Jean 10
10
Atisokanicic: Maritcenici iriniw kirika omaritcenicima
1Cecoc ki itew: “Ohwe ka witamatakok, tapwe ni icinakon: anahwe aka ka otci pitaketc ickwatemik nete ka ici kanawerimakaniwiritci maritcenica, ka pacitaskotc miniskanatikok, kimoti iriniwiw kaie iteritakosiw mia awik ka macihiwetc e kimotitc. 2Aric anahwe ka otci pitaketc ickwatemik, enko ni maritcenici iriniw, anahwe ka nanakatcihatc maritcenica. 3Cenamowakaniwiw aniheriw ickwatemiriw, iriniwa ka nanakatcitaritci ickwatemiriw e cenamakotc. Natotako anahweriw maritcenica e ititakositc. Papeikw e icinikasoritci wicamew, minawatc orowitirew. 4E ickwa orowitiratc kaskina omaritcenicima, nikanickawew. Kaskina nosanehiko, osam e kiskerimikotc e ititakositc. 5Aniki maritcenicak nama wiskat kata nosanehwewok awiriw aka ka kiskerimatcik. Pitoc kata totamok. Kata ocimowok, osam aka e kiskerimatcik e ititakosiritci.”
6Ekoni ka ici atisokowaspan Cecoc anahweriw Pharisien iriniwa. Nama aric ki otci nisitotamiriwa wa itemakanik aniheriw otatisokanicic.
Cecoc, Miro Maritcenici Iriniw
7Kiapatc itew Cecoc: “Ohwe ka witamatakok, tapwe ni icinakon: nin nit iteritakosin mia ickwatem miniskanatikok ka ici takok, neta ka ici kanawerimakaniwitcik maritcenicak. 8Epwamoci nin ki pe icaian, iriniwok ki pe icawok. Aric kaskina kaie iteritakosipanak mia kimoti iriniwok ka macihiwetcik. Nama aric ki otci natotakowok. 9Tarasak mia ickwatem nit iteritakosin. Anahwe ka pitaketc, nin e cenamowak, kata wikotcihakaniwiw. Kata pakitinakaniwiw matci kitci pitaketc kaie kitci orowitc. Kata miskam ke mitcik. 10Kimoti iriniw, wetci pe icatc, tepirak kitci kimotitc, kitci nipatasotc kaie kitci pikotasotc. Nin ni ki pe ican ota askik, kitci ki takonik iriniwok pimatisiwiniw, kitci mockineckakotcik, e micta mirwacinik.”
11“Nin anahwe maritcenici iriniw ka miro nanakatcihatc omaritcenicima e iteritakosian. Miro maritcenici iriniw matci pakiteritam opimatisiwin omaritcenicima otci. 12Kecpin iriniw e akacehakaniwitc kitci witcihiwetc e nanakatcihakaniwiritci maritcenica, pitoc kata ici mihew anahweriw maritcenica kaie anahwe tapwe maritcenici iriniw. Namaiew ni wir tipirawe omaritcenicima anahwe ka akacehakaniwitc. Kotc wapamate mahikana e petcimoteritci, ekoni ke ici nakatatc anahweriw maritcenica kitci ocimotc. Anahwe tca mahikan kata kwackotitawew anahweriw maritcenica. Aci kata orackapahitoriwa. 13Ekoni e itotisketc arotakan, tepirak e kanawapatak kitci coriaketc, aka tapwe e pamerimatc maritcenica.”
14“Nin anahwe miro maritcenici iriniw e iteritakosian. Ni miro kiskerimawok nimaritcenicimak, kaie ni miro kiskerimikok. 15Mia Notawi e ici miro kiskerimitc, ekoni kaie nin e ici kiskerimak. Kaie ni pakitinen nipimatisiwin nimaritcenicimak otci. 16Tawok kotakihik nimaritcenicimak aka moci e kanawerimakaniwitcik pitakamik ohweriw miniskanatikok. Actew kaie wirawaw kitci pe iciwirakik. Ni ka natotakok e aimihakik, kirika kaskina tapickotc kata nanakatcihakaniwiwok, tepirak e peikociritci maritcenici iriniwa ka kanawerimikotcik.”
17“Ni sakihikw Notawi, osam e pakitinaman nipimatisiwin, matci minawatc kitci ki pe otitikowak. 18Nama awik ni ka ki maninamakw nipimatisiwiniw, patoc nin tipirawe e ici naheritaman kitci pakitinaman. Ni ki mirikowin tiperitamowin kitci pakitinaman nipimatisiwin, matci peikon kiapatc kitci pe otitikoian. Ekoni meka ka ki ici miritc Notawi kitci itotiskewak.”
19Aci kiapatc cota iriniwok papikaninitowakopan aniheriw otci ka ki pe aiteritci Cecoca. 20Mitcet nta e tacitcik itewakopan: “Matci manitowa ki pitciteheckakotake! Kiwockwatisiw! Kekwan wetci natotawekw?”
21Kotakihik aric itewakopan: “Iriniw e pitciteheckakotc matci manitowa nama nte kata itepan aniheriw ka aitetc. Kata kackitapan ia matci manito kitci miratc iriniwa aka ka wapiritci minawatc kitci wapiritci?”
E wepakonakaniwitc Cecoc
22Minawatc ki otcitciparin neta Jérusalem otenak kitci makocaniwok kitci aiamihe mikiwam e tipickamomakak. Mekwata piponokopan. 23Cecoc pa pimotepan neta ka nimitewotakarik, weckatc ka ki ocitakaniwonikopanen Salomon otci, nte e ici acterik kitci aiamihe mikiwamik. 24Cota okimawok ki mawotcihitowok neta e ici nanipowiritci Cecoca e waskakapowictawatcik, e itatcik: “Tan irikik e actek kitci pehoak, aka tca moci kitci witamawiak kekocic? Kecpin tapwe kir anihi ka ki itespan Kice Manito kitci pe iciticohwatc ota askik kitci akwacimiweritci, wewerita witamacinan.”
25Aci naskamawew Cecoc, e itatc: “Aci kit ickwa witamatinawaw, nama aric ki tapwetowinawaw. Ki ta kiskeritenawaw tepirak e wapatamekw e aitotaman Notawi oticinikasowinik. 26Nama aric ki tapwetowinawaw. Nama meka kit iteritakosinawaw nimaritcenicimak. 27Nimaritcenicimak ni miro natotakok tan e itewak. Ni kiskerimawok, kaie ni nosanehikok. 28Kakike pimatisiwiniw ni mirawok. Nama tca wiskat kata oniciniwok. Nama awik ni ka ki pe maninamakw nitcitcik e takonimaki. 29Anahweriw ka ki pe miritc Notawi, kirawe kicteritakosiriwa patok kaskina kotakihi awiriwa. Nama kata ki maskamakaniwiw Notawi awiriw e takonatc. 30Notawi kirika nin, e niciak mia peikw e asiteritakosiak.”
31Minawatc kiapatc ki iti mawotcihewok asiniwa aniki cota okimawok, e wi mosinihatcik Cecoca. 32Ki tca itikowok: “Ki ki miritinawaw kitci wapatamekw mitcet kekwan ka mataweritakok, Notawi e ki miritc kitci totamwak. Tan ohwe mia neta ka ki totaman wetci wi nipahiekw, asiniik e wi mosinihiekw?”
33Itewok aniki cota okimawok: “Nama osam e ki totaman ka mirwacik wetci wi nipahitak. Osam ni e wi papirotowotc Kice Manito. Tepirak kit iriniwin, aric ki kice manitowikason!”
34Itew Cecoc: “Masinatew neta kit aiamihe irakonikewiniwak, aci weckatc e ki itetc Kice Manito:
‘Kaskina ki manitowinawaw.’ Psaumes 82.6
35Ki kiskeritenano, nama kata ki note pakiticowatcikateriw Kice Manito Omasinahikan e itasinaterik. Kice Manito ki icinikatew ‘manitowok’ anahweriw iriniwa ka ki miratc otitewin. 36Nin ni ki orapamikw Notawi kirika ni ki pe iciticohokw ota askik. Kekwan tca wetci iteiekw, ni papirotowaw Kice Manito e ki iteian, ‘nin Kice Manito Okosa’? 37Kecpin aka e totamwak Notawi ka ki ici miritc kitci itotiskewak, nama ki ta tapwetowinawaw. 38Misawatc aric e totamwak Notawi otamirowin, peikon nama ki tapwetowinawaw. Kirike aric ki ta tapwetenawaw anihe ka aitotiskeian, kitci ki capo kiskeritamekw tapwe e witci tacikemitc Notawi nitehik, acitc nin e witci tacikemak otehik.”
39Minawatc kiapatc natowi totamwakopan aniki cota iriniwok kitci ki otci makonakaniwiritci anihi Cecoca, aric kiapatc ki kitickapihikowok.
40Kiapatc Cecoc ki matcaw, akam sipik Jourdain e icatc. Ekota neta mia nictam ka sikahatakekopanen anahwe Capatis. Ekota kaie neta ka ici taciketc Cecoc. 41Mitcet iriniwa ki pe natawapamiko, e aiteritci: “Capatis nama ki otci totam kekociciriw e mataweritakonik, aric kaskina ka ki aitetc, ka arimomatc Cecoca, tapwe icinakoniw.”
42Ekota neta mitcet ka otci tapwerimatcik Cecoca.
Currently Selected:
Jean 10: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
