Luke 11

Enskat-aton iaȣenre teioteriȣasonterakȣen Noriȣatokenti tsini hoiaton Roiatatokenti Luc.

1ONEN are raonhaa ionsonton, ȣahaterennaien, nok nonen Sahaterennaientako Saiatat ne raotiokȣa ȣahoriȣanontonse ȣahenron: Seȣenniiio! takȣari onnien tsi naiakȣaiere naiakȣaterennaien, tsi nihoieren ne San tsi Sakorionnienni ne raotiokȣa.

2Tontahariȣaserako, ȣahenron: Enseȣenron nenseȣaterennaien: Takȣaienha karonhiake tesiteron! Aiesasennaien! Aiesaȣenniiostake! Aiesanikonraierite nonȣentsiake tsiniiot ne Karonhiake tiesanikonraieriton!

3Takȣanont ne kenh ȣente ne iakionnhekȣen.

4Nok sasanikonrhen tsi niionkȣariȣaneren: Aseken tsionkȣanikonrhens oni nii tsiniionkhinikonraksatha nonkȣe. Nok tosa askȣaiatatkaȣe ne kariȣak senke ehren tanon askȣariȣakȣiten ne iotaksen.

5Sekon tontahenron: Onka kiok tsinitsion ahotenrohsentake asonthen niiahonnhoharane nok ahenron: Orie takenatarani asen nikanatarake.

6Aseken onkiatenro ȣahakenonsorenne, nok iah othenon teȣakien nahoten ahinonte.

7Nok ahontahenron ne kanonskon thenteron: tosa othenon tontakenikonrharen aseken onen ȣakatennhoton, onen oni kheienne ne kheienhokonha iah kati taonton ne taontakatkestsko nok aontakonhion?

8Kȣarori, tsi iah tataontahatkestsko nok aontahaon netsi ronatenro; nok sane tenthatkestsko netsi tehonikonrharani nok enthaon tsinikon tehotonȣentsioni.

9Neh kati ahoriȣa kȣarori, katon: Seȣariȣanonton, nok enhiestshiion; Seȣesak, nok enseȣatsenri; Seȣannhohaiak, nok enhiestsinnhotonkȣase.

10Aseken, tiontataȣis ne ieriȣanontons, ietsenries ne iakesaks; nok enhonȣannhotonkȣase ne rannhohaiaks.

11Onka oni tsinitsion ahoȣiraientake, kanatarok ahoriȣanontonse ne roniha, ohnenhia ontekenh enthaon? ok ne ens oniare aontahaon nonen kentsionk enhariȣanonton.

12Takȣarere ontekenh aontahaon ne Onnhonsa ahariȣanonton?

13Etho kati taeseȣaiatorete, seȣaȣeiente ise ne tsionkȣetaksens neioianere tsi naietsiiatierase ne ietsiienhokonha, toh kati onte senha nonshakaon ne Etsiseȣaniha Karonhiake thenteron ne raonikonratokenti onkaresson ronȣariȣanontonnis?

14Ethone are enskat Sahaiatinekenȣe notkon iah teȣatati: nok tanon akȣa neok sonsakaiakenne notkon oknaha Sahatati ne rotiennine; ȣahakonerakȣenhaton.

15Otiake are sane ȣahiron: Beelzebul ȣahi nehne konȣakoȣanen notkonseraksen ahosennakon raieratha tsi sesakoiatinekens nonatkonsson.

16Otiake neok ne ronȣatenientensehakȣe, ȣaonȣariȣanontonse ioriȣanerakȣat, karonhiakeka.

17Nok tanon tsi roterientaratsion tsinihotinikonraȣens, ȣahenron: tsini kanakeraserake ne iah skariȣat tehken enhiakaonȣentsiaiesha; oni tsini kaȣatsirake ne iah skanikonrat tehken enȣatȣatsiraton.

18Tokat nonȣa notkonseraksen ok raonhake tehoriȣatironte, oh kati niiot tsi enȣahteke ne raonakerasera? Seȣatonse ȣahi Beelzebul ȣakienaȣase tsi sekheiatekȣatha nonatkonseraksen.

19Tokat nonȣa Beelzebul aonkienaȣaseheke, onka kati nehne ronȣatiienaȣase ne ietsiienhokonha? nese ȣaonni ok rononha tenhiestsiiatorete.

20Nok tanon tokat Niio raosnonke tkaientakȣa tsi sekheiatekȣatha nonatkonsson, Oriȣiio kati ȣahi tsi onen seȣaiatorenhon ne Niio raonakerasera.

21Ronaktiio ne ronkȣe ne rosaststenseraien, akȣekon skennen tikaien tsini hoien.

22Nok tanon nahononsorenne ne rosaststenserakennion, ȣahokȣa tsini hatatiatakennhastakȣe, nok akȣekon ienhaaȣe tsini hoientakȣe.

23Iah sahonkeniriȣat tehken ne iah tehakeriȣaȣase; nok ne iah enskatne teiakoniroroks ratiesatha.

24Katke nonshonȣaiatinekenȣe notkon tsi sakotiennine nonkȣe, eh niienhenre tsi iohnenniokoton raȣesakonhaties nahaonrishentane; nok nenhoioha, enhenron: tsi teȣakenonsote ienske, tsi oni nonȣe tesakiakenhon.

25Saraȣe, Skanonsaseronni, tsionheȣanion oni.

26Oksaok sahakete, nok, sasakononksa tsiatak nikontkonserake senha ratinessonronon tsiniiot ne raonha, nok sahontaȣeiate eh oni sahontenaktonni; ne kati ahoriȣa onen senha henhentarahekte tohiken ronkȣe tsnitiotonne ne tiotierenton.

27Arek ok tiiehoteȣennokte, skaiatat tsiothonȣisen tontahiohenrete nok ȣakenron: iakotaskasts ne ieiatakon tsiatatakȣe, oni ne iesataronte!

28Tontahenron: neh tanon naha iakotaskasts niakotaonsate ne Niio raoȣenna nok ronȣaȣennarakȣa.

29Nok tsi akȣekon ok akta iakaȣenontonhatie, ethone are onen ȣahenron: kehiken kaȣatsirate kaȣatsiraksenskȣa: kariȣanontons ioriȣanerakȣat, iah ki tanon onte eh teiaȣensere, neok enȣatkatho tsiniiaȣenhon ne Jonas Rotokensehakȣe raiatatake.

30Aseken ne Jonas rahonateniententsera iotonhon ne Ninifronon; eh kati oni nonȣa nenhiaȣenne nonkȣe Roienha tsinonkati nekenh kaȣatsirate.

31Entieronon konȣakorakoȣa, tentkatane nok enhiakoriȣaiakse oni enhiakoriȣente nonȣa kenh kaȣatsirate: aseken naonhaȣaonȣentsiokten naonronke ne Salomon rahottokhatsera, senha nonȣa raiatanoron ne kenh ihres tsiniiot ne Salomon.

32Ninifronon tenthatitane nonen tenhiontatiatoretane ensakotiriȣaiakse nok ensakotiriȣente nekenh nonȣa kaȣatsirate: aseken ne rononha shonatatreȣaton sasakotati ne Jonas, nok senha nonȣa raiatanoron nekenh ihres tsiniiot ne Jonas.

33Iah ȣahi nehne onka tekahaserotha neok saok iaonsete tsinonȣe tiotaseton, ok ne ens okȣirokon, iehaserotakȣake ȣahi enhienioten naontkatho tsi teiosȣatte tsini iakon tiontaȣeiatha.

34Okara ȣahi aosȣathetsera noieronta. Toka skariio tsiatakȣekon ki tenhiosȣatheke, nok tanon nenskaraksenhake tsiatakȣekon ki tentiokarasseke.

35Senikonrarak kati tosa tetiokarasek ne sahasera.

36Toka nonȣa tsiatakȣekon teiosȣathe, iah oni kaneka teiotasatare, akȣa ki akȣekon tiiatensasȣatheke, tsi kis ens niiot ne kahasera tesasȣathetennis.

37Sekon ok sihotare, saiatat Pharisian, ȣahoonkaron nentie, eh ȣarete ne Iesos, nok atekkȣaratserakta ȣahanistskȣaren.

38Ȣahonekheren ne Pharisian tsi iah tehotsiohare ohenton ne tahastskaon.

39Nok tanon ne Roianer, tontahenron: ionerakȣat ki oni nise Pharisian neseȣaiatoten tsi astste ok nonkati Seȣanohares ne seȣastsesonha, seȣakerassonha oni; nok ne seȣeriane titkahere ne kanenskȣen, oni ȣanontonniontseraksen.

40Teseȣanonȣaraȣenrie! Onka roson ne eneken, iah kenh oni raonha tehoson ne nakon?

41Ashetenrate tanon niare tsini saien, ethone onen oriȣakȣekon ensaianereke.

42Seȣententasere ise Pharisian! Akȣa nehne ieseȣakariaks tsi seȣaienthokȣas, oni tsi tekanatokenhaton nok oni nohontessonha; nok seȣentorha ne taeseȣasniene ne Niio raoriȣasonha nese tanon aonteseȣatierenton nok ethone ne kenh kaien.

43Seȣentent Pharisian! neok tsionȣesata nohenton iaeseȣenstskȣarake nononsatokentike nok taietsinonȣeratonseke nonkȣeokon tsi ionkȣene.

44Seȣententasere, seȣaiatons oni Pharisian tsionkȣetaksenskȣa! akȣa neh tetsiseȣatieren tsiniiot nonen iah othenon tetsioken tsi ieiatat, nese ȣaonni iah ki othenon teietokata neh ierataties.

45Ethone oni otiake ne sakotirionnienni taontati, ȣahonniron: Seȣenniio! Takȣasentenni oni nii tsinaten saton.

46Tontasakoȣennaȣeron, ȣahenron: Seȣententasere oni nise kaianerensera iotsirionnienni! Aseken iokste iestsiketas nonkȣesonha, nok nise iah teseȣakȣenies neok oni ne kenh niiaheseȣaiere.

47Seȣententasere! Aseken tsiestshiiatatahas ne Rotitokenseakȣe ne ietsiniokonkenha sakotirio.

48Oriȣiio tsi ȣene tsionnis tsi seȣariȣanonȣes tsini hotiieranion ne ietsiniokonkenha aseken nerononha sakotirio nok nise ase tsi tsionnis tsi ratiiatatarion.

49Nese ahoriȣa ȣaton ne Niio raottokhatsera: ienkheiatennietase Rotitokense; nok entesakonaȣentho, ensakotisereson oni.

50Niaonteriȣiheȣe, neh nonȣa ne kenh kaȣatsirate ahonateriȣaienhase tsinikon rotinekȣensinekenhon ne Rotitokensehakȣe tsinahe tiontonȣentsiatasaȣe.

51Abel raonekȣensa enteȣatasaȣen tsiniiore ne Zakari raonekȣensa, neh nakȣa akta tsi iontienkȣaronniatakȣa ononsatokentike ronȣario: Tokenske tsi kȣaroris tsi rononha enhonteriȣaketate nonȣa kenh kaȣatsirate.

52Seȣententasere, ise Kaianerensera ietsirionnienni! Seȣatiatakȣeniioston nʼattokhatsera aonnhotonkȣa; iah se sane nise tiieseȣataȣeiaton; neok naiestsinnhese ne iaiontaȣeiate onka ienrhakȣe iakataȣeiate.

53Sekon ok neh sihotarakȣenhatie, ȣathonȣatkenniaienthoten ne Pharisian tanon ne Sakotirionnienni niateioriȣake ȣahonȣariȣanontonnionhase.

54Neok ne teonȣaskotanis, rotirharekȣe neh nahontahatiierate othenon ahonȣariȣannhontako nah onatessenniiose ahonȣariȣarhoste.

Currently Selected:

Luke 11: MHK

Highlight

Copy

Want to have your highlights saved across all your devices? Sign up or sign in

Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.

The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).

Learn More About Ohiatonhseratokénti