METIYU 10

Buu Wyw leq Vnyi

(Mk 3:13-19; Lk 6:12-16)

1Jisu mwwg buu wyw leq vnyiam goqkum banv bulam almanbo yalam ruqxa mvdwb ho dooily vcboam la vc-ai luuxiam mwp mvdwb atoram jilwqtvl kanamnum. 2Soq si hoq xuqlinum nyi tulug eminv; otuqjaqb, Simon (Pitor rvk hvl benam) la mwwg bor Andriyo; ho Jems la mwwg bor Jon, Jebedig kov; 3Pilip la Bartolomiyu, Tomas, Gvda nyooga kokarbo Metiyu; Alpiyus gv ko Jems la Taddayus; 4At gvdangam rvkybo Simon ho Jisun nyepinbo Iskeriot Judas.

Buu Wyw leq Vnyig Bon Nyinam

(Mk 6:7-13; Lk 9:1-6)

5Soq nyi wyw leq vnyi sam Jisu soq agam tulu sam tomswrl bulam kanam nvmlwqnum, “Nulv Nyoodo nyi gvdag pengkob wmab hoo Samaritanwg pamda urab haamab. 6Hvbmab nulv sviya niikbo Israel nyi tulug dookub wgdvl 7bulug agaho ‘Ao gvdag Lvpwngv hvvnwq paku hvl bekinta.’ 8Vcboam mwpta, sik boam turdkub purabta, bwswq nyil sita bo nyi tulungam mwpta, ui-oram mam ruqxa ta. Nulv kor jimab kaapa panv, hoqgab nulv hog kor naamab jito. 9Nulv hun rupam ho nulug cuk uraho hog twngk lwwcw taqgkam baql wmabv; 10ho lamta gab cuk naara, lvlwq koolynan, luxuq gwlynan ho beqnyia bwwlynan gokam bvvl wgmab. Hoggab bon nyinbo akam mwwg bon nyijongam jidwb nyijdvn.

11“Ho nulv pamda ho nampam golo wc yukam, hoq urab haagdvl hiyv akgon nulam svgagvrwq dvb mwwdwn hoq hvk nyi loq meegaqto hoo hoqhvk nyi lvgab nulv wknam gob mwwg dookho dooba to. 12Ho nulv nam golo haaikam nulv, ‘Swrsomalongv nulug lvgab doonka,’ hvl salam jil beto. 13Hvb loqkam nulug salam jil benam swrsomalongam hvraqb hoq namho doomto; hvbmabde nulam svgagvrwq mabnyiloqkam nulug salam mam nookur tuku. 14Hoo hiyvg nammv ho nampamv nulam svgagvrwq maatayin, ho nulug benam mam tama dvn hoqham nulug lvpia hoq diimwram dudin dupaq peel hoq nyook hoqgv wleqto. 15Ngo nulam jvqtw jaqb bedwn, pw-hwwd aalam hoq nampam hoq nyi tulungam aya ram hvbmabde Pwnbov Sodom la Gomorra hoqg nyi tulungam ya aya yaabin tayin.

Haady bo Hentwr

(Mk 13:9-13; Lk 21:12-17)

16“Hengab to! Ngo nulam svca cvvtwg pengko ho sviyangam roolwqnam hvb kanam gviyin. Nulv tvb hvbkalam hvvminl hingkub to hoo yobur hvbkalam nyinyiaqto. 17Hengab to, nyi tulungv nulam nootu tayin ho nyi tulug nyel dookum agaho boatayin. Hoq kokwb nulam Sinagog uraho xipwql xigur mvtayin. 18Hoqgv nulam gora abwg la lvpw at dook agaho ngoqg emin gab pw-hwwm dvb boatayin, ho bulam la Nyoodo nyi tulug agaho ngoqg Tugu Puiyam bemdvb jitayin. 19Bulv nulam pw-hwwk nyel dookum ho boa baloqkam ham mwwdwq maab, hvbmabde moodv haaikam nulv hog hvl betayin ham nulam jitayin. 20Hoggab nulug agam bedynamv nulug atwg galoqkv bedwb nyiram; hvbmabde hoq tulu agam hv nulug Abwg yal galoqkv nulam agam bemdvb jitayin.

21“Nyi tulungv bulug atwg vbw-boram mengm dvb jitayin, hoo ab tulungv atwg ko tulungam hvbkalam nyitayin, hoo ko tulu ngvkam bulug ab annam ceebio baql ab annam mengtayin. 22Ho nyi vxiv nulam ngoqg pagoq gab oyum yumtayin; hvbmabde hiyv nyiidil sinam gob cwql dootayin, mwam ywwtayin. 23Nyi tulungv nulam pamda ak golo mvnyi-mviya baloqkam pamda asaq gonwb keleqto. Ngo nulam bitwjaqb bedwn, Nyia Ko Tuupv haama daab nulv Israel pamda mwlwho nulug bon nyidynam mam nyinya nyoram.

24“Biswrnam akv mwam biswrbo akam koi yaama dvn. Nyerangv mwwg atam koi yaama dvn. 25Hoqgab biswrnam akv mwam biswrbo ak hvb nyidwb mwv pwbwb cengdwb nyidwn ho nyera akv atam mwwg at hvbkalam nyiky dvn. Hoggab nam namlo atam Beljebul hvl goqb nyiloqkam imiqho doonbo imiq nyi tulungam hog hwdgo ham hilayab almab emin mingtayin!

Hiyvn Bosdvb Nyidwn

(Lk 12:2-7)

26“Nyi tulungam bos maabv. Sija hognvkam kulub ap pan ham kubkoqtayin ho cengma dvb kvsil apnam ham kam mwlwngv cimpw dvb nyitayin. 27Ngo hognvkam kan uraho bidu gvdwn ham nulv aalwg huto ho bedar dvb nyidwn hoo hognvkam vpwb bisil benam mam tapanam mam ham pamto ao hoqgv nulv sogoql bekin dvb nyidwn. 28Yalam mengnyi maanbo, gv vpam mengn boam bos maabv; hvbmabde gv vpam la yalam ui nyooklo twrdy bo Pwnboam bosto. 29Tayin taqkinv pwdw dornyi go nulv rvma dvn yv? Hvbsujaqkam nulug Abv gaml jimalo pwdw dorg kam ked aolo hop maadwn. 30Nul gab nyiloqkam nulug dumpo dum mwlwngam xil ap pakun. 31Hoggab nulv akukam bos maabv, hoggab pwdwngam nulv vigo xibin yaanam hvvtwngv!

Xaqlin tvl hoo Kriston Haqpaqnamv

(Lk 12:8-9)

32“Hiyv nyiv ngam nyi tulug agalo mwv ngoqg gvk hvl pulum jumdwn, ngo kam mwam ao gvda tolo doonbo Abwg agatol ngoqgv hvl pulum jumtayin. 33Hvbmabde hiyv nyi akgon ngam nyi tulug agalo haqtayin ngo kam mwam ngoqg Abwg agatol ao gvdalo haqpaq tayin.

Swrsomalongam Ma, hvbmabde Guunyi Ceebiongv

(Lk 12:51-53; 14:26-27)

34“Nulv ngam gvda gvtam swrsomalongam baql jitab haadwn mwwmab. Hvbma; ngo swrsomalongam jitab haama; hvbmabde lyoqr orioqkam jitab haaiyin. 35Ngo ko tulungam bulug abam ceebio hang baqm dvb ho ko nyem tulungam annam ceebio hang baqm dvb, ho nyeexw tulungam bulug aiyam ceebio hang baqm dvb; 36Hoggab atwg imiq nyi mwlwngam almanbo ceebio nyiib nyitayin.

37“Hiyv nyiv mwwg atwg ab-annam ngam koi yaab aby bobin dvn mwv ngoqg buub swwnyiram ho hiyv mwwg atwg ko tuupam ho ko nyem tulungam ngam koi yaab aby bobin dvn mwv ngoqg buub swwnyiram. 38Hiyv lajaqkam mwwg atwg daapongam jootwl ngoqg lvpia dwqkwb dwqmin gvl kokwb wma baloqkam ngoqg buub mwv kam swwnyiram. 39Hiyv lajaqkam mwwg atwg swwgam rvky bov mwv ham niim tayin; hvbmabde hiyv ngoqgab mwwg swwgam niim tayin, mwv ham kaapa tayin.

Amin

(Mk 9:41)

40“Hiyv nyiv nulam svgagvrwq dvn mwv ngam svgagvrwq dvn ho hiyv nyiv ngam svgagvrwq dvn mwv ngam kanambo akam svgagvrwq dvn. 41Hiyv nyiv Pwnbog pui baqnboam svgagvrwq dvn hoggab mwv Pwnbog pui baqn bob nyigam gab, mwv pui baqnbo tulug lvgab aminam naaba tayin. Hoo hiyv nyiv albo akgon svgagvrwq dvn hoggab mwv albo nyiib nyigam gab hoo mwv albo nyi tulug lvgab aminam naaba tayin. 42Ngo nulam jvqtw jaqb bedwn, hiyv nyiv ngoqg soq anyobo buu akgon mwam ngoqg buungv hvl cengtwl iss swiywq twws ujuqg jidwn mwv jvqtw jaqb mwwg aminam kaapa tayin.”

Currently Selected:

METIYU 10: NYISBSI

Highlight

Copy