Mark 2

Cecoc e kikehatc iriniwa ka niponesiritci

(Natawapata kaie Matio 9.1-8; Luc 5.17-26)

1Ani apitc wiskata ki pe kiwew Cecoc neta Capernaüm otenak. Aci ki petakaniwoniw e ki pe kiwetc. 2Ki micta tca icaniwoniw neta mikiwamik ka ici taciketc. Ki iti micta mitcetinaniwoniw, nac e apitc sitcikapowinaniwonik, mitcet orowitimik nanipowiwok. Ekoni e ici kiskinohamaketc Cecoc.

3Aci atita iriniwok pe takociniwok e pecowatcik peikw iriniwa e niponesiritci, Cecoca e wi iciwitowatcik. Pe newiwok e pe takonatcik iriniwa tetaskonikanik e aratcik anihi ka niponesiritci. 4Nama aric ki iciwirewok pecotcik ite e icikapowiritci Cecoca, osam e mitcetinaniwonik. Ki tca iciwirewok okitc mikiwamik. Minawatc ki pokonehamok okitc ite e ici apiritci Cecoca. Ekota ka otci nitapikenatcik anihi ka niponesiritci, otetaskonikanik e miciniritci. 5Ka wapamatc Cecoc anahweriw iriniwa e apitc asperimototakotc, ki itew anihi ka niponesiritci: “Nikosis, ki kasihamakowin kipactatowina.”

6Apipanak neta atita ka kiskinohamaketcik cota aiamihe irakonikewiniw. Iteritamwakopan: 7“Ceckwat ani ici arimwew anahwe iriniw! Marerimew Kice Manitowa! Awin ke ki kasihak pactatowiniw? Tepirak kotc Kice Manito!”

8Tecikotc kiskeritam Cecoc ani e iteritamiritci. Aci itew: “Kekwan wetci iteritamekw anihe? 9Kirawe ia wetan kitci itakaniwitc anahwe ka niponesitc: ‘Ki kasihamakowin kipactatowina,’ kekotc kitci itakaniwitc: ‘Pasiko, otapina kitetaskonikan, pimote tca’? 10Aric ni nataweriten kitci kiskeritamekw ohwe: kackitaw anahwe Ka ki pe iriniwihitisotc#2.10 Ka ki pe iriniwihitisotc: Arimomitiso ota Cecoc. kitci kasihak pactatowiniw ota askik.”

Ekoni e ici itatc anihi ka niponesiritci: 11“Ki witamatin, pasiko! Otapina kitetaskonikan! Kiwe kimikiwamik!” 12Tecikotc pasiko anahwe iriniw. Otapinam otetaskonikan e iti pimotetc. Kaskina awik kanawapamewok. Micta mamiskateritamok. Mirwatcimewok Kice Manitowa e itetcik: “Pitcerak ni wapatenan ani e isparik!”

Cecoc e wicamatc Lévi

(Natawapata kaie Matio 9.9-13; Luc 5.27-32)

13Kiapatc minawatc Cecoc ki iti icaw rarewak sakihikanik, Galilée ka icinikaterik. Micta mitcetiriwa iriniwa ka pe natawapamikotc. Ekoni e ici kiskinohamaketc. 14E iti pimotetc, wapamew peikw iriniwa. Lévi icinikasoriw, Alphée anihi okosa. Nte taci apiripan neta ka ici otamirotcik ka natockaketcik. Itew Cecoc: “Pe nosanehici.” Ekoni e ici pasikotc anahwe Lévi e tca nosanehwatc.

15Minawatc ki nta mitciso Cecoc Lévi omikiwamirik. Mitcetiwok ka natockaketcik kaie kotakihik iriniwok aka ka kicterimakaniwitcik#2.15 iriniwok aka ka kicterimakaniwitcik: Peikon kata ki ici nisitotakon: “pactati iriniwok” ka iterimakaniwitcik. ki pe icawok e witci mitcisomatcik Cecoca kirika owitcewakana. Mitcetipanak meka iriniwok ani e ici pimatisitcik ka nosanehwatcik Cecoca. 16Iriniwok ka kiskinohamaketcik cota aiamihe irakonikewiniw, Pharisien iriniwok e ici apitcik, wapatamwakopan aniheriw e isparinik. Ki wapamewok Cecoca e witci mitcisomaritci anihi towiriw iriniwa. Itewok Cecoca owitcewakaniriw: “Kekwariw wetci witci mitcisomatc anahweriw ka natockakeritci kaie tca anihi kotakihi iriniwa aka ka kicterimakaniwiritci?”

17Ki petam aniheriw Cecoc. Minawatc ki itew: “Iriniwok ka miro pimatisitcik nama takatc mackiki iriniwa natawapamewok. Ka akositcik, enko aniki ke natawapamatcik mackiki iriniwa. Nama ni ki otci pe ican kitci wicamakik iriniwok aci icikowisk ka iterimitisotcik, aric kirawe aniki ka kiskerimitisotcik ka pactatitcik.”

Roskosowiniw e arimotak Cecoc

(Natawapata kaie Matio 9.14-17; Luc 5.33-39)

18Peikwaw e kicikarik Capatis owitcewakana kirika Pharisien iriniwok roskosopanak. Aci atita iriniwok ki natawapamewok Cecoca e kokwetcimatcik: “Capatis owitcewakana kirika Pharisien iriniwok owitcewakaniwawa roskosoriwa. Kekwariw tca wetci aka totakik kir kiwitcewakanak?”

19Itikowok Cecoca: “Kecpin e ickwa nipowinaniwok, makocaniwon. Anahwe ka nipowitc wicamew okwimesa kitci pe nta witci mitcisomikotc. Kit iteritenawaw ia, aniki ka wicamakaniwitcik kata roskosowok mekwata kiapatc e tacikeritci anihi okwimesiwawa ka nipowiritci? Nama ketcinatc! 20Nikotin aric maninamowakaniwitawe anihi ka nipowiritci, aci nta kata roskosowok.”

21Minawatc kiapatc itew Cecoc: “Nama awik pokoham kete wikasiriw, ocki pakiwanicekiniw kitci totak. Kecpin actate aniheriw, minawatc kisisipatate owikasim, aniheriw pokonehikaniw kata manipariniw. Kirawe tca kata iti micariw neta e pikockarik.”

22“Nama kaie awik kata sikinam kete mackimotewanik ka pakekiniwonik ocki minicaporiw anotcikwetc e ki ocitakaniwok. Osam meka anihe ocki minicapo kiapatc kata otamirohomakan e ocihomakak. Kata pakickiparin anihe kete mackimotewan. E niciki tca kata onactakaniwono, minicapo kaie mackimotewan. Patoc ocki mackimotewanik kata actakaniwon ocki minicapo!”

Cecoc e arimotak e arwepi kicikarik

(Natawapata kaie Matio 12.1-8; Luc 6.1-5)

23Peikwaw e arwepi kicikarik, Cecoc kirika owitcewakana acockamopanak kitikan askiriw. Aci owitcewakana iti manipitamiriwa mirominockwa ka nitawikiritci neta, mekwata e pimotetcik neta kitikan askik.

24 Pharisien iriniwok itewok: “Kanawapata! Kekwariw wetci totakik aniheriw kiwitcewakanak? Masinatew meka kitaiamihe irakonikewininak aka ani kitci totcikatek e mekwa arwepi kicikak.”

25Itew Cecoc: “Nama ia ni wiskat ki ki otci tapwatenawaw anihe? Weckatc peikwaw e kicikarik Okimaw Tapit#2.25 Tapit: David arimisikopan, e pakatewakopanen kirika otirinima. 26Ki pitakew Tapit Kice Manitowa otaiamihe mikiwamirik. Ki mowew neta pakwecikana ka ki aiamihe pakitinakaniwiritci Kice Manitowa otci. Abiatar icinikasokopan ka kice cota makatewokorewispan ani apitc. Masinatew kitirakonikewininak, acteriw tepirak makatewokorewok kitci mowatcik anihi pakwecikana. Aric Tapit ki otapinew. Ki mamirew anahweriw otirinima.”

27Kiapatc itew Cecoc: “Ki ocitakaniwon kitci arwepi kicikak iriniw otci. Nama aric ki otci ocihakaniwiw iriniw kitci tiperimikotc arwepi kicikariw. 28Ekoni wetci iteian, anahwe Ka ki pe iriniwihitisotc#2.28 Ka ki pe iriniwihitisotc: Arimomitiso ota Cecoc. wir ka tiperitak wawatc e arwepi kicikarik.”

Currently Selected:

Mark 2: ATMK

Highlight

Copy