Mark 3

Cecoc e kikehatc iriniwa e arwepi kicikarik

(Natawapata kaie Matio 12.9-14; Luc 6.6-11)

1Minawatc iti pitakew Cecoc cota aiamihe mikiwamik. Arwepi kicikarikopan. Iriniw e niponesitc otcitcik pa tacikepan neta. 2Pharisien iriniwok neta ka tacikewaspan wewerita nanakatcihewakopan Cecoca e totamiritci, e wi kiskeritakik ke apitc kikehakwen awiriw e arwepi kicikarik. Nantowapatamowakopan meka ke ki otci itactahoratcik Cecoca.#3.2 Itacteriw neta otaiamihe irakonikewiniwak cota iriniwok tekaci aka kitci otamironaniwonik e arwepi kicikarik. 3Itew Cecoc anihi iriniwa ka niponesiritci otcitcirik: “Pasiko, kaskina awik kitci wapamiskik.”

4Minawatc ki kokwetcimew Cecoc anahweriw ka taci kanawapakeritci, e itatc: “Ki kokwetcimitinawaw, tan e itemakak kitaiamihe irakonikewininak kitci totcikatek e arwepi kicikak? Kitci miro totawakaniwitc iriniw kekotc ma kitci matci totawakaniwitc? Kitci natokohakaniwitc e akositc, kekotc ma kitci pakiterimakaniwitc kitci nipotc?”

Nama aric ki otci kitowok. 5Kiciw kanawapamew Cecoc anahweriw neta ka tacikeritci kirika micta kice kackeritamokopan, osam tekaci aka e wi nisitotamiritci. Aci itew anihi iriniwa ka niponesiritci: “Pe icitcitceri.”

Ekoni e ici icitcitcerictowatc anahwe iriniw. Ekoni e iti kiketc. 6Ki orowiwok Pharisien iriniwok neta cota aiamihe mikiwamik e tca mawotcihitotcik kirika kotakihik iriniwok ka atoskectawatcik Romain kice okimawa Hérode ka icinikasoritci, e arimotakik tan ke ki totakik kitci ki nipahakaniwiritci Cecoca.

Mitcet iriniwok e pe natawapamatcik Cecoca

7Cecoc iti matcawok kirika owitcewakana, neta rarewak Galilée sakihikanik e icatcik. Mitcet iriniwa iti nosanehikowok. Atita Galilée askik ototepanak, kaie Judée askik. 8Kotakihik Jérusalem otenak ototewakopan, kirika Idumée acitc kotak askik, akam sipik Jourdain ka ici takonik. Ekote atita e ototewakopanen, kaie nete kotakihi askik pecotcik ka ici takonik otenariw Tyr kaie Sidon ka icinikaterik. Wetci pe natawapamatcik Cecoca aniki mitcet iriniwok, osam e ki petaketcik e aitotiskeritci.

9Itew Cecoc owitcewakana kitci natcipatamakotc tcimaniw aka kitci cakotcickakotc anihi mitcet iriniwa. 10Osam mitcetiriwa e ki kikehatc ka akosiritci. Kaskina tca kotakihik papitoc ka itapinetcik wi kotci natcikapowictawewok Cecoca e wi pecowapamatcik, e wi takinatcik kitci ki kikehikotcik kaie wirawaw. 11Kirika kotc ko e wapamikospan Cecoc matci manitowa, nipiskoparihoriwa pecotcik nte ositik e tca iteritci e tepitepweritci: “Kir Kice Manito Okosa!”

12Aric Cecoc kaketin ki witamawew aka kitci tipatcimonaniwonik awin wir.

Cecoc e orapamatc mitato acitc nicw otarotakana

(Natawapata kaie Matio 10.1-4; Luc 6.12-16)

13Minawatc Cecoc ki amatciwew matinacik. Aci wicamew iriniwa ka ki orapamatc. Tato nta e taciritci ki pe natcikapowictako. 14Mitato acitc nicw ki orapamew, “nitarotakanak”#3.14 nitarotakanak: Kekotc: onapotema. e icinikatatc. Ki orapamew anahweriw kitci ki pa witcewikotc kirika kitci ki iciticohwatc kitci pa tipatatamiritci Mirwatcimowiniw, 15kaie ki mamirew tiperitamowiniw kitci orowiticohwaritci matci manitowa.

16Enko ohki mitato acitc nicw iriniwok ka ki orapamakaniwitcik: Simo (kotakeriw icinikasowiniw ki miriko Cecoca, Pien ki icinikatiko), 17minawatc Cak acitc ocima, Jean ka icinikasoritci, Zébédée anihi okosa e niciritci. (Kaie wirawaw ki mirikowok Cecoca kotakeriw icinikasowiniw. Boanergès ki icinikatikowok. Wi itemakan anihe icinikasowin: “Iriniwok mia onimiskiw ka asiteritakositcik.”) 18Minawatc Atre, Pirip,#3.18 Pirip: Philippe Barthélemy, Matio,#3.18 Matio: Matthieu Toma,#3.18 Toma: Thomas Cak (Alphée anihi okosa), Thaddée, Simo (“Anahwe aka ka naheritak kitci tiperimikotc kice okimawa” ka icinikatakaniwispan), 19acitc Judas Iscariote, anahwe ke pakiterimatc Cecoca.

Cecoc e wi matcewirikotc otcirowemakana

20Minawatc ki pe kiwew mikiwamik. Pe mitcetinaniwoniw neta. E apitc mitcetinaniwonik, nama wawatc ki mitcisowok Cecoc kirika owitcewakana. 21Ka petakeritci atita otcirowemakana Cecoc, ki pe matcawok e wi pe natcipahatcik kirika e aitetcik: “Nama aci waskamatisiw!”

Cecoc e naskamotc e ici itactahorakaniwitc

(Natawapata kaie Matio 12.22-32; Luc 11.14-23; 12.10)

22Ka kiskinohamaketcik cota aiamihe irakonikewiniw Jérusalem otenak ki otci pe matcawok e pe icatcik neta Cecoca ka ici tacikeritci. Ki aiarimomewok e tca itatcik: “Matci manito, ‘Béelzébul’ e icinikasotc, enko anaha ka ki pitciteheckowatc Cecoca!”

Kotakihik aitepanak: “Anahwe ka tiperimatc matci manitowa, enko na ka ki miratc Cecoca kitci kackitaritci kitci ki orowiticohwaritci manitowa!”

23Minawa Cecoc wicamew anahweriw ka ki aiteritci e tca aimihatc, atisokaniciciriw e apatcitatc, e itatc: “Tan ke ki totak Matci Manito#3.23,26 Matci Manito: Satan icinikatakaniwiw Matci Manito ota. kitci ki orowiticohotisotc? 24Kecpin e matciparihitotcik iriniwok peikw okimawinik ka taciketcik e macikotatotcik, nama kinowec kata takon anihe okimawin. 25Peikon kaie kecpin ka tcirowemitotcik matciparihitotawe, nama kinowec kaie wirawaw kata niciwonatcihitisowok. 26Peikon tca kaie wir Matci Manito, kecpin e matciparihitoritci anahweriw ka atoskectakotc, kecpin kaie e papikaniparinik e tiperitak, nama kinowec kata tiperitam. Otcitakotc kata ickwapariniw otiperitamowin.”

27“Nama awik kata ki pitakew omikiwamirik iriniwa ka mackawisiritci, kitci tca matcewitatc e ici tatamiritci, patoc kata takopitew anihi iriniwa ka mackawisiritci. Aric ickwa takopitate, aci neta kaskina kata ki matcewitawew ka ici takonik neta omikiwamirik.”

28“Tapwe ohwe ka witamatakok: kaskina kata ki kasihamawakaniwiwok opactatowiniwaw iriniwok, kaie kaskina ka ki ici mareritciketcik. 29Aric anahwe ke marerimatc Miro Manitowa nama wiskat kata ki kasihamawakaniwiw. Nespitc kata kanaweritam aniheriw opactatowin.”

30Wetci ici aiarimwekopanen Cecoc e aimihatc anahweriw iriniwa, osam e ki iteritci: “Matci manito ka ki pitciteheckowatc Cecoca.”

Cecoc okawiwa acitc owitcicana

(Natawapata kaie Matio 12.46-50; Luc 8.19-21)

31Aci pe takociniwok Cecoc okawiwa acitc owitcicana. Orowitimik taci nanipowiwok. Ki tca iciticohwewok peikw iriniwa kitci nta wicamaritci Cecoca. 32Ani apitc mitcetinaniwonikopan e waskapinaniwonik neta ka ici apitc Cecoc. Aci itakaniwiw: “Kikawi kirika kiwitcicanak ki taci pehikok orowitimik neta. Ki natawerimikok.”

33Aci itew Cecoc: “Awin na nikawi? Kaie awin aniki niwitcicanak?”

34Minawatc kanawapamew neta iriniwa ka waskapiritci neta ka ici apitc, e tca itatc: “Kanawapamakokw! Nikawi kirika niwitcicanak tacikewok ota! 35Anahwe meka awik ka aitotisketc e ici nataweritamiritci Kice Manitowa, enko na niwitcican kekotc nikawi.”

Currently Selected:

Mark 3: ATMK

Highlight

Copy