Mark 10
10
E kiskinohamaketc Cecoc aka kitci wepinitonaniwonik
(Natawapata kaie Matio 19.1-12; Luc 16.18)
1Minawatc ki matcaw Cecoc, Judée askik itekera e icatc. Minawatc akam sipik Jourdain ka icinikaterik ki iti icaw. Ki pe mitcetiriwa kiapatc iriniwa e pe natawapamikotc neta ka ici taciketc. Ki kiskinohamawew, mitowi mocak ka ki pe totak.
2Aci pe natawapamiko atita Pharisien iriniwa, e wikokwe paciwirikotc, arotc kitci itetc, ke ki otci itactahorakaniwitc. Kokwetcimiko tca, e itikotc: “Kirano kitirakonikewinino, masinatew ia matci kitci wepinatc iriniw okoma?”
3Cecoc naskamo ka ki kokwetcimakaniwitc, meckotc kaie wir e kokwetcimatc: “Kekw irakonikewin ka ki miritakw Moïse?”
4Itewok: “Enko ohweriw Moïse otirakonikewin: matci kata ki wepinew iriniw okoma. Tepirak masinahikaniw kata ocitaw e witak e matceticohwatc anihi iskwewa, aka aci e wi wikimatc.”
5Aci itikowok Cecoca: “Moïse ki ocitaw ohweriw irakonikewiniw kirawaw otci, osam e micta mackawak kitehiwaw. 6Ickotok ka kitciparitc Kice Manito kaskina kekociciriw ka kiceritak,
‘Iriniwa kaie iskwewa ki kicerimew.’ Genèse 1.27; 5.2
Ekoni e itacterik omasinahikanik. 7Kaie itemakaniw:
‘Ekoni ke otci nakatatc onikihikowa iriniw,
kitci witci tacikematc owiwa, kitci mamweritakositcik.
8Mia peikw kata iteritakosiwok.’ Genèse 2.24
Nama aci nicw kata iteritakosiwok, aric mia peikw awik. 9Nama tca acteriw iriniw kitci tipananak aniheriw Kice Manitowa ka ki mamowinamiritci.”
10Minawatc ka ickwa pitaketcik mikiwamik, aci kokwetcimiko Cecoc owitcewakana aniheriw ka ki arimotak. 11Itew: “Kecpin iriniw e matceticohwatc okoma, e tca nipowitc kotakihi iskwewa, akohew anihi okoma. Pacikwatisiw. 12Peikon kaie wir iskwew, kecpin e wepinatc onapema, e tca nipowitc kotakihi iriniwa, kaie wir pacikwatisiw.”
Cecoc e aiamitowatatc awaca
(Natawapata kaie Matio 19.13-15; Luc 18.15-17)
13Iriniwok pe iciwirepanak awaca kitci takinikoritci Cecoca, kitci tca aiamitowatikoritci. Aric aniki Cecoc owitcewakana ki otcinehwewok anahweriw iriniwa. 14Ka wapatak Cecoc ani e totamiritci owitcewakana, nama ki otci mirowinam. Ki itew: “Pakitinakok awacak kitci pe natawapamitcik. Akawir otcinehwakok. Iriniwok meka ka asperimototawitcik mia ohki awacak, enko aniki ka ici tatakik Kice Manitowa Okimawiniw. 15Tapwe ohwe ka witamatakok: awik aka ka ici naheritak kitci pe otitikotc Kice Manitowa Okimawiniw, mitowi awacic e pe otitikotc, nama wiskat kata ki pitakew neta.”
16Minawatc ki otapinew anihi awaca. Tato neta e taciritci ki takinew, e tca aiamitowatatc.
Iriniw ka micikitatc
(Natawapata kaie Matio 19.16-30; Luc 18.18-30)
17Mia e iti matcatc Cecoc, aci pe mowinitiko peikw iriniwa, e tca nipiskoctakotc, e kokwetcimikotc: “Miro kiskinohamake iriniw, tan ke ki totaman kitci ki mirikoian kakike pimatisiwin?”
18Aci itiko Cecoca: “Kekwan wetci icinikaciin ‘miro kiskinohamake iriniw’? Nama taw awik mocak e miro totak, tepirak Kice Manito. 19Ki kiskeriten e itemakak cota aiamihe irakonikewin:
‘Akawir manoho.
Akawir pacikwatisi.
Akawir kimoti.
Akawir kiraski, awik kitci ki otci atamerimakaniwitc.
Akawir wecimi kiwitc iriniw.
Kicterimi kotawi kaie kikawi.’” Exode 20.12-16; Deutéronome 5.16-20
20Aci itew anahwe iriniw: “Kiskinohamake iriniw, esko ka pe awaciwian ni ki sapiten kaskina anihi irakonikewina.”
21Cecoca kanawapamew e sakihatc, e tca itatc: “Peikw kiapatc kekocic ki noteparin. Matca nta atawe kaskina e ici tataman. Ki ka tca mamirawok ka kitimakisitcik aniheriw coriariw irikik ke kackitain. Meckotc tca wakwek ki ka micikitan. Petcimote pe nosanehici.”
22Aric anahwe iriniw ka petak aniheriw e itakaniwitc, ki pakitcikwepariw. Ekoni e ici matcatc e micta kackeritak. Mictahi meka micikitapan.
23Aci kanawapamew Cecoc anahweriw owitcewakana e waskakapowictakotc, e tca witamawatc: “Micta arimaniw ka micikitatcik kitci ki pitaketcik Kice Manitowa Okimawinik.”
24Mamiskasitako owitcewakana ani e itetc. Aric kiapatc itew: “Ninitcanicak, mictahi ariman kitci ki pitakaniwok Kice Manito Okimawinik. 25Arimaniw micta atikw#10.25 micta atikw: Mia itemakan e emitikociwictek: un chameau. kitci ki pitaketc e iriko pokoneckarik caponikaniw. Kirawe aric kiapatc arimaniw iriniw e micikitatc kitci ki pitaketc Kice Manitowa Okimawinik.”
26Ickam kirawe mamiskasitamok aniheriw Cecoc owitcewakana. Aci kokwetcimitowok: “Awin tca ke ki akwacimakaniwitc?”
27Kanawapamikowok Cecoca, e tca itikotcik: “Iriniwok nama kackitawok kitci akwacimitisotcik. Wir aric Kice Manito kackitaw kitci akwacimiwetc. Kaskina meka kekociciriw wir kackitaw.”
28Aci itew Pien: “Natotaci! Kaskina kekocic ni ki pakiteritenan e nosanehitak.”
29Aci itiko Cecoca: “Tapwe ohwe ka witamatakok: kecpin awik nakatake omikiwam acitc otaski, kaie nakatate octesa, omisa, ocima, okawiwa, otawiwa acitc onitcanica, nin otci acitc Mirwatcimowiniw otci, 30awocamec mitato mitana tatwaw kata mirakaniwiw, anotc mekwata e pimatisitc: mikiwamiriw kaie askiriw, acitc ke octesitc, ke omisitc, ke ocimitc, ke okawitc, ke onitcanicitc acitc ke otaskitc kata mirakaniwiw, kirika nekatcitawiniw kata pe otitiko. Minawatc nanake nikanik kakike pimatisiwiniw kata pe otitiko.”
31“Aric mitcet iriniwok anotc ka nikanickatcik, kecko otananik kata pimotewok. Aniki tca anotc ka otananickatcik kata nikanickawok.”
Aci nictowaw e witak Cecoc ke iciwepasitc
(Natawapata kaie Matio 20.17-19; Luc 18.31-34)
32Aci pimotepanak nete meskanak Jérusalem otenak ka iticimonik. Nikanitepan Cecoc. Owitcewakana kaie tca ka nosanehikotcik micta sekisirikopan. Kek tipan ki iciwirew Cecoc anihi e mitato acitc niciritci owitcewakana e witamawatc aci kekatc ke iti iciwepasitc. 33Ki itew: “Natotamokw! Jérusalem otenak kit icanano. Ekote neta ke ici pakiterimakaniwitc anahwe Ka ki pe iriniwihitisotc,#10.33 Ka ki pe iriniwihitisotc: Arimomitiso ota Cecoc. kitci makonikotc anahweriw cota makatewokorewa ka tiperitamiritci acitc ka kiskinohamakeritci cota aiamihe irakonikewiniw. Kata anwerimiko kitci nipahakaniwitc, kaie kata pakiterimiko kitci makonakaniwitc, aka ka cota iriniwiritci kitci makonikotc. 34Kata papirotako. Kata iskwatiko.#10.34 Kata iskwatiko: Manawan: Kata sikowatiko. Kata pasakactehiko kirika kata nipahiko. Minawatc ickwa nicto kickokarike kata apitcipaw.”
Ka ki ici nataweritakik Cak kirika Jean
(Natawapata kaie Matio 20.20-28)
35Minawatc Cak kirika Jean, Zébédée anahweriw okosa e niciritci, pe natawapamewok Cecoca, e itatcik: “Kiskinohamake iriniw, ni nataweritenan kitci itotiskein kekocic ninan otci, ohwe ke ici nataweritamatak.”
36“Kekwan ka ici nataweritamekw kitci totaman kirawaw otci?” itikowok Cecoca.
37Aci itewok: “Nete tacikeine kokimawinik e micta icperitakok, pakitinicinan kitci ici apiak opimera ke ici apiin, peikw kinihiwinik, kotak kinamatciwinik.”
38Itikowok Cecoca: “Nama ki kiskeritenawaw anihe ka ici nataweritamekw. Tarasak minikwakanik ni ka minikwan nekaterimowin, kirika tarasak ni ka sikahatason nekaterimowinik. Kirawaw tca, ki ta kackitanawaw ia kitci otci minikweiekw nekaterimowin neta minikwakanik ke minikwewakeian? Ki ta kackitanawaw ia kitci sikahatasoiekw neta nekaterimowinik, mitowi nin ke ici sikahatasoian?”
39Itewok: “Ehe, ni ka kackitanan.”
Aci itikowok Cecoca: “Tapwe wirata ki ka minikwewakanawaw anihe minikwakan ke minikwewakeian, kirika ki ka pe otitikonawaw anihe sikahatasowin ke pe otitikoian. 40Namaiew aric ni nin ke orapamak anahwe ke apitc ninihiwinik kekotc ma ninamatciwinik. Kice Manito ni, wir ka ki orapamatc anahweriw iriniwa kirika aci ickwa nisawitawew neta ke ici apiritci.”
41Ka petaketcik aniki kotakihik Cecoc owitcewakana aniheriw ka ki ici nataweritamiritci Cak kaie Jean, ki kiciwasiwok. 42Aci kaskina wicamew Cecoc owitcewakana e tca witamawatc: “Ki kiskeritenawaw ohwe e icinakok: tawok okimawok ota askik e tiperimatcik iriniwa, mocak e witamawatcik ke aitotiskeritci. Ka kicteritakositcik natawerimewok kaskina awiriw kitci kiskeritamiritci e apitc mackawisiritci. 43Nama aric nte icinakon kirawaw otci. Kecpin aric peikw neta e taciekw nataweritake tapwe kitci kicteritakositc, acteriw kitci atoskectatakw, mia arotakan kitci iteritakositc. 44Kaie kecpin peikw neta e taciekw wi nikanickate, acteriw kitci arotakaniwitc, kaskina awiriw kitci atoskectawatc. 45Nama meka ki otci pe icaw anahwe Ka ki pe iriniwihitisotc#10.45 Ka ki pe iriniwihitisotc: Arimomitiso ota Cecoc. kitci atoskectawakaniwitc, aric ma kitci atoskectaketc kirika kitci pakitinak opimatisiwin, micta mitcet iriniwok kitci wikotcihakaniwitcik.”
Cecoc e kikehatc Bartimée aka ka wapiritci
(Natawapata kaie Matio 20.29-34; Luc 18.35-43)
46Aci Jéricho otenak ki takociniwok Cecoc kirika owitcewakana. Minawatc neta ki otci matcawok, mitcet iriniwa e nosanehikotcik. Tapan neta iriniw aka e wapitc. Bartimée icinikasopan, Timée anihi okosa. Anahwe Bartimée tcikiskanak taci apipan e natotamaketc. 47Kek petakew: “Cecoc, Nazareth ka otcitc, takociniw.”
Ki tepwew: “Cecoc, Okimaw Tapit Okosa,#10.47 Tapit Okosa: Wi itemakanotake: otaniskotape osima. kitimakerimici!”
48Mitcet iriniwa kitotiko e itikotc aka awocamec kitci kitotc. Aric kirawe kiapatc kaketin tepwew, e itetc: “Okimaw Tapit Okosa, kitimakerimici!”
49Nokikapowiw Cecoc, e itetc: “Wicamakw.”
Aci natcipahewok anihi aka ka wapiritci, e itatcik: “Sokitehe. Pasiko. Ki wicamikowin.”
50Aci motcik iciwepinam okapotowan anahwe Bartimée e pasikopatatc e natcikapowictawatc Cecoca. 51Aci itiko: “Kekwan ka ici nataweritaman kitci totaman kir otci?”
“Teperitcikein, itotiske kitci koski wapian.”
52Itew Cecoc: “Matca. Tapwe kit asperimototawin, ekoni wetci ki kikein.”
Tecikotc ki iti wapiw. Ki iti witcewew Cecoca ka iti matcaritci meskanak.
Currently Selected:
Mark 10: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
