Tlu̱nar ɓu̱ Pudeku 1

Alqawar Ɓar ɓu̱ Jiimbi shakhshakhndi

1Tiyofilus, mbu̱ lagarkati ɓang nu̱ gumang, nga shi bu̱lar yoro ɗyine ɗyiku nu̱ Yesu nggaki su̱ shiran kap kom ndu̱ ɗyiku nu̱ nggaki su̱ shogaran ɓara, 2ma khu̱dli ye fu̱ɗar nu̱ daki nda ma yir mbu̱ viɗi. Me ku̱ da nda ma yir viɗi wa shi ɓalar nu̱ ku̱nshe Jiimbi shakhshakhndi ye pudeku nyin datki. 3Gaanje mu̱ti ɓaran tu̱k, wa wut varan ye wor ndu̱ nyifiri, tu̱ shi ɗyiku zum zum nu̱ wutki za chin wa ji mbe mu̱ti shwat. Wa wut varan ye wor me qaandi ɗyin vat tu̱ shi ɓalar ɗyine kwaaɗar ɓu̱ Magham. 4Sarchi nu̱ke a su̱yen ndu̱ wor tu̱ ze wor za, “Njig nu Urshalima ɓa, bu ma alqawar nu̱ Zhinkir ɓang shiki mbu̱r fara, tang zu̱ ye nwang. 5Ku̱me Yokhana shi baptisme ye nduki ndu̱ ɗyim, yang fan ndu̱ qaandi koɗomma, ka shi baptisme ye nu ndu̱ Jiimbi shakhshakhndi.”

Wa Da Yesu ma Yir mbu̱ Viɗi

6Nu̱ Pudekwang tabaki tu̱ zham Yesu ku za, “Zhinerem gwaanji, ta ma gaɓ ndu̱ kwaaɗarang ye Israila leendang mu?”

7Tu̱ Yesu ze wor za, “Zhinkirang ɗyenda ke nu̱ zalale sar sarchiku ndu̱ fu̱ɗarku, nu̱ vu̱r zalale zu̱ndi nang ye nu ɓa. 8Yang ba tun ka kha ndu̱ zalale sarchi nu̱ Jiimbi shakhshakhndi a shurki ye nu, tun ka kha ma saidu ku ɓanga mbu̱ Urshalima ndu̱ Yakhudiya ndu̱ Samariya ma yir me koɗokh larji kap.”

9Nu̱ zu̱ki wanang, a nggu̱tan ku tu̱ da nda ma yir mbu̱ viɗi. Tu̱ ku̱zapti nggur lu̱pa nda nu̱ gha me yiti wora nu̱ na nda ku tu̱k ɓa.

10Sarchi nu̱ gharki yiti wor a nggu̱ti nda sarchi nu̱ke a yir viɗang, fan ndu̱ fan tu̱ nduki rap ndu̱ luktiku ɓongndi ching gha bing ndu̱ wora. 11Tu̱ nduki rapndang zu̱ za, “Nduki nu̱ Galili, nu̱m saki tun ching gha fan tun a nggu̱t maa viɗang na? Ba chin Yesu nu̱ daki nda ɓar she nu ma yir viɗ nang kaɗa gaɓ ba wa nun naki yir ɓaran.”

Wa Dat Matayas ku̱ Dlu̱ Maa Khar ɓu̱ Yakhuda

12Tu̱ Pudekwang gaɓ nu̱ Urshalima nu̱ke ɓakh ɓaran ndu̱ Dleng Zaitun ye maa nu̱ke a su̱ kwang, wa khu̱l yir me Fu̱ɗar Maasi, nang ke kilomite da. 13Nu̱ khu̱lki ku mbu̱ ghayang, tu̱ dlan ye maa khar ɓaanda mbu̱ dangkalyang. Nduki nu̱ke a ye maaranang ɗya Biturus ndu̱ Yokhana, ndu̱ Yaqub, ndu̱ Andu̱rawus, ndu̱ Filibus, ndu̱ Toma, ndu̱ Bartilomi, ndu̱ Matta, ndu̱ Yaqub yi ɓu̱ Alfawus. Kom ndu̱ Siman nu̱ka qaki nda za nu̱ zhiri ghai ɓaran, ndu̱ Yakhuda yi ɓu̱ Yaqub. 14Wor nang vu̱rki ɗyin wor ma barari ndu̱ memu̱nar da su̱yen ndu̱ nusuku ngguri, ndu̱ Maryam man Yesu ndu̱ khachin khuzuku.

15Mbu̱ qaandiku naandang tu̱ Biturus ji tu̱ chin gha chele nu̱ mbu Yesu ku (nu̱ke khang ɓaanda wa khu̱l won ndu̱ ɗyirap). 16Tu̱ zu̱ za, “Nyeezaku, wa ku̱s ku̱ ɓalar nu̱ Magham nu̱ Jiimbi ɓu̱ Magham zu̱ki nu̱ ku̱nshe Dauda ɗyine Yakhuda njif nu̱ shiki dle gume ye nduki nu̱ ku̱ski Yesu nyedli. 17Ku̱me ɗya da chele ɓaarem zhu, wa shi me ɓaran mbu̱ tlu̱nar nang.”

18(Yakhuda wa masa dalang ndu̱ mu̱zhindi tlu̱nar malkandi ɓaran, tu̱ nggu̱ɗ ndu̱ mbu̱ ɗyinan, tu̱ mban wudli, tu̱ ghaɗye mbanang mbata nu̱ dam. 19Nduki nu̱ Urshalima kap wa zu̱n ɗyi nu̱ ɗatlki nang, tu̱ ka qa maaranang nu̱ me ghai ɓaanda za, “Akeldama,” mban za, dalang tom.)

20Tu̱ Biturus zu̱m guma ndu̱ ɓalarang za, “Jiwa a nje bu̱laran mbu̱ lagarkati Zabura za,

‘Ku̱ rafti ɓaran kha karangan,

ku̱ aaki khan mban ɓa.’

“Wa gaɓ tu̱ zu̱ tu̱k za,

‘Ku̱ njif nggur dlu̱ me tlu̱nar ɓaranang.’

21“Ku̱me nang, wa ku̱s ku̱ dat nduk da chele nduki nang nu̱ke a su̱yen ndu̱ chem aakochi sarchi nu̱ke Yesu a vi ka vi ka chele ɓaarem. 22Wa shipa ku̱ njifang kha da chele nduki nu̱ke a su̱yen ndu̱ chem ji ɗyin sarchi nu̱ke Yokhana a baptisme ma yir ye fu̱ɗar nu̱ daki Yesu ɓar she rem ma yir mbu̱ viɗi. Wa ku̱s ku̱ da chele nduki nu̱ke a saida jiiri ɓu̱ Yesu mbe mu̱ti su̱yen ndu̱ chem.”

23Tu̱ vu̱r dlu̱m nduki rap, Yusufu nu̱ka qaki nda za Barsabas (nang ke ba Justus tu̱k), kom ndu̱ Matayas. 24Tu̱ nu̱ mbu Yesu kwang shi barar a zu̱ran ku za, “Zhinkir gwaanji, ta zu̱n memu̱na aaki. Wut njif no datki yerem chele nduki rapndi nang, 25ma ku̱ dlu̱ me tlu̱nar pude nu̱ Yakhuda njigki tu̱ ɗu̱ varan ye maa nu̱ shipaki nda.” 26Tu̱ ngga daatiku chele ɓaanda tu̱ daatang nggu̱ɗ nu̱ ɗyine Matayas tu̱ kha ma puda su̱yen ndu̱ gwaanggu̱m dandang.

Currently Selected:

Tlu̱nar ɓu̱ Pudeku 1: ttrNT

Highlight

Copy