Tlu̱nar ɓu̱ Pudeku 2

Ɓar ɓu̱ Jiimbi shakhshakhndi

1Nu̱ fu̱ɗar Pentikos a ɓa ki, nu̱ mbu Yesu ku kap tabaran ye maa da. 2Fan ndu̱ fan tu̱ tu̱k su̱qur ɗyi nggur nu̱ shipaki ɓar ɓu̱ khu̱kheeti du̱mbu̱rkandi na viki mbu̱ viɗi, tu̱ nyel mbu̱ rafti nu̱ke a mban kwang kap. 3Tu̱ na ɗyiku nu̱ shipaki ghiindi ɓaiku a shakhti a shurti nu̱ ɗyine aa nyi nduk da chele ɓaanda. 4Tu̱ nyel kap ɓaanda ndu̱ Jiimbi shakhshakhndi, tu̱ nggaasi ɓalarku ndu̱ me ghaiku zum zum, ba wa nu̱ Jiimbi shakhshakhndang vu̱rki ye wora.

5Yang nduki nu̱ ghaari ghai ɓu̱ Yakhudeku a nje khang kharan Urshalima ye sarchi nang. A ɓa ku mbu̱ ghaiku zum zum mu̱na larji. 6Nu̱ tu̱kki su̱qur khu̱kheetang ku, tu̱ taba a lazham ku ku̱me aakya tu̱k tabar nu̱ mbu Yesu kwang a ɓalar ndu̱ me ghai ɓaanda. 7Tu̱ shi lazham ku maɗyi a zu̱ran za, “Woɗye nduki nu̱ke a ɓalar nang ɗya qusa Galili ɓa goma? 8Yang shi kikimndi tu̱ aaki chele ɓaarem ku̱s tu̱k wor a ɓalar ndu̱ me ghai ɓarana? 9Chem Partiyeku, ndu̱ Medesku ndu̱ Elamku ndu̱ nduki nu̱ Mesopotamiya, ndu̱ Yakhudiya ndu̱ Kapadokiya ndu̱ Pontus ndu̱ Asiya. 10Nu̱ nduk Pargiya ndu̱ Pamfiliya, ndu̱ Masar ndu̱ nduki nu̱ Sairin mbu̱ dlar ghai Libiya, kom ndu̱ runggiku na viki Roma. Kap ndu̱ Yakhudeku ndu̱ nduki nu̱ke ɗya Yakhudeku ɓa yang wa maita ku tu̱ vi nu̱ mbu̱ ghaari ghai ɓu̱ Yakhudekwang. 11(Wonji kap Yakhudeku ndu̱ nduki nu̱ke ɗya Yakhudeku ɓa nu̱ nggodki) ndu̱ Ku̱reteku ndu̱ Laru̱beku kap chem a tu̱k a zu̱ ɗyiku ɓu̱ Magham nu̱ke nduk nu̱ su̱n ndu̱ tu̱ktan mbu̱ meghai ɓaarem ɓa.” 12Tu̱ ɗyen zu̱m ɗyin wor tu̱ shi lazham ku a zu̱ran ye yen ku za, “Na mban za kima?”

13Tu̱ yang ɓeeni nduki shi ɓalar wuti ndu̱mndi ye wor a zu̱ran ku za, “Ɗyamndi shiki ye wor khang tu̱ ki me kuyar ɓaanda.”

Ɓalar ɓu̱ Biturus ye Tabar Nduki Fu̱ɗa Pentikos

14Tu̱ Biturus ji tu̱ ching gha su̱yen ndu̱ Gwaanggu̱m dandang, tu̱ da su̱quran nu̱ viɗi tu̱ shi ɓalar ye wora. A zu̱ran za, “Nyeeza Yakhudeku ndu̱ nduki nu̱ke kharan ku Urshalima, tu̱k ma, tun da mbu̱ ɗyi nu̱ke nga ma zu̱ran ye nu. 15Nduki nang kuyaran ku wa nu̱ke tun tamankyang ɓa nu̱ke leendang ɗya vi mu̱dlam nu̱ dumaari dong. 16Nang ke ɗyi nu̱ annabi Jowel zu̱ki za:

17‘Magham wa zu̱ za,

Ngga ɗa zu̱ Jiimbi ɓang ye nduki kap

mbu̱ lauɗar qaandi virkiri.

Qusonggi ɓaanu nusu ndu̱ khusku ka kha ma

nu̱ wopar zu̱r ɓu̱ Magham.

Yiti nyakhtlirku ɓaanu ka na

ɗyi tukakandi ku,

geema khuzuku ka shi zhineku.

18Ngga ɗa zu̱ Jiimbi ɓanga nu̱ ɗyine

maaviku ɓang nusu ndu̱ khusku

mbu̱ qaandiku naandang,

ka wopa zu̱r ɓang ku.

19Ngga wut ɗye lazhamku mu̱na viɗi,

ndu̱ ɗye saidu ku fan vu̱ghai.

Tom ndu̱ ɓai ndu̱ qu̱ndi nu̱ke chit khurit.

20Ka gaɓ ndu̱ fu̱ɗar tu̱ kha zhum,

tu̱ chere kha vyang wa tom,

me ku̱ fu̱ɗar ɓu̱ Zhinkir gwaanji a ɓa,

fu̱ɗar gwaanji nu̱ke zhaaji a si.

21Yang aaki shiki qar mbu̱

dlu̱m Zhinerem gwaanji ka gwa ɗanari.’

22“Nyeeza Israila tu̱k ma ɓalar nang. Yesu ye Nazaret ɗya njif nu̱ Magham wutki ye nu za chin wa maita nda shwat. Magham wa wut ye nu ku̱nshe ɗye lazhamku ndu̱ tlu̱nar gwaanji gwaanjiku ndu̱ ɗyiku nu̱ Magham shiki ku̱nshe nda chele ɓaanu, ba wa nun zu̱nki, ku̱me shi ɗyiku nang kap mbu̱ yitonu. 23Me ku̱ vu̱r khuski nang nu̱ mbu̱ kha nu ma ku̱ nu̱ solarku kaatli nda gha, Magham wa zu̱ni ku̱me chin daasaki. 24Yang tu̱ Magham ji ndu̱ chin ɓar mbe mu̱ti, tu̱ lawa nda ɓar mbe zalale ni. Ku̱me ɓu̱ shi ku̱ mu̱ti khubti nda ɓa. 25Ji Dauda wa shi ɓalar ɓaran nu̱ zu̱ki za,

‘Nga na Zhinkir gwaanji aakochi,

a nje su̱yen ndu̱ nga.

Nu̱ke a nje ɗyin bu̱na nu̱ zu̱ma,

ngam ɓu̱ tu̱k sawa ɓa.

26Memu̱nara a kashar ku̱men,

ghiinda a qa taazi zhakhzhakh maɗyi,

Aa nu̱ke nga nduku,

yang ba ngga kha ndu̱ sar memu̱na.

27Ku̱me tom ɓu̱ njig nyifi ɓang

nu̱ mbu̱ ku̱jip ɓa.

Yang tom njig Shakhshakhndi ɓaa

tu̱ mu̱tl ɓa.

28Ta shoga njiv nyifiri ya.

To ka nyedli nga ndu̱ kasha

ku̱me khar ɓa su̱yen ndu̱ nga.’

29“Nyeeza Israila, ngga ɗu̱ma zu̱ran ye nu sawa su̱ ɓa, nga za zhikanerem Dauda wa mu̱ɗi tu̱ pa nda gha, ku̱jip ɓaran a nje she rem ma ɓar meeni. 30Yang ɗya annabi nu̱ zu̱nki za Magham wa shi alqawar yenda ndu̱ ku̱mndar nu̱ ɗyine chin ka vu̱r kujiri ye da mbu̱ pooni ɓaran, ba wa nyin vu̱rki kujiri yenda. 31Dauda wa na ɗyinang zhu tang, tu̱ shi ɓalar ɗyine jiiri ɓu̱ Masiya ɓar mbe mu̱ti za ɓu̱ njigti nda nu̱ mbu̱ ku̱jip ɓa, yang man varan ɓu̱ mu̱tl ɓa. 32Magham wa ji ndu̱ Yesu nang ɓar mbe mu̱ti, yang chem nang kap saidu zhire ɓu̱ ɗyiku nang. 33Wa vu̱r zhaaji yenda a bu̱n zu̱ma ɓu̱ Magham, tu̱ ɗa dlu̱ Jiimbi shakhshakhndi nu̱ Zhin shiki alqawaranang ta zu̱n ɗyinerem, nang ke ɗyi nu̱ke tun a naran ndu̱ tu̱ktan. 34Aa nu̱ke Dauda nu̱ dlan mbu̱ viɗi ɓa, yang wa zu̱ za,

‘Zhinkir ɓang gwaanji wa ze

Zhinerem gwaanji,

“Khon ɗyin bu̱na nu̱ zu̱ma,

35kope nga sa nu̱ zhangndor ku

nu̱ mbu̱ saaro ro.” ’

36“Ku̱me nang, bu ku̱ Israila kap zu̱n nu̱ ɗyine chin Yesu nun katlki nda gha nang, Magham wa gaɓ ndu̱ chin ma Zhinkir gwaanji ndu̱ Masiya shwat.”

37Nu̱ ndukikwang tu̱kki wanang tu̱ ɓalarang zhokh memu̱na wora tu̱ ze Biturus ndu̱ ɓeeni Pudekwang za, “Nyeezerem, chem ka shi kya nu̱ma?”

38Tu̱ Biturus ze wor za, “Nggoɗ ma, tu̱ shi baptisme ye aaki chele ɓaanu mbu̱ dlu̱m Yesu Masiya ma ku̱ ndu̱m solar ɓaanu ye nu, tun ka dlu̱ Jiimbi shakhshakhndi mu̱nki. 39Ku̱me Magham shi alqawar nang ye nu ndu̱ qusonggi ɓaanu, ndu̱ nduki nu̱ kya ɓakh, nang ke kap nduki nu̱ Magham a qaki nu̱ she nda.”

40Tu̱ dut dlu̱mndi wor ndu̱ ɓalarku khang, tu̱ khuɗ wor tu̱k za, “Ɗana ma vaanu mbe nduki nu̱ tlu̱nar malkandi ku nu̱ qaandi virkir meeni.” 41Tu̱ Biturus shi baptisme ye nduki nu̱ dlu̱ki ɓalarang, tu̱ gwa shaatar nduki nu̱ khu̱lki du̱pu kunung ye fu̱ɗaranang.

Khar ɓu̱ nu̱ Mbu Yesu ku Su̱yen

42Tu̱ vu̱r vaanda ye shogar ɓu̱ Pudekwang ndu̱ khar ndu̱ yen, ndu̱ zu̱mndi ɗye zu̱mndi su̱yen kom ndu̱ barari. 43Tu̱ sawar Magham ku̱s aaki, ku̱me ɗye lazhamku ndu̱ ɗyiku khang nu̱ Magham shiki nu̱ ku̱nshe Pudekwang. 44Nu̱ mbu Yesu ku kap kharan su̱yen a shakh ɗyin me khar wor wayen. 45Tu̱ masa ɗyin me khar wor ɓar ku, tu̱ shakh mu̱zhindan ba wa nu̱ke aaki a gangndan. 46Wa ka ɗu̱ ku mbu̱ Rafti ɓu̱ Magham aakochi, a zu̱m ɗye zu̱mndi ku su̱yen mbu̱ raftiku ɓaanda, a zu̱mndi ku su̱yen ndu̱ kasha, ndu̱ ɓu̱tokh memu̱na. 47A gwar dlu̱m Magham tu̱ guma wor shi paling she nduki kap. Tu̱ Zhinkir gwaanji ki shaata nduki nu̱ gwaki ɗanar ye wor aa nyi fu̱ɗa.

Currently Selected:

Tlu̱nar ɓu̱ Pudeku 2: ttrNT

Highlight

Copy