Jean 9

Cecoc e kikehatc iriniwa aka wiskat ka ki otci wapiritci

1E pimotetc meskanak, aci Cecoc wapamew iriniwa aka ka wapiritci esko ka nitawikiritci. 2Kokwetcimiko owitcewakana: “Kiskinohamake iriniw, kekwariw aka wetci ki otci wapitc anahwe iriniw ka nitawikitc? Osam ia ni wir e ki pactatitc kekotc ma onikihikwa e ki pactatiritci?”

3Cecoc itew: “Nama osam e ki pactatitc, nama kaie osam onikihikwa e ki pactatiritci wetci icinakositc. Nama wapiw tepirak kitci ki wapatcikaterik tan e ici otamiroritci Kice Manitowa opimatisiwinik. 4E mekwa kicikak e icinakok, actew kitci itotiskeikw aniheriw otamirowin anahwe ka ki pe iciticohwitc. Aci kekatc iti tipiskaw. Nama tca awik kata ki otamiro. 5Mekwata e tacikeian ota askik, ni wactenamowawok iriniwok.”

6Ka ickwa itetc aniheriw Cecoc, ki isko askik. Ki ocitaw memantcic acickiriw, osikowinapo e totak. Ki ciconamawew ockicikorik anihi aka ka wapiritci, aniheriw acickiriw e totak. 7Kirika ki itew: “Matca nta kisikweho nete nipik, kapacimo orakanik Siloé!” —Wi itwaniwon anihe “Iciticohwakaniwiw.”—

Anahwe iriniw aka ka wapitc ki icaw. Ki kisikweho. Minawatc e pe kiwetc, aci wapiw!

8Aniki owitci tacikemakana kaie aniki ka ki wapamawaspan e natotamakerispana kokwetcikemowok, e itetcik: “Enko ia ni anahwe iriniw ka taci ko apispan e natotamaketc?”

9Atita itewakopan: “Enko na.”

Kotakihik tca itewakopan: “Namaiew na. Ekoni aric kekatc e icinakositc.”

Aric wir anahwe iriniw ki itew: “Nin ni!”

10Ki kokwetcimewok: “Tan ka ki isparik kickicikw kitci ki wapiin?”

11Ki itew: “Anahwe iriniw Cecoc ka icinikatakaniwitc ki ocitaw memantcic acickiriw. Ki ciconam tca nickicikok kirika ni ki itikw: ‘Ica nete Siloé kitci nta kisikwehoin.’ Ni ki tca ican. Ka ickwa tca kisikwehoan, ekoni ka iti wapian!”

12Ki kokwetcimewok: “Tante tca anahwe iriniw?”

“Nama ni kiskeriten,” itew.

Pharisien iriniwok e kokwetcimatcik anihi ka ki kikehakaniwiritci

13Minawatc ki pe iciwitowakaniwiwok Pharisien iriniwok anihi iriniwa aka wiskat ka ki otci wapiritci. 14Mekwata arwepi kicikarikopan Cecoc ka ocitaspan acickiriw kirika ka kikehaspan anihi iriniwa. 15Ekoni wetci kaie wirawaw Pharisien iriniwok ki kokwetcimatcik anihi iriniwa tan ka isparinik wetci aci wapatamiritci. Ki itikowok: “Ki actaw memantcic acickiriw nickicikok, ni ki kisikwehon, ni wapin tca aci anotc.”

16Atita neta e tacitcik aniki Pharisien iriniwok itewok: “Anahwe ka ki totak, namaieriw Kice Manitowa ka ki pe iciticohikotc. Nama meka nosanetaw aniheriw cota aiamihe irakonikewiniw ka itemakanik aka kitci otamironaniwonik mekwata e arwepi kicikarik.”

Aric kotakihik itewakopan: “Awik ka pactati iriniwitc nama kata kackitapan kitci ici mata kackitatc!”

Aci nta papikaninitowakopan aniki iriniwok, papitoc e ici wapatakik.

17Aci aniki Pharisien iriniwok kiapatc kokwetcimewok iriniwa aka ka wapiritci ka ki kikehakaniwiritci: “Kir tca, tan e iterimatc anahwe ka ki kikehisk kickicikok?”

“Ka nikan tipatcimotc ni anahwe,” ki itew.

18Aric aniki cota okimawok nama wi tapwetamwakopan aka wiskat e ki otci wapiritci anihi iriniwa, aci tca anotc e wapiritci. Ki tca wicamewok onikihikoriw, 19e wi kokwetcimatcik. Ki kokwetcimewok, e itatcik: “Enko ia tapwe anahwe kikosiwaw? Tapwe ia tca, nama ki otci wapiw ka nitawikitc? Tan tca ka ki isparinik wetci aci wapitc?”

20Aniki onikihikoriw iteriwa: “Ni kiskeritenan enko anahwe nikosinan, kaie aka e wapispan ka nitawikitc. 21Nama aric ni kiskeritenan tan ka isparitc kitci ki aci wapitc. Nama kaie ni kiskerimimanan awiriw ka ki kikehikotc ockicikok. Kokwetcimakw wir tipirawe. Tipi asitatisiw kitci witamatakw!”

22Ki itewakopan aniheriw, osam e koctawakopanen anahweriw cota okimawa. Aci meka aniki cota okimawok ki oreritamwakopan kitci matceticohwakaniwiritci nete cota aiamihe mikiwamik kaskina anihi ka iterimaritci Cecoca, anihi ka ki itespan Kice Manito kitci pe iciticohwatc ota askik kitci akwacimiweritci. 23Eko tca ni wetci iteritci anihi onikihikwa anahwe aka ka wapitc: “Tipi asitatisiw kitci witamatakw. Wir tipirawe kokwetcimakw!”

24Minawatc aniki Pharisien iriniwok kiapatc ki wicamewok anihi iriniwa aka ka ki otci wapirispana, e itatcik: “Nespi tapwe, Kice Manito otci. Ni kiskeritenan meka e pactati iriniwitc anahwe iriniw Cecoc.”

25Ki itew: “Nama ni kiskeriten nin kecpin pactatikwen kekotc ma nama. Aric peikw kekocic ni kiskeriten: nama ni wapitai, aci tca anotc ni wapin!”

26Kiapatc kokwetcimewok: “Tan ka totask? Kekwariw ka ki totak kitci ki kikehisk kickicikok?”

27“Aci kit ickwa witamatinawaw,” itew. “Nama aric ki ki otci natotawinawaw. Kekwan tca wetci kiapatc wi petamekw anihe kitci iteian? Pot kaie kirawaw ki wi nosanehwawatake?”

28Aci marerimewok, e itatcik: “Kir tca ki nosanehwaw anahwe iriniw. Ninan tca, Moïse ni nosanehwanan. 29Ni kiskeritenan meka Kice Manito e ki aimihatc Moïsa. Aric anahwe iriniw Cecoc, nama wawatc ni kiskerimanan tante wetcitc!”

30Itikowok anihi iriniwa: “Enko ohwe ka mamiskateritakok: nama ki kiskeritenawaw tante wetcitc anahwe iriniw, aric ki kiketaw nickicikoriw! 31Ki kiskeritenano meka Kice Manito aka e natotawatc ka pactatiritci, aric e natotawatc kaskina ka kicterimikotc kaie ka sapitamiritci e ici nataweritak. 32Nama wiskat ki ki otci petakanano awik kitci kikehatc iriniwa aka e ki otci wapiritci ka nitawikiritci. 33Kecpin anahwe iriniw aka Kice Manitowa e ki otci iciticohikotc, nama kekociciriw kata ki kackitapan kitci itotisketc!”

34Ki itewok: “Tekaci kir pactatowinik ki tacikan esko ka nitawikiin. Aci ia ki wi kiskinohamawinan?”

Minawatc ki iti matceticohwewok neta cota aiamihe mikiwamik.

Aka e wapinaniwok otcitcakocinak itekera

35Aci Cecoc ki petakew e ki matceticohwakaniwiritci anihi iriniwa. Ki natawapamew, e kokwetcimatc: “Ki tapwerimaw ia anahwe Ka ki pe iriniwihitisotc?”

36Ki itew anahwe iriniw: “Okimaw, pe witamaci, awin na, kitci ki tapwerimak.”

37Itiko Cecoca: “Aci ki ki wapamaw! Enko ohwa anotc ka taci aimihisk.”

38“Ki tapwetatin, Teperitcikein!” itew Cecoca anahwe iriniw, e iti nipiskoctawatc.

39Aci itew Cecoc: “Ni ki pe ican ota askik kitci ki takok tipaskonikewin, kitci ki tca kikehakaniwitcik iriniwok aka ka wapitcik, acitc aka awocamec kitci wapitcik aniki anotc ka wapitcik.”#9.39 aniki anotc ka wapitcik: Pot wi itetake: …kitci wapatahakik aniki ka iterimitisotcik, ‘ni micta miro wapaten,’ aka tapwe e wapatakik.

40Atita Pharisien iriniwok neta kaie wirawaw ka tacikewakopanen ki petamok aniheriw ka iteritci Cecoca. Ekoni e ici kokwetcimatcik, e itatcik: “Ninan tca, ki wi itwan ia, kaie ninan nama ni wapinan?”

41Itikowok Cecoca: “Kecpin aka tapwe ki wapiekw, nama ki ta anweritakosinawaw. Aric osam e iteiekw, ‘Ni wapatenan,’ kiapatc kit anweritakosinawaw.”#9.41 Pot wi itetake: Kecpin aka tapwe ki otci kiskeritamekopan e ici nataweritak Kice Manito, nama ki ta anweritakosinawaw, misawatc e ki pactatiekw. Aric ki kiskeritenawaw e ici nataweritak Kice Manito, nama peikon ki sapitowawaw.

Currently Selected:

Jean 9: ATMK

Highlight

Copy