Jean 7
7
Aka e tapwerimikotc ocima Cecoc
1Aci minawatc pa icapan Cecoc neta Galilée askik. Nama neta Judée askik wi pa icakopan, osam cota okimawok natowi totamwakopan kitci nipahatcik. 2Aci otcitciparinipan kitci aiamihe makocetcik cota iriniwok, “Huttes” e icinikaterikopanen omakocaniwaw.#7.2 “Huttes” e icinikaterikopanen omakocaniwaw: Micta kicteritamopanak aniheriw e arwepi kicikarik cota iriniwok. Peikwo manactakana irikik mawotcihitowakopan e mirwatatakik. E takwakinik ko totamwakopan, mia tca ko apitc kaie takonikopan kotakeriw e arwepi kicikarik okitikaniwaw otci, aci e ki ickwa mawotcitatcik. Wetci totamwakopanen, aka ni kitci oniketcik e ki witcihakaniwiritci otaniskotape omocomiwawa nete askik ka ici cipewatawokarik, Kice Manito e ki witcihakopanen. Irikik e mirwatatamowaspan ekoni irikik e tacikewaspan mictikokiwamik, wirawaw ko ka ocitawakopanen aniheriw otci e arwepi kicikarik. Ekota nta kaskina Jérusalem otenak e icawaspan e mirwatatakik, e makocetcik. 3Aci Cecoc ki itiko anahweriw ocima: “Matca ota. Nete ica Judée askik kitci ki wapatakik kaie wirawaw iriniwok ka nosanehwiskik e ici mata kackitain. 4Kecpin awik e nataweritak kitci kiskerimakaniwitc, nama kataw e ici kackitatc. Ani e ici mata kackitain, ki ta natowi toten kitci wapamikoin.”
5Tapwe wirata nama moci tapwerimikopan Cecoc wir tipirawe ocima. 6Aci itew: “Nama moci otcitciparin kitci matcaian, Jérusalem otenak kitci icaian, kitci ki icinakonik kotc Kice Manito ka ki itactatc nin otci. Aric kirawaw, mocak kata miroparinopan kitci icaiekw neta. 7Nama ki ka ki cikerimikowawok iriniwok ota askik ka nosanetatcik matci meskanariw, notc ka nosanetakaniwonik ota askik. Aric nin ni cikerimikok, osam e iteian aka e mirwacinik aniheriw ka aitotakik. 8Ekoci kirawaw icakw nete ka ici mirwatcitcikatek. Nin nama ni ka ican neta. Nama meka moci otcitciparin kitci icaian.”
9Ka ickwa itetc aniheriw Cecoc, ekote neta kiapatc ka taciketc Galilée askik.
E icatc Cecoc ka ici mirwatcitcikaterik
10Ka ickwa matcaritci Cecoc ocima, ka ici aiamihe makocaniwonik e icaritci, kaie wir ki icaw Cecoc, aka aric e nataweritak kitci wapamakaniwitc, kekatc kimotc e icatc. 11Mekwata e mirwatcitcikaterik, cota okimawok nantowapamewakopan Cecoca, e pa kokwetcikemotcik: “Tante wir Cecoc?” 12Micta aiarimomakaniwikopan Cecoc neta ka ici mitcetinaniwonik. Atita itewakopan: “Miro iriniwiw.” Kotakihik kiapatc itewakopan: “Nama ni! Wecimew iriniwa.” 13Nama aric nataweritamwakopan kitci petawakaniwitcik e arimomatcik Cecoca. Kaskina meka koctewakopan anahweriw cota okimawa.
14Aci awocamec apita esko ki mirwatcitcikatekipan.#7.14 Aci awocamec apita esko ki mirwatcitcikatekipan: Wi itemakanotake: aci wiec new kickwa esko ka kitciparik e mirwatcitcikatekipan. Kitci aiamihe mikiwamik ki icaw Cecoc e iti kiskinohamaketc. 15Kockopariwok cota okimawok kirika e kokwetcikemotcik: “Kekwariw wetci miro kiskeritak aniheriw anahwe iriniw, aka tca e ki otci kiskinohamasotc?”
16Minawatc itikowok Cecoca: “Anihe ka ici kiskinohamakeian, nama nte nititeritamowinik otciparin. Anahwe ka ki pe iciticohwitc, Kice Manito, ekote ni wetciparinik. 17Kecpin awik e orapatak kitci itotisketc e ici nataweritamiritci Kice Manitowa, kata kiskeritam apitc tapwe Kice Manitok otciparinikwen nikiskinohamakewiniw, kekotc ma tepirak nin nititeritamowinik e ki otciparinik. 18Iriniw ka otinak otitewin tepirak wir tipirawe otiteritamowinik wi kicterimikosiw. Aric anahwe ka otamirotatc kitci kicterimakaniwiritci anihi ka ki pe iciticohikotc, witam tapwewiniw. Nama takoniw wir e ici weciketc. 19Moïse ki ki mirikowaw irakonikewiniw,#7.19 Moïse ki ki mirikowaw irakonikewiniw: Cota aiamihe irakonikewin ka arimotcikatekwen. taina? Nama aric otci peikw nta e taciekw ki nosanetawanawaw. Kekwan tca wetci natowi totamekw kitci nipahikoian?”
20Itiko anihi mitcet iriniwa ka natotakospan: “Ki ki pitciteheckakw matci manito! Awin na ka wi nipahisk?”
21Minawatc itikowok Cecoca: “Ni ki mata kackitan. Kaskina ki kockowapamonawaw! 22Itacteriw Moïse otaiamihe irakonikewinik kaskina kitci kicawatocwakaniwitcik cota ockinikicicak.#7.22 kitci kicawatocwakaniwitcik cota ockinikicicak: Itemakaniw meka otirakonikewin Moïse kaskina kitci kicawatocwakaniwitcik cota ockinikicicak e ickwa nicwaso (8) kickokwesitcik. Namaiew aric Moïse ka ki kitciparitc e totak aniheriw, aric aniki weckatc kitaniskotape kimocominowok.#7.22 weckatc kitaniskotape kimocominowok: Pot Abraham, Isak acitc Cakop arimomakaniwitakenak. Ekoni tca e ici mireritamekw kitci kicawatocwakaniwitc ockinikicic misawatc peikon e arwepi kicikarik. 23Kecpin kirawaw kicawatocwekwe ockinikicic e arwepi kicikak, aka kitci ki patahamekw Moïse otaiamihe irakonikewin, kekwan wetci kiciwasiekw nin e ki kikehak iriniw kaskina e itikititc e mekwa arwepi kicikak? 24Ponitakw e tipaskonikeiekw, tepirak e kanawapatamekw oskitc e icinakok. Icikowisk tipaskonikekw.”#7.24 Icikowisk tipaskonikekw: Wi itemakanotake: Akawir tipaskonekw awik, aka wirata e kiskeritamekw mia ka ki iciwepanik. Natowi totamokw kitci kiskeritamekw tapwe e icinakonik, kitci ki wewerita tipaskonikeiekw.
Cecoc ia ni anihi ka ki itespan Kice Manito kitci pe iciticohwatc ota askik kitci akwacimiweritci?
25Atita iriniwok nta ka taciketcik Jérusalem otenak aitewakopan: “Namaiew ia ni anahwe iriniw ka wi nipahakaniwitc? 26Kanawapamakw! Aiarimwew, e mitcetiritci iriniwa e petakotc. Nama aric wiec itakaniwiw. Tapwerimiko ia aci anihi kokimaminowa, tapwe wir anihi ka ki itespan Kice Manito kitci pe iciticohwatc ota askik kitci akwacimiweritci? 27Takocike anihi ka ki itespan Kice Manito kitci pe iciticohwatc ota askik kitci akwacimiweritci, nama awik kata kiskerimew nte wetciritci. Anahwe tca iriniw ki kiskerimano ite wetcitc.”
28Kiskinohamakepan Cecoc neta kitci aiamihe mikiwamik. Ki itew e kiciwetc: “Ki kiskeriminawaw ia? Ki kiskeritenawaw ia ite wetcian? Wetci tacikeian ota, aka nircike e ki otci iteritaman kitci pe icaian. Anahwe tca ka ki pe iciticohwitc mocak kata ki asperimototawakaniwiw. Nama ki kiskerimawaw. 29Nin aric ni kiskerimaw, osam meka ni witci tacikematai epwamoci pe icaian ota, kirika wir ka ki pe iciticohwitc.”
30Minawatc natowi totamopanak kitci makonakaniwiritci. Nama aric moci awik ki makonepan. Nama meka moci acteripan kitci icinakonik kotc Kice Manito ka ki itactatc. 31Peikon mitcet nta e tacitcik asperimototawekopan. Itewakopan: “Takocike anahwe ka ki iteritci Kice Manitowa kitci pe iciticohikotc kitci akwacimiwetc, awocamec ia kirawe kata mata kackitaw patok anahwe iriniw?”
Iriniwok e iciticohwakaniwitcik kitci nta makonatcik Cecoca
32 Pharisien iriniwok ki petakewok ani kimotc e ici aiarimomakaniwiritci Cecoca, neta e ici mitcetinaniwonik. Aci tca aniki cota makatewokorewok ka tiperitakik kirika Pharisien iriniwok ki iciticohwewok iriniwa ka nanakatcitaritci kitci aiamihe mikiwamiriw, kitci nta makonaritci Cecoca. 33Aci itew Cecoc: “Memacic kiapatc ki ka witci tacikemitinawaw, minawatc ni ka natawapamaw anahwe ka ki pe iciticohwitc. 34Ki ka nantowapaminawaw, nama aric ki ka miskawinawaw. Nama meka ki ka ki icanawaw nete ke ici tacikeian.”
35Aci kokwetcimitowok cota iriniwok: “Tante tca ni ke icatc anahwe iriniw aka kitci ki miskawokw? Nete ia warawik kotak askik kata icaw, neta ka ici tacikeritci cota iriniwa ka ki orackaritci, nte itekera ka ici otaskiritci iriniwa aka ka cota iriniwiritci?#7.35 iriniwa aka ka cota iriniwiritci: Mia itemakan: Grec iriniwa. Kata nta kiskinohamawew ia? 36Tan ni wa itemakanik aniheriw ka ki itetc: ‘Ki ka nantowapaminawaw, nama aric ki ka miskawinawaw. Nama meka ki ka ki pe icanawaw nete ke tacikeian’?”
Nipi ka pimatisihiwemakak
37Ekoni aniheriw mamitcitc kecikarik iriniwok ka mirwatatamwakopanen e aiamihe makocetcik neta Jérusalem otenak. Mawotci kicteritakonokopan anihe e kicikak. Keskatc Cecoc pasiko e tepwetc, e itetc: “Kecpin awik pakatamokwen, kitci pe natawapamitc kirika kitci minikwetc.#7.37 Kecpin awik pakatamokwen, kitci pe natawapamitc kirika kitci minikwetc: Wi itetake: …ni ka miraw ke minikwetc. 38‘Anahwe ka tapwerimitc, ke isparitc, mia mitowi nipiriw e pe sakacikowinik e pimatisihiwemakanik, otehik e otacikowinik,’ kotc e itasinaterik Kice Manito Omasinahikanik.”
39Miro Manitowa arimomekopan Cecoc, ke pe otitikorispana iriniwa ka tapwerimikotc. Aric aniheriw apitc nama ni moci ki otci pakitinakaniwikopan Miro Manito. Nama meka moci ki otci icperimakaniwikopan Cecoc.
E papikaninitotcik iriniwok Cecoca otci
40Ka ickwa petakik aniheriw atita nta ka taciketcik ka ici mitcetinaniwonik, itewakopan: “Anahwe iriniw, tapwe ni anaha Ka Nikan Tipatcimotc.”
41Kotakihik itewakopan: “Enko anihi ka ki itespan Kice Manito kitci pe iciticohwatc ota askik kitci akwacimiweritci!”
Aric kotakihik ki itewok: “Galilée askik ia kata ki otciw anahwe ke pe iciticohwakaniwitc kitci akwacimiwetc? 42Itemakan meka Kice Manito Omasinahikanik: ‘Anihi ka ki itespan Kice Manito kitci pe iciticohwatc ota askik kitci akwacimiweritci, Tapita kata otaniskotape omocomiw. Bethléem kata otciw, anihe otenacic Tapita ka ki otciritci.’”
43Aci papikaninitowakopan iriniwok. Atita aci tapwerimewakopan Cecoca. Atita kaie nama tapwerimewakopan. 44Atita nta e tacitcik nataweritamwakopan kitci makonakaniwiritci, nama aric awik ki otci makonew.
Cota aiamihe okimawok aka e tapweritakik
45Ki kiwewok aniki iriniwok ka nanakatcitatcik kitci aiamihe mikiwamiriw e natawapamatcik anahweriw cota makatewokorewa ka tiperitamiritci kirika Pharisien iriniwa. Kokwetcimikowok: “Kekwan wetci aka pecowekw Cecoc?”
46Aci itewok aniki ka nanakatcitatcik kitci aiamihe mikiwamiriw: “Nama wiskat ni ki otci petawanan iriniw ani kitci ici arimwetc, mitowi wir.”
47Itewok aniki Pharisien iriniwok: “Kaie kirawaw ia ki wecimikowaw? 48Taw ia peikw ota e tacitcik cota okimawok kekotc ma peikw Pharisien iriniw ka ki tapwerimatc Cecoca? 49Aric aniki kaskina iriniwok anotc ka natotawatcik nama kiskeritamok Moïse otaiamihe irakonikewiniw. Kata anwerimakaniwiwok.”
50Peikw Pharisien iriniw, Nicodème e icinikasotc, tacikekopan neta kaie wir. Nama orina weckatc ki natawapamekopan Cecoca. Aci itew anahwe Nicodème: 51“Itemakan kitirakonikewininak aka kitci ki atamerimakaniwitc awik, patoc e petawakaniwitc, acitc e nta kiskerimakaniwitc ka ki itotisketc.”
52Aci itakaniwiw Nicodème: “Kaie kir ia Galilée askik ki otcin? Wewerita tapwata Kice Manito Omasinahikan. Ki ka tca wapaten aka otci peikw ka nikan tipatcimotc Galilée askik e ki otcitc.”
Iskwew ka keskopitakaniwitc mekwata e pacikwatisitc
[ 53Ekoni minawatc papeikw ka ici kiwetcik omikiwamiwak.
Currently Selected:
Jean 7: ATMK
Highlight
Share
Copy
Want to have your highlights saved across all your devices? Sign up or sign in
Canadian Bible Society, 2014
