Tlu̱nar ɓu̱ Pudeku 5

Khananiya ndu̱ Safira

1Yang tu̱ khuski nggur dlu̱man za Khananiya ndu̱ nokhzan Safira masa dam ɓaanda ɓara. 2Tu̱ Khananiya tuka ɓeeni mu̱zhindang gha ye vaaran nu̱ zu̱ndi ɓu̱ nokhzan, tu̱ ɗa ɓa ndu̱ ɓeenanang gume Pudekwang.

3Tu̱ Biturus ze nda za, “To Khananiya, nu̱m saki to njig Sheɗan tu̱ vi nu̱ mbu̱ memu̱na ro, to shi wollo ye Jiimbi shakhshakhndi, to tuka ɓeeni mu̱zhindi damang gha ye vaara na? 4Me masa na damang ɓara ɗya khalandi ɓa ɓa goma? Ai no masaki ɓarang nu̱ nduk ranna nu̱ ɗyine a ɓa na ndu̱ mu̱zhindan ɓa. Yang nu̱m saki to shi kwaari nang mbu̱ memu̱na ra? To lamba kya nduk ɓa, to shi ye Magham.”

5Ba nu̱ Khananiya tu̱kki nang, tu̱ nggu̱ɗ tu̱ mu̱ɗi. Tu̱ sawar maɗyikandi ku̱s nduki nu̱ tu̱kki ɗyiku nang. 6Tu̱ nyakhtlir ku ji tu̱ sa man varanang nu̱ mbu̱ kapar tu̱ pa nda gha.

7Qu̱rse awe kunung tu̱ nokhzi Khananiya vi, nu̱ zu̱n ɗyi nu̱ gwaki zhimen ɓa. 8Tu̱ Biturus zham nda za, “Zu̱ ya, nang ke kap kap mu̱zhindi dam nun masaki ɓarang mu?”

Tu̱ tlogha za, “I ɗo, nang ke kap kapan.”

9Tu̱ Biturus zham nda tu̱k za, “Nu̱m saki tun gu̱n me nu ma buu Jiimbi ɓu̱ Maghamang na? Tu̱k su̱qura saari nduki me virang nu̱ ɗa paki zhime gha, yang ka ɓa da ku tu̱k tu̱ ɗu̱ ndu̱ to tu̱ ɗa pa gha.”

10Fan ndu̱ fan tu̱ nggu̱ɗ tu̱ mu̱t gume nda. Nu̱ nyakhtlirkwang a viki tu̱ gwa nda wa mu̱ɗi, tu̱ da nda ku, tu̱ vi ndu̱ chin ku, tu̱ ɗa pa nda gha wudle ku̱jip ɓu̱ zhimenang. 11Tu̱ tabar ɓu̱ nu̱ mbu Yesu ku ndu̱ nduki nu̱ tu̱kki ɗyi nu̱ ɗatlki nang tu̱k sawar ku maɗyikandi.

Pudekwang wa Shi ɗye Lazhamku Khang

12Pudekwang wa shi ɗye lazhamku khang mbu̱ yiti nduki. Yang nu̱ mbu Yesu kwang wa ka taba nu̱ mbu̱ rafti ɓu̱ Magham mbu̱ kalap ɓu̱ Solomonang. 13Yang aa da nduk nu̱ song maito a nje nu̱ ɗu̱maki viri nu̱ chele ɓaanda ɓa kha sawa, aa nu̱ke nduki a na zhaaji ɓaanda. 14Kap ndu̱ nang tu̱ nduki khang nusu ndu̱ khusku maita Zhinerem gwaanji tu̱ shaata khang nu̱ si ku. 15Ku̱me nang, tu̱ ndukiku a vi ndu̱ nduki nu̱ke var wor mu̱n ɓa qaandan ɗyine gaanggirku ndu̱ ku̱rbukku me njivku ma ku̱ jiimbi Biturus mbu ɗyin ɓeenan ku mbu̱ a peetari ɗyin njivang. 16Tu̱ nduki na viki mbu̱ ghaiku nu̱ke a bing ndu̱ Urshalima taba khang, a ɓa ku ndu̱ nduki nu̱ke var wor mu̱n ɓa, kom ndu̱ nduki nu̱ke khu̱kheeti malkandi a vu̱r bonye ye wora tu̱ gwa shaanar ku tu̱k.

Pudekwang wa za Bonye ku̱me Maito ɓaanda

17Tu̱ gorkir ɓu̱ kuruku ndu̱ ɓeeni Sadukeku nu̱ke a su̱yen ndu̱ chinang ki zhiri ɓu̱ Pudekwang maɗyi. 18Tu̱ yang ku̱s Pudekwang tu̱ khi wor gha zhaaru̱m. 19Tu̱ nu̱ ru̱kti ɓu̱ Magham a ɓa mbu̱ virkirang tu̱ qu̱n me virikwang nu̱gha tu̱ ngga wor gha, tu̱ ze wor za, 20“Ɗu̱ ma mbu̱ rafti ɓu̱ Magham tun a zu̱ labar mewar nyifiri nang kap ye nduki.”

21Nu̱ dumaari ɗau tu̱ vi ku nu̱ mbu̱ rafti ɓu̱ Magham tu̱ ki shogar ye nduki.

Yang nu̱ gorkir ɓu̱ kuruku ndu̱ nduki ɓaranku tabaki tu̱ qa dlegumeku ɓu̱ Israila ndu̱ nduki nu̱ke a mbu̱ tabar ɓaanda kap, tu̱ ru̱k nu̱ zhaaru̱m ma ku̱ ɗa ɓa ndu̱ Pudekwang. 22Yang ni nu̱ nggu̱ti rafti ɓu̱ Maghamang ɗu̱ki ku nu̱ ɗa gwa wor ɓa. Tu̱ ɗa gaɓ ku tu̱ ze wor za, 23“Chem wa gwa zhaaru̱mang khiiran khwit, ndu̱ nu̱ nggu̱ti zhaaru̱m kwang chingndan me virang, yang nyem qu̱nki me virang nu̱gha nyem gwa aaki mban ɓa.” 24Nu̱ gorkir ɓu̱ nu̱ nggu̱ti rafti ɓu̱ Magham ndu̱ kuruku rututundang tu̱kki wanang, tu̱ ɗyin wor ɓu̱tl maɗyi, a kor ɗyi nu̱ke ɗyinang ka ɓa ɗa ɓa ki si.

25Tu̱ njif nggur a ɓa tu̱ ze wor za, “Wonda nduki nun khiiki wor ghang chingndan mbu̱ rafti ɓu̱ Magham a shogar ku ye nduki.” 26Tu̱ nu̱ nggu̱ti rafti ɓu̱ Magham su̱yen ndu̱ gorkirku ɓaanda ɗu̱ tu̱ ɗa ɓa ndu̱ Pudekwang, yang nu̱ ranna wor ɓa ku̱me a sawa ku̱ ndukyang mbuk wor ndu̱ ndogdiku ɓa.

27Na ɓa ki ndu̱ wor tu̱ sa za ku̱ ching gha ku gume tabar ɓu̱ dlegumeku ɓu̱ Yakhudekwang ma ku̱ gorkir ɓu̱ kurukwang shi zhamndi ye wora. 28Tu̱ gorkir ɓu̱ kurukwang ze wor za, “Chem wa nggu̱tl ku̱ shi nu shogar ye nduki mbu̱ dlu̱m nang ɓa. Yang kap ndu̱ nang tun wa nyel Urshalima ndu̱ shogar ɓaanu tun a shim tu̱pa taɗar mbu̱ti tom ɓu̱ khuski nang nu̱ ɗyine rem.”

29Tu̱ Yang Biturus ndu̱ ɓeena Pudekwang tlogha yenda za, “Wa ku̱s ku̱ shi mi zu̱r ɓu̱ Magham tu̱ duk zu̱r ɓu̱ nduku. 30Maghamndi ɓu̱ Zhikanerem wa ji ndu̱ Yesu ɓar mbe mu̱ti, chin nun tlaghaki nda nu̱ gha nu̱ ku̱nshe kaatli nun katlki nda nu̱ me qu̱far kaatlang. 31Yang Magham wa vu̱r zhaaji yenda ku̱ khan ve bu̱nan nu̱ zu̱ma tu̱ kha ma dle gume ndu̱ nu̱ ɗanari, ma ku̱ qu̱n njiv ye Israila ku̱ nggoɗ ku tu̱ yaapa solar ɓaanda ye wora. 32Chem nang kap chem a khar saidu ɓu̱ ɗyiku nang, Jiimbi shakhshakhndi nu̱ Magham vu̱rki ye nu̱ mbu zu̱r ɓaran ɗya saidu tu̱k.”

33Nu̱ dlegumeku nang tu̱kki tu̱ memu̱na wor su̱bu̱r maɗyi, tu̱ shim ku̱ tlagha nda Pudekwang nu̱gha. 34Tu̱ yang Parise nggur nu̱ke dlu̱man za Gamaliyel, ɗya maalu̱m Taurete, nu̱ke aakya na zhaaji ɓaran ji nu̱ viɗi mbu̱ tabar dle gume ɓu̱ Yakhudekwang, tu̱ sa za ku̱ vi ndu̱ ndukyang dam dong. 35Nu̱ viki nu̱ wor dam, tu̱ ze nduki nu̱ mbu̱ tabarang za, “Nyeezaku Israila, nggu̱t ma mbu̱ ɗyi nu̱ke tun a shim shiran ye nduki nang nu̱gha mbari. 36Mbu̱ sonyiriku nu̱ peetaki, khuski nggur a ɓa za chin a mbu̱ Tiyodas, nu̱ daki ɗyinan ma ɗyi ngguri. Nu̱ mburi nda ku wa khu̱l won vat, yang nu̱ tlaghaki nda nu̱ gha tu̱ lakhta nu̱ mburi nda kwang nu̱gha tu̱ maaran woɗa. 37Qu̱rsan, tu̱ khuzi Galili nggur nu̱ke dlu̱man za Yakhuda a vi ye dalangi sarchi shigar ndukyang. Tu̱ sa nduki ɓaran ma dakhlari. Nu̱ tlaghaki nda nu̱ gha, tu̱ lakhta nu̱ mburi nda kwang nu̱gha tu̱k. 38Ku̱me nang, nga zu̱ran ye nu, njig ma nduki nang, ku̱ ɗu̱ vaanda! Mbu̱ ku̱rti ɓaanda ndu̱ tlu̱nar nu̱ke a shiran ku nang ɗya ɓu̱ nduku, ka lakhta. 39Yang mbu̱ ɗya ɓu̱ Magham tun ɓu̱ ɗu̱ma nggu̱tl wor ɓa, yang tun ka gwa vaanu tun a dakhlar ndu̱ Magham.”

40Tu̱ tabarang tlogha su̱ sawari nu̱ vu̱rkyang, tu̱ ɗa vi ndu̱ Pudekwang, tu̱ shi kurpi ye wor tu̱ wu wor za karawan nang ku̱ shi ɓalarku mbu̱ dlu̱m Yesu tu̱k ɓa. Kom tu̱ ngga wor gha.

41Tu̱ Pudekwang njig maa tabar dle gume ɓu̱ Yakhudekwang a kashar ku ku̱me nduki wa na wor wa khu̱l ku̱ za nda bonye ku̱me dlu̱m Yesu. 42Yang konyi fu̱ɗa, aa mbu̱ rafti ɓu̱ Magham, aa kaari, sar da nu̱ njig shogar ndu̱ zu̱r labar mbarkandang ye nduki nu̱ ɗyine Yesu ke Masiya ɓa.

Currently Selected:

Tlu̱nar ɓu̱ Pudeku 5: ttrNT

Highlight

Copy