Matio 28

Ka apitcipatc Cecoc

(Natawapata kaie Mark 16.1-10; Luc 24.1-12; Jean 20.1-10)

1Ka ickwa arwepi kicikarik, e iti wapanik, Mari, Magdala otenak ka otcitc, kirika anahwe kotak Mari ki pe natawapatamok Cecoca omatikowociriw. 2Kek ki micta kwekon. Peikw aceriw, Teperitcikeritci e ki pe iciticohikotc, ki pe otcirew wakwek. Opimera ki pe nta tetipinew anihi asiniwa ka ki kipahikewakaniwonik nete ickwatemik matikowocik. Ki apiw neta asinik. 3Mia e micta wasisotc e icinakosispan anahwe aceriw, acitc ki wapekahacew, mia kon. 4E apitc sekisitcik aniki cimakanicak, ki iti micta nikipariwakopan, kek pakiciniwok, mia e nipotcik e icinakosiwakopanen. 5Aci anahwe aceriw ki itew anahweriw iskwewa: “Aka sekisikw! Ni kiskeriten e nantowapamekw Cecoc, anahwe ka ki tcictaskowatakaniwitc tcipaiatikok. 6Nama ni aci taw ota. Aci ki apitcipaw, kotc ka ki itespan. Pe nta kanawapatamwakw neta ka ici micikipan. 7Matcakw, wipatc nta witamawakok aniki Cecoc owitcewakana, ‘Ki apitcipaw ni Cecoc! Nete tca ki ka nta pehikowaw Galilée askik! Ekote ni ke ici wapamekw!’ Enko ni ka wi witamatakokipan.”

8Tecikotc ki nakatamok aniheriw omatikowociriw aniki iskwewok, e sekisitcik kaie peikon e micta mireritakik. Ki mipatawok e nta witamawatcik anahweriw Cecoc owitcewakana.

9Kek keskat ki pe nta nakickakowok Cecoca, e tca arimikakotcik, “kwei” e itikotcik. Tecikotc ki nipiskoctawewok, e matcikonatcik ositirik, kirika e kicterimatcik. 10Itikowok Cecoca: “Aka sekisikw! Matcakw, nta witamawakok niwitcewakanak Galilée askik kitci icatcik. Ekote ni ke ici wapamitcik.”

Cimakanicak e tipatcimotcik tan ka ki iciwepanik

11Mekwata e pimotetcik meskanak aniki iskwewok, atita cimakanicak neta ka nanakatcitawaspan matikowociriw, ki pe kiwewok Jérusalem otenak, e nta atisokowatcik cota makatewokorewa ka tiperitamiritci kaskina ka ki iciwepanik. 12Ki mawotcihitowok aniki cota makatewokorewok ka tiperitakik kirika cota aiamihe okimawok. Ka ickwa nahitatotcik ke totakik, ki mirewok anahweriw cimakanica nipara coriariw, 13kaie e itatcik: “Ki ka itanawaw, ‘Cecoc owitcewakana ki pe icawok e mekwa tipiskarik e ki pe nta kimotitcik Cecoca owiawiriw, mekwata e nipaiakipan.’ 14Kecpin kice okimaw petakete, ni ka cakosimanan, kitci itakitc aka kitci pameritak, kaie ki ka witcihitinan aka kitci anwerimikoiekw.”

15Aniki cimakanicak ki otapinamok aniheriw coriariw ka mirakaniwitcik, ekoni kaie ka ki totakik kotc ka ki itakaniwitcik. Enko ohwe atisokan mocak ka ki itatisoketcik cota iriniwok nac anotc ohweriw e kicikarik.

Cecoc e wapamikotc owitcewakana

(Natawapata kaie Mark 16.14-18; Luc 24.36-49; Jean 20.19-23; Ka ki aitotiskeritci Cecoc otarotakana 1.6-8)

16Ka ickwa apitcipatc Cecoc, owitcewakana e mitato acitc peikw e taciritci ki icariw matinacik, nete ka ki ici iciticohwatc kitci icaritci, Galilée askik itekera. 17Kek ka wapamatcik Cecoca, ki nipiskoctawewok e kicterimatcik. Atita aric neta e tacitcik anwetamwakopan. 18Cecoc ki natcikapowictawew, e tca itatc: “Kaskina mackawisiwin#28.18 mackawisiwin: Peikon kata ki ici nisitotakon: tiperitamowin. ni ki mirikowin wakwek kaie ota askik. 19Natawapamakok kaskina iriniwok ota askik, kaskina wiec e pe otcitcik, kotc e icinakositcik. Witcihakok kitci nosanehwitcik, kaie sikahatowakok, kitci iteiekw, oticinikasowinik e Otawiwitc kaie Weokositc kaie Miro Manito. 20Kiskinohamawakok nitirinimak kitci nosanetatcik kaskina ka ki ici witamatakok kitci itotiskeiekw. Kaie otcitakotc kitci kiskeritamekw mocak ki ka witci tacikemitinawaw nac kitci ponaskiwok.”

Currently Selected:

Matio 28: ATMK

Highlight

Copy