Mark 15
15
Ȣisk-haton iaȣenre teioteriȣasonterakȣen tsini hoiaton Roiatatokenti Mark.
1Akȣa neok saorhenne, Sahatitsienhaientakȣentho ne ratitsihenstatsi, ratiianerenseronni nok oni ne ratiiatons, ȣahonȣanerenke ne Iesos nok Pilat ne niiahonȣasarine.
2Nok ne Pilat tahoriȣanontonse, ȣahenron: iseken ne Sitaeronon Iesanontiio? tontahenron ne Iesos akȣa neok ne tasierite.
3Tanon niateioriȣake ronȣanoȣentanionniskȣe ne ratitsihenstakȣeniios, iah ki othenon tahontahatati.
4Sekon ne Pilat sahoriȣanontonse ȣahenron: iah kenh othenon tataontaseriȣaserako? Satkatto toh niiesaierha.
5Nok tanon ne Iesos iah othenon tatethaȣen, nese ȣaonni oriȣiio tsi ȣahonerako ne Pilat.
6Enskat tsinihotirannhaonne neh nonȣe nikahaȣis tsi Shatonnhethe: Kanenrakȣekonʼsʼ ens ȣaheriȣanonton nok tenhonȣaiatatokente kah nikaien tsinihati ratinnhoton enshonȣannhotonko.
7Saiatat kati rannhotonkȣe nethone Barabas ronȣaiasts onkȣe Sakorio.
8Akȣekon ok ȣathotihenrete ȣahonniron: eh ki natakȣaieras oni takȣatesennon tsiniiorannhaon.
9Tontahenron ne Pilat: enseȣatontate kati ken nahonsahiiatkaȣe ne Sitaeronon Ronȣanontiio?
10Roterientaratsion se tsi akȣa neok tsini honȣanossas ne ratitsihenstakȣeniios ronȣaienastonhatie.
11Nok ki tanon ne ratitsihenstakȣeniios, ȣasakotinikonrata nʼonkȣeokon Barabas hahatiriȣanonton ahonsahonȣatkaȣe.
12Tontahenron ne Pilat: oh kati nekenh neneh nenhoiataȣen ne Hetsiseȣanatonkȣa Sitaeronon Ronȣanontiio?
13Nok tontahotihenrete: teshtsientannharen.
14Pilat tontahenron: oh nekenh nahoten ronnhikon? nok onen senha tahonkȣisron ȣathotihenrete: teshtsientannharen.
15Etho kati nahaiere ne Pilat tsinihatiriȣanontons, sahotkaȣe ne Barabas: nok ȣahatennhane ȣahonȣasokȣaȣesson ne Iesos, ethone onen ȣasakotsiakȣarisien ne tahonȣaientannharen.
16Ethone onen Atehenrakon tsi teieiatoretakȣa niiahonȣaiatenhaȣe ne Sotar eh oni nonȣe akȣekon iahonnitiokȣaroroke.
17Tanon kanetarhon taonȣaiataȣite nok ohikta kakakȣentonni tahonȣanonȣaroroke.
18Nok tahontasaȣen ok tahonȣaieron tehonȣanonȣeratons, ronton: ȣatkȣanonȣeraton Sitaeronon iesanontiio.
19Atennists ens oni tehonȣanonȣarehekhons, ronȣanistskeroserahatons, tehonȣatontsotaniskȣe oni ronȣatiskȣentarhose.
20Sahonaterihonkoten tsi ronȣatentoriata sahonȣaiataȣitasi ne Kanetarhon nok neh ne rahotseronniat sahonȣaseronniate nok ȣahonȣatiatatentiate ne tahonȣaientannharen.
21Simon Cyrenn-ronon Alexandre tanon Rufus ronȣaniha eh hisrehne kaehtake natontahaȣenonhatiene, neh ȣahonȣatonnioktakȣen ahatiasaketate ne Iesos raoiasa.
22Nok Golgotha niiahonȣaiatenhaȣe, neh naiahiron Kakenkȣarake.
23Ehnonȣe nahonȣanekarhase otsitsia tanon (Myr) tekaieston iah tanon othenon tehonekiren.
24Nok nonen sahonȣaiasakestsko ethone ȣahatiȣastiakon ne raohȣensonha ahotitokense onka ahoȣenk enȣaton.
25Asenhaton siioȣistahehatie satonȣaientannharen.
26Kenh kaien kaiatonkȣen tsinahoten ronȣariȣentakȣen: Sitaeronon Ronȣanontiio.
27Teniiase teninenskȣaskȣe ȣahonȣariskonte tsi ȣathonȣatiientannharen, Saiatat tsi raȣeientetakon nok saiatat sanekȣati.
28Onen are nehne Iakaierine tsi ȣaton tsi Kaiaton: eh nontahonȣatate tsiniiot nonkȣetaksenskȣa.
29Nok tsiniiakon neh nonȣe niiontoheststakȣe ronȣenratonnihakȣe, akȣaʼsʼ enʼsʼ teionnonkarenrons tsi ionton: Astskȣi! ise ne sesenonsarisions Nʼononsatokenti nok asen nonta sesenonsonni.
30Satatiatakennha tanon nonȣa onen tontasastsnent ne Kaiasake.
31Tihonȣaieronhakȣe oni neneh ne Ratitsihenstakȣeniios oni ne ratiiatons rontonhakȣe: Akȣa kenh neneh iehakȣenies nakoren asakoiatakennha, nok iah tehakȣenies ne raonha ahatatiatakennha.
32Tethastsnent tanisa nonȣa onen Nisraelonon Ronȣanontiio ne Kaiasake, aiakȣatkatto, nok aontaiakȣetak. Ronȣariȣakȣennihakȣe oni neneh ne ronariskonhon.
33Iaiakhaton siioȣistahehatie onȣentsiakȣekon taiokaraȣe, tsiniiore ne tioton-haton.
34Nok tiotonhaton siioȣistahehatie ethone nathohenrete ne Iesos Sahenron: Eloï, Eloï lamma sabacthani? neh sakat naiahiron: AkeNiio, AkeNiio, ohnontieren takateȣenteton?
35Nok otiake netho ronnes ȣaharonke tsinahoten ȣahenron; ȣahenron: onen Elie iehononks.
36Saiatat iatharatate tekanekakȣa iotsitsiatkenne iaharoȣe nok kanakarakenhiate iaroharen nok ȣahonnhontho nahanekira akȣa ratonne; Teȣaterharat katesiken entre kenh ne Elie nok aonsahoiatanentasi ne kaiasake.
37Sekon tonsahohenrete ne Iesos nok ȣahatonniseraton.
38Nok nononsatokentike teȣasontotakȣenne ohniataraha ehneken tontasaȣen tsi onteratsion tsiniiore nʼehtake.
39Nok ne Rasennoȣanen nakta ratakȣe, ȣahatkatho tsi raȣenheion oni tsiniiot tsi ȣathohonrete, ȣahenron: Oriȣiio onȣe kehiken ronkȣe tsi Niio Roienkenha.
40Tsionathonȣisen oni isih niiore tetkontikanerakȣe, neh eh kontiiatarakȣe Onȣari-ȣatere, nok Onȣari Sak niraha ronistenha tanon ne Sose, nok Salome.
41Nehne ronȣanonteratieskȣe nok ronȣaseronniennihatieskȣe Galile Shitres; nok ionentiokoȣanen sekon notiake nehne ronnene Jerusalem Shontarete.
42Tsi onen niiokara, nok neh ȣenniserate tsinonȣe oriȣakȣekon niiekȣatakȣas, neh tsi entakta kenhne tsi ȣentanoron.
43Sose Arimaté-aka enskat ne ratsienhahiens oni tronkȣetaieri rorhakȣe oni tsinonkȣati ne Niio raonakerasera, tahatetsanite Pilatne ȣarete nok ȣahoriȣanontonse, Iesos raoieronta.
44Ȣahonerako ne Pilat tsi onen ok ahaȣenheion, iahononke ne Rasennoȣanen ȣahoriȣanontonse onen kenh ȣaonnise thaȣenheion?
45Nok nonen sahatrori ne Rasennoȣanen, oksaok Sose ȣahotsiakȣarisien ne Iesos raoieronta.
46Nok ne Sose kaniataroȣanen ȣahaninon, sahoiatanentahsi ne kaiasake, nok neh noniataraha ȣathaȣaȣenhekte, nok kenststenrarakonne etho ȣahateȣeienton nok kenststenroȣanen ȣahanontekte tsi iokaronte.
47Nok nʼOnȣari-ȣaritere tanon Onȣari Sose ronistenha tekenikaneratie tsinonȣe iahahien.
Currently Selected:
Mark 15: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
