METIYU 9

Lviya Laqyabo Nyi Ak Jisu Mwpnam

(Mk 2:1-12; Lk 5:17-26)

1Kokw so Jisu swp urab cao kunv swnyiq kvtin gonwb robkur kunv mwwg atwg nampam hookur kunum. 2Ho kaanamv nyi tulungv kartaqnan golo lviya laqyabo nyi ak mwwg dookub joa jinum, Kokw so Jisu bulug mwwjwnam mam kaatwl, lviya laqyabo nyi akam benum, “Ngoqg ko no bos maabv! Noqg nyic mwlwngam apaq jipa kun.”

3Ho Pvvb tomswrbo nyi tulungv atv bemin sunyianv benum, “Soq nyi ak si Pwnboam bepaq taiyaq bo go!”

4Bulv hognvkam mwwdul doonum ham Jisu kaapa tvl benum, “Nulv hoggab hoqhvk almanbo bvrwqkam hang uraho mwwdwn? 5Noqg nyicam apaq jipa kun hvl benamv bengam yaadwn, hvbmab gorab wto hvnamv bengam yaadwn? 6Ngo nulam bekin dvn, Nyia Ko Tuupv gvda gvt so nyicam apaq jidwb atorv doodwn. “Hoqgab mwv lviya laqyabo nyi akam benum, “Gorab tuku, ho noqg kartaqngam naarab bvl nammwb wnku.”

7Nyi akv gorab kunv mwwg nammwb wknum. 8Soq sam nyi tulungv kaatwl bos sonum, ho nyi tulungam soq svk atoram jigam gab Pwnboam paqnyanum.

Jisu Metiyunvn Goqnam

(Mk 2:13-17; Lk 5:27-32)

9Jisu hoq nyookam apaqpel wdul doonum, Ho mwv gvda nyoogangam konbo Metiyu hvl eminam nyi ak mwwg gvda nyooga kokumko namho doonam mam kaapanum. Jisu mwam benum, “Ngoqg kokwb wmin gvto.” Metiyu gorab banv mwwg kokwb wmin gvnum,

10Kokw so Jisu Metiyug nam uraho dvnam dudul doodwkho gvda nyooga kokar bov hoo nwd xipa maanam asaq nyi tulungv vigo Jisug la mwwg buu tulug lvgab dool dvnam dvbanum. 11Soq sam Parisi tulungv kaapa tvl mwwg buu tulungam toxnum, “Hoggab nulam tomswrbo akv gvdag nyooga konbo hoo nwd topa maanam nyi tulug lvgab dvba dvn?”

12Jisu bulug benam mam tapa tvl birwqnum, “Vc maanbo gab nyub goqdwb nyimadvn, hvbmabde vcbo nyi tulu gab sulak nyubv doodwn. 13Dvrwqbo Potangv hog hvl bedwn hoqg niqtuqngam wgdvl meelin ta. ‘Ngo ayanam mam sulak meegaqdvn, sibin sviya pwr jinam mam ngo meegaq ma. ‘Ngo xinam nyiidarbo nyi tulungam goqtab haama, hvbmabde nwd xipa maanam nyi tulungam goqtab haaiyin.”

Dvmab Vrnam

(Mk 2:18-22; Lk 5:33-39)

14Jon Baptist buu tulungv Jisug dookub haabnv toxnum, “Hoggab ngulv la Parisi tulungv dvmab vrr dvn, hvbmabde noqg buu tulungv vcwr gokam vrr maado?”

15Jisu bulam birwqnum, “Nyem naanbo nyegag lvgab mwwg ajin tulungv doody deedib nyem naanbov nyiin dvparam muurul doomnamv aldvn? Hvbmabde bulug pengko hoqgam nyega akam bool wleqdvk aalv haatayin, hoq kokwngam dvmab vrr tayin.

16“Hiyvkam kucuqbo kamt paceqbo aoho nitbo vjam hamtaq dvn, hoggab nitbo vj hamtaqnamv xwwkum baloqkam kamt hoqg ungngv otuqgam ut yaatayin. 17Hvbmab hiyvkam nitbo roo alangam kucuqbo vpin yooxaqlo toolwq maadwn, hvb mvbaloqkam vpin yooxaqngv buqctayin ho alangv toopaq tayin ho yooxaqngvkam dubtayin. Hvbmab nit vpin yooxaqlo nitbo roo alangam toolwq dvb nyidwn, homolo vnyi-vnyiv alwb dootayin.”

Saab Nyem Koam Turdkub Mvnum hoo Jisug Vjam Gvbwbo Dvn

(Mk 5:21-43; Lk 8:40-56)

18Jisu soq sam bidu dvkho Juhudi saab ak mwwg dookub haabnv lvpia kumbwl xuml benum, “Ngoqg nyem kov sijada sipa ku, hvbmabde no wl mwnwg aoho alaq idaq baloqkam mwn turab taikun.”

19Hoqgab Jisu gorab kunv mwwg buu tulungv la mwv hoq nyi kokw kokwb wnum.

20Kokw so vnyw nywyw leq nywnyi go vrr ui sarl doodubo dvn ak Jisu kokwb rumin gvbnv mwwg vj laqyap niqtuqkam gvbwnum. 21Nyem dvn akv mwn atam atv besnum, “Ngo mwwg vjam igab twqb nyiloqkam ngoqg vcv al taikun.”

22Jisu nywwkur kaanv nyem dvn akam kaapa tvl mwam benum, “Ngoqg nyem ko, haakam to, bos maabv! Noqg mwwjwngv nam al dukub mvpa ku.” Hoq bed mood jaq hoqgv hoq nyem dvn akv al kunum.

23Kokw so Jisu hoq saab nammwb haanum. Nyi tulungv svma liid kub dumdum-taal dwwl, piul tabl ho xabl-riil doonam mam kaapa tvl 24mwv benum, “Mwlwngv wleqto! Nyem ko ak si sima sulak-mwn yubl doodo!” Ham tatwl nyi tulungv mwam nyirj-nyiryanum. 25Kokw so nyi tulungam cwrw hoqgam roolin tvl Jisu hoq nyem ko dook cwrw urab haanv nyem ko alaqngam gvbw kalam nyem ko akv turab kunum. 26Soq pagoq soq puiyv hoq gvda tvqpwho naleqb yuuknum.

Nyiqca bo Nyi Vnyi go Jisu Mwpnam

27Hoq ditaq hoqgv Jisu wdul doodwkho nyiqca bo nyi vnyi go mwwg kokw-kokwb wmin gvbnv benum, “Debidg Ko Tuup! Ngulam aya mwwpa tvb!” hvl sogoql benum.

28Kokw so Jisu nam urab haanum, ho hoq nyiqca bo nyi vnyiv mwwg dook urab haanum, hoo mwv bulam toxnum, “Ngo nulam mwp tai nvbo hvl nulv mwwjwdvn i?”

Bulv birwqnum, “Vv, tomswrbo!”

29Kokw so Jisu bulug vnyiqngam alaqngv idaql benum, “Soq sam nulv mwwjwnam hvb nyimto!” 30Kokw so bulug vnyiqkv kaapa kunum. Jisu bulam vc-jaqb yvtw pal benum, “Soq sam nulv hiyv nvkam bekin maab!”

31Hvbmabde lengda layil Jisug puiyam gvda mwlwho bepor tukul puiyv durabnum.

Paca boam Aldvb Mvnam

32Hoq nyi tulungv agab lengda kalam nyi acamgo sony cenam nyi ak Jisug dookub joanum, mwv goolaq kumanum, hoggab mwwg uraho oramv doonum. 33Hvbmabde kokw so sony uiyam ruqpaq kalam nyi akv agam goorab kunum, ham kaatwl nyi tulungv deedy jaq gokbo mwwnyianum, ho Israel nyi tulug pengko lokam soq sib nyinam go kaaka tukma hvl benyanum.

34Hvbmabde Parisi tulungv benum, “Mwam sony tulug lvpw atv ruqpaq mvdwb jipan.”

Jisu Nyi Tulungam Aya Mwwpanam

35Jisu pamda dvvxib la nampam pvmxib gaqkarnum. Mwv Sinagog uraho tomswrnum, ho deedy luuxib vcbo nyi tulungam mwpnum. 36Mwv nyi acammam kaatwl mwwg hangv biinv bul gab aya mwwpanum, hoggab rvkybo doomabo sviya pvtw hvb anya twqb nyinum. 37Hoqgab mwv mwwg buu tulungam benum, “Vly naasv vi supa, hvbmabde noosu baqadvb bon nyinbov anyo pa. 38Hoqgab vly atam mwwg dvnam noocum bo nyi lo vigo kanam mvdwb mwam xumto.”

Currently Selected:

METIYU 9: NYISBSI

Highlight

Copy