Luke 16
16
Iaiak-aton iaȣenre teioteriȣasonterakȣen Oriȣatokenti tsini hoiaton Roiatatokenti Luc.
1Ratonhakȣe oni ne Iesos: saiatat ne rostsokoȣa enskat ronnhatseraien ne rororoki ȣahonȣariȣarho rotiesatenni ne raoȣenksonha.
2Iahononke, ȣahaȣenhase: oh nahoten keriȣaronkas nise sariȣake? Skontseraseronni kati tsiniiot tsi saterihonte; aseken iah ki sekon noia kenh tiiaonsasiere nakaȣenk sonha.
3Ȣahenron ne kenh raroroks ne raȣerientakon: oh natenhiaȣennekenha onense ȣahi ne raiatakȣeniio sahakeriontako tsi Kaststeristakȣe ne raoȣenksonha? iah takkȣeni nonȣentsia kenh nakiere, nok katehens ne takastsarite.
4Ȣakatorientare tsi nenkiere naontetsenri ne taionkarhoton tsi rotinonsoton nonen entsionkerion takȣen.
5Ethone akteson tsi iasakohnonkhon ne ronatkaroton, ȣahoriȣanontonse ne rahente, ȣahenron: Toh nikon iakarotani nakkosȣe?
6Tontahenron: Enskat teȣenniaȣe nikanakȣake kenhie. Nok ne raroroks tontahenron: Satsiena ne saiatonsera, nok kenh sanistskȣaron oiah sasonni ȣisk ok nenseȣassen.
7Tihaiatate sahoriȣanontonse: ok nise, toh nikon satkarote? Enskat teȣenniaȣe nikaȣinotserake onatsia. Nok ne raroroks tontahenron: satsiena ne saiatonsera, nok oiah Sasonni ne satekon niȣassen.
8Nok ne Rostsokoȣa, ȣathorensaron ne raonnhatsera iah tehoriȣatoken, neh tsi nihaȣeiente tsi nahaiere, aseken nonȣentsiakekha akoienhokonha senha iontatenikonrare tsinikariȣes iakonnhetie, tsiniiot ne kasȣathetsera akoienhokonha.
9Nok nii kȣaroris oni, seȣatenroseronni ne ȣastsokoȣatseraksen, aiaȣens nonen enseȣatokten, taiestsiiarhoton rahotinakeraserakon iatekakonte.
10Onka roriȣatoken tsinonȣe niioriȣaha roriȣatoken ki tsinonȣe niiorihoȣanens; nok ne iah tehoriȣatoken tsinonȣe niioriȣaha, iah ki tehoriȣatoken tsinonȣe niiorihoȣanens.
11Tokat kati nonȣa iah tosariȣatokenne tsinonkati ne ȣastsokoȣatseraksen, onka kati enhiesatakȣenniaienhase noriȣiio, ȣastsokoȣatseriio oni?
12Tokat oni nonȣa iah tesariȣatokon tsinonȣe nakoren akoȣenk, onka kati entieson ne saȣenk?
13Iah tahakȣeni ne rannhatsera tekeni taokosȣetseraientake; aseken tokat saiatat enhosȣen, nok enhonoronkȣe ne saiatat; tokat enhokonnienste saiatat, enhokenron ne saiatat iah kati oni nise taonton ne Niio hatsiseȣaiotense tanon Otkon.
14Tsinihati ne Pharisian ronataonsatekȣe tsinahoten ȣahenron ok tahonȣaieron aseken rohnaskennhasene ne rononha.
15Ȣasakaȣenhase kati: Iseȣere kinise seȣaianerese nonkȣene; nok tanon ne Niio akȣekon raienteri tsini seȣeriasotens; Aseken tsinikon ioriȣanoronsta nonkȣe okon akȣekon roriȣaston ne Niio.
16Kaianerensera tanon Rotitokenseakȣe ȣatatiene tsiniiore ne San. Nok eh nahe tiotasaȣe onen karihoȣanaton ne Niio raonakerasera; akȣekon ok oni iakoskennhen niaiontaȣeiate.
17Senhase ȣatiesen taontohestste tsi karonhiate oni tsi ionȣentsiate tsiniiot ne skaiatonkȣa aiohsense tsini kaiaton ne kaianerensera.
18Onkakiok enshatekȣate ok ne ens tenshiatekhasi nok oia enshoniake, enhariȣanerake kentesera, nok onkakiok enshatateniakten ne skonȣatekȣaton enhariȣanerake kentesera.
19Saiatat oni naha ne rokȣastsekoȣa; neok ne kanoronson rastseronniatakȣe, neok oni ne niateskakkȣiiosson irakskȣe ok tiiateȣenniserake.
20Saiatat oni nerotent Lazar ronȣaiastskȣe tsi ronnhokaronte ne rokȣastse rahiationnikȣe, raiatakȣekon roststaȣiskȣe.
21Raskaneksȣe narahona neh ahrake ne tkaniserens rahotekkȣarane ne rokȣastse, iah tanon onka tehonȣaȣiskȣe; erhar ok eh kontikȣattoskȣe nok kontikanonstskȣe tsi roststaronnion.
22Khare onen ȣarenheie ne rotent, Ratironhiakeronon iahonȣaiatenhaȣe ranaskȣakon nʼAbraham; ȣarenheie oni nehne ne rokȣastsekoȣa nok ȣahonȣaiatata.
23Nok nonen sihotetsiraton, oni Onesson roronhiaken, ȣahatarakestsko, nok ihnon iahoken Abraham, nok ranaskȣakon eh thotonnhahere ne Lazar.
24Ȣathohenrete, ȣahenron: Rakeni Abraham, askitenre, ahontastsiatori ne Lazar, aȣenke iatahanisnonsoȣe nok ahatieȣenthotakȣe kennasake; aseken iah tiiaieriȣaheȣe tsini ȣakeronhiaken kehiken kenh nonȣe otonkokon.
25Tontahoȣennaȣeron nʼAbraham ȣahenron: Kien saseiarann tsi sastsokoȣane nonȣentsiake nok ne Lazar eso roieshaon, onȣa kati nehne nonȣa onen rotsennonni, nok nise ioronhiakentastsanit saronhiakentha.
26Iah ki oni neok toioriȣa ioshonhioȣanen tsi iotonȣentsiiakon ne teionkȣakhasiaton; nese ȣaonni iah teseȣatons ne kentho iaiontenti nok eh iaien tsi tesiteron, iah oni neh aontaiontenti nok kentho nahontaien.
27Nok nerokȣastse, ȣahenron: ȣakonneken kati Rakeni Abraham, iahonsastsiatori ne Lazar rakenineha.
28Aonsasakororiana ne ȣisk nateiakȣatennontere aontonsseke tosa aiakȣariskon.
29Tontahenron nʼAbraham: sakotiȣennenhaȣe ne Moïs oni ne Rotitokense, neh ratiser.
30Sekon tontahenron ne rokȣastse: tosa, rakeni Abraham; toka se nonȣa enshontatreȣate nonka kiok iakaȣenheion ahonsahonȣatiroriana,
31Nok nʼAbraham tontahenron; tokat iah tenhontahonsatathe tsini honen ne Moïs oni ne rotitokensehakȣe, iah kisenha tahontahonnetakȣe naonsasakotiken aonsaiontonnhete niakaȣenheionne.
Currently Selected:
Luke 16: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
