Tlu̱nar ɓu̱ Pudeku 4

Biturus ndu̱ Yokhana Gume Tabar ɓu̱ Dle gume ɓu̱ Yakhudeku

1Sarchi nu̱ke Biturus ndu̱ Yokhana ɓalar ye tabar ndukyang, tu̱ kuruku ndu̱ gorkir ɓu̱ nu̱ nggu̱ti rafti ɓu̱ Magham ndu̱ Sadukekwang a ɓa she wora. 2Tu̱ shokhna ku ku̱me nu̱ mbu Yesu kwang a shogaran ye nduki za mu̱tiku ka ɓa ji ndu̱ nyifiri ba wa nu̱ Yesu jiiki mbe mu̱ti. 3Tu̱ yang ku̱s Biturus ndu̱ Yokhana tu̱ khi wor gha kope vi dumaaran nu̱ke mugdi wa shi. 4Yang tu̱ khang chele nduki nu̱ tu̱kki ɓalarang maita ku. Tu̱ khang ɓu̱ nu̱ mbu Yesu kwang khu̱l khuzuku du̱pu qurmun. 5Ɗaatlu̱maaran tu̱ dlegumeku ɓaanda ndu̱ ndukkudaandi ndu̱ maalu̱m taurete kwang taba nu̱ Urshalima. 6Khanana gorkir ɓu̱ kurukwang, a nje ye maaran, ndu̱ Kayafa ndu̱ Yokhana ndu̱ Alekhzanda, ndu̱ kheetiku ɓu̱ gorkir kurukwang kap. 7Tu̱ ching Biturus ndu̱ Yokhana nu̱ tala, tu̱ zham wor za, “Tun a shi ɗyinang ndu̱ nyi zalalya, ndu̱ mbu̱ dlu̱m ki tu̱ka?”

8Tu̱ Biturus nu̱ke nyeedlan ndu̱ Jiimbi shakhshakhndi ze wor za, “Dlegumeku ɓu̱ nduki ndu̱ ndukkudaandi. 9Mbu̱ tun qa remi meeni ku̱me mu̱nkir nu̱ shiki ye zu̱ɓti nang kom ku̱ zu̱n nu shi kikimndi tu̱ shaana, 10zu̱n man gha, tun ndu̱ nduki nu̱ Israila kap. Khuski nang chingndan gha gume nu shaanaran ku̱me dlu̱m Yesu Masiya khuzi Nazaret nun katlki nda gha, tu̱ Magham ji ndu̱ chin mbe mu̱tang. 11Chin Yesu nang, chin ke ba wa,

‘Ndogdi nu̱ tun nu̱ du̱ndiku zhangki gha,

tu̱ yang gaɓ tu̱ kha ma ndogdi

nu̱ dukki boote mbu̱ ndogdi du̱ndiku.’

12“Yang gwar ɗanar a nje nu̱ ku̱nshe njif nggur zum ɓa, ku̱me nu̱ vu̱r dlu̱m nggur ye njif nggur mbu̱ larji nang za nduk ka gwa ɗana nu̱ ku̱nshe nda shwat ɓa.”

13Nu naki song sawar ɓu̱ Biturus ndu̱ Yokhana tu̱ zu̱n ku za nu̱ shi zu̱ndi ku ɓa, yang ɗya aa nu̱m ku ɓa, tu̱ shi lazham ku, tu̱ yang da mban ku za wa shi khar ku ndu̱ Yesu. 14Yang nu̱ke khuski nu̱ gwaki shaanarang a nje chingndan su̱yen ndu̱ Pudekwang, nu̱ ɗu̱ma zu̱ ɗyi nggur ku tu̱k ɓa. 15Tu̱ ze Pudekwang za ku̱ vi ɓar gume tabar ɓu̱ dle gume ɓu̱ Yakhudeku. Tu̱ shi sawari ku chele ɓaanda. 16A zu̱ran ku za, “Chem ka shikya nu̱m ndu̱ ndukiku nang na? Ku̱me nduki nu̱ Urshalima kap wa zu̱n za nduki nang wa shi ɗye lazham maɗyikandi, yang chem ɓu̱ ɗu̱ma keelaran ɓa. 17Yang mbu̱ chem a shim ku̱ ɗyinang shaata lakhtar chele nduki ɓa, zu̱ mi ye wor nyem za, karawan nang, ku̱ shi ɓalar ye aaki ku mbu̱ dlu̱m Yesu ɓa.”

18Kom tu̱ qa Pudekwang, tu̱ wu wor za, gana fan ku̱ shi ɓalar ye aaki mbu̱ dlu̱m Yesu tu̱k ɓa, yang ku̱ shi shogar ye aaki mbu̱ dlu̱mang zum ɓa. 19Tu̱ yang Biturus ndu̱ Yokhana tlogha za, “Kuma ma ndu̱ vaanu, wa shi torop ku̱ mbu mi ɓalar ɓaanu tu̱ duk ɓu̱ Magham mu? 20Ɓaarem chem ɓu̱ ɗu̱ma khar yit ɗyine ɗyi nyem tu̱kki chem na ɓa.”

21Nu̱ dutki dlu̱mdi wor tu̱k, tu̱ ngga wor gha nu̱ke nu̱ gwa ɗyi nu̱ke wor ka shiki ye wor ɓa, ku̱me nduki kap a gor dlu̱m Magham ku̱me ɗyi nu̱ ɗatlkyang. 22Sonyi ɓu̱ khuski nu̱ gwaki shaanar nu̱ ɗye lazhamang wa khu̱l ɗyin vat.

Barar ni nu̱ Mbu Yesu ku Shiki ma Gwa nda Du̱mbu̱ri

23Nu̱ nggaki Biturus ndu̱ Yokhana ku gha tu̱ ɗu̱ ku she nduki ɓaanda ta zu̱ labar ɗyi nu̱ kuruku rututundi ndu̱ dle gume kwang zu̱ki ye wora. 24Nu̱ tu̱kki wanang ku, tu̱ da su̱qur wor nu̱ viɗi guma da tu̱ shi barar ye Magham. A zu̱ran ku za, “Magham nu̱ zalale aa nu̱m, to du̱ngki maa vu̱ghai ndu̱ maa viɗi, ndu̱ ɗyim chitndi, ndu̱ ɗyi nu̱ke a mbu̱ wor kap. 25Ta shi ɓalar mbe Jiimbi Shakhshakhndi nu̱ ku̱nshe maavi ɓaaro Dauda nu̱ke ɗya zhikanerem no za,

‘Nu̱m saki tu̱ nduki nu̱ke ɗya Yakhudeku ɓa

ki shokhnara?

Tu̱ me ghaiku ki kwaari ɗyine

ɗyiku bamnda?

26Kujiku nu̱ larji daasaran ku ma dakhla,

dlegumeku ɓaanda wa gonta ɗyin wora,

a kare ku ndu̱ Zhinkir gwaanji

ndu̱ Masiya ɓaran.’#4:26 Nggu̱t tu̱k mbu̱: Zab 2:1-2.

27“Jiwa Kuji Khiridus ndu̱ Puntus Bilatus wa gonta ɗyin wor ndu̱ Israileku ndu̱ nduki nu̱ke ɗya Israileku ɓa mbu̱ ghai nang, a kare ku ndu̱ maavi ɓaa Shakhshakhndi Yesu, no gaɓki ndu̱ chin ma Masiya.#4:27 Nggu̱t tu̱k mbu̱: Mat 27:1-2; Mar 15:1; Luk 23:1, 7-11; Ykh 18:28-29. 28Taba ku ma shi ɗyi no daasaki ka shi, nu̱ ku̱nshe zalale ɓaaro ndu̱ shimndi ɓaaro. 29Yang leendang Zhinkir gwaanji, to nggu̱t komkomi nu̱ke a shiran ku ma nggu̱tl ku̱ shi mi tlu̱na ɓa. Vu̱r du̱mbu̱r zu̱r ɓalar ɓaa ye maaviku ɓaaro sawa si ɓa. 30A do khaaro nu̱ shaanar nduki, to shi ɗye lazhamku ndu̱ ɗye saiduku khang ku̱me dlu̱m maavi ɓaa Shakhshakhndi, Yesu.”

31Nu̱ shiki barar kwang tu̱ maa nu̱ tabaki nu̱ njang yakhta. Tu̱ nyel wor ndu̱ Jiimbi shakhshakhndi, tu̱ ki zu̱ ɓalar ɓu̱ Magham ku waare sawa.

Nu̱ Mbu Yesu ku a Shakh ɗyin me Khar Wora

32Kwaari ɓu̱ nu̱ mbu Yesu ku kap, ndu̱ memu̱na wor wa kha da, nduk a nje nu̱ daki ɗyin khaa nda ma ɓaran chin ɗyenda ɓa. A shakh ɗyin me khar wor ndu̱ yen. 33Tu̱ Pudekwang saida jiiri ɓu̱ Yesu mbe mu̱ti ndu̱ zalale gwaanji. Mu̱nkir gwaanji ɓu̱ Magham a nje ɗyine wor kap, 34nu̱ke nduk a nje nu̱ mbu̱ɗki ɗyi nggur chele ɓaanda ɓa. Nu̱ damku ndu̱ nu̱ raftiku tu̱ ka masa ɓara tu̱ ka ɓa ndu̱ mu̱zhindan, 35a du̱ngndan gha gume Pudekwang, tu̱ shakh ye aaki wa nu̱ke a gangndan. 36Yusufu, nu̱ke ɗya ye me sham ɓu̱ Lawi, khuzi Saipurus, nu̱ Pudekwang ka qaki nda za Barnaba (mban za, nu̱ vu̱rti shokhku̱rokh me bu̱n), 37masa dam ɓaran ɓara, tu̱ ɗa ɓa ndu̱ mu̱zhindan gume Pudekwang.

Currently Selected:

Tlu̱nar ɓu̱ Pudeku 4: ttrNT

Highlight

Copy