Mark 9

1“Tapwe ohwe ka witamatakok: atita ota ka taciketcik nama kata nipowok epwamoci wapatakawe Kice Manitowa Okimawiniw e takociparinik e micta mackawisimakanik.”

E wapatahetc Cecoc oticperitakosiwin

(Natawapata kaie Matio 17.1-13; Luc 9.28-36)

2Ka ickwa nikotwaso kickokarik, ki matcewirew nicto owitcewakana Cecoc: Pien, Cak acitc Jean, nte e ici icpatinarik e iciwiratc. Wirancikewaw nete e taciketcik. Mekwata e kanawapamikotc, pitoc iti icinakosiw Cecoc. 3Iti micta wapariw owikasim, mia kon. E apitc wasiterik, nama awik ota askik kata kackitapan ani kitci ki asitci wapekahak wikasiriw. 4Kek wapamewok nicw iriniwa, Élie kirika Moïse ka icinikasoritci,#9.4 Élie kirika Moïse: Weckatc ki pimatisiwakopan e nikan tipatcimowakopanen Kice Manito otci. e taci aimihitotcik kirika Cecoca. 5Pien itew Cecoca: “Kiskinohamake iriniw, mirwacin e tacikeikw ota. Nicto rakasimonikiwama ni ka orekahenan: peikw kir, peikw Moïse, acitc peikw Élie otci!”

6Ekoni ka itetc Pien, aric nama tapwe kiskeritamokopan aniheriw ka itetc. Sekisipanak meka kaskina e tacitcik. 7Aci iti nokon e petoskowok, nac kaskina aka e nokositcik e rikockakotcik oskoriw. Kek petakon e otci arimwaniwok nta oskok, e itwaniwok: “Enko ohwa Nikosis ka micta sakihak. Natotawakw!”

8Aci itapiwok aniki Cecoc owitcewakana. Wapatamok aka aci e nokosiritci anahweriw Éliwa kirika Moïsa, aci tca neta e peikokapowiritci Cecoca.

9Minawatc e iti nitcitciwetcik Cecoc kirika owitcewakana, aci itew: “Aka awik atisokowakw anihe ka ki ici wapatamekw, patoc ickwa apitcipate anahwe Ka ki pe iriniwihitisotc.”#9.9 Ka ki pe iriniwihitisotc: Arimomitiso ota Cecoc.

10Nama tca ki otci pamatisokewok, aric kokwetcimitowakopan: “Tan wa itemakanik aniheriw ka itetc, kitci apitcipaniwonik?”

11Minawatc kokwetcimewok Cecoca: “Kekwariw wetci itetcik ka kiskinohamaketcik cota aiamihe irakonikewiniw wirctam anihi Éliwa kitci pe icaritci?”

12-13Itikowok Cecoca: “Tapwe wirata wirctam kata pe icaw Élie kitci pe nta wecitatc kaskina ka matciparinik, mia ocki kitci iteritakonik. Aric nin ki witamatinawaw: aci ickwa takociniw anahwe Élie. Ki aitotawewok iriniwok ka ki aiteritakik, kotc e itacterik Kice Manito Omasinahikanik. Ekoni peikon ke ici nekatcitatc anahwe Ka ki pe iriniwihitisotc, kirika kata wepakonakaniwiw, kotc ka masinaterik Kice Manito Omasinahikanik.”

Cecoc e kikehatc awaca, matci manitoriw e ki pitciteheckakoritci

(Natawapata kaie Matio 17.14-21; Luc 9.37-43a)

14Tekocikik nete ka ici tacikeritci anihi kotakihi owitcewakana Cecoc, wapatamok e micta mitcetinaniwonik waska e ici tacikeritci. Tawok kaie atita iriniwok ka kiskinohamaketcik cota aiamihe irakonikewiniw, e taci aiamihitotcik kirika Cecoc owitcewakana. 15Kotc e wapamatcik Cecoca, micta kockopariwok. Mowinitewok e wi arimikowatcik. 16Aci Cecoc kokwetcimew owitcewakana: “Kekwan ka arimotamekw kirika aniki kiskinohamake iriniwok?”

17Peikw neta otci arimwew iriniw taci e micta mitcetinaniwonik: “Kiskinohamake iriniw, ki ki pe iciwitatin nikosis kitci witcihatc, osam e ki pitciteheckakotc matci manitowa. Nama tca ki arimwew. 18Tatwaw e macikakotc anihi matci manitowa, wepicimiko motcik e micta pictewotamotc. Kakiceapitecin acitc e micta tcitowaskositc, kaskina e itikititc. Ni ki tca nataweritamawawok kiwitcewakanak kitci orowiticohwatcik anihi matci manitowa, nama aric ki otci kackihewok.”

19Aci itikowok Cecoca: “Wesa kirawaw, aka ka asperimototawiekw! Tan irikik ke actek kitci witci tacikemitakok? Tan kaie irikik ke actek kitci witcihitakok? Pecowakw anahwe awacic.”

20Ekoni e ici iciwitowakaniwitc Cecoc anihi awaca. Anahwe matci manito, kotc e wapamatc Cecoca, ki micta aiatciparihew anihi awaca. Ekoni e ici pakiciniritci motcik e kwekwetipiparihoritci. Micta pictewotamoriw. 21Aci kokwetcimew Cecoc anihi awaca otatamiriw: “Tan apitc esko aniheriw icinakositc?”

Itew anahwe iriniw: “Kotc ka pe awaciwitc. 22Mitcetwaw ki kokwetcihiko e wi nipahikotc anihi matci manitowa, e matcicte wepinikotc kekotc e pakope wepinikotc. Kitimakerimicinan kirika witcihicinan, keckitawonen.”

23Itew Cecoc. “Kit icin, ‘Keckitawonen.’ Kaskina meka kekociciriw kackitaw anahwe ka tapwerimatc Kice Manitowa.”

24Kek tepwew anahwe iriniw, e tca itetc: “Ki tapwerimitin ni. Witcihici aric, nit arimisin meka kitci tipi tapweritaman!”

25Cecoc wapamew iriniwa e mitcetiritci e pe nta mipataritci. Ekoni e ici iti tepwatatc anihi matci manitowa e itatc: “Kir matci manito ka totaman kitci kipitaniwok kirika aka kitci arimwaniwok. Kit ititin kitci orowiin neta awacik. Akawir minawatc wiskat pitake neta!”

26Ekoni ka ici micta nanotakositc anahwe matci manito. Kaketin aiatciparihew anihi awaca, e tca orowitc. Anahwe ockinikicic, mia e nipotc icinakosiw. Kaskina awik itew: “Nipo ni anahwe!” 27Aric ki otapiniskenew Cecoc anihi awaca e tca witcihatc e pasikoritci.

28Ka ickwa pitaketcik mikiwamik Cecoc kirika owitcewakana, wircikewaw ka taciketcik, ki kokwetcimiko anahweriw owitcewakana: “Kekwan aka wetci ki orowiticohwakitc anahwe matci manito?”

29Itikowok Cecoca: “Tepirak pakoserimowin apatan kitci ki orowiticohwakaniwitc anahwe towi matci manito.”

Kiapatc e nikan witak Cecoc ke iciwepasitc

(Natawapata kaie Matio 17.22-23; Luc 9.43b-45)

30Minawatc Cecoc kirika owitcewakana ki matcawok neta. Ki capotoweckamok Galilée askiriw. Nama mireritamokopan Cecoc kitci kiskerimakaniwitcik tante e ici taciketcik, 31osam meka anahweriw owitcewakana wi kiskinohamawepan. Ki itew: “Anahwe Ka ki pe iriniwihitisotc#9.31 Ka ki pe iriniwihitisotc: Arimomitiso ota Cecoc. kata pakiterimakaniwiw kitci makonikotc iriniwa. Kata nipahiko. Minawatc ickwa nicto kickokarike kata apitcipaw.”

32Nama aric ki otci nisitotamok aniheriw wa iteritci Cecoca, kaie ki kokwarisikeritamok kitci kokwetcimatcik.

Awin ka mawotci kicteritakositc?

(Natawapata kaie Matio 18.1-5; Luc 9.46-48)

33Aci Capernaüm otenak ki takociniwok. Ki pitakewok mikiwamik. Aci Cecoc kokwetcimew anahweriw owitcewakana: “Kekwan ni ka ki aiarimotamoiekw mekwata ka pe pimoteikw?” 34Nama aric kitowok, e ki aimihitotcik, aniheriw e arimotakik awin neta e tacitcik ka mawotci kicteritakositc. 35Ki apiw Cecoc. Wicamew anihi owitcewakana e mitato acitc niciritci kitci pe natotakotc, e itatc: “Kecpin awik iteritake kitci nikanickatc, mia awik e otananickatc kata totam. Kata tca atoskectawew kaskina owitc iriniwa.”

36Aci peikw awaca natcipahew e nanipowihatc tetawitc e ici tacikeritci owitcewakana. Takonew anihi awaca, e itatc iriniwa: 37“Anahwe ka kicterimatc awaca mitowiriw ohweriw awaca ka witcikapowictawiritci, e kicterimatc anihi nin otci, nin tipirawe ni kicterimikw. Kaie anahwe ka kicterimitc, nama ni nin tepirak ni kicterimikw. Kicterimew kaie anihi ka ki pe iciticohwitc.”

Awik aka e wi cakotcihitokw, ki witcewikono ni

(Natawapata kaie Luc 9.49-50)

38Jean itew Cecoca: “Kiskinohamake iriniw, ni ki wapamanan iriniw e orowiticohwatc matci manitowa irinik, kiticinikasowiniw e apatcitatc. Ni ki kokwetcitanan kitci otcinehwakitc aka nte kitci totak, osam aka e witcewisk, mitowi ninan e witcewitak.”

39Aci itiko Cecoca: “Akawir otcinehwakw. Nama meka awik kackitaw kitci mata kackitatc niticinikasowiniw e apatcitatc, minawatc tca kitci marerimitc. 40Kecpin meka awik aka e wi cakotcihitokw, ki witcewikono ni. 41Tapwe kaie ohwe ka witamatakok: kaskina awik ke minihitakw nipiriw, osam e okimamiekw Krist, kata pe otitiko aniheriw ka ki ici kackitamatisotc.”

E apitc maratak e pactatinaniwok

(Natawapata kaie Matio 18.6-9; Luc 17.1-2)

42“Kecpin awik e cikimatc peikw nta e taciritci ka apiciciritci ka tapwerimiritci kitci pactatiritci, kirawe kata miroparinipan wir otci, anahwe ka ki cikimiwetc, kitci takopitakaniwiritci okwak asiniwa mia e irikwapiskisiritci, e pakopepinakaniwitc kitcikamik.”

43“Kecpin kitcitci e pactatiwakein, kickitcitcehotiso. Kirawe kata miroparinopan kir otci kitci pitakein tapwe pimatisiwinik tepirak e peikocik kitcitci, patok kitci kanaweritaman e niciki, atamaskamikok kitci icain, nete ickote aka wiskat e actawek. [ 44Nte, ‘mantcocak ka mitcikik ko wiawiriw nama wiskat nipowok, kaie anihe ickote nama wiskat actawew.’]”#9.44,46 Nama takon ohwe mitcet weckatc masinahikanik.

45“Kecpin kisit e pactatiwakein, kickisitehotiso. Kirawe kata miroparinopan kir otci kitci pitakein tapwe pimatisiwinik tepirak e peikocik kisit, patok e niciki kitci kanaweritaman, atamaskamikok tca kitci iciwepinikoin. [ 46Nte, ‘mantcocak ka mitcikik ko wiawiriw nama wiskat nipowok, kaie anihe ickote nama wiskat actawew.’]”

47“Kaie kecpin kickicikw e pactatiwakein, manipata. Kirawe kata miroparinopan kir otci kitci pitakein Kice Manito Okimawinik tepirak e peikocik kickicikw, patok e niciki kitci kanaweritaman, kitci tca iciwepinikoin atamaskamikok. 48Itemakan meka: Nte,

‘mantcocak ka mitcikik ko wiawiriw nama wiskat nipowok,

kaie anihe ickote nama wiskat actawew.’ ” Ésaïe 66.24

49“Tapwe wirata, tato neta e taciikw kata mirakaniwiw nekatcitawiniw#9.49 nekatcitawiniw: Mia itemakan: ickoteriw kitci ki otci sokikapowitc, mitowi ciwotakan e apatcitakaniwok kitci ki mirospokok mitcim.”

50“Mirwapatan ciwotakan. Kecpin aric aka awocamec nisitospokoke ciwotakan, tan ke ki totcikatek kitci koski ciwak? Tarasak peikon mia ciwotakan ka mirwapatak ki ta miro irapatisinawaw, kaie pekatc ki ta pimatisinawaw kitci miroparihitoekw kirika kiwitc iriniwawok.”

Currently Selected:

Mark 9: ATMK

Highlight

Copy