Mark 1

Capatis e tipatcimotc Cecoca kitci pe takociniritci

(Natawapata kaie Matio 3.1-12; Luc 3.1-18; Jean 1.19-28)

1Ota kitciparin Mirwatcimowin, Cecoc Krist e arimomakaniwitc, Kice Manito Okosa.

2Weckatc ki masinatew masinahikan. Peikw iriniw ka ki masinahak, Ésaïe e icinikasospan. Nikan tipatcimokopan, ohweriw ka itasinahak:

“Ki itew Kice Manito:

Ni ka iciticohwaw anahwe ke nikan witamaketc, ke nikanickask,

kitci nta ocitamask meskanariw. Malachie 3.1

3Petakosiw iriniw e tepitepwetc neta ka ici cipewatawokarik, e itetc:

‘Ocitakw meskanaw tipickotc kitci iticimok,

taci ke pimotetc Teperitciketc!’ ” Ésaïe 40.3

4Tapwe tca ki icinakon ani ka itemakak. Ki pe takociniw iriniw, Capatis icinikasokopan. Pamatisikopan neta askik ka ici cipewatawokarik. Pa aicakopan e sikahatakespan kaie e aiarimwespan, e aitetc: “Kweskatisikw! Sikahatasokw! Ki ka kasihamakowaw tca kipactatowiniwariw Kice Manito!”

5Kaskina awik ka tacikespan neta askik Judée ka icinikaterik kaie neta Jérusalem otenak ki natawapamewok. Ekoni ka ici witakik tapwe e cikeritakik e ki patahakik. Ki tca sikahatakowok Capatisa neta sipik Jourdain ka icinikaterik.

6Atikowaniw ko apatcitakopan anahwe Capatis, kaie pakekini pakotehona apatcihekopan. Kwackwackotcihimanakecica mowekopan ko, kaie amo namanasiriw mitcikopan ka ki miskakipan neta askik ka ici cipewatawokarik.

7Kaskina ka tacikewaspan ki itikowok anihi Capatisa: “Anahwe nanake ke pe takocik, kirawe mackaweritakosiw patok nin. Nin nama ni tipi miro iriniwin wawatc tepirak kitci nowectaian kitci ki apikonamowak omaskisiniapi. 8Nin ki ki sikahatatinawaw, nipi e apatcitaian. Aric wir ki ka sikahatakowaw, Miro Manitowa kitci miritakw.”

Cecoc e sikahatasotc, minawatc e kokwetcihakaniwitc

(Natawapata kaie Matio 3.13–4.11; Luc 3.21-22; 4.1-13)

9Minawatc Cecoc ki pe takociniw, Nazareth otenak e ki pe otci matcatc, Galilée askik itekera. Ki sikahatako anihi Capatisa neta Jourdain sipik. 10Mia apitc ka kospitc Cecoc, ki wapatam e ceparinik waskoriw, kirika ki wapamew Miro Manitowa e pe racireritci wir otci, mia omemew e icinakosiritci. 11Ki petam e itakaniwitc, wakwek e otewetcikaterik: “Kir nikosis, ka sakihitan, ki micta mireritamihin.”

12Tecikotc ki matcaw Cecoc, nete askik e icatc ka ici cipewatawokarik, Miro Manitowa e ki iciticohikotc. 13Ekota nete ka taciketc, nemitana tato kickwa irikik. Matci Manitowa#1.13 Matci Manitowa: Satan icinikatakaniwiw Matci Manito ota. kokwetcihikopan. Ani irikik ka taciketc, notcimiw awesisa ki witci tacikemiko, kaie aceriwa ki pe nta atoskectako.

New iriniwa wicamew Cecoc kitci witcewikotc

(Natawapata kaie Matio 4.12-22; Luc 4.14-15; 5.1-11)

14Minawatc ki kipohwakaniwiw Capatis. Ekoni tca ka ici matcatc Cecoc, nete e icatc Galilée askik e nta tipatcimotc Kice Manitowa Omirwatcimowiniw. Aiarimwekopan e aitetc: 15“Aci peconakoniw Kice Manito Okimawin! Kweskatisikw! Tapwetamokw Mirwatcimowin!”

16Mekwata nete e pimotespan Cecoc rarewak Galilée sakihikanik, aci ki wapamew nicw namesike iriniwa. Anahwe peikw, Simo#1.16 Simo: Simon icinikaso. Minawatc anihi ocima, Atre#1.16 Atre: André icinikasoriw. Mekwata taci pakitohwapanak. 17Aci itikowok Cecoca: “Pe witcewicikw! Ki ka witcihitinawaw kitci natcipahekok iriniwok kitci pe nosanehwitcik, tarasak mia names e natcipahekw e pakitohwaiekw!”

18Tecikotc pakitinewok otaripiwawa e nosanehwatcik.

19Nakewar ici pimote Cecoc, aci wapamew nicw kotakihi iriniwa, Cak#1.19 Cak: Jacques acitc ocima Jean, Zébédée anihi e niciritci okosa. Otcimaniwak apiwakopan aniki iriniwok. Taci wecihepanak otaripiwawa. 20Wicamikowok Cecoca. Tecikotc nakatewok otawiwawa acitc otirinimiwawa neta otcimaniwak, e iti witcewatcik Cecoca.

Iriniw e nekatcihikotc matci manitowa

(Natawapata kaie Luc 4.31-37)

21Minawatc Cecoc kirika owitcewakana ki icawok otenak, Capernaüm ka icinikaterik. Apitc e arwepi kicikarik, Cecoc ki pitakew cota aiamihe mikiwamik e iti kiskinohamaketc. 22Iriniwok neta ka ki petawatcik micta mamiskasitawewakopan, pitoc e ici kiskinohamakeritci kaie tca anahweriw iriniwa ka kiskinohamakeritci cota aiamihe irakonikewiniw. Mictahi meka ki mackawisimakaniw okiskinohamakewin.

23Mia pe pitakew iriniw neta cota aiamihe mikiwamik, matci manitowa e nekatcihikotc. Tepwew e itetc: 24“Cecoc, Nazareth otenak ka otciin, kekwan ka nataweritamawiak? Ki ki pe ican ia kitci nipahiak? Ki kiskerimitin ni: kir Ka Kitcitwawisiin, ka ki pe iciticohwisk Kice Manito.”

25Kaketin aimihew anihi matci manitowa Cecoc, e itatc: “Aka kito! Pakitini kaie anahwe iriniw!”

26E iti orowictawatc anihi iriniwa anahwe matci manito, pitama kiapatc micta opirikohew kirika nanotakohew. 27Iriniwok neta ka tacikewaspan e apitc mamiskateritakik, kokwetcimitowok e itetcik: “Kekwan ni? Micta mackawisimakan ohwe ocki kiskinohamakewin! Wawatc matci manitowa itew ke itotiskeritci anahwe iriniw, kaie sapitako!”

28Minawatc ki micta kiciparin kaskina wiec e aiarimomakaniwitc Cecoc Galilée askik itekera.

Cecoc e kikehatc mitcet ka akosiritci

(Natawapata kaie Matio 8.14-17; Luc 4.38-41)

29Minawatc Cecoc kirika owitcewakana ki matcawok neta cota aiamihe mikiwamik, nete e icatcik Simo acitc Atre ka ici omikiwamiritci. Anahweriw kaie ki witcewikowok Cak kirika Jean. 30Simo osikosa mackociniripana neta e kisiswapineritci. Ka pe takocik neta Cecoc, ki arimotamowakaniwiw anihi iskwewa. 31Ki tca natawapamew. Ki otapiniskenew e pasikopitatc. Tecikotc ki matcamakaniw e kisiswapineritci. Aci anahwe iskwew ki nta atoskectawew anahweriw omantema e acamatc.

32E iti otakocinik, e ickwa pakicimoritci pisimwa, mitcet akosikana ki iciwitowakaniwiw Cecoc, kaie mitcet ka ki pitciteheckakoritci matci manitowa. 33Kaskina neta otenak ka taciketcik ki mawotcihitowok orowitimik ickwatemik neta mikiwamik. 34Mitcet neta e tacitcik ki kikehikowok Cecoca, papitoc e ki itapinetcik kaie mitcet omatci manitomiwa e ki orowiticohwakaniwiritci. Nama kaie ki otci pakitinew Cecoc anahweriw matci manitowa ka ki matceticohwakaniwiritci kitci kitoritci. Kiskerimikopan meka.

Cecoc e pa icatc Galilée askik

(Natawapata kaie Luc 4.42-44)

35Minawatc wipatc kecepawonik, kiapatc tipiskarikopan. Cecoc ki onickaw. Ki matcaw neta mikiwamik. Ki orowiw nta otenak, wiec nte ki icaw aka e ici taniwonik. Ekotca ka ici aiamihatc. 36Aci Simo kaie atita iriniwa ka ki pe witcewaspan ki matcawok e nantowapamatcik Cecoca. 37Ka ickwa miskawatcik ki itewok: “Kaskina awik ki nantowapamikw.”

38Itew Cecoc: “Matcatan. Nete kaie kotakihi otenacik pecotcik ka ici takoki ki ka icanano. Ni ka nta kakeskwan. Ekoni meka wetci ki pe icaian ota askik.”

39Minawatc kaskina e irikokwarik ki pa aicaw neta Galilée askik. Mitcet cota aiamihe mikiwamiskak ki pa kakeskwew kirika ki orowiticohwew matci manitowa.

Cecoc e kikehatc ka omikiwapineritci

(Natawapata kaie Matio 8.1-4; Luc 5.12-16)

40Cecoc ki pe natawapamiko iriniwa ka omikiwapineritci. Pe nipiskoctako e pakoserimikotc kitci witcihatc, e itikotc: “Kecpin ici nataweritamane, matci ki ka ki kikehin.”

41Ki micta kitimakerimew Cecoc. Otapiniskenew e takinatc, e tca itatc: “Nit ici naheriten. Ekoni ici kike!”

42Tecikotc matcamakaniw omikiwapinewin anahwe iriniw. Ekoni e kiketc. 43Minawatc kaketin aimihiko Cecoca, tecikotc e kiweticohikotc, 44e itikotc: “Wewerita natotaci. Akawir awik arimotamo e ki kikehitan. Aric matca natawapam makatewokorew kitci ki wapamisk. Minawatc ki ka aiamihe pakitinikan, kotc ka ki itactatc Moïse kitci totcikaterik, otcitakotc kitci kiskeritakok aci tapwe e ki kikein.”

45Ki tca matcaw anahwe iriniw, aric kaskina wiec e pa tipatcimotc aniheriw ka ki iciwepasitc. Ekoni wetci arimanikopanen otenak e wi pitaketc Cecoc. Aric nakewara nete otenak pe pa aitacikekopan nete aka e ici taniwonik. Peikon kaskina wiec ototaniwonikopan e pe natawapamakaniwitc.

Currently Selected:

Mark 1: ATMK

Highlight

Copy