Mark 6

Nazareth iriniwok aka e tapwerimatcik Cecoca

(Natawapata kaie Matio 13.53-58; Luc 4.16-30)

1Minawatc ki matcaw Cecoc nta ka tacikespan. Nete tca icaw otenak ka ki otci matcekitc. Owitcewakana iti witcewikopan. 2Aci ka arwepi kicikarik ki nta kiskinohamakew cota aiamihe mikiwamik. Mitcetinaniwonipan neta. Aniki ka tacikewaspan ki micta mamiskasitawewok. Itepanak: “Tante ka otinak aniheriw ka aitetc? Awiriw ka ki mirikotc aniheriw omiro omitoneritcikan acitc kitci mata kackitatc! 3Namaiew ia ni anahwe manike iriniw, Mari#6.3 Mari: Marie okosa? Namaiew ia ni kaie octesiwawa Cak kaie Joses, Jude kirika Simo? Namaiew ia ni wir kotakihi ocima ka ickweciwiritci ka tacikeritci ota kotenaminak?”

Ekoni tca wetci aka ki tapwerimatcik Cecoca.

4Aci itikowok: “Awik ka nikan tipatcimotc kaskina wiec kicterimakaniwiw, nama tepirak otenamik neta ka ki otci pe matcekitc, kaie otcirowemakana nama kicterimiko.”

5Nama ki mata kackitapan Cecoc neta otenak, tepirak ki takinew atita ka akosiritci e kikehatc. 6Ki mamiskateritam aka e asperimototakotc iriniwa neta otenamik.

Nanicw e iciticohwatc owitcewakana Cecoc kitci tipatcimoritci

(Natawapata kaie Matio 10.5-15; Luc 9.1-6)

Minawatc nete otenaskak ki pa icaw Cecoc e kiskinohamaketc. 7Ki wicamew e mitato acitc niciritci owitcewakana. Nanicw e taciritci ki iciticahwew kitci pa aitotiskeritci ke itetc, kirika ki mamirew tiperitamowiniw kitci ki orowiticohwaritci matci manitowa. 8Kaie minawatc ki itew ohweriw: “Akawir kekocic matcewitakw matcaiekwe, matci tepirak askohon. Akawir matcewirakw pakwecikan, kaie mackimotai akawir matcewitakw. Nama kaie ki ka pitahenawaw coria kitaripociwak. 9Ki ka piskenawaw kimaskisiniwaw. Akawir kaie matcewitakw nanicw kipapakiwaniwaw.”

10Kiapatc itikowok Cecoca: “Takociniekwe otenak, wicamikoiekwe mikiwamik kitci nipaiekw, ekota neta peikonok ke ici tacikeiekw, nac kitci nakatamekw anihe otenaw. 11Kecpin aric aka ici mireritakawe iriniwok otenamiwak kitci tacikeiekw, kekotc aka wi natotakoiekwe, ki ka orowinawaw neta otenamiwak. Ki ka powiparitanawaw kimaskisiniwaw e mirikosiwok. Kata tca kiskeritakoniw arotc e ki totakik.”

12Aci matcawok, neta e icatcik ka ki ici iciticohwakaniwitcik e nta witamawatcik iriniwa kitci kweskatisiritci. 13Mitcet matci manitowa ki orowiticohwewok kaie mitcet ka akosiritci ki kikehewok, pimiteriw e acitakaniwonik okitc octikwaniwak.

Capatis ka nipahakaniwitc

(Natawapata kaie Matio 14.1-12; Luc 9.7-9)

14Aci Okimaw Hérode ki petakew kaskina e aitotamiritci Cecoca. Aci meka kaskina wiec petakaniwonikopan. Atita iriniwok itewakopan: “Capatis na ka ki apitcipatc! Ekoni wetci takonik aniheriw tiperitamowiniw Cecoc kitci mata kackitatc!”

15Kotakihik itewakopan: “Élie na!”

Kotakihik kiapatc itepanak: “Enko anaha ka nikan tipatcimotc Kice Manitowa otci, mitowi aniki kotakihik weckatc ka ki pe tatcik!”

16Ka petak Hérode aniheriw e iteritci, aci itew: “Capatis na ka ki iteiapan kitci kickikwecowakaniwitc, ki aric apitcipaw!” 17Tapwe sani ki itekopan anahwe Hérode kitci makonakaniwiritci Capatisa, kitci takopitakaniwiritci, minawatc tca kitci kipohwakaniwiritci. Wetci ki totamokopanen aniheriw Hérode, osam ni anihi Hérodiade otci. Anahwe iskwew, enkweriw ka ki okomirispan Pirip, Hérode ocima. Peikon ki nipowiwok anahwe Hérode kirika Hérodiade. 18Mocak meka ki itikopan anahwe Hérode Capatisa: “Nama ni actew kitci otapinimatc kicim okoma.” 19Mictahi tca cikerimekopan anahwe Hérodiade anihi Capatisa. Wi itekopan kitci nipahakaniwiritci, nama aric ki totamopan, osam anihi Hérode aka e ki otci naheritamiritci. 20Anahwe Hérode koctepan Capatisa e kiskeritakipan icikowisk e itatisiritci kaie e kitcitwaweritakosiritci. Nanakatcihepan tca. E natotawaspan e kakeskweritci, wanimikokopan ko anahwe okimaw. Mireritamokopan aric peikon e natotawatc.

21Aci peikwaw e kicikarik, mia ka tipickak Hérode, ki otcitcipariniw anihi otiskwema wiec kitci totamiritci. Mekwata Hérode ki ocitakopan kitci makocaniwonik otirinima otci: anahweriw ka witcihikotc ko e tiperitak, acitc anahweriw ka tiperimaritci cimakanica, acitc kotakihi iriniwa ka kicteritakosiritci neta Galilée askik. 22Mekwata e makocaniwonik, aci pe pitakeriwa Hérodiade otanisa neta e ici cipetakarik. Ki nimiw anahwe ickwecic. Ki micta mireritamihew Héroda kirika kotakihi ka ki wicamakaniwiritci. Aci itiko okimawa anahwe ickwecic: “Kaskina ke ici nataweritamawiin ki ka miritin.” 23Kirika itew e nespi tapwetc: “Tapwe ki ka miritin ke ici nataweritaman, misawatc apita ka ici tiperitaman, nataweritamawiine.”

24Ekoni e ici orowitc anahwe ickwecic, e tca itatc okawiwa: “Kekwan ke ici nataweritamawak?”

Aci itiko: “Capatis octikwan.”

25Ekoni minawatc ka ici nta pitakepatatc anahwe ickwecic, e tca nta witamawatc okimawa ka ici nataweritak: “Capatis octikwan ni nataweritamwan tecikotc kitci pe miriin, orakanik tca kitci acterik.”

26Micta kackeritam anahwe okimaw. Nama aric ki nakanamawew ani e ici nataweritamakotc, osam e ki nespi tapwetc e petakotc anihi ka ki wicamatc. 27Tecikotc ki iciticahwew peikw ocimakanicima kitci petaritci Capatisa octikwaniw. Ki icaw anahwe cimakanic neta kipohotowikamikok e tca kickikwekohatc Capatisa. 28Minawatc ki iciwitamawew anihi ickweca Capatisa octikwaniw, orakanik e ki actakaniwonik, e miratc. Anahwe tca ickwecic ki iti mirew okawiwa. 29Ka petaketcik Capatis owitcewakana ka ki isparinik, ki pe natcipatawok owiawiriw e nta nahikakik matikowocik.

Cecoc e acamatc niaranwaw kice mitato mitana iriniwa

(Natawapata kaie Matio 14.13-21; Luc 9.10-17; Jean 6.1-14)

30Aci ki pe kiweriwa Cecoc otarotakana,#6.30 otarotakana: Kekotc: onapotema e pe natawapamikotc neta ka ici taciketc. Witamako kaskina ka ki ici aitotamiritci kaie ka ki ici kiskinohamakeritci. 31Mekwata mitcetipanak iriniwok. Atita pe takocinipanak, atita matcapanak. Nama tca ickwa aikewok Cecoc kirika owitcewakana kitci ki mitcisotcik. Ekoni wetci itatc: “Petcimotekw, ki ka nantowapatenano wiec ke ki ici arwepiekw.”#6.31 ke ki ici arwepiekw: Manawan: ke ki ici arwecimoekw. 32Ekoni tca e ici positcimetcik, wircikewaw e nta nantowapatakik ke ici arwepitcik.

33Aric mitcet iriniwok ki wapamewok e matcehoritci, e nisitowinawatcik. Kaskina wiec otenaskak otcipatawok, wirctamiwaw e takocikik e motci pimotetcik neta ka ici icawaspan Cecoc kirika owitcewakana.

34Ka kapatc Cecoc tcimanik, aci wapatam e mitcetinaniwonik. Ki micta kitimakerimew anahweriw iriniwa, osam kekatc mia e iterimatc mia maritcenicak aka e tatcik ka nanakatcihikotcik. Ekoni e ici iti kiskinohamawatc mitcet kekociciriw. 35Aci akwaskowariw ka pe natawapamikotc owitcewakana, e tca itikotc: “Aci iti tipiskaw kirika nama tapwe taniwon ota. 36Ki ta matceticohwawok aniki iriniwok kitci icatcik papikan kitikan askik kaie otenacik pecotcik ka takonik, mitcimiriw kitci ki otapinakik.”

37Aci itikowok Cecoca: “Kirawaw tipirawe acamakok!”

Kokwetcimewok: “Ki nataweriten ia ninan kitci nta otapinakitc pakwecikan, nicwaw mitato mitana coriawapiskw#6.37 nicwaw mitato mitana coriawapiskw: Ani apitc tepirak peikwapiskoriw kanewikopan iriniw tato kickwa ka otamirotc. tca kitci tcakinamak kitci ki mitcisotcik?”

38Itikowok Cecoca: “Tan e tacitcik kipakwecikanimiwaw? Kotci nta kiskeritamokw.”

Ka ickwa nta kiskeritakik, aci itewok Cecoca: “Niaraniwok pakwecikanak, kaie niciwok namesak.”

39Minawatc ki itew Cecoc owitcewakana papikan kitci apihakaniwiritci iriniwa ka tacikeritci neta mackocik. 40Atita niarano mitana tacipanak ka papakanihakaniwiritci, atita kaie mitato mitana. 41Minawatc Cecoc ki otapinew anihi niaran pakwecikana acitc nicw namesa. Ki itapiw icpimik wakwek, mikwetc e itatc Kice Manitowa. Ki pakwepitew pakwecikana. Minawatc ki mirew owitcewakana kitci papakitinaritci anahweriw iriniwa. Peikon kaie ka ki totawatc namesa. Kaskina kiapatc ki papakitinakaniwiriwa. 42Tato nta e tacitcik aniki iriniwok kaskina ki mitcisowok nac e miro tipiparitcik. 43Cecoc owitcewakana ki mawotcitawok ka ki ickonikaterik mitcimiriw. Mitato acitc nicw pakitenakaniw#6.43 pakitenakaniw: Kekotc: mackoci orakaniw; otapi orakaniw. ki mockinetawok. 44Aniki iriniwok ka ki mowatcik pakwecikana, niaranwaw kice mitato mitana ki taciwakopan.

Cecoc e pimotetc okitc sakihikanik

(Natawapata kaie Matio 14.22-33; Jean 6.15-21)

45Kotc ka ickwa acamatc anahweriw iriniwa e mitcetiritci, Cecoc ki itew owitcewakana kitci positcimeritci kitci nikan matcehoritci e acohamiritci sakihikaniw epwamoci wir, nta tca itekera Bethsaïda otenak kitci ici acohakik, wir kitci itatc Cecoc anihi mitcet iriniwa kitci kiweritci. 46Ka ickwa nakatikotcik kaskina anihi iriniwa, aci wircike ki amatciwew matinacik e nta aiamihatc. 47Tepiskarik kiapatc tetawakamik sakihikanik nokoniw otcimaniwaw owitcewakana. Wircike tca Cecoc tacikew rarewak. 48Wapamew mictahi e arimikeritci kitci ki mickaritci, osam e nakepacitcik. Epwamoci sakasikeritci pisimwa, Cecoc natawapamew owitcewakana, okitc nipik e pimotetc. Nac kekatc iti wimackawew e iti atiminehwatc.

49Aric ka wapamatcik e pimoteritci okitc nipik, ki iteritamok e amatisotcik. Ki micta nanotakosiwok. 50Kaskina meka e tacitcik wapamepanak. Ki micta sekisiwok. Tecikotc aric aimihew Cecoc, e itatc: “Sokitehekw! Nin ni! Akawir sekisikw!”

51Minawatc ki witci positcimew owitcewakana. Ekoni ka acterawerik. Ki micta kice mamiskateritamok. 52Nama meka apitc moci ki otci nisitotamok ka ki mata kackitaritci Cecoca, anahweriw pakwecikana ka ki mitcetiharitci. Nama meka kackitawok kitci kanaweritakik omitoneritcikaniwak.

Cecoc e kikehatc ka akosiritci Génésareth askik

(Natawapata kaie Matio 14.34-36)

53Sakihikaniw e ki acohakik Cecoc kirika owitcewakana, aci macakawok, seskipitamok otcimaniwaw neta Génésareth askik. 54Ka ickwa kapatcik tcimanik, mitcet ki nisitowinawewok Cecoca. 55Kaskina wiec otaskiwak aispatawok e nta natcipahatcik otakosikaniwawa, e tetaskonatcik, e tca iciwitowatcik Cecoca kotc wiec e ici petaketcik nte e ici tacikeritci. 56Kaskina wiec ka iti icatc Cecoc otenacik, otenaskak, kaie kitikan askik, mitcet iriniwok pe nta arewok ka akosiritci nta ko ka ici mawotcihitonaniwonik, e tca pakoserimatcik Cecoca kitci pakitinamiritci kirike nitek okapotowanik kitci takinamiritci anahweriw otakosikaniwawa. Kaskina tca ka ki takinatcik ki kikewok.

Currently Selected:

Mark 6: ATMK

Highlight

Copy