Tlu̱nar ɓu̱ Pudeku 3

Biturus wa Shaana Zu̱ɓti nggur me Rafti ɓu̱ Magham

1Sarchi ngguri Biturus ndu̱ Yokhana a yir ku mbu̱ Rafti ɓu̱ Magham vi kunung nu̱ mugdi, sarchi barari. 2Yang khuski nggur a nje nu̱ khaki nda zu̱ɓtan nu̱ka ɓa ki ndu̱ chin aa nyi fu̱ɗa tu̱ du̱ng nda gha me vi rafti ɓu̱ Magham nu̱ka qaki za mevi Mbarkandang. Ma ku̱ khuɗ sadke kha nduki nu̱ka viki nu̱ mbu̱ rafti ɓu̱ Maghamang. 3Nu̱ naki Biturus ndu̱ Yokhana a ma viri nu̱ mbu̱ rafti ɓu̱ Maghamang, tu̱ khuɗ mu̱zhindi kha wora. 4Tu̱ Biturus ndu̱ Yokhana nggu̱ti nda njang dong, kom tu̱ Biturus ze nda za, “Nggu̱terem.” 5Tu̱ khuskyang zu̱ yiti ye wor a taman za ka vu̱r ɗyi nggur yenda ku.

6Tu̱ yang Biturus ze nda za, “Mu̱zhin khaara ɓa, yang ɗyi nu̱ke a khaara ngga vu̱r yoro. Mbu̱ dlu̱m Yesu Masiya khuzi Nazaret, ju to shi yiri.” 7Tu̱ Biturus khuɓ kharan nu̱ zu̱ma tu̱ da nda nu̱ viɗi. Fan ndu̱ fan tu̱ saaran ndu̱ kukwatli saaran kha ndu̱ du̱mbu̱r. 8Tu̱ ji burut tu̱ ching gha, tu̱ nggaasi yiri. Tu̱ vi su̱yen ndu̱ wor nu̱ mbu̱ rafti ɓu̱ Maghamang a yir a ku̱m jiiri a gwar dlu̱m Magham. 9Nu̱ nduki naki nda a yir a gwar dlu̱m Magham, 10tu̱ saida za ɗya njif nu̱ka khaki nu̱ me vi Mbarkandi nu̱ mbu̱ rafti ɓu̱ Magham tu̱ ka shi khutang. Tu̱ yang shi lazham ku maɗyi ku̱me ɗyi nu̱ ɗatlki ndu̱ khuskyang.

Ɓalar nu̱ Biturus Shiki mbu̱ Kalap ɓu̱ Solomon

11Sarchi ni nu̱ khuti nang khubki Biturus ndu̱ Yokhana, tu̱ nduki kap a ɓa she wor ɗyin ɗa ve maa nu̱ka qaki za Kalap ɓu̱ Solomonang, a lazham ku. 12Nu̱ Biturus naki wanang, tu̱ ze tabar ndukyang za: “Nduki nu̱ Israila, nu̱m saki tun ki lazham shir ɓu̱ ɗyi nang? Nu̱m saki tun ki nggu̱terem ba wa du̱mbu̱r ɓaarem ndu̱ sawar Maghamndi ɓaarem saki tu̱ khuski nang shi yira na? 13Maghamndi ɓu̱ Yibram ndu̱ Yishaku, ndu̱ Nyagham, Maghamndi ɓu̱ zhikanerem, chin vu̱rki zhaaji ye maavi ɓaran Yesu. Nang ke njif nun vu̱rki nda ɓar ku̱ tlagha nda nu̱ gha, tun wut zhangndi yenda gume nggomna Bilatus aa nu̱ke wa shim ku̱ ngga nji nda gha. 14Yang tun zhang nduk Shakhshakhndi, nu̱ shir ɗyi Toropndi gha, tun khuɗ za ku̱ ngga kya nu̱ tlaghar mu̱ti ye nu gha. 15Tun tlagha njif nu̱ke ɗya dlu̱dlarsi nyifi. Yang Magham wa ji ndu̱ chin ɓar mbe mu̱ti, chem ke saidu ɓu̱ ɗyiku nang. 16Maitar dlu̱m Yesu nu̱ke zalale a si saki khuski nun zu̱nki nda tun a nggu̱ti nda nang tu̱ gwa du̱mbu̱r. Dlu̱m Yesu ndu̱ maita nda nyem shiki saki tu̱ khuski nang shaana nggalang. Tun wa na ndu̱ yitonu.

17“Yang nyeeza, nga zu̱n tun shi ɗyinang mbu̱ song zu̱ni, ba wa nu̱ dlegumeku ɓaanu shiki. 18Yang tu̱k nu̱ ku̱nshe shir ɓu̱ ɗyiku nang Magham wa nyel ɗyi nu̱ zu̱ki nu̱ ku̱nshe annabikwang kap, ku̱me wa zu̱ za Masiya ɓaran ka za bonye. 19Ku̱me nang, nggoɗ ma, tun gaɓ nu̱ she Magham ma ku̱ shiɓ solar ɓaanu ye nun gha. Zhinerem gwaanji nu̱ke a su̱yen ndu̱ tunu ka pa du̱mbu̱r ye jiimbonu tu̱ memu̱nanu kha mewa, 20yang ka ɗa ru̱k Masiya nyin datki ye nu zhu tang chin ke Yesu. 21Wa ku̱s ku̱ Yesu khan mbu̱ viɗi, ma yir sarchi nu̱ke ka gaɓki ndu̱ aa nu̱m tu̱ kha mewa, ba wa nu̱ Magham zu̱ki zhu tang nu̱ ku̱nshe annabiku ɓaran shakhshakhndi. 22Ji Musa wa zu̱ za, ‘Magham Zhinkir ɓaanu gwaanji ka ɗa ru̱k annabi nggur ye nu mbu̱ khachinkirku ɓaanu, ba wa nu̱ ɗa ru̱kki ngang. Yang wa ku̱s ku̱ tu̱k nu ɗyi nu̱ke ka zu̱ki ye nu kap. 23Njif nu̱ke nu̱ tu̱k annabi nang ɓa, ka su̱ya nda nu̱ gha chele nduki ɓu̱ Magham.’

24“Annabiku kap, ji ɗyin Samaila ma yir ɗyin annabiku na ɓa ki gana wa shi ɓalarku ɗyine ɗyiku nu̱ shiki mbu̱ qaandiku nang shwat. 25Yang Magham shi ɓalarku nu̱ ku̱nshe annabikwang ku̱me tun qusonggi ɓaanda, tun ka zu̱mki boote shakhti ɗye mbu̱ ge alqawar nu̱ Magham shiki ye zhikannu. Nu̱ zu̱ki ye Yibram za, ‘Nu̱ ku̱nshe pooni ɓaaro nduki nu̱ larji kap ka gwaki barke.’ 26Nu̱ Magham datki maavi ɓaran, tu̱ ru̱kti nda nu̱ she nu gumapaali ma ku̱ sa barke ye nu, tu̱ ɗa da nu ɓar mbe ɗye shir malkandi.”

Currently Selected:

Tlu̱nar ɓu̱ Pudeku 3: ttrNT

Highlight

Copy