Mark 5

Cecoc e kikehatc iriniwa, mitcet matci manitowa e ki pitciteheckakoritci

(Natawapata kaie Matio 8.28-34; Luc 8.26-39)

1Aci iti macakawok Cecoc kirika owitcewakana nte Gérasène iriniwok ka ici otaskitcik, nete akam sakihikanik Galilée. 2Mia apitc e iti kapatc Cecoc tcimanik, peikw iriniwa pe natawapamiko, rikwaskanik e ototeritci. Anahwe iriniw ki pitciteheckakokopan matci manitowa. 3Ekota tca ko neta rikwaskanik e pa tacikespan. Nama awik kackitakopan kitci takopitatc, misawatc piwapiskwapiriw e totcikaterik. 4Aci mitcetwaw ki kotci takopitakaniwipan, oskatik kaie otcitcik. Mocak aric ki kackihopan, e pikotatc aniheriw piwapiskwapiriw. Nama awik tipi mackawisikopan kitci ki matcikonatc. 5Aspinikotc e kickarik kaie e tipiskarik pa pimotekopan neta rikwaskanik, kaie ko nte e matinacinik pa aicapan e micta nanotakositc kaie tca e wisakahotisotc, asiniwa e otatamohotisowaketc.

6Warawik otci wapamew Cecoca. Ekoni e ici mowinitatc e nipiskoctawatc, 7e itatc e micta kiciwetc: “Kekwan ni ka ici nataweritamawiin, Cecoc, Kice Manito ka mawotci icperitakositc Okosa? Ki pakoserimitin, Kice Manito otci, akawir nekatcihici!” 8Wetci itetc aniheriw, osam e ki itikospan Cecoca: “Matci manito, orowicko anahwe iriniw!”

9Aci itew Cecoc anihi iriniwa: “Tan ni e icinikasoin?”

Naskamoriw e iteritci: “Ka mitcetiak nit icinikason. Ni mitcetinan meka.”

10Aci kaketin nataweritamawew Cecoca aka kotak wiec kitci iciticohwaritci anahweriw omatci manitoma.

11Nama neta warawik mitcetiwakopan kokocak e pa nantowi mitcisotcik nte e poskotinacinik. 12Aci aniki matci manitowok pakoserimewok Cecoca, e itatcik: “Iciticahamacinan neta kokocak ka tatcik kitci ki pitcickowakitcik.”

13Ki pakitinikowok Cecoca aniheriw ka ki ici nataweritakik. Ekoni tca ka ici orowitcik aniki matci manitowok nta irinik, nete kokoca e ki pitakeckowatcik. Kaskina aniki kokocak, wiec nicwaw kice mitato mitana e tacitcik, ki nitcikowackotiwok e kickapiskarik sakihikanik e ici pakicinitcik. Kaskina tca ki kwapawewok.

14Tapanak neta iriniwok ka kanawerimatcik anahweriw kokoca. Ka wapatakik aniheriw ka ispariritci, ki ocimowok e pa nta tipatcimotcik otenak kirika kitikan askik. Mitcet iriniwok ki pe nta kanawapatamok ka ki isparinik. 15Tekocikik neta Cecoca ka ici tacikeritci, wapamewok kaie anihi iriniwa ka ki pitciteheckakorispana matci manitowa e mitcetiritci, aci tekaci pitoc e icinakosiritci aka e taritci omatci manitomiwariw. Motcik taci apiriw. Aci owikasimiriw, aci kaie cowatc e itiritci. Ki micta sekisiwok aniki iriniwok. 16Aniki ka ki wapatakik kaskina ka ki isparinik ki tipatcimowok tan mia ka ki ispariritci iriniwa acitc kokoca. 17Ki tca pakoserimakaniwiw Cecoc kitci matcatc neta otaskiwak.

18Mia e wi iti positcimetc Cecoc, ki kokwetcimiko anihi iriniwa ka ki kikehatc matci kitci ki witcewikotc. 19Nama aric ki otci naheritam, e itatc: “Kiwe neta kimikiwamik, neta ka ici taciketcik kitcirowemakanak. Kaskina tca tipatcimo ka ki totak Kice Manito kir otci e kitimakerimisk.”

20Ekoni e ici matcatc anahwe iriniw e iti tipatcimotc neta askik, Mitato Otenaw ka icinikaterik, kaskina ka ki totamiritci Cecoca wir otci. Kaskina tca ka ki petawatcik ki micta mamiskasitawewok.

Jaïrus otanisa, kirika iskwew ka ki takinamowatc Cecoca owikasimiriw

(Natawapata kaie Matio 9.18-26; Luc 8.40-56)

21Minawatc ki acoham Cecoc nte e kiwetc akam sakihikanik. Mecakatc ote itekekam, micta pe mitcetiriwa iriniwa nte e icikapowitc rarewak sakihikanik. 22Peikw ka nikaniwitc neta cota aiamihe mikiwamik pe takociniw. Jaïrus icinikaso. Ka wapamatc Cecoca ki nipiskoctawew, 23e tca pakoserimatc otcitakotc kitci witcihikotc: “Nitanis aci kekatc nipo,” itew anahwe ka nikaniwitc. “Petcimote, ki pakoserimitin. Pe nta takini, ekoni kitci kiketc, kiapatc tca kitci pimatisitc.”

24Ekoni e ici matcatc, Cecoca e witcewikotc. Mitcet iriniwok kaie wirawaw pe icawok e witcewatcik. Micta sitcikapowinaniwoniw.

25Takopan neta iskwew, mocak e onitakopanen omikw, mitato acitc nicw tato pipona esko itapinekopanen. 26Mitcet ki natawapamekopan mackiki iriniwa, aric ki micta nekatcihikokopan, nac kaie e ki tcakinak kaskina ocoriam. Nama aric peikon awocamec ki otci miro pimatisiw. Eckam iti akosipan. 27-28Aci petakew Cecoca e ici kackitaritci. Aiteritamokopan: “Kecpin takinamwake misawatc tepirak owikasim, ni ta mirwatisin ni.” Otananik tca nte icaw Cecoca e pimoteritci, e mitcetinaniwonik, e takinak owikasimiriw. 29Tecikotc nakapariniw omikw e matcamakanik. Tecikotc kaie kiskeritam aci e kiketc. 30Mia kotc kiskeritam Cecoc e ki apatcitakaniwonik memantcic omackawisiwin. Aci kiwepariho, e tca itatc iriniwa: “Awin ka ki pe takinak niwikasimiriw?”

31Itiko owitcewakana: “Ki wapaten e sitcikapowinaniwok e mitcetinaniwok. Kiapatc ia kit itan, ‘Awin ka ki pe takinitc?’”

32Aitapiw aric Cecoc kitci kiskerimatc anihi ka ki totamiritci. 33Anahwe tca iskwew ninikipariw e kokwarisikeritak, e kiskeritak e ki kikehakaniwitc. Pe natawapamew. Nipiskoctawew e witamawatc tapwe ka ki isparinik. 34Cecoc itew anihi iskwewa: “Nitanis, tapwe kit asperimototawin, ekoni wetci ki kikein. Ekoni ici matca, acitc pekaterita. Nama aci ki ka ici arimiparin.”

35Mekwata e taci arimwetc Cecoc, aci pe takociniwok atita iriniwok, anihi Jaïrusa omikiwamirik e ki pe ototetcik, e tca itatcik: “Aci ki poni pimatisiw kitanis. Ceckwat kiapatc ki otamihaw anahwe Kiskinohamake iriniw.”

36Nama aric aniheriw ki otci pamitam Cecoc. Itew anihi Jaïrusa: “Akawir sekisi! Tapwerimici tepirak!”

37Nama kaie awocamec ki otci pakitinam Cecoc kitci witcewakaniwitc. Tepirak ki witcewiko Piena, Caka kirika Jeanwa (Cak anihi owitcicana). 38Tekocikik neta anihi ka nikaniritci omikiwamirik, wapatamok e mitcetinaniwonik. Petamok e micta matonaniwonik kaie e nanotakosinaniwonik. 39Ekoni e ici pitaketc neta Cecoc, e tca itatc anahweriw ka matoritci: “Kekwan wetci matoiekw e micta wectatewetaiekw? Nama ni nipo anahwe awacic! Tepirak ni nipaw!”

40Papirotowakaniwiw aniheriw e itetc. Ekoni e ici orowiticohwatc. Minawatc ki wicamew e nictiritci owitcewakana kirika anihi awaca onikihikoriw kitci pe nta witcewikotc, tapickotc tca e pitaketcik neta aricapik ka ici miciniritci anihi ickweca. 41Ki otapiniskenew, e tca itatc: “Talitha koum!” Wi itemakan anihe: “Ickwecic, kit ititin, onicka!”

42Tecikotc ki pasiko anahwe ickwecic, e tca pimotetc. Mitato acitc nicwo tato piponesipan. Aniki ka wapatakik aniheriw ki micta kice mamiskateritamok. 43Aric Cecoc ki itew aka kitci witamakaniwonik. Minawatc ki itew: “Mirakw ke mitcik.”

Currently Selected:

Mark 5: ATMK

Highlight

Copy