mu̱tki nu̱ka gwa ɗye zu̱mndi nu̱ka shakki ye ku̱du̱w ku aa nyi fu̱ɗa ɓa. 2Tu̱ gwaanggu̱m rapndang qa nu̱ mbu Yesu ku kap tu̱ zu̱ ku za, “Nu̱ shi mbar njig mi tlu̱nar wopar ɓalar ɓu̱ Magham ku̱me tlu̱nar ɗye zu̱m ɓa. 3Ku̱me nang nyeezaku, dat ma nduki mut chele ɓaanu nu̱ke nyeedlan ndu̱ Jiimbi shakhshakhndi ndu̱ kaɗari. Chem ka vu̱r tlu̱nar nang nu̱ mbu̱ khar wora. 4Ku̱me gwa mi chem rub nu̱ ɗyine barari ndu̱ shogar ɓalar ɓu̱ Magham ɓara.”

5Tu̱ ɓalar nang shi mu̱n ye aaki. Tu̱ dat Istafanus, khuski nu̱ke nyeedlan ndu̱ maito ndu̱ Jiimbi shakhshakhndi ndu̱ Filibus ndu̱ Pu̱rokorus, ndu̱ Nikano, ndu̱ Timon ndu̱ Barminas, ndu̱ Nikolas khuzi Antiyok. Nu̱ke ɗya Yakhuda ɓa yang wa vi ghaari ghai ɓu̱ Yakhudekwang. 6Ta ɓa ndu̱ ndukiku nang gume Pudekwang, tu̱ shi barar ye wor tu̱ sa khar barke ye wora.

7Tu̱ ɓalar ɓu̱ Magham shaata yir aa fu̱n. Tu̱ nu̱ mbu Yesu ku shaata shir khang maɗyi mbu̱ ghai Urshalima. Kuruku khang tu̱ maita labar mbarkandang.

Wa Ku̱s Istafanus

8Yang tu̱ Istafanus, khuski nu̱ke mu̱nkir ɓu̱ Magham ndu̱ zalale ɓaran nyeedlan mbe nda, shi ɗye lazhamku khang ndu̱ ɗye saidu ku chele nduki. 9Tu̱ yang nduki nu̱ mbu̱ kib tabar nu̱ka qaki wor za ɗyin wor Dliiranang, gu̱n keele ku ndu̱ Istafanus. Yang ɗya Yakhudeku na viki Sariyan ndu̱ Alekhzandu̱riya ndu̱ ghai Kilikiya ndu̱ Asiya. 10Yang nu̱ ɗu̱ma nda ku ɓa ku̱me a ɓalarang ndu̱ kaɗari nu̱ Jiimbi shakhshakhndi vu̱rki yenda.

11Tu̱ yang sokh nduki nggur ku mbu̱ tuka za, ku̱ zu̱ ku za, “Chem wa tu̱k Istafanus a ɓalar ndu̱mndi nu̱ ve Musa ndu̱ Magham.”

12Nu̱ zu̱ki ku wanang, tu̱ khangkal ɓu̱ ndukiku ndu̱ dlegumeku ndu̱ maalu̱m taurete kwang gu̱r nu̱ viɗi, tu̱ ku̱s Istafanus ku ta ɓa ndu̱ chin gume tabar dle gume ɓu̱ Yakhudekwang. 13Tu̱ dle gumekwang a ɓa ndu̱ nu̱ saidu wollo ku tu̱ zu̱ ku za, “Khuski nang nu̱ laada ɓalar bamndi nu̱ ɗyine ye maa shakhshakhndi nang ndu̱ wopar ɓu̱ Musa ɓa. 14Chem wa tu̱k nda a zu̱ran za Yesu khuzi Nazaretang ka gu̱ɗa maa nang nu̱gha tu̱ nggoɗ me ghaiku nu̱ Musa njigki yeremang nu̱gha.”

15Yang kap nduki nu̱ khaki gha ye maa tabar dle gume ɓu̱ Yakhudekwang tu̱ zu̱ yiti yenda ku njang, tu̱ yang na mbu̱ yitanang wa nggoɗ ba wa ɓu̱ nu̱ ru̱kti ɓu̱ Magham.

Currently Selected:

Tlu̱nar ɓu̱ Pudeku 6: ttrNT

Highlight

Copy