Jean 8
8
1Aric Cecoc ki icaw nete matinacik Mont des Oliviers ka icinikaterik. 2Wipatc e kicepawocinik kiapatc minawatc nete ki icaw kitci aiamihe mikiwamik. Kaskina iriniwa ki pe natawapamiko. Ki apiw e kiskinohamaketc. 3Aci iriniwok ka kiskinohamaketcik cota aiamihe irakonikewiniw kirika Pharisien iriniwok ki pe iciwirewok peikw iskwewa neta Cecoca ka ici kiskinohamakeritci. Ki keskopitakaniwirikopan anihi iskwewa mekwata e pacikwatisiritci. Nikanik iciwirewok neta e ici mitcetinaniwonik, 4e tca itatcik Cecoca: “Kiskinohamake iriniw, ohwe iskwew ki keskopitakaniwiw mekwata e pacikwatisitc. 5Weckatc Moïse ki itew otirakonikewinik kitci pe mosinihakaniwiritci kitci nipahakaniwiritci kaskina anihi towiriw iskwewa ka pacikwatisiritci.#8.5 Itemakan neta Lévitique 20.10 acitc Deutéronome 22.22-24: Kecpin e keskopitakaniwitc iriniw mekwata e wipematc iskwewa kotakihi iriniwa e nipowiritci, e nicitcik kata nipahakaniwiwok, anahwe iriniw, kaie wir anahwe iskwew. Kir tca, tan e itein?”
6Wetci itetcik, wikokwe paciwirewakopan Cecoca arotc kitci iteritci, ke ki otci itactahoratcik.#8.6 Ki itemakan meka neta cota aiamihe irakonikewinik, e niciritci, anihi iriniwa matci kaie anihi iskwewa, kitci nipahakaniwiritci e pacikwatisiritci. Aric ki itemakan Romain irakonikewinik, aka kitci nipahakaniwitc awik e pacikwatisitc. Tepirak ki cinicikiw Cecoc e masinahiketc rekak, otitohikan otcitci e totak. 7Kiapatc kokwetcimewok Cecoca. Aci pasiko, e tca itatc: “Neta e taciekw anahwe aka wiskat ka ki otci pactatitc, enko anahwe wirctam ke mosinihatc.”
8Kiapatc cinicikiw Cecoc e masinahiketc rekak. 9Ka ickwa petakik aniheriw ka ki iteritci Cecoca, papeikw ki matcawok. Wirctamiwaw kice iriniwok ki matcawok, minawatc kotakihik. Nac wircike tacikew Cecoc, kirika anihi iskwewa kiapatc e witcikapowictakotc. 10Aci pasiko e tca kokwetcimatc: “Tante aniki ka ki itactahoriskik? Nama ia awik ki ki otci atamerimikw?”
11“Nama awik, Okimaw,” itew anahwe iskwew.
Aci itew Cecoc: “Nama kaie nin kit atamerimitin. Ekoni ici matca, akawir aric minawatc pactati.”]#8.11 Nama takon ohwe mitcet weckatc masinahikanik: Jean 7.53–8.11.
Cecoc anahwe ka wactenamowatc iriniwa ota askik
12Minawatc kiapatc Cecoc aimihepan anihi iriniwa e mitcetiritci, e itetc: “Nin ka wactenamowakik kaskina iriniwok ota askik. Anahwe ka nosanehwitc kata wactenamowakaniwiw opimatisiwinik. Nama wiskat minawatc kata pimotew nte e ici kiski tipiskarik.”
13Ki itewok Pharisien iriniwok: “Kir tipirawe kit arimomitison. Nama tca sokiteritakon kitipatcimowin.”
14Naskamawew Cecoc: “Misawatc nin tipirawe e iteian e tapweian, tapwe ni sokiteritakon kaskina ka aiteian. Ni kiskeriten meka nte wetcian, kaie nte e icaian. Aric kirawaw tekaci nama ki kiskeritenawaw nte wetcian, nama kaie nte e icaian. 15Kirawaw ki tipaskonikanawaw mia ko e ici tipaskoniketcik iriniwok ota askik. Nin, nama awik ni tipaskonaw. 16Kecpin aric e otcitciparik kitci tipaskonikeian, sokiteritakon anihe nitipaskonikewin. Nama meka ni peikocin e tipaskonikeian. Notawi meka ka ki pe iciticohwitc ni witci tacikemikw. 17Itasinatew kitaiamihe irakonikewiniwaw: Kecpin nicw iriniwok e nahitatotcik kekociciriw e ki iciwepanik, sokiteritakoniw aniheriw ka ici nahitatotcik. 18Nin tipirawe ni witen tapwe e icinakok ka iteian, kaie Notawi ka ki pe iciticohwitc ni tipatcimikw e nahitowitc.”
19 Pharisien iriniwok kokwetcimewok: “Tante anahwe Kotawi?”
Itew Cecoc: “Nama ki kiskeriminawaw, nama kaie ki kiskerimawaw Notawi. Kecpin tapwe ki kiskerimiekw, Notawi kaie wir ki ta kiskerimawaw.”
20Aitepan aniheriw Cecoc mekwata e kiskinohamakespan kitci aiamihe mikiwamik, pecotcik neta ka ici pakitinikaniwonik. Nama aric awik ki otci makonew. Nama meka moci otcitciparinikopan kitci isparinik.
“Nama ki ka ki icanawaw nte e icaian”
21Kiapatc Cecoc itew: “Aci kekatc ni ka matcan. Ki ka nantowapaminawaw, aric ki ka niponawaw kipactatowiniwak. Nama ki ka ki icanawaw nte e icaian.”
22Aci ititowakopan cota okimawok: “Wi ia nipahitiso, wetci itetc aniheriw: ‘Nama ki ka ki icanawaw nte e icaian’?”
23Kiapatc Cecoc itew: “Kirawaw ota askik ki otcinawaw. Nin aric icpimik ni otcin. Ki tiperitakosinawaw ota askik. Aric nin nama ni tiperitakosin ota. 24Ekoni wetci ki ititakok: ‘Ki ka niponawaw kipactatowiniwak.’ Tapwe meka ki ka niponawaw kipactatowiniwak kecpin aka tapwetamekwe ohwe: Nin ni tan e iteritakosian.”#8.24 Nin ni tan e iteritakosian: Ekoni meka e icinikatitisokopanen weckatc Kice Manito: “Nin ni tan.”
25“Awin tca ni kir?” itewakopan e kokwetcimatcik.
Itew Cecoc: “Kotc nictam ka aimihitakok ki ki witamatinawaw. 26Mictahi mitcen ke ki iteian kirawaw otci, ke ki ici tipaskonitakok. Aric mocak kata ki asperimototawakaniwiw kitci tapwetc anahwe ka ki pe iciticohwitc. Tepirak tca aniheriw ka ici kiskinohamawitc ni tipatcimowan iriniwok otci ota askik.”
27Nama nisitotamwakopan Otawiriw e arimotamowakaniwitcik. 28Kiapatc tca itew Cecoc: “Icpinekwe anahwe Ka ki pe iriniwihitisotc, ohwe ki ka nisitowinenawaw: tapwe nin ka icinikatakaniwitc ‘Nin ni tan.’ Kaie ki ka nisitowinenawaw aka kekwan nircike e totaman, tepirak Notawi ka ki ici kiskinohamawitc nit itan. 29Anahwe ka ki pe iciticohwitc ni witci tacikemikw. Nama ni ki otci nakatikw nircike. Mocak meka ni totamwan e ici mireritak.”
30Aniheriw otci e aitekopanen Cecoc, mitcet iriniwok ki tapwerimewok.
Iriniwok ka tiperitakositcik acitc aniki aka ka tiperitakositcik
31Cecoc ki itew anahweriw cota iriniwa aci ka tapwerimikotc: “Kecpin mocak e nosanetaiekw nititewin, tapwe niwitcewakanak kit iteritakosinawaw. 32Tapwewin tca ki ka kiskeritenawaw, kirika ki ka wikotcihikowaw anihe tapwewin.”
33Aci itewok: “Ninan Abraham nitaniskotape nimocominan, ekota neta pe otapikeciniak. Nama wiskat ni ki otci tiperitakosinan. Kekwan tca wetci iciak: ‘Ki ka wikotcihikowinawaw’?”
34Cecoc itew: “Ohwe ka witamatakok, tapwe ni icinakon: tato iriniw ka pactatitc, tiperimiko pactatowiniw. 35Mitowi awik e tiperitakositc, nama mocak kata witci tacikemew anihi ka atoskectawatc aka wiskat kitci tcirowematc. Aric iriniw e okositc, mocak kata tcirowemitowok. 36Kecpin Kice Manito Okosa wikotcihimitakwe, tapwe ki ka wikotcihikowinawaw. 37Ni kiskeriten e otaniskotape omocomiekw Abraham. Aric ki natowi totenawaw kitci nipahikoian, osam e anweritamekw nititewin. 38Nin kit arimotamatinawaw aniheriw Notawi ka ki ici wapatahitc. Kirawaw aric ki totenawaw kotawiwaw#8.38 kotawiwaw: Enko na Matci Manito ka arimomakaniwitc. ka ki ititakw.”
39Aci itewok aniki cota iriniwok: “Ninan notawinan, enko anaha Abraham.”
“Kecpin tapwe Abraham onitcanica iteritakosiekwen,” itew Cecoc, “ki ta totenawaw mitowi wir ka ki totak. 40Ki ki witamatinawaw tapwewin ka ki pe ici kiskinohamawitc Kice Manito. Peikon aric anotc mekwata ki natowi totenawaw kitci nipahikoian. Abraham wir nama wiskat ki otci natowi totam nte aniheriw towiriw kitci totak. 41Kirawaw, mia kotawiwaw, ekoni e totamekw.”
Aci itewok: “Nama arotc awacic nit iteritakosinan. Peikociw Notawinan, enko anahwe Kice Manito.”
42Itew Cecoc: “Kecpin tapwe Kice Manito weotawiekwen, ki ta sakihinawaw. Ekote meka nte wetcian, Kice Manitok. Ekoni ota wetci taian, wir otci. Namaiew nin tipirawe ka ki oreritaman kitci pe icaian. Wir Kice Manito ka ki pe iciticohwitc. 43Kekwan wetci aka nisitotamekw anihe ka ititakok? Osam nama ki kackitanawaw kitci natotamekw e wi iteian. 44Kotawiwaw, enko na Matci Manito, kirika ki wi itotiskanawaw wir kotawiwaw e ici nataweritak. Mocak manoho anahwe. Ekoni mocak e icinakositc esko ka kiceritcikaterik askiriw. Nama wiskat nosanetaw tapwewiniw. Tekaci meka nama tapweritakosiw. E kiraskitc, ekoni e itotisketc aniheriw mocak ka itotiskespan. Aspinikotc meka kiraskiw, kirika kaskina wir e tiperitak kiraskiwiniw. 45Aric nin ni witen tapwewin. Ekoni wetci aka tapwetowiekw. 46Awin neta e taciekw ke ki wapatahiwetc e ki pactatiwak? Kecpin e witaman tapwewin, kekwan wetci aka tapwetowiekw? 47Awik e tiperimikotc Kice Manitowa, natotam otitewiniw. Aric kirawaw nama ki tiperimikowaw. Ekoni wetci aka natotawekw.”
Cecoc kirika Abraham
48Minawatc aniki cota iriniwok itewok Cecoca: “Ni tapwanan, taina, e iteiak e Samarie iriniwiin, kaie e ki pitciteheckask matci manito?”
49Itew Cecoc: “Nama ni ki otci pitciteheckakw matci manito. Ni kicterimaw Notawi, aric kirawaw kit anweritenawaw kitci kicterimiekw. 50Nama ni natowi toten kitci icperimikoian nin tipirawe. Taw anahwe peikw, Notawi, e natowi totak aniheriw nin otci, kaie icikowisk ka tipaskoniketc. 51Ohwe ka witamatakok, tapwe ni icinakon: anahwe ka natotak nititewiniw nama wiskat kata poni pimatisiw.”
52Aci itewok aniki cota iriniwok: “Aci tekaci ni kiskeritenan e ki pitciteheckask matci manito. Aci Abraham ki poni pimatisiw, acitc aniki ka pe nikan tipatcimowaspan ki poni pimatisiwok kaie wirawaw. Aric kir kit itwan, ‘Anahwe ka natotak nititewiniw nama wiskat kata poni pimatisiw.’ 53Kotawinapan Abraham weckatc ki poni pimatisiw. Kit iteriten ia, kirawe kir ki kicteritakosin patok wir? Ka ki pe nikan tipatcimotcik kaie wirawaw ki poni pimatisiwok. Awin tca ni e iterimitisoin?”
54Itew Cecoc: “Kecpin nin tipirawe ki icperimitisoian, tekaci nama wiec kata irapatanopan. Anahwe ka pe icperimitc, enko anahwe Notawi. Kirawaw kit itanawaw, ‘Enko anahwe Kikice Manitomino.’ 55Nama aric ki kiskerimawaw. Nin ni kiskerimaw. Kecpin ki iteian, ‘Nama ni kiskerimaw,’ ni ta kiraski iriniwin mitowi kirawaw. Aric tapwe ni kiskerimaw kaie ni sapitamwan otitewin. 56Kotawiwapan Abraham mictahi mireritamokopan e mamitoneritakipan peikwaw e kicikarik kitci wapamitc.#8.56 kitci wapamitc: Wi itetake: …kitci wapamitc e takociniwak ota askik. Ki wapatam e otcitciparinik, kaie ki mireritam.”
57Aci itewok aniki cota iriniwok: “Nama moci ki niarano mitana tato piponesin. Kekwan wetci itein e ki wapamatc Abraham?”
58Itew Cecoc: “Ohwe ka witamatakok, tapwe ni icinakon: epwamoci Abraham ki nitawikitc, aci Nin ni tan.”#8.58 Nin ni tan: Ekoni wir tepirak Kice Manito e icinikatitisotc Nin ni tan, Omasinahikanik e arimomitisotc. Ani tca e icinikatitisotc kaie wir Cecoc, ici iterimikotake cota iriniwa, “Papirotawew Kice Manitowa.”
59Ekoni e ici mowackinatcik asiniwa aniki cota iriniwok e wi mosinihatcik Cecoca. Aric ki kaso Cecoc, e orowitc kitci aiamihe mikiwamik.
Currently Selected:
Jean 8: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
